Мулоқоти Раиси вилоят бо роҳбари Намояндагии тиҷоратии Ҷумҳурии Тоҷикистон дар Ҷумҳурии Латвия

Рӯзи якшанбеи 12 май Раиси вилояти Суғд Раҷаббой Аҳмадзода роҳбари Намояндагии тиҷоратии Ҷумҳурии Тоҷикистон дар Ҷумҳурии Латвия Муҳаммадаваз Саидов ва ҳамроҳонашро ба ҳузур пазируфт.

Зимни суҳбат ҷонибҳо перомуни ҷалби сармоя ба иқтисодиёти вилоят ва ташкили корхонаҳои муштарак бо саҳмгузории инвесторони аврупоӣ мубодилаи афкор намуданд.

Раиси вилоят Раҷаббой Аҳмадзода дар оғоз оид ба вазъи иқтисодиву иҷтимоӣ ва раванди саноатикунонии вилоят маълумот дода, иброз дошт, ки бо дастуру ҳидоятҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон то соли 2021 дар вилоят беш аз 300 корхонаи саноатӣ бунёд карда мешавад. Дар ин раванд ташкили корхонаҳои муштарак низ ба манфиати кор буда, бо ин роҳ метавон садҳо ҷойи нави корӣ таъсис дод.

Дар аснои суҳбат масъулини Намояндагии тиҷоратии Ҷумҳурии Тоҷикистон дар Ҷумҳурии Латвия аз густариши ҳамкориҳои Тоҷикистон бо мамлакатҳои гуногуни олам изҳори хушнудӣ намуда, ҷиҳати бунёди корхонаҳои металлургӣ, ба роҳ мондани истеҳсоли консерваи моҳӣ, батареяҳои офтобӣ, бунёди корхонаи истеҳсоли ранг бо ҷалби сармоягузорони аврупоӣ лоиҳаҳоро пешниҳод карданд. Аз ҷониби меҳмонон пешниҳод гардид, ки дар марҳилаи аввал корхонаи коркарди маъдан, аз ҷумла барит бо наздик 100 ҷойи корӣ сохта шавад.

Раиси вилоят татбиқи чунин лоиҳаҳо ва бунёди корхонаҳоро ба манфиати кор арзёбӣ карда, таъкид кард, ки мақомоти иҷроияи ҳокимияти давлатии вилоят омода аст ҳамкориҳоро бо сармоягузорон тақвият бахшад.

Хадамоти матбуоти
Раиси вилояти Суғд

Add comment


Security code
Refresh