Омодагӣ ба истиқболи ҷашнҳои бузург вусъат меёбад

Сафари кории Раиси вилоят ба ноҳияи Мастчоҳ

19 сентябри соли равон Раиси вилояти Суғд, муовини якуми Раиси Маҷлиси миллии Маҷлиси Олии Ҷумҳурии Тоҷикистон Раҷаббой Аҳмадзода ба ноҳияи Мастчоҳ сафари корӣ намуда, аз вазъи иҷрои дастуру супоришҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва ҷараёни корҳои ободониву созандагӣ, бунёди иншооти муҳими иҷтимоӣ - фарҳангӣ дар ноҳия аз наздик шинос гардид.

Мавриди зикр аст, ки бо пешниҳоди Пешвои муаззами миллат соли 2020 дар ноҳияи Мастчоҳ ҷашни умумиҷумҳуриявии Ваҳдати миллӣ баргузор мегардад. Бобати сазовор истиқбол намудани ин ҷашни таърихии миллат алҳол дар ноҳия корҳои ободониву созандагӣ вусъати тоза меёбанд, ки бо дастгирии Ҳукумати мамлакат, Мақомоти иҷроияи ҳокимияти давлатии вилоят ва ноҳия, ҳамчунин соҳибкорон амалӣ мегарданд.

Раиси вилоят нахуст аз ҷараёни корҳои сохтмонӣ дар мактаби таҳсилоти умумӣ, ки дар шаҳраки Ганҷободи Ҷамоати шаҳраки Суғдиёни ноҳия бунёд мегардад, шинос гардид. Фармоишгари иншоот Идораи сохтмони асосии вилоят буда, пудратчӣ ҶДММ «Сохтмон» мебошад. Тибқи лоиҳа мактаби наву замонавӣ барои 720 хонанда дар ду баст пешбинӣ гардида, ҳамзамон дорои толори варзишӣ, ошхона ва буғхона барои гармидиҳии мутамарказонида хоҳад буд. Алҳол корҳои сохтмонӣ дар иншоот идома ёфта, сохтмончиён ният доранд, онро дар муҳлати муқарраргардида ва бо сифати баланд ба истифода диҳанд.

Раҷаббой Аҳмадзода дар суҳбат бо сохтмончиён аз сиёсати маорифпарваронаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ёдовар гардида, таъкид дошт, ки маҳз бо ҳидоятҳои неки Сарвари хирадманди кишвар вазъи соҳаҳои иҷтимоӣ, бахусус маориф дар вилоят, аз ҷумла ноҳияи Мастчоҳ куллан рӯ ба беҳбудӣ овардааст.

- Бинокоронро зарур аст, ки ба сифати корҳои сохтмонӣ эътибори зарурӣ дода, бо истифода аз ҳунарҳои миллӣ ва завқи баланди меъморӣ иншоотро барои хонандагон пешкаш намоянд, - таъкид дошт Раҷаббой Аҳмадзода.

Дар ин раванд Раиси вилоят масъулини сохторҳои вилоятӣ ва ноҳиявиро вазифадор намуд, ки бобати ободии шаҳрак, аз ҷумла чароғонкунии роҳҳо, бунёди майдончаҳои варзишӣ, кӯдакистон ва бунгоҳи тиббӣ ҳарчӣ зудтар тадбирҳои амалӣ андешанд.

Ба истиқболи ҷашни 30 - солагии Истиқлолияти давлатии Ҷумҳурии Тоҷикистон дар ноҳияи Мастчоҳ беш аз 300 иншооти мухталифи иҷтимоӣ - иқтисодӣ бунёд мегарданд, ки ба беҳтар шудани сатҳи зиндагии мардуми маҳал, таъсиси ҷойҳои корӣ ва ободиву пешрафти ноҳия боз ҳам мусоидат мекунанд.

Раиси вилоят ҳини сафари корӣ аз рафти корҳои сохтмонӣ дар иншооти толори варзишии «Паҳлавонони Суғд», ҳавзи шиноварӣ, Қасри бошукӯҳи фарҳанг, меҳмонхонаи замонавӣ шиносоӣ пайдо намуда, ба фаъолияти маркази хизматрасонии «Бӯстон» ҳусни ифтитоҳ бахшид.

Дар маҷлисгоҳи мақомоти иҷроияи ҳокимияти давлатии ноҳия таҳти раёсати Раиси вилоят Раҷаббой Аҳмадзода ҷаласаи фаъолони ноҳия доир гардид, ки дар он рафти иҷрои нақшаи чорабиниҳо ба истиқболи ҷашни 30 - солагии Истиқлолияти давлатии Ҷумҳурии Тоҷикистон ва таҷлили ҷашни умумиҷумҳуриявии ваҳдат дар ноҳия мавриди баррасӣ қарор гирифт.

Ҳамзамон, Раиси вилоят дар маъракаи оғози чиниши пахта дар хоҷагии деҳқонии «Бешариқ» - и ноҳия, мумфаршкунии роҳи деҳаи Роғ, ки бо саҳми сокинони он амалӣ мегардад, ширкат варзида, бо сокинони ноҳия мулоқоту суҳбатҳои судманд доир намуд.

Мухтори Абдулло,
«Ҳақиқати Суғд»

 

Add comment


Security code
Refresh