07 September 2021

Президенти Ҷумҳурии Тоҷикистон Эмомалӣ Раҳмон дар паради ҳарбӣ ба муносибати 30-юмин солгарди Истиқлолияти давлатии Ҷумҳурии Тоҷикистон иштирок намуданд

7 сентябр ба муносибати таҷлили 30-юмин солгарди Истиқлолияти давлатии Ҷумҳурии Тоҷикистон бо иштироки Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон, Сарфармондеҳи Олии Қувваҳои Мусаллаҳ, генерали артиш муҳтарам Эмомалӣ Раҳмон дар майдони Дӯстии шаҳри Душанбе паради ҳарбӣ баргузор гардид.

Таҷлили ҷашни муқаддас бо расми гузашти 30 ҳазор нафар хизматчии ҳарбии Қувваҳои Мусаллаҳ, ҳайати шахсии мақомоти ҳифзи ҳуқуқ ва афсарону сарбозони захираҳои сафарбарӣ, яъне муҳофизони истиқлоли Ватан, марзу буми давлати соҳибихтиёр ва ҳомиёни қонунияту тартибот дар фазои тантанавӣ оғоз гардид.

Читать далее

Дар Суғд бахшида ба 30-солагии Истиқлоли давлатии Ҷумҳурии Тоҷикистон паради ҳарбӣ доир шуд

7 сентябри соли 2021 дар хиёбони ба номи Раҳмон Набиеви маркази вилояти Суғд бахшида ба 30-солагии Истиқлоли давлатии Ҷумҳурии Тоҷикистон паради ҳарбӣ доир гардид.

Баъди гузориши сардори горнизони Суғд оид ба омодагии ҷузъу томҳо муовини якуми Сарвазири мамлакат Давлаталӣ Саид ва Раиси вилояти Суғд Раҷаббой Аҳмадзода дар назди иштирокчиён суханронӣ намуданд.

Читать далее

МАЗМУН ВА МОҲИЯТИ ТАЪЛИМ ДАР ЗАМОНИ МУОСИР

Дар ин айёми пур аз шодиву сурур мардуми кишвар, аз ҷумла маорифчиён бо як ҷаҳон саодату ифтихор сисолагии истиқлолро ҷашн мегиранд. Сӣ сол дар муқоиса бо таърихи тӯлонии халқи куҳанбунёдамон чандон фосилаи зиёд нест, вале роҳи дар ин марҳалаи кӯтоҳи таърихӣ паймуда бо даҳсолаҳои зиёд баробар мебошад.

Маориф чун соҳаи калидӣ пайваста дар мадди назари давлат ва Ҳукумати Ҷумҳурии Тоҷикистон қарор дошта, бо дастуру ҳидоятҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷиҳати фароҳамоварии шароити зарурӣ, баланд бардоштани сатҳу сифати таълим дар ҳамаи зинаҳои таҳсилот дар саросари кишвар тадбирҳо амалӣ гардиданд. Бо дастуру ҳидоятҳои Пешвои муаззами миллат дар замони соҳибистиқлолии кишвар на танҳо мазмуни таҳсилот ба куллӣ тағйир ёфт, балки муассисаҳои таълимӣ ба худ шакл ва мазмуни нав пайдо карда, давра ба давра ба талаботи имрӯза мутобиқ гардонида шуданд. Ҷойгоҳи мактабу маориф ва мақоми омӯзгор тадриҷан боло рафтанд.

Дар соли ҷашни бузурги миллат аз буҷа ба соҳаи маорифи вилоят 1 миллиарду 116 миллиону 934 ҳазор сомонӣ маблағ ҷудо гардид, ки ин назар ба соли гузашта 11,6 фоиз зиёд мебошад. Барои бо дастовардҳои арзанда истиқбол гирифтани санаи бузурги таърихӣ дар доираи 1300 рӯзи бунёдкорию созандагӣ мардуми сарбаланди кишвар, аз ҷумла маорифчиёни вилоят сидқидилона саъю талош варзиданд. Дар давоми солҳои соҳибистиқлолӣ шумораи мактабҳои таҳсилоти умумии вилоят аз 702 то ба 938 адад, теъдоди хонандагони мактабҳо аз 409,6 то ба 565 ҳазору 231 нафар ва омӯзгорони мактабҳо аз 30,7 ҳазор то 40 ҳазору 85 нафар расид. Фарогирии кӯдакон дар миқёси вилоят дар муассисаҳои таҳсилоти томактабӣ 15 фоиз, дар Маркази инкишофи кӯдак 20,4 фоизи теъдоди умумии кӯдаконро ташкил медиҳад.

Имрӯз дар шаҳру ноҳияҳои вилоят ҷиҳати ба 30 фоиз расонидани фарогирии кӯдакон ба муассисаҳои томактабӣ тадбирҳои муассир рӯи кор меоянд. Соли таҳсили гузашта хонандагони вилоят дар даври ҷумҳуриявии олимпиадаҳои фаннӣ сарбаландона иштирок намуда, сазовори 476 ҷойи ифтихорӣ, аз ҷумла 53 ҷойи якум, 144 ҷойи дуюм ва 279 ҷойи сеюм гардиданд, ки ин нишондиҳандаи дуюм дар миқёси ҷумҳурӣ мебошад. 74 нафар хонандаи лаёқатманди муассисаҳои таълимии вилоят ғолиби олимпиадаҳои байналмилалии фаннии давлатҳои Туркия ва Ҷумҳурии Қазоқистон, 3 нафар ғолиби олимпиадаи байналмилалии лоиҳавии Олмон ва 773 нафар ғолибони олимпиадаҳои байналмилалии фосилавии давлатҳои Федератсияи Россия, Амрико, Таиланд, Хитой ва Эрон гардиданд.

Аз рӯи натиҷаҳои ҷамъбасти соли таҳсили 2020‐2021 28 нафар, аз ҷумла 25 нафар хонандаи муассисаҳои таълимии вилоят бо медали тилло ва 3 нафар бо медали нуқра сарфароз гардиданд, ки ин нишондиҳанда нисбат ба соли таҳсили гузашта 13 нафар зиёд мебошад. Дар натиҷаи ҷамъбасти 42‐юмин Сессияи Академияи хурди илмҳо 31 нафар хонандаи фаъоли муассисаҳои таълимии вилояти Суғд ба узви пайвастаи (узви ҳақиқӣ – Шоҳҷоизаи озмун) Академияи хурди илмҳо соҳиб шуда, 68 нафар узви вобаста гардиданд. Ҳамчунин, 103 нафар дар бахшҳои мухталиф соҳиби мақоми аввал, 56 нафар соҳиби мақоми дуюм, 61 нафар соҳиби мақоми 3‐юм гардида, 31 нафар бо Ифтихорномаи Академияи миллии илмҳо қадр карда шуданд. Бо ба даст овардани ин нишондиҳанда дастаи вилояти Суғд мақоми аввалро дар ҷумҳурӣ соҳиб гардид. Намояндагони вилоят дар озмуни “Фурӯғи субҳи доноӣ китоб аст” сарбаландона иштирок намуда, Шоҳҷоизаи озмун насиби Раъно Насриддинова хонандаи синфи 11‐и муассисаи таҳсилоти миёнаи умумии №28‐и шаҳри Панҷакент гардид.

Алҳол давраҳои якум ва дуюми озмунҳои “Фурӯғи субҳи доноӣ китоб аст” ва “Илм‐фурӯғи маърифат” ҷамъбаст гардида, маълум шуд, ки теъдоди иштирокчиён нисбат ба соли гузашта зиёд аст. Бо мақсади ҳавасмандгардонии хонандагони муассисаҳои таълимии вилоят ва омӯзгорони онҳо, ки дар олимпиадаҳои байналмилалӣ, ҷумҳуриявӣ иштирок намуда, ғолибият ба даст оварданд, аз ҳисоби буҷети вилоят 191 ҳазор сомонӣ ҷудо гардид. Маҳз, ғамхориҳои давлату Ҳукумат нисбати мактабу маориф боис гардид, ки соли 2020 дар ду озмуни бонуфузи касбии ҷумҳурияӣ Таҳмина Ҳоҷибоева, мураббияи муассисаи таҳсилоти томактабии №8‐и ноҳияи Бобоҷон Ғафуров ғолиби озмуни “Мураббии соли Тоҷикистон‐2020” ва Дилором Ҷалолова омӯзгори фанни биологияи муассисаи таълимии давлатии Мактаб барои хонандагони болаёқати ҳамин ноҳия дар озмуни “Муаллими соли Тоҷикистон 2020” ба дарёфти ҷои дуюм сазовор гардиданд.

Вилоят Болтуева роҳбари маҳфили дастони моҳири Маркази таҳсилоти иловагии ноҳияи Спитамен дар миқёси ҷумҳурӣ ғолиби озмуни “Беҳтарин роҳбари маҳфили соли 2021” гардид. Ин ҳама дастовардҳо маорифчиёни вилоятро вазифадор менамоянд, ки аз имкониятҳои мавҷуда беш аз пеш самаранок истифода намуда, дар соли таҳсили нави 2021 – 2022 бо ҷаҳду талоши зиёд муваффақиятҳояшонро бештар намоянд.

Осим КАРИМЗОДА,

сардори Раёсати маорифи вилояти Суғд

Читать далее

ЧОРААНДЕШӢ - БАҲРИ ИҶРОИ ТАЛАБОТ

 

 

 

Дар прокуратураи вилояти Суғд ҷаласаи Шӯрои ҳамоҳангсозии фаъолияти мақомоти ҳифзи ҳуқуқи вилоят таҳти роҳбарии раиси Шӯро-прокурори вилояти Суғд, мушовири адлияи дараҷаи 1 Хоҷазода Фурқат Файзалӣ баргузор гардид. Дар ҷаласаи Шӯро ҳолати иҷрои қонунгузорӣ дар бораи мубориза бар зидди экстремизми динӣ, терроризм, шомилшавии ҷавонон ба ҳизбу ҳаракатҳои ифротӣ, ба таълими ғайриқонунии динӣ ҷалб кардани ноболиғон ва ҷавонон дар фаъолияти мақомоти марбута дар соли 2020 ва 6 моҳи соли 2021 мавриди баррасӣ қарор дода шуд.

Дар ҷаласа муовинони раисони шаҳру ноҳияҳои вилоят, сардорони Раёсату шуъбаҳои дахлдори Мақомоти иҷроияи ҳокимияти давлатии вилоят, сардорон ва шахсони масъули мақомоти амният ва корҳои дохилӣ ширкат доштанд. Ҷаласаро прокурори вилояти Суғд, мушовири адлияи дараҷаи 1 Хоҷазода Фурқат Файзалӣ оғоз намуда қайд кард, ки ҳолати иҷрои қонунгузорӣ дар самти мубориза бар зидди экстремизми динӣ, терроризм, шомилшавии ҷавонон ба ҳизбу ҳаракатҳои ифротӣ, ба таълими ғайриқонунии динӣ ҷалб кардани ноболиғон ва ҷавонон зери назорати доимии мақомоти ҳифзи ҳуқуқи вилоят қарор дорад. Стратегияи миллии Ҷумҳурии Тоҷикистон оид ба муқовимат ба экстремизм ва терроризм барои солҳои 2016‐2020 ҳамчун санади хусусияти барномавидошта мақсад, вазифаҳо ва самтҳои асосии сиёсати давлатии Ҷумҳурии Тоҷикистонро дар соҳаи муқовимат ба экстремизм ва терроризм муайян менамояд. Вобаста ба ин масъала ахбороти сардори шуъбаи муқовимат ба терроризм, экстремизм ва назорати иҷрои қонунҳо дар самти амнияти миллии прокуратураи вилояти Суғд, мушовири адлияи дараҷаи 2 Саидзода Иброҳим Тӯйчӣ ва баёноти роҳбарони субъектони амаликунандаи мубориза бар зидди ҷиноятҳои террористӣ ва экстремистӣ шунида шуд.

Таъкид шуд, ки аз мақомоти иҷроияи ҳокимияти давлатӣ дар самти баланд бардоштани тайёрии касбии соҳаи мафкуравӣ, гузаронидани семинар тренингҳо вобаста ба масъалаҳои пешгирии экстремизм ва терроризм, ташкили барномаҳои радиоӣ ва телевизионӣ ҷиҳати баланд бардоштани сатҳи огоҳии шаҳрвандон аз равандҳои сиёсии ҷаҳони муосир, тамоюлҳои экстремистӣ ва террористӣ, ҷиҳати пурра ба Ватан баргардонидани толибилмони дар муассисаҳои таълимоти динии хориҷи кишвар ғайрирасмӣ таҳсил менамуда, дастгирии фаъолияти соҳибкории ҷавонон, мусоидат ба осон намудани дастрасии қарзҳои имтиёзнок, мусоидат ба шуғли аҳолӣ ва андешидани чораҳо оид ба танзими раванди муҳоҷират, зиёд кардани шумора ва ташкили фаъолияти клубҳо, иншоотҳои варзишӣ, китобхонаҳо ва марказҳои маърифатӣ, баланд бардоштани сатҳи донишу маърифати динии имом‐хатибон ва ғайра андешидани чораҳои муассирро талаб менамояд. Аз рӯи натиҷаи муҳокимаи масъала қарори дахлдор қабул гардида, шахсони масъули субъектони амаликунанда вазифадор шуданд, ки баҳри иҷрои талаботи дар пеш гузошташуда чораҳои иловагии зарурӣ андешанд. Сардори шуъбаи назорати иҷрои қонунҳо дар мақомоти корҳои дохилӣ ва назорати маводи нашъаовар мушовири адлияи дараҷаи 2 М. Қурбонзода изҳор намуд, ки дар давраи таҳлилӣ, муфаттишони мақомоти корҳои дохилӣ дар вилоят 491 адад ин қабил парвандаҳои ҷиноятиро нисбат ба 612 нафар мавриди таҳқиқу тафтиш қарор дода, аз ин 388 адад нисбат ба 391 нафар ба суд ирсол намуда, бо ҳукмҳои судӣ шахсони гунаҳкор маҳкум гардидаанд.

Дар нимсолаи якуми соли равон 149 адад ҷиноят ба қайд гирифта шудааст, ки нисбат ба ҳамин давраи соли пешин дар як сатҳ қарор дошта, кушодашавии он 97,99 фоизро ташкил медиҳад. Содиршавии чунин ҷиноятҳо дар шаҳру ноҳияҳои Хуҷанд, Исфара, Конибодом, Бобоҷон Ғафуров, Мастчоҳ, Спитамен ва Бӯстон зиёд шудааст. Яке аз сабабҳои зиёд содир шудани ин намуди ҷиноятҳо дар шаҳру ноҳияҳои зикргашта ба таври дахлдор ба роҳ монда нашудани фаъолият дар самти пешгирӣ ва сари вақт ошкор накардани ҷиноятҳои авбошӣ мебошад. Сабаби дигари зиёд ба қайд гирифта шудани ҷиноятҳои авбошӣ ин аз ҷониби кормандони мақомоти корҳои дохилӣ аз қайд пинҳон кардани ин қабил ҷиноятҳо мебошад.

Дар давраи таҳлилӣ аз тарафи мақомоти прокуратураи вилоят ҳамагӣ 64 ҷинояти аз қайд пинҳонмонда вобаста ба ҷинояти авбошӣ ошкор ва ба қайд гузошта шудааст. Вобаста ба масъалаи баррасигардида қарори дахлдор қабул карда шуд.

Гулҷаҳон МАҲКАМОВА,

“Ҳақиқати Суғд”

 

 

 

Читать далее