Замони кўдакони Истиқлол

Подробности статьи

Ҳар сол, рўзи якуми июн дар аксари кишварҳои ҷаҳон, аз ҷумла Тоҷикистони мо ҳамчун Рўзи байналмилалии ҳифзи кўдакон ҷашн гирифта мешавад. Ин сана солҳост, ки дар миёни мардуми мо ҳамчун яке аз рўзҳои зеботарину таърихӣ ба шумор меравад. Рўзи байналмилалии ҳифзи кўдакон бо қарори Анҷумани Шўрои Федератсияи байналмилалии демократии занон таъсис ёфта, бори аввал соли 1950 дар даҳҳо кишвари дунё таҷлил гардида буд. Аз ин рў, ин санаи некро ҳамчун рўзи баробариву бародарӣ ва ҳифзи манфиатҳои кўдакон ном мебаранд.

Бо шарофати файзи Истиқлол дар Тоҷикистони азиз пешрафти соҳаи маориф хеле намоён ба назар расида, кўдакону наслҳои ҷавон зери осмони софу беғубор, бо шавқу ғайрати зиёд саодати зиндагӣ доранд ва умр ба сар мебаранд.

Яке аз самтҳои афзалиятноки сиёсати давлату ҳукумат, хоса Президенти Ҷумҳурии Тоҷикистон, Асосгузори сулҳу Ваҳдати миллӣ - Пешвои миллат, мўҳтарам Эмомалӣ Раҳмон беҳдошти ҳаёти кўдакону ҷавонон ба ҳисоб меравад.

Ҳанўз 26-уми июни соли 1993 Ҷумҳурии Тоҷикистон яке аз санадҳои муҳими ҳуқуқи байналхалқӣ-Конвенсияи ҳуқуқи кўдак, ки онро СММ 20-уми ноябри соли 1989 қабул кардааст, эътироф намуд. Асосгузори сулҳу Ваҳдат - Пешвои миллат Эмомалӣ Раҳмон дар яке аз суханрониҳояшон гуфта буданд: “Мо барои шумо ҳамаи шароити таҳсилро фароҳам меорем ва аз шумо фақат хубу аъло таҳсил кардан ва соҳиби илму ҳунар шуданро талаб дорем». Дар ҳама давру замон омўхтани илму дониш ва маърифатпарварӣ омилҳои пешрафту тараққиёти ҳар як давлат ба ҳисоб меравад. Имрўз, яъне дар асри ХХI  пешрафти илму техника босуръат ҷараён дорад.

Боиси хурсандист, ки дар тўли 25 соли Истиқлолияти Ҷумҳурии Тоҷикистон кўдакистону мактабҳои зиёди замонавӣ бунёд гардида, ба истифода дода шудаанд. Чунки ояндаи ҷомеа дар дасти кўдакони имрўза аст, ки фардо ба воя расида, ҷомеаро идора мекунанд. Мо бояд, ки дар рўҳияи   меҳнатдўстӣ, таҳаммулпазирӣ ва ахлоқи неку ҳамида онҳоро тарбия намоем.

Бо ҳамин ниятҳои нек ҳамаи кўдакони Тоҷикистони азизро ба муносибати иди байналмилалӣ табрик гуфта, умед дорам, ки ҳар кадоми кўдакону наврасони азиз дар оянда сазовори номи баланди фарзандони фарзонаи миллати тоҷдори Тоҷикистон мегарданд.

Г. Зокирова,
омўзгори МТМУ-и № 2,
шаҳри Истиқлол

Хат ғалат, имло ғалат, иншо ғалат!

Подробности статьи

«Дар  хотир  бояд  дошт,  ки  танҳо  миллати  босавод  метавонад,  насли  соҳибмаърифату  донишманд  ва  кадрҳои  арзандаи  давронро  ба  воя  расонад,  пеш  равад  ва  дар  ҷомеаи  мутамаддин  мақоми  арзандаи  худро  пайдо  намояд».

Ин  нукта  дар  Паёми  Пешвои  миллат,  Президенти  Ҷумҳурии  Тоҷикистон, мўҳтарам  Эмомалӣ  Раҳмон  ба  Маҷлиси  Олии  Ҷумҳурии  Тоҷикистон  зикр  шудааст.

Имрўз  мақоми  давлатӣ  гирифтани  забони  тоҷикӣ  боиси  ифтихор  ва  хурсандии  ҳар  яки  мост  ва  онро,  бешубҳа,  метавон  яке  аз  дастовардҳои  бузург  ва  меваҳои  ширини истиқлолият  арзёбӣ  кард. Маълум,  ки  забон яке  аз  рукнҳои  асосии  давлат  ва  давлатдории  миллист  ва  онро пояи  миллат  хондаанд. Вале  ин  поя  ва  ин  рукни  муҳими  давлату  миллат  ҳамеша  зарурат  ба  нигоҳубин  ва  ғамхорӣ  дорад.

Албатта, рушду такомулу ғанӣ гардидани забон аз таваҷҷўҳи ҳар як  шаҳрванди ин кишвар вобастагӣ дорад. Зеро коре, ки дар иттиҳод  мешавад, шикасту озоре нахоҳад дид. Ҳарчанд ки дар мавриди беҳдошти  забони миллӣ қонуну барномаҳо аз тарафи ҳукумат қабул шудааст, аммо  аз ҷониби баъзе шаҳрвандон беэҳтиромӣ нисбат ба зинда ва тоза нигоҳ  доштани забон зоҳир мегардад. 

Ҳамаи муассисаҳои таълимӣ бо кадрҳои баландихтисос таъминанд. Китобҳои замонавӣ чоп шудаанд, дар ҳамаи мактабу кўдакистонҳо  компютер ва интернетро васеъ истифода бурдан лозим аст. Худи мо ҳам аз  муаллимон таълим гирифта, ба чунин дараҷаи камолот расидаем. Аммо  боз якчанд омилҳое ҳастанд, ки ба маърифатнокшавӣ ва саводнокгардии  омма, хусусан мактабиён таъсири амиқ мерасонанд. 

Яке аз чунин омилҳо ин тахтаҳои тарғиботӣ мебошанд. Агар дар ин  тахтаҳо калимаю ибораҳо, ҷумлаҳо дуруст навишта шуда бошанд, он  навиштаҷот дар хотири хонандагон амиқ нақш мебанданд. Мумкин аст,  ки хонанда дар ҳаёти ояндааш он навиштаҳоро истифода барад, бо ин  восита саводнокии худро аз ҷиҳати мазмун ва имло нишон дода тавонад…

Афсўс, на ҳамаи тахтаҳои таблиғотии шаҳри Хуҷанд бе хато навишта шудаанду ба талаботи қоидаҳои имло мувофиқанд. Чизе, ки мардум ҳар  рўз мебинаду аз он истифода мекунад,  зуд дар зеҳнаш мемонад. Акнун  якчанд мисол меорем:

Дар кўчаи ба номи Камоли Хуҷандӣ рў ба рўи беморхонаи вилоятии бачагона дар пештоқи мағоза чунин навишта шудааст: «Ширинихои НЕКРЎЗ». Ибораи хеле мувофиқ ва соҳибмазмун аст. Дар ин ҷо калимаи «Шириниҳои» ба ҷои ҳарфи «ҳ» бо ҳарфи «х» навишта шудааст. Аммо дар  давоми ин ибора мо мехонем: «Самбўсаҳои милли». Ба назар гўё ягон  хатоӣ надорад. Вале дар охири калимаи «милли»  ӣ-и  заданок гузоштан  лозим аст! Инро қоидаи имлои забони тоҷикӣ талаб менамояд. 

Дар баъзе ҷойҳо навишта шудааст, ки «Савдо бо пули милли». Дар ин ҷо  ҳам айнан хатогии болоӣ ба назар мерасад, яъне калимаи «миллӣ» танҳо  бо ӣ-и заданок навишта шуданаш дуруст аст. Вобаста ба ин дар аксар  ошхонаҳо ва мағозаҳо ҳамин хел ғалатҳои имлоӣ, услубӣ ва мантиқӣ  дида мешаванд.

Ҳамчунин, воқеъ дар гардиши сероҳаи назди мағозаи Гулбаҳор дар тахтаи  таблиғотӣ шеъре сабт шудааст, ки он ҳамагӣ чор мисраъ асту мазмуни амиқ дорад:

Тоҷикистон, модари ҷон, шукри модар мекунем,

Зарраи  хоки туро ҳамвазни гавҳар мекунем.

Сад қасам аз номи фарзандони бо ору шуҷоъ,

Шўҳрататро то Сурайё зеби кишвар мекунем.

Одамонро ба ватандўстӣ даъват менамояд. Аммо дар ин ҷо низ хатогии имлоӣ содир шудааст. Дар ибораи «фарзандони бо ор» бояд сифат якҷоя  навишта мешуд. Яъне дар намуди «фарзандони боор». Бар замми ин бояд  номи муаллиф зикр мешуд, чунки баъзе шахсон он шеърро азёд кардаанд,  вале аз муаллифаш бехабаранд. Дар ин сероҳа, ки гузаргоҳи садҳо талабагону ҳазорҳо донишҷўён мебошад, бояд ин шеър бе ягон хатогӣ  навишта мешуд!

Дар имлои бисёр калимаҳо духўрагӣ дида мешавад. Мисол: Хисрав - Хусрав, Фариддадини Аттор - Фариддудини Аттор, Абўабдуллоҳ - Абўабдулло, Абдурраҳмон - Абдураҳмон, Аловаддин - Аловуддин,  Авесто - Авасто, марҳала - марҳила …

Акнун вақти он расидааст, ки Кумитаи истилоҳоти назди ҳукумати  Ҷумҳурии Тоҷикистон аз ин ду вариант якеро интихоб намояд ва барои  имло пешкаш гардонад.

Хулоса, дар бобати имло бесару сомониро барҳам диҳем, ҷиддан ба қоидаҳои имло риоя кунем ва ин кор ба манфиати забони модарии мо,  хонандагони мактабҳои миёна, донишҷўён, муаллимон хоҳад буд.

Мунаввара  ОЧИЛОВА,
омўзгори мактаби таҳсилоти
умумии рақами  23,
ноҳияи Бобоҷон Ғафуров

Ба осебдидагони офатҳои табиӣ кӯмак расонида шуд

Подробности статьи

Чунонки маълум аст, санаҳои 9-12-уми майи соли 2016 дар натиҷаи боришоти пайдарпай ва омадани сели калони фалокатовар, ки бештар ба деҳаҳои Шўрча, Савр, Қўштеппаи Ҷамоати деҳоти Халифа Ҳасан, деҳаи Шашқати Ҷамоати деҳоти Рўдакӣ, деҳаи Дашти Қозӣ, Киштўдаки Ҷамоати деҳоти Ёрӣ, Амондара, Лоиқ Шералӣ, маҳаллаҳои Сойи Мисрак, Зардолузори шаҳр, соҳаҳои кишоварзӣ, чорводорӣ ва як қатор корхонаву ташкилотҳои Панҷакент хисороти моддӣ расонид.

Дирўз намояндагони Мақомоти иҷроияи ҳокимияти давлатии вилоят бо мақсади кўмаку дастгирӣ ба осебдидагони офатҳои табиӣ ба ин мавзеъ сафар намуданд.

«Панҷшанбе» кай ба танзим медарояд?

Подробности статьи

Дар бозори марказии «Панҷшанбе»-и шаҳри Хуҷанд имрўз бо баракоти ҳосили дастранҷи деҳқонони вилоят маҳсулоти хоҷагии қишлоқ фаровон аст. Аз саҳарии барвақт марди деҳқон маҳсулоти худро ба бозор бароварда, бо нархи арзон мефурўшад. Савдогарон бошанд, нархи маҳсулоти харидаи худро қадре баланд бардошта, боз ба фурўш мебароранд ва ба ин васила  зиндагии худро пеш мебаранд.

Чек гиру баъд савдо кун, набошад…

Тибқи супориши Раиси вилояти Суғд, мўҳтарам Абдураҳмон Қодирӣ, деҳқонон дар майдони «Регистон»-и бозори «Панҷшанбе» бояд дастранҷи меҳнати худро бо нархи ба харидор дастрас ба фурўш бароранд. Ҳамчунин, ба онҳо гуфта шудааст, ки дар ҷойи муайяншуда бе супоридани маблағ ва гирифтани чек савдо кунанд.

Мақоми зан дар оини фарҳанги миллӣ

Подробности статьи

Таҳти ҳамин унвон дар Муассисаи давлатии вилоятии «Кохи фарҳанги ба номи Абўабдуллоҳи Рўдакӣ»-и шаҳри Хуҷанд бахшида ба Рўзи байналмилалии оила  конфронси вилоятӣ баргузор гардид. Конфронсро муовини Раиси вилоят Назира Ғаффорӣ ҳусни оғоз бахшид. Сардори Раёсати кор бо занон ва оилаи Мақомоти иҷроияи ҳокимияти давлатии вилоят Нодира Мирзозода дар мавзўи «Мақоми зан дар оини фарҳанги миллӣ» маърўза кард.

Н. Мирзозода оид ба баланд бардоштани мақоми зан дар ҷомеа, дастгирии Ҳукумати Ҷумҳурии Тоҷикистон, амалигардонии фармону дастурҳои Асосгузори сулҳу Ваҳдати миллӣ - Пешвои миллат, Президенти мамлакат, мўҳтарам Эмомалӣ Раҳмон, Барномаҳои давлатӣ ва қарорҳои Раиси вилоят Абдураҳмон Қодирӣ фикру ақоиди хешро иброз дошта, қайд кард, ки, мутаассифона, дар ҷомеаи мо ҳастанд занон, модароне, ки ба амалҳои зишт, худкушиву ҷиноятҳои мухталиф даст мезананд. Инчунин, дар бобати пўшидани либоси ғайримиллӣ дар мисоли сатр ва ҳиҷоб андешаи хешро иброз дошт.

Мавсуф аз он изҳори таассуф кард, ки модарон нисбат ба фарзандони хеш бепарвоӣ зоҳир менамоянд, ки дар натиҷа онон ба ҳаракатҳои экстремистиву террористӣ шомил гардида, ҷиноятҳои вазнин содир мекунанд. Инчунин, солҳои охир сафи занони ба ҷиноят, худкушӣ, дуздиву ғоратгарӣ ва фурўши кўдакони худ машғулбуда хеле зиёд шуда истодааст. Аксарият чунин ҳодисоти номатлуб бо сабабҳои муноқишаи оилавӣ ва ё нафароне, ки дар муҳоҷирати меҳнатианд, сар задааст. Баҳри пешгирии чунин ҳодисаҳои номатлуб аз ҳисоби занони фаъол, намояндагони соҳоти мухталиф ва уламои дин гурўҳи доимоамалкунанда таъсис дода, бо 17375 занони табақоти гуногун вохўриҳо ташкил намудаанд. Натиҷаи чунин корбарӣ буд, ки соли сипарӣ аз байни авфшудагон як нафар соҳиби Гранти Раиси вилоят гардида, дар ҷомеа мавқеи худро устувор гардондааст.

Сардори Раёсати Вазорати корҳои дохилии Ҷумҳурии Тоҷикистон дар вилояти Суғд, генерал - майори милитсия Назарзода Шариф Раҳмон оид ба пешгирии ҷиноят дар байни занон, андешидани чораву тадбирҳо маълумоти муфассал дод. Ў нахуст аз боби ба тас-виб расидани фармону қарор ва барномаҳои давлатӣ дар бораи баланд бардоштани мақоми зан дар ҷомеа ибрози андеша намуда, сипас ҷиноятҳои мухталифи дар давоми панҷ соли охир рухдодаро таҳлил намуд.

Шариф Назарзода содир гардидани ҷиноят, хосатан ҷинояти қаллобӣ, хариду фурўши одамон, дуздиву ғоратгарӣ ва кушторро ба риштаи таҳлил кашида, сабабҳои асосии онро дар муноқишаи оилавӣ ва ё муҳоҷирати меҳнатӣ донист. Бобати рўй овардани ҷавонону занон ба ҳизбҳои террористӣ – экстремистӣ, ба ҷинояти куштор оилавӣ  даст задан, иғво андохтани баъзе табақаҳои ҷомеа аз ҷониби имом-хатибон ва домуллоҳо ибрози ақида намуд. Инчунин навори таҳлилӣ-аналитикӣ доир ба ҷинояти панҷ соли охир рухдода, фикру андеша ва пушаймонии ҷинояткорони дастгиршуда ва ё хешу пайвандони эшон пешкаши ҳозирин гардонида шуд.  

Мудири кафедраи журналистикаи Донишгоҳи давлатии Хуҷанд ба номи академик Бобоҷон Ғафуров Дилбар Самадова, муовини раиси шаҳри Панҷакент Маҳбуба Ҳабибӣ, мудири шўъбаи маорифи ноҳияи Деваштич Зикрулло Иброҳимов, раиси Шўрои бибиотунҳои шаҳри Хуҷанд Мастура Темирова, донишҷўён Мафтуна Ҳодибоева, М. Сўфиева ва Зумрад Раҳмонова дар музокира фикру андеша ва пешниҳодоти хешро иброз доштанд.

Саволу ҷавоб бо аҳли нишаст анҷомбахши конфронс буд.

Тавҳида ҶЎРАЕВА,
“Ҳақиқати Суғд”  

Паёми табрикии Раиси вилоят бахшида ба Рӯзи байналмилалии ҳифзи кӯдакон

Подробности статьи

Фаро расидани Рӯзи байналмилалии ҳифзи кӯдаконро ба тамоми кӯдакону наврасон табрику муборакбод гуфта, барои онҳо даврони босаодати наврасӣ осмони соф, оромию осудагӣ ва хандаи беғубори тифлиро таманно дорам.

Асосгузори сулҳу Ваҳдати миллӣ - Пешвои миллат, Президенти Ҷумҳурии Тоҷикистон, мӯҳтарам Эмомалӣ Раҳмон вобаста ба таълиму тарбияи кӯдакону наврасон ва барои онҳо муҳайё намудани шароити мувофиқ таъкид кардаанд:

«Падару модарон, масъулони таълиму тарбия, роҳбарони мақомоти иҷроияи маҳаллии ҳокимияти давлатӣ ва тамоми ҷомеаи шаҳрвандӣ барои аз мактаб дур намондани фарзандон саъю талош намоянд, ба илму донишандӯзӣ ва касбу ҳунаромӯзии наврасону ҷавонон диққати махсус диҳанд. Ҳамзамон бо ин, ҳамкориро бо мактаб тақвият бахшанд ва барои таълими фарзандон тамоми шароити заруриро муҳайё намоянд».

Семинари ҷумҳуриявӣ: танзими анъана ва ҷашну маросимҳо амали дастҷамъона ва эҳсоси масъулият зарур аст!

Подробности статьи

«Мо вазифадорем, ки расму оинҳоро аз хурофоту таассуби барои имрўзу ояндаи ҷамъият номатлуб тоза созем, онҳоро бо назардошти имкониятҳои иқтисодию иҷтимоӣ ва фарҳангии худамон танзим намоем».

Эмомалӣ Раҳмон

Рўзи 28-уми майи соли равон дар Муассисаи давлатии «Қасри маданияти Арбоб»  дар мавзўи «Дастовардҳои  Ҷумҳурии Тоҷикистон дар даврони Истиқлолияти давлатӣ» семинари ҷумҳуриявӣ доир гардид. Дар кори он  намояндагони Дастгоҳи иҷроияи Президенти Ҷумҳурии Тоҷикистон, Кумита оид ба корҳои дин, танзими анъана ва ҷашну маросимҳои миллӣ, намояндагони шаҳри Душанбе, ноҳияҳои тобеи ҷумҳурӣ, вилоятҳои Хатлон ва  Мухтори Кўҳистони Бадахшон, шаҳру навоҳии вилояти Суғд иштирок доштанд.

ҲАҚИҚАТИ СУҒД № 62 24.05.2016

Подробности статьи

Бо амри дилу виҷдон

Подробности статьи

Нафаре бо номи мустаор нисбат ба донишҷўёни донишгоҳҳои олии вилояти Суғд, ки барои дастгирии баргузории Раъйпурсӣ, истиқболи Рўзи ҷавонони Тоҷикистон ва 25-солагии Истиқлолияти давлатии Ҷумҳурии Тоҷикистон бо ирода ва хоҳиши худ роҳпаймоӣ анҷом доданд, ҳарфи таҳқир ба забон оварда, таъна задааст, ки гўё донишгоҳҳо ба заводи лагандбардорӣ табдил ёфта, донишҷўи бавиҷдону ватандўст тарбия намекунанд.

Дар навбати аввал, муаллифи навишта худаш, агар донишҷў бошад, дараҷаи саводи худашро нишон додааст. Худ дар сатҳи ҳамин навиштааш савод дорад ва комилан аз имлои забони тоҷикӣ бехабар асту ҷои таҳсил ба ҳамин гуна корҳои беҳудаву ҳарзаргардиву ҳарзагўӣ машғул аст, аз нигоҳи худ ба вазъи кунунии донишгоҳҳо баҳо медиҳад. Ҳар нафар донишҷўе, ки сатҳи дониши кофӣ надорад, худаш дар фикри ҷустани ҳар роҳу воситаи дигар барои  гирифтани имтиҳону санҷишҳо мешавад, ҳол он ки Худоро шукр тайи чанд соли охир воқеан Донишгоҳи давлатии Хуҷанд ба номи академик Бобоҷон Ғафуров ба яке аз донишгоҳҳое табдил ёфтааст, ки сатҳи мавҷудияти ҳодисаҳои номатлуб, аз қабили тамаъҷўӣ ва ришваситонӣ дар он ба мушоҳида намерасад ва инро пурсишҳои афкори худи донишҷўён муайян кардааст. Донишҷўён, ки тариқи маркази тестии донишгоҳ санҷишу имтиҳон месупоранд, худ мустақиман баробари анҷоми имтиҳон тариқи компутер баҳояшонро мегиранд. Муаллифи ҳамон навишта, ҳатто аз ҳамин ҷараёни нави қабули санҷишу имтиҳонот, ки дар тамоми донишгоҳҳои кишвар ҷорӣ шудааст, хабар надорад ва маълум аст, ки худ нафари фаъол нест ва суханони нафари дигарро ноогоҳона, ба хотири бад кардани низоми кунунии маорифи кишвар навиштааст.

Натиҷаи чунин пешравиҳост, ки ҳамасола сафи донишҷўёни босаводи донишгоҳ афзун гардида, дар озмунҳои фаннии ҷумҳуриявӣ ва байналхалқӣ ба гирифтани мақомҳои ифтихорӣ соҳиб мешаванд ва аз тарафи роҳбарияти донишгоҳ қадршиносӣ мегарданд. Аз ин рў, ин донишҷўён, ки ба роҳпаймоӣ баромаданд, пеш аз ҳама, ҷавобан ба чунин ғамхориҳо, ки аз иқдомҳои Асосгузори сулҳу Ваҳдати миллӣ - Пешвои миллат, мўҳтарам Эмомалӣ Раҳмон сарчашма мегирад, бо амри дилу виҷдони худ амал карданд. Мо ифтихор мекунем, ки донишҷўёни ватандўсту масъулиятшинос пайваста меафзояд. Беҳтар мебуд, ки ҷои машғул шудан ба чунин корҳои номатлуб ва таънаҳои беҷою ғаразнок бо ҳамсолони худ пайи омўзишу дарсхонӣ мешудед (агар дар ҳақиқат донишҷў бошед). Ба Шумо тавсияи мо ҳамчун муаллим он аст, ки ин гуна рафтори ноҷоро, ки ҳамагӣ аз ноогоҳӣ ва кам хондан сарчашма мегирад, канор гузошта, ба такмили дониши худ машғул шавед.

Ҳамаи хонандагон аллакай огоҳ шуданд, ки то куҷо Шумо аз имлои забони тоҷикӣ хабар доред ва навиштаатон ҳам сатҳи донишатонро нишон медиҳад. Хуб мешуд, ба ҳамсолони фаъолу донишманди худ пайравӣ намоед.

Санавбар Мираҳмадова,
устоди Донишгоҳи давлатии Хуҷанд
ба номи академик Бобоҷон Ғафуров  

Боздиди Раиси вилоят аз мавзеи Сексарӣ

Подробности статьи

Дирӯз, якшанбеи 29 май Раиси вилояти Суғд Абдураҳмон Қодирӣ бо сафари корӣ ба минтақаи Сексарии ноҳияи Деваштич ва шаҳри Истаравшан ташриф оварда, барои обёрии пурра ва истифодаи самараноку оқилонаи заминҳои ин мавзеъ ба масъулин дастуру супоришҳо дод.

Раиси вилояти Суғд Абдураҳмон Қодирӣ дар ин мавзеъ нахуст бо нақшаи обёрии мавзеи Сексарӣ ошно гардид ва тавре иттилоъ дода шуд, ҳамаи заминҳои корами ин мавзеъ тавассути пойгоҳҳои обкашии ноҳияи Зафаробод бо оби полезӣ таъмин карда мешуд. Дар машварати корӣ бо мутахасисон ҳамчунин манбаҳои  дигари обёрии заминҳои Сексарӣ мавриди баррасӣ қарор гирифт. Дар ояндаи наздик, яъне пас аз анҷоми марҳилаи севуми кашидани хатти оби Даҳкатсой – Даҳанасой қисми муайяни об ба хоҷагидорони дашти Сексарӣ дастрас мешавад ва танқисии оби полезии ин минтақа ба пуррагӣ аз байн бардошта хоҳад шуд.