Шиносоии Раиси вилоят бо рафти сохтмони муассисаи томактабӣ дар ноҳияи Мастчоҳ

Нимаи дуюми рӯзи 29 июл Раиси вилояти Суғд Раҷаббой Аҳмадзода бо мақсади шиносоӣ бо ҷараёни корҳои ободониву созандагӣ ва ҷиҳати иштирок дар маросими ифтитоҳи иншооти гуногун ба ноҳияи Мастчоҳ сафар кард.

Ёдовар бояд шуд, ки ба истиқболи 30-солагии Истиқлолияти давлатии Ҷумҳурии Тоҷикистон дар ноҳияи Мастчоҳ бунёду навсозии беш аз 500 иншоот ба нақша гирифта шуда, дар даҳҳо иншооти ҷашнӣ корҳои сохтмонӣ ҷараён доранд. Дар нимсолаи якуми соли равон дар ноҳия бо харҷи 14 миллиону 560 ҳазор сомонӣ  68 иншооти таъиноти гуногун сохта ба истифода дода шудааст.

Зимни сафар Раиси вилоят рафти корҳои сохтмониро дар чанде аз иншооти ҷашнӣ мушоҳида намуд. Раҷаббой Аҳмадзода нахуст ба маҳаллаи 40-солагии Дилварзини Ҷамоати деҳоти Палдорак ташриф овард ва бо рафти корҳои сохтмонӣ дар муассисаи томактабӣ шинос гардид. 

Чуноне иттилоъ дода шуд муассисаи томактабӣ ҷиҳати иҷрои дастуру ҳидоятҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз ҷониби соҳибкори маҳаллӣ Оймаҳмад Шарипов бунёд гардида истодааст. Тибқи лоиҳа барои бунёди иншоот 2 миллион сомонӣ пешбинӣ гардида, то имрӯз 80 дарсади корҳои сохтмонӣ  анҷом ёфтаанд. Муассисаи мазкур барои 80 нафар тарбиятгиранда дар як баст сохта шуда,  аз ду ошёна иборат мебошад.

Раиси вилоят ҳангоми шиносоӣ бобати бо сифати баланд ба итмом расонидани корҳои сохтмонӣ тавсияҳо дода, иқдоми соҳибкорро дар самти ба таълиму тарбия фаро гирифтани кӯдакон муҳиму саривақтӣ арзёбӣ кард.

Хадамоти матбуоти
Раиси вилояти Суғд

Add comment


Security code
Refresh