02 June 2021

Сафари расмии Пешвои миллат Эмомалӣ Раҳмон дар Ҷумҳурии Исломии Покистон оғоз шуд

2 июни соли 2021 Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо сафари расмӣ вориди шаҳри Исломобод — пойтахти Ҷумҳурии Исломии Покистон шуданд.

Дар фурудгоҳи байналмилалии шаҳри Исломобод Сарвари давлати Тоҷикистон муҳтарам Эмомалӣ Раҳмонро намояндагони воломақоми кишвари мизбон бо самимияти олӣ истиқбол гирифтанд.

Барои пазироии меҳмони олимақом фурудгоҳ бо аксҳои Сарони давлатҳои Тоҷикистону Покистон, парчамҳои ҳарду давлат ва шиору овезаҳо, оро ёфта, горди фахрӣ саф ороста буд.

Читать далее

Фестивал-аксия "Театр барои кӯдакон"

Бори нахуст Фестивал-аксия "Театр барои кӯдакон" дар шаҳри Конибодом роҳандозӣ гардид. Ташаббускорон ҳадафи ин падидаи муҳими фарҳангиро ба хотири ҷалби таваҷҷуҳи ҷомеа ба театр, бахусус тарбияи насли нав дар руҳияи худшиносӣ ва дӯстдории санъати театрӣ арзёбӣ мекунанд. Фестивал-аксияи "Театр барои кӯдакон" бо ибтикори Театри давлатии драмаи мусиқии ба номи Туҳфа Фозиловаи шаҳри Конибодом дар доираи таҷлили 30-юмин солгарди Истиқлолияти давлатии Ҷумҳурии Тоҷикистон баргузор гардида истодааст.

Дар рӯзи нахустини баргузории фестивал-аксия дар Театри давлатии драмаи мусиқии ба номи Тўҳфа Фозиловаи шаҳри Конибодом ба фестивали мазкур оғози расмӣ бахшида шуд. Таъкид гардид, ки давлату Ҳукумати Тоҷикистон барои рушди санъати театрӣ ва ҳифзи арзишҳои маънавӣ таваҷҷуҳи зиёд зоҳир менамояд. Баргузории ҷашнвораи театрӣ шаҳодати гуфтаҳои боло мебошад. Изҳори боварӣ карда шуд, ки доир гардидани фестивал-аксияи театрӣ барои кӯдакон дар рушди соҳаи театр саҳм мегузорад.

Дар идома аз ҷониби ҳунармандони Театри давлатии драмаи мусиқии ба номи Туҳфа Фозиловаи шаҳри Конибодом ба сокинони Канди куҳан намоишномаи "Гушдарози ҳилагар" намоиш дода шуд. Тамошобинон, ки дар қатори наврасон калонсолон низ буданд, намоишномаро бо таваҷҷуҳи зиёд тамошо мекарданд. Мушоҳидаҳо нишон медиҳад, ки ҷомеа ба намоишномаҳои хубу диданӣ мароқи бештар дорад. Аз ин ҷост, ки намоишномаи "Гушдарози ҳилагар" хуш пазироӣ гардид.

Рӯзи дуюми Фестивал-аксияи театр барои кӯдакон бо гузоштанинамоишномаи "Маликаи шӯх" оғоз ёфт. Намоишномаи мазкурро ҳунармандони Театри давлатии ҷумҳуриявии лӯхтаки шаҳри Душанбе пешниҳоди тамошобинон намуданд. Ҷанбаҳои тарбиявии намоишномаҳои театрӣ барои тарбияи кӯдакон таъсири амиқ мерасонад. Зеро театр қудрати бузурги таъсиррасонӣ ба шахсияти инсонӣ дониста мешавад. Рафтан ба театр ва гирифтани ғизои маънавӣ аз намоишномаҳо дар гузашта роиҷ буд ва ин раванд имрӯз дубора эҳё мешавад.

Ёдовар мешавем, ки фестивал-аксияи "Театр барои кӯдакон" аз 1-ум то 4-уми июн идома меёбад.

Дар ин муддат ҳунармандони Театри давлатии драмаи русии ба номи Маяковскийи шаҳри Душанбе ва Театри лӯхтаки шаҳри Бӯстон намоишномаҳои театриро пешниҳоди тамошобин менамоянд.

 

Читать далее

КИТОБХОНА ВА ХОНАНДА

Дар асоси “Барномаи рушди китобдорӣ” ва бо мақсади баланд бардоштани маърифати аҳолӣ дар саросари кишвар озмуни китобхонҳо – “Фурӯғи субҳи доноӣ китоб аст” эълон гардида, аз тамоми гӯшаву канори ҷумҳурӣ китобхонҳои беҳтарин бо ҷоизаву мукофотпулиҳо қадрдонӣ шуда истодаанд. Дар ин самт натанҳо мактабу маориф, балки саҳми китобхонаҳо низ назаррас мебошанд.

Китобхонаи марказии ноҳияи Зафаробод низ аз соли таъсис то ба ин дам мекӯшад китобхонҳоро ҳарчи бештар ҷалб намояд ва дар андӯхтани дониш саҳм‐гузор бошад. Дар китобхонаи мазкур миқдори умумии китобҳо 104 ҳазор 685 нусха буда, аз он зиёда аз 40 ҳазор нусха бо забони тоҷикӣ, 45 ҳазор нусха бо забони русӣ ва зиёда аз 18 ҳазор нусхаи дигар бо забонҳои гуногун гирд оварда шудааст.

Миқдори солонаи китобхонҳо дар ноҳия 10 ҳазору 205 нафар буда, дар як сол наздик 105 ҳазор китоб барои хониш гардиш мешавад. Инчунин, китобхона бо 6 компютери замонавӣ, бидуни насби интернет ҷиҳозонида шудааст, ки ташрифовардагон метавонанд аз он истифода баранд. Зимни суҳбат маълум гардид, ки то соли 2015 тавассути “Корвони китоб” аз ҷумҳурӣ ба китобхонаи марказии ноҳияи Зафаробод низ дар қатори дигар шаҳру навоҳӣ китобҳои тозанашр ройгон дастрас мешуданд. Соли гузашта мо 145 ҷилд ва дар семоҳаи аввали ҳамин сол 54 ҷилд китоби нав харидорӣ кардем, афзуд директори китобхонаи марказии ноҳия Баҳодур Азизов.

Ҳоло дар китобхона 22 нафар китобдор фаъолият мебаранд ва бахшида ба рӯзҳои ҷашнӣ ва солгарди адибони бузург пайваста озмуну чорабиниҳо ташкил ва баргузор менамоянд. Аз ҷумла бахшида ба 700‐солагии шоир Камоли Хуҷандӣ, 110солагии Мирзо Турсунзода чорабиниҳо баргузор намудаанд. Барои иштирок ва ба даст овардани муваффақият дар озмуни ҷумҳуриявии “Фурӯғи субҳи доноӣ китоб аст” китобхона нақша дорад китобхонҳоро ҷалб намояд.

Рӯзигул ЗОҲИДОВА,

 таҷрибаомӯзи “Ҳақиқати Суғд”

Читать далее

ҶАВОБГӮ БА НИЁЗҲОИ ҶОМЕА

«Китоб дар назди мардуми мо чунон қадру манзалате дорад, ки онро зери болини тифли навзод мегузоранд. Бо ният ва умеде, ки дониш чароғи равшани дили ӯ ва гирудори зиндагӣ ҷавшани ҷонаш бошад. Ин анъанаи нек бояд идома ёбад ва ба наслҳои оянда дарси ибрат гардад».

Ин нуктаҳо, ки аз забони асосгузори сулҳу ваҳдати миллӣ – Президенти Ҷумҳурии Тоҷикистон муҳтарам Эмомалӣ Раҳмон гуфта шудааст, ифодагари арҷгузории мо ба аҷдоди соҳибфазлу донишварамон ҳамчун шиноснома ва нишони ҳастиву бақо пазируфта шудааст. Аз ин ҷост, ки дар радифи эълон шудани солҳои 2019‐2021 «Солҳои рушди деҳот, сайёҳӣ ва ҳунарҳои мардумӣ», таҷлили ҷашни 30 – солагии Истиқлолияти давлатии Ҷумҳурии Тоҷикистон чанд сол инҷониб баргузор шудани озмуни ҷумҳуриявии китобхонӣ бо номи «Фурӯғи субҳи доноӣ» барои ноил шудан ба ҳадафу ормонҳои олӣ пайванди қавӣ дорад.

 «Маҷмӯаи саволу ҷавоб, тест ва гуфтор оид ба китоб, китобдорӣ ва китобшиносӣ» маҷмӯаест, ки нашриёти «Меъроҷ» бо тавсияи шӯрои табъу нашри Китобхонаи вилоятии оммавии ба номи Тошхӯҷа Асирӣ ба табъ расонда, саволу ҷавобҳо ва тестҳо оид ба самтҳои гуногуни соҳаи китобшиносӣ, мисли таърихи китобу китобсозӣ, истилоҳоти умумиистеъмолӣ, фароҳамоварӣ ва коркарди китоб, феҳраст, корҳои маълумотдиҳӣ – библиографӣ, илмӣ – методӣ, мубодилавӣ – захиравӣ ва маҳфуздорӣ, махзани китобӣ, иттилоотӣ – компютерӣ, электронӣ ва хизматрасонӣ фароҳам омадаанд. Ҳамчунин гуфтори бузургон перомуни арзиши олии китобу китобдорӣ ба унвони раҳнамои мутахассисон ва тарғибгарони донишу хирад оварда шудааст.

Тавре директори Китобхонаи вилоятии оммавии ба номи Тошхӯҷа Асирӣ Баҳром Мирсаидов дар пешгуфтори китоб менигорад, мутахассисони китобшинос барои тамоми китобдорони вилоят, корманддонишҷӯён китобҳои таълимӣ, дастурҳову мактубҳои методӣ, рӯйхатҳои тавсиявӣ, намунаи ҳуҷҷатнигорӣ, «Тақвими санаҳои ҳумоюнӣ» ва дигар маводи соҳавиро омода ва дастрас менамоянд, ки «Маҷмӯаи саволу ҷавоб, тест ва гуфтор оид ба китоб, китобдорӣ ва китобшиносӣ» аз қабили онҳост. Зеро барои мутахассисону дастурдеҳони соҳа маълум аст, ки то кунун бештари маводи илмию таълимии китобшиносию китобхонашиносӣ ва аксари ҳуҷҷатнигории китобхонавӣ ба таври мукаммал таҷдиди назар нашуда, хизматрасонии китобию иттиллотӣ бо усули анъанавӣ ба роҳ монда мешавад.

Бо назардошти ба маводи таълимӣ эҳтиёҷи бештар доштани донишҷӯёни ихтисоси китобхонашиносию китобшиносии макотиби олӣ, аз донишҳои муосири соҳа барканор мондани бархе аз мутахассисони китобшинос бо мақсади тарбияи мутахассисони ҷавобгӯ ба ниёзҳои ҷомеа китоби мазкурро ба табъ расондаанд. Таҳиягарон мутмаинанд, ки маҷмӯаи мазкур раҳнамои хубу судманд буда, бо мақсади наҷиб, яъне камолоти фикриву маънавии китобдорони асил ва омӯзгорону ҷӯяндагони ҳақиқии илму маърифат рӯи коғаз омадааст.

Шоира САЛИМОВА,

«Ҳақиқати Суғд»

Читать далее

ОЛИМАЕ САРШОР АЗ МЕҲР

Таърих гувоҳ аст, ки аз рӯзе ҳаёт побарҷост ва ҷомеа пеш меравад, занон баробари мардон дар саҳнаҳои мухталифи ҳаёти сиёсӣ, иҷтимоӣ, фарҳангӣ, илмӣ ва адабӣ ҳунар омӯхта, сазовори мавқеи шоиста гардидаанд. Албатта, дар ин радиф кишвари мо бо занони сиёсатмадор, ходимони илм, кормандони соҳаҳои саноату кишоварзӣ, фарҳанг, тиб, маориф, варзиш ва ғайра фахр дорад. Саодату сарфарозии мардум аз тинати поку ҳидояти неки модарон ва заҳмати шоистаи занони сарбаланду нозанини мост.

Яке аз он нафароне, ки имрӯз ба ростӣ, ин ҷо аз кору пайкораш ҳарф мезанем, олимаи даврони мо, инсони некусиришт, зани порсову оқила, номзади илмҳои филологӣ Ӯғулой Умаралиева аст. Ин инсони покгавҳар, ватанпарвар, хушахлоқ ва бомаърифат яке аз бунёдгарону озодфикрони ҷомеаи имрӯз буда, дар ҳама ҷода ҳамчун бонуи сиёсатшинос маъруфи ҳамагон мебошад. Асосгузори сулҳу ваҳдати миллӣ–Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бузургиву беназирии модарро ситоиш намуда, гуфтаанд: “Бешак, дар ҷомеае, ки сафи занҳои босаводу бомаърифат меафзояд, пешравӣ босуръат хоҳад буд ва дар он шумораи ҳарчи бештари фарзандони хуб тарбия хоҳанд ёфт”.

Ин гуфтаҳои Сардори давлатро хонда, маҳз устод Умаралиева барин занон бар ёдам мерасанд. Бо чеҳраву нигоҳи пур аз табассуму меҳр, лафзи ширин, суханони пандомез, дарки маънӣ, саводи баланд, дилёбиву ширингуфторӣ маҳбуби аҳли устодону шогирдон гардидааст. Ҳангоми суҳбат бештар хислати аз ҳама беҳтарин – ширинзабониашро дарк кардам. Чунон равону суфта ва нозукбинонаву боандеша сухан меронад, ки хоҳиши соатҳо наздаш нишаста, ба ҳарфи дили ӯ гӯш кардан дар дил пайдо мешавад.

Як хислати дигари ӯро кашф кардам, ки дар баробари соҳибмаърифативу соҳибсолорӣ чунон чобукона рафтор менамояд, ки баъзан ҷавонон шояд ин лаёқату қувваро доро набошанд, ана ин хислат низ барои шарафёбу шинохта, соҳибном гардиданаш кӯмаки калон расонидааст. Агар ҳоло мебинӣ, ки дар донишгоҳ қарор дорад, пас аз анҷоми дарс аллакай ба ягон ҷамъомаду вохӯрӣ рафтааст ё дар идораҳои ҳизбӣ қарор дорад. Яъне дар як рӯз бо вуҷуди бузургсолорӣ чӣ қадар корҳоро ба анҷом мерасонад, ки ин воқеан рисолати ӯст, нишонаи кору пайкори устод аст. ӯғулой Умаралиева дар оилаи хизматчии давлатӣ дар ноҳияи Ашт ба дунё омадааст. Номзади илмҳои филология, дотсент буда, пас аз хатми Донишкадаи давлатии омӯзгории ба номи Т.Г.Шевченко (ҳоло Донишгоҳи давлатии омӯзгории ба номи С.Айнӣ)‐и шаҳри Душанбе фаъолияти меҳнатии мавсуф дар зодгоҳаш оғоз гардид. Бо макотиби миёнаи маркази вилоят–шаҳри Ҳуҷанд пайванд мегирад ва дар МТМУ №21, ҳамчунин ба ҳайси муовини директор оид ба корҳои таълим дар МТМУ №9 ба номи Нурулло Ҳувайдуллоев ва солҳои 1991‐1992 ба сифати методист‐инспектори шуъбаи маорифи шаҳри Хуҷанд фаъолияти пурсамар бурдааст. Баъдан ӯ соли 1993 ба факултети филологияи тоҷики Донишгоҳи давлатии Хуҷанд ба номи академик Бобоҷон Ғафуров барои идомаи фаъолият даъват шуд.

Таҳти роҳнамоии профессор Ф.Зикриёев ва таҳти назари аъзо‐корреспонденти Академияи илмҳои Ҷумҳурии Тоҷикистон Шарофиддин Рустамов пайваста заҳмат кашида, рисолаи худро таҳти унвони «Ҷумлаҳои туфайлӣ ва мӯътариза дар забони адабии тоҷик» соли 1998 бомуваффақият дифоъ намуда, соҳиби унвони илмии номзади илмҳои филологӣ ва соли 2004 ба дараҷаи илмии дотсентӣ мушарраф гардид. Пас аз фаъолияти тӯлонӣ дар вазифаҳои баланди донишгоҳ ба ҳайси мудири шуъбаи кор бо занони Кумитаи иҷроияи Ҳизби Халқии Демократии Тоҷикистон (ҲХДТ) дар вилояти Суғд фаъолият бурд. Бо инъикоси шумори номгӯи вазифаҳои устод, ки дар ҳар яки он сарбаландона меҳнат намудааст, мо ин ҷо онҳоро ба итмом расонида наметавонем. Китобҳои «Дирафши мост ҳизби халқ», «Нигини миллати тоҷик», “Бонувони зиндагисоз”, «Ҳизби ормонҳои халқ» ва ғайра маҳсули меҳнати ӯст.

Ӯғулой Умаралиева барои китоби “Ҳизби ормонҳои халқ” ба дарёфти Ҷоизаи ба номи Бобоҷон Ғафуров сазовор шудааст. Ӯғулой Умаралиева намояндаи фаъол ва аъзои Шӯрои зан ва оилаи Мақомоти иҷроияи ҳокимияти давлатии вилояти Суғд ва шаҳри Хуҷанд, тарғибгари фаъоли гурӯҳи тарғиботӣ‐ташвиқотии назди МИҲД‐и вилояти Суғд (гурӯҳҳои «Афкор ва Зеҳн») буда, дар роҳандозӣ намудани Паём ва барномаҳои стратегии давлатии Президенти Ҷумҳурии Тоҷикистон муҳтарам Эмомалӣ Раҳмон саҳми босазо дорад.

Бо унвонҳои баланди Аълочии маорифи Ҷумҳурии Тоҷикистон, барои хизматҳои шоёнаш бо ифтихорномаву сипосномаҳои бешумор қадрдонӣ шудааст. Бо меҳрубонии аҳли оила, алалхусус ҳамсарашу фарзандон, наберагону аберагон устод рӯз аз рӯз илҳом гирифта, рӯ ба шукуфоӣ дорад, гӯё аз нав ҷавон мегардад. Ба ин зани мушфиқ, устоди ҳамаи мо, шогирдон дар роҳҳои ҳамвори зиндагӣ рӯзгори баофият, барору комёбиҳои тоза ба тоза таманно дорем.

Гулҷаҳон ТУРСУНЗОДА,

“Ҳақиқати Суғд”

Читать далее

Сафари расмии Президенти Ҷумҳурии Тоҷикистон Эмомалӣ Раҳмон ба Ҷумҳурии Исломии Покистон

Имрӯз Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон барои анҷом додани сафари расмӣ ба Ҷумҳурии Исломии Покистон сафар карданд.

Дар фурӯдгоҳи байналмилалии пойтахт Президенти Ҷумҳурии Тоҷикистон муҳтарам Эмомалӣ Раҳмонро раиси Маҷлиси миллии Маҷлиси Олии Ҷумҳурии Тоҷикистон, Сарвазири Ҷумҳурии Тоҷикистон ва дигар шахсони расмӣ гусел намуданд.

Читать далее