Нақши барҷаста дар ҳифзу ҳимояи амнияти давлатӣ

Чорабинии идона бахшида ба Рӯзи таъсисёбии Қувваҳои Мусаллаҳи Ҷумҳурии Тоҷикистон

22 феврали соли 2019 дар толори бошукӯҳи Кохи фарҳанги ба номи Абӯабдуллоҳи Рӯдакии маркази вилоят ба ифтихори солгарди таъсисёбии Қувваҳои Мусаллаҳи Ҷумҳурии Тоҷикистон чорабинии мутантан баргузор гардид, ки дар он аз ҷумла роҳбарияти Мақомоти иҷроияи ҳокимияти давлатии вилоят, намояндагони комиссариатҳои ҳарбии гарнизони Суғд, афсарон ва сарбозони қисмҳои низомӣ ва собиқадорони ҷангу меҳнат, муҳофизони сохти конститутсионӣ ширкат варзиданд. Чорабинӣ бо ворид намудани Парчами давлатӣ ба толор ва садо додани Суруди миллӣ оғоз ёфт.

Муовини якуми Раиси вилоят Хол Ҳайдар чорабиниро ифтитоҳ ва суханронӣ намуда, афсарону сарбозон ва хизматчиёни ҷузъу томҳои гарнизони Суғд, ҳомиёни содиқи марзу буми Ватан ва собиқадорони соҳаро бахшида ба Рӯзи таъсисёбии Қувваҳои Мусаллаҳи Ҷумҳурии Тоҷикистон аз номи Раиси вилоят Раҷаббой Аҳмадзода табрику таҳният намуд.

Боиси зикр аст, ки бисту шаш сол қабл, 23 феврали соли 1993 дар таърихи кишвари мо боз як саҳифаи хеле муҳими таърихӣ – таъсиси Қувваҳои Мусаллаҳ, ки сипари боэътимоди давлат ба ҳисоб меравад, боз гардид.

Қувваҳои Мусаллаҳи кишварамон ҳамагӣ баъди якуним соли ба даст овардани Истиқлолияти давлатӣ - дар марҳалаи ниҳоят вазнин ва ҳассоси таърихӣ, яъне дар шароите таъсис дода шуд, ки бақои давлати мустақили тоҷикон таҳти хатари ҷиддӣ қарор дошт.

Хизматчиёни Қувваҳои Мусаллаҳи Тоҷикистон аз он рӯзҳои вазнин сар карда, дар барқарор кардани сохти конститутсионӣ ва ҳокимияти қонунӣ, мубориза бар зидди дастаҳои мусаллаҳи ҷинояткор, ошӯбҳои хиёнаткорона, кӯшишҳои табаддулоти ҳарбии хоинони миллат ва ҳифзи сарҳади давлатӣ фидокорона хизмат карданд ва дар айни замон аз имтиҳони ҷиддии ҳаёт гузаштанд. Дар ин раванд хизматчиёни ҳарбии Қувваҳои Мусаллаҳ борҳо бо ҷасорату шуҷоат ва далериву матонаташон ватандӯстони асил буданашонро собит намуданд.

Садҳо нафари онҳо дар ин ҷода ҷонашонро қурбон карданд, ки мо хотираи некашонро ҳамеша пос медорем. Корнамоиҳои афсарон, ки баҳри таъмини сулҳу осоиштагӣ ҳалок шудаанд, ҳамчун рамзи садоқат ба Ватан дар хотири мардум абадӣ нақш бастааст.

Ҳангоми иштирок дар набардҳо барои муҳофизати сохти конститутсионӣ 368 нафар фиристодагони вилоят ҳалок шудаанд, ки мо ҳеҷ гоҳ хотираи неки онҳоро фаромӯш намекунем.

- Имрӯз бо ифтихор гуфта метавонем, ки Артиши миллии Ҷумҳурии Тоҷикистон рисолати касбиашро ба ҷо оварда, дар таҳкими пояҳои давлатдорӣ ва истиқрори сулҳу субот ҳамчун нерӯи тавоно ва қудратманд саҳми босазо гузошта истодааст, - таъкид дошт муовини якуми Раиси вилоят.

Қувваҳои Мусаллаҳи Ҷумҳурии Тоҷикистон имрӯз қодиранд, манфиатҳои давлати соҳибистиқлоламонро сарбаландона ҳимоя намоянд. Сол аз сол беҳтар шудани таъминоти қисмҳои низомӣ, шаклан ва мазмунан тағйир ёфтани корҳои тарбиявию сиёсӣ, мунтазам гузаронида шудани машқҳои ҳарбӣ боиси афзудани маҳорати касбию ҷангии сарбозон мегарданд.

Хизматчиёни ҳарбии сохторҳои низомӣ ва ҳайати шахсии мақомоти ҳифзи ҳуқуқи мамлакат дар таъмини сулҳу суботи устувор, амнияти давлат ва мардум, таҳкими ваҳдати миллӣ, ки пешрафту тараққиёти кишварамон бевосита ба онҳо вобастагӣ дорад, нақши барҷаста ва бузург доранд.

Дар ин раванд бо мақсади таъмини иҷрои супоришҳои Асосгузори сулҳу ваҳдати миллӣ - Пешвои миллат, Президенти кишвар, Сарфармондеҳи Олии Қувваҳои Мусаллаҳи Ҷумҳурии Тоҷикистон муҳтарам Эмомалӣ Раҳмон ба таҳкими фаъолияти қисмҳои низомӣ, беҳтар гардонидани шароити зиндагӣ, интизоми ҳайати шахсӣ ва омодагии ҷангии онҳо таваҷҷуҳи хоса зоҳир карда мешавад.

Мавриди зикр аст, ки ҳамаи ҷузъу томҳои дар вилояти Суғд будаи Қувваҳои Мусаллаҳи Ҷумҳурии Тоҷикистон бо базаи моддию техникӣ таъмин гардидаанд. Дар баробари ин, Мақомоти иҷроияи ҳокимияти давлатии вилоят ҷиҳати беҳтар намудани базаи моддию техникии қисмҳои ҳарбии ҳудуди вилоят ғамхории доимӣ зоҳир карда, барои беҳтар намудани шароити хизмат чораҳои зарурӣ меандешад.

Дар зарфи бисту шаш сол Артиши миллии мо ба мактаби тарбияи ватандӯстиву ватандорӣ ва матонату мардонагӣ табдил ёфта, то имрӯз дар сафҳои худ даҳҳо ҳазор ҷавонони обутобёфтаро ба камол расонид. Имрӯз ҷавонони бонангу номуси мо хуб дарк мекунанд, ки хизмат ба Ватан барои онҳо қарзи муқаддаси фарзандӣ ва рисолати мардонагист.

Ҳамзамон, муовини якуми Раиси вилоят Хол Ҳайдар ба як қатор ҳомиёни далеру шуҷои Ватан, афсарону сарбозон ва кормандони комиссариатҳои ҳарбӣ Сипоснома ва туҳфаҳои Раиси вилоятро тақдим дошт.

Барномаи пурмуҳтавои фарҳангӣ, ки саршор аз меҳру муҳаббат ба Ватан буд, ба тантанаи идона ҳусни анҷом бахшид.

Мухтори Абдулло,
«Ҳақиқати Суғд»

 

Add comment


Security code
Refresh