ВАТАНДӮСТӢ АЗ ИМОН АСТ!

Details

Published on Thursday, 09 March 2023 10:20

Сарзамине, ки инсон дар он зода шудаву хуни нофаш рехтааст, обу хокаш парваридааст ва аз ҳавои тозааш нафас кашидааст, Ватан унвон дорад, ки бемисл асту инсон то охири умраш аз он қарздор аст. Зеро Ватан баробарарзиш бо Модар асту дар тинати инсон нисбати модари ширипистондодааш меҳру муҳаббати беандоза ҷойгир аст.

Мебояд чунин эҳсосоти олӣ нисбат ба Ватан низ дар қалби ҳар инсон вуҷуд дошта бошад. Алалхусус, насли ҷавони имрӯза, ки дар фазои пуртазоди иттилоотӣ соҳиби навидҳо мегардад, бояд хуб дарк намоянд, ки муборизаи иттилоотӣ байни давлатҳо, динҳо, мактабҳои илмӣ – идеологӣ, фалсафаи дунёӣ ва ҳоказо хеле ҳассос асту интихоби маълумоти воқеӣ, фаҳмишу тарғиби ғояҳо кори саҳл нест. Агар, каме эътибор надиҳад, бидуни ихтиёр ба чоҳи идеологии ифротгароёни пинҳонӣ меғӯтад. Бинобар ин, қабули Қонуни Ҷумҳурии Тоҷикистон “Дар бораи тарбияи ватандӯстии шаҳрвандон” хеле бамаврид ва муфид аст, ки аз ҷониби ҷомеа комилан дастгирӣ ёфта истодааст.

Дар ин замина, масъулини ҳамаи мақомотҳои давлатию ҷамъиятӣ вазифадоранд, ки муҳтавои Қонуни мазкурро байни ҷомеа фаъолона тарғибу ташвиқ намоянд. Ҷоиз ба қайд аст, ки дар ин ҷода аз чорчӯбаҳои мавҷудаи расмӣ, сохтакорӣ, риёкорӣ ва амалҳои амсоли онҳо мебояд парҳезу худдорӣ кард.

Дар ҳошияи андешаҳои баёнгардида боисрор талаб менамоям, ки масъулини соҳаи идеологии кишвар шаклу усулҳои нави тарғиби тарбияи ватандӯстии шаҳрвандонро роҳандозӣ намоянд. Масалан, омода намудани гурӯҳи ташаббускори ҷавон бо мусаллаҳсозии онон бо дониши чуқури мисолҳои воқеӣ бо тафсилоташ аз маълумоти мақомоти ҳифзи ҳуқуқ ва аз ҷониби онҳо дар маҳаллаҳо, чойхонаҳо, мавзеъҳои ҷамъиятӣ ташкил намудани суҳбату вохӯриҳои ғайрирасмӣ мувофиқи мақсад мебошад.

Давоми ин тадбирҳо метавон озодона фикру андешаҳои ҳамаи иштирокчиён шунида, муҳокима карда шавад ва посуху хулосаи мушаххас изҳор гардад. Ҳамаи қишрҳои ҷомеаро мебояд, ки аз фаъолият дар тарбияи ватандӯстӣ дар канор набошанду садоқати хешро ба Ватани маҳбуб собит созанд.

М.СОБИРОВ,
дотсенти Донишгоҳи давлатии Хуҷанд
ба номи академи Бобоҷон Ғафуров