January 2021

15 January 2021

Раҷаббой Аҳмадзода собиқадори хизмати давлатӣ Баҳриддин Ахмедовро аёдат намуд

Раиси вилояти Суғд Раҷаббой Аҳмадзода ба манзили Корманди хизматнишондодаи маданияти Тоҷикистон, Шаҳрванди фахрии шаҳри Хуҷанд Баҳриддин Ахмедов рафта, эшонро аёдат намуд.

Зимни суҳбати самимӣ Раиси вилояти Суғд Раҷаббой Аҳмадзода аз хизматҳои шоёни Баҳриддин Ахмедов ёдовар шуда, аз ҷумла таъкид дошт, ки мавсуф  баробари таъсисёбии вилояти Ленинобод (Суғди имрӯза) моҳи декабри соли 1970 ба узвияти кумитаи ташкилии вилоят пешбарӣ гардида, ӯро 14 феврали соли 1971 дар Иҷлосияи  якуми Шўрои депутатҳои меҳнаткашони  вилояти Ленинобод котиби комиҷроияи Шўрои депутатҳои вилоят  интихоб карданд ва дар ҳамин вазифа то ба нафақа баромадан, яъне соли 1993 фаъолият бурд.

Читать далее

Боздиди Раиси вилоят аз корхонаҳои саноатии маркази вилоят

Дирӯз Раиси вилояти Суғд Раҷаббой Аҳмадзода дар шаҳри Хуҷанд бо раванди бунёд ва фаъолияти як қатор корхонаҳои саноатии шаҳр шинос гардид.

Нахуст дар минтақаи саноатии шимолу шарқии шаҳр бо фаъолияти корхонаи  «Хуҷандагро» ошноӣ пайдо карда шуд. Иттилоъ дода шуд, ки дар корхонаи  «Хуҷандагро»  барои хушксозии пиёз аз Аврупо таҷҳизоти навтаринро ворид месозанд. Онҳо тасмим гирифтаанд, ки ҳаҷм ва номгӯи маҳсулоти истеҳсолшавандаро зиёд намоянд. Айни замон дар корхона дар як шабонарӯз 20 тонна маҳсулоти хоҷагии қишлоқ коркард мегардад.

Читать далее

БОНУИ ЭҶОДКОРУ ЗЕБОИПАРАСТ

Мегӯянд, агар нафареро ҳунар омӯзонӣ ва ӯ ризқи хешро аз паси ҳамин дарёбад, ту инсони хушбахтӣ, зеро ба шарофати кӯшишу ғайрати ту шахсе ризқи хешро меёбад ва ба ин васила вазъи хеш ва аҳли оилаашро беҳтар месозад. Адолат Ҳоҷиева, - сокини шаҳраки Сирдарёи шаҳри Гулистон бошад, дасти 480 нафарро аз ҷамоатҳои деҳоти Чойруқдаррон, Сирдарё, Консой, Адрасмон, Зарнисору шаҳри Гулистон ва ноҳияи Бобоҷон Ғафуров рост кардаасту ҳар яке соҳиби Сертификат гардида, имрӯз дар паси дастгоҳҳои атласу адрасбофӣ нишастаанду ба зиндагии гуворо расиданд.

Адолат Ҳоҷиева - гирандаи Гранти Президентӣ худро хушбахт меҳисобад, ки соли рафта се нафар шогирдонаш соҳиби гранти Раиси вилоят гардиданд.

- Ман шодам, ки самараи меҳнати ман нисбат ба шогирдон барабас нарафтааст, балки онон аз ҳунаре, ки аз бар кардаанд, ризқ меёбанду ҳоло аз рӯи ибораи «турфа шогирде, ки ба ҳайрат оварад устодро» амал намуда истодаанд. Ин дастпарварони ман аллакай соҳибкасб гардида, боз садҳо нафари дигарро бо касби аҷдодӣ ошно карда истодаанд.

АЗ ДАРИЧАИ ТАЪРИХ

Адолат дар оилаи ҳунармандон ба дунё омадааст. Дар хотир дорад, ки панҷ хоҳару се додар дар як кунҷи хона нишаста, гоҳе бо ҳам бозӣ доштанду гоҳе чашм аз дастҷунбонии модар Саломатхон ва бибиаш Пошшохон наканда, ҳар як ҳаракати ононро аз бар мекарданд. Пас аз хатми мактаби миёнаи рақами 14-уми деҳаи Унҷии ноҳияи Бобоҷон Ғафуров тақдир Адолат Ҳоҷиеваро ба Ҷамоати шаҳраки Сирдарёи шаҳри Гулистон овард.

- Калонсолон мегуфтанд, ки «дар айёми наврасӣ ҳунареро аз бар кардан, қироати маводе ва ё аз худ кардани шеър чун нақш бар санг дар хотир мемонад», рост будааст. Вақте дар мактаби миёна ба дарси таълими меҳнат мерафтем, дар паси мошини дарздӯзӣ нишаста, ба дӯхтани чизе агар машғул шавем, то муаллимаамон нафареро омӯзонидан ман аллакай онро дӯхта мешудам. Гоҳе муаллимаамон агар нафареро омӯзонида истода бошанд, ба ман супориш медоданд, ки «Адолат, тарзи дӯхтани вай дугонаатро назорат намо, камбудиашро нишон деҳ, ислоҳ кунад».

Шояд ҳамин дастгирии муаллимаи меҳнат ҳам маро ба ин касб дилгарм сохт, - мегӯяд Адолат сар аз дӯхтани ҷомаи домодӣ набардошта.

Вақте ба камол расид, ӯро низ насиб гардид, ки паси дастгоҳи адрасбофию атласбофӣ нишинад. Касби авлодиро дар паси дастгоҳҳои абарқударти Комбинати қолинбофии Қайроққум ва ҶДММ «Зарбоф» - и шаҳри Хуҷанд идома бахшид.

Соли 2014-ум бошад, дар дили Адолат оташаке шуъла зад: «Чаро дигарон дар ин синну сол ҳунареро аз бар карда, ба касбе даст мезананду ман холабеғамӣ дорам?» Чанде пас бо дастгирии мақомоти иҷроияи ҳокимияти давлатии шаҳри Гулистон коргоҳи хурдакаке таъсис дод. Бо тавсияи пайвандон аз касби аҷдодӣ ёдовар шуд ва онро эҳё намуд. Занони хонанишин, духтаракони нав остонаи таълимгоҳро хатмкарда дараш мекӯфтанд. Ҳамин тариқ, шумораи шогирдонаш аз ҳисоби бонувони хонанишину духтаракони остонаи таълимгоҳро хатмкарда меафзуданд. Дастгоҳи дарздӯзие, ки аз хонааш оварда буд ва бо дастгирии мақомоти иҷроияи ҳокимияти давлатии шаҳри Гулистон миқдори он ба чор адад расид. Коркарди ашёи хом низ дар ҳамин нукта ба анҷом расид. Вақте соли 2015 соҳиби гранти Раиси вилоят гардид, номгӯи маҳсулоти омодасохтааш ва сафи кормандонашро аз ҳисоби шогирдонаш ба ҳашт нафар расонд.

АЗ АШЁИ ХОМ ТО ИСТЕҲСОЛ

- Борҳо Асосгузори сулҳу ваҳдати миллӣ – Пешвои миллат, Президенти мамлакат муҳтарам Эмомалӣ Раҳмон таъкид медоранд, ашёи хоми ватанӣ бояд дар дохил коркард шавад. Албатта бояд чунин бошад, охир, давраҳои пешин чӣ гуна буд? Мо ашёи хом, масалан, пахта мерӯёндем, аммо дар дигар ҷумҳуриҳо он коркард мешуд. Ҳоло мо тамоми имконият ва шароитро доро ҳастем.

Аз ҷониби мо танҳо софдилона меҳнат кардан лозим аст, – мегӯяд Адолат бодиққат ба риштаҳои рангдодааш нигариста.

Айни ҳол онҳо ресмони пахтагиро аз коргоҳи дӯзандагии 1 - Май ва бирешимро аз ҶДММ «Атласи Хуҷанд» дастрас мекунанду боқимонда рангубор намудан, аз он матоъҳои навъҳои карбос, шоҳии гулоб, шоҳии подшоҳии сабз, адрас, кӯкқарға ва ғайраро дар ҳамин сех омода карда, инчунин куртаву поҷомаву галстуку сумкачаҳо, пойафзол, нимтана, костум ва дигар навъи дӯхтанро худ ба анҷом мерасонанд.

НУКТАИ ФУРӮШ - БАҲРИ ПЕШРАВИИ КОР

Зани дурандешу пухтакор Адолат Ҳоҷиева вақте ба истеҳсоли матоъ ва аз он дӯхтани навъҳои гуногуни сарулибосро ба анҷом расонд, боз ба андеша ғӯтавар гашт: «Охир, ашёи хом ҳаст, истеҳсол ҳаст, навъҳои гуногуни дӯхтанро ба анҷом расонида истодаем, пас чаро нуктаи фурӯшро низ ташкил накунем?» Бо ҳамин мақсад аз марказҳои савдои «Саховат» -и шаҳри Хуҷанд ва «Ирам» -и шаҳри Гулистон гӯшаеро барои савдои молҳои омоданамудаашон интихоб кард.

- Ба ин васила боз ду ҷойи корӣ муҳайё гардид ва ду оила зисти хешро беҳтар сохтанд, - мегӯяд бо қаноатмандӣ ин бонуи меҳнатқарин, ки бо ин баҳона минбаъд ба муҳрабофию омода сохтани туҳфаҳо барои сайёҳон низ пардохт.

МЕРОСБАРОНИ ҲУНАР

- Ман имрӯз аз шодравон бибиаму модарам, тағои ҳунармандам Иброҳимҷон Мамадҷонов ва духтарашон Назокатхон миннатпазирам, ки ба шарофати заҳмати устодии онон ба чунин поя расидам. Ибораи гузаштагонамон «аз гаҳвора то гӯр кор ёд мегириву аз олами ҳунар воқиф мешавӣ», ҳақ асту рост.

Гарчанде шогирдони бешумор дорам, аммо то ҳол аз пирони кор, аз ҷавонон маслиҳату машварат мепурсам, - мегӯяд бо қаноатмандию шодмонӣ Адолат. Адолат на танҳо бофанда, ресанда, дӯзанда, эҷодкор, инчунин фарзандону наберагони худро низ чун идомадиҳандаи ҳунари аҷдодӣ меомӯзонад. Ҳатто арӯси хонадонашро низ аз ҳунари авлодӣ воқиф сохтааст.

Пайвандони умраш Адибахон дар истироҳатгоҳи «Уқобча» меҳнат мекунаду дар хонааш низ дастгоҳи бофандагӣ дорад, инчунин либосҳои шинаму замонавиро ба мизоҷонаш омода месозад ва мисоли модараш имсол соҳиби гранти Раиси вилоят гардид. Духтари дуюмаш Азизахон бошад, истиқоматкунандаи Ҷамоати деҳоти Овчӣ – Қалъача асту ҳамроҳи шогирдону дастпарваронаш бо адрасбофию сӯзанидӯзӣ, қуроқдӯзию рӯймолдӯзӣ машғул аст.

Арӯси хонадонаш Мадинахон хатмкардаи Донишкадаи политехникии Донишгоҳи техникии Тоҷикистон ба номи академик Муҳаммад Осимӣ буда, ба ҷуз барномасозӣ, инчунин аз ҳунарҳои хушдоманаш воқиф гардида, боз дар ҳамкорӣ бо дӯзандагони Маркази савдои «Шарқ» - и шаҳри Хуҷанд муҳрабофӣ низ мекунад. - Ин касбест, ки инсонро аз рӯзҳои қашшоқиву гуруснагӣ раҳоӣ мебахшад, ҳоло наберачаам Анисахон шавқи зиёд дорад, маълум, ки аз касби аҷдодӣ мерос хоҳад гирифт, - гуфт бо хурсандии беинтиҳо Адолат аз боби меваи умраш бо меҳр ҳарф зада.

ГРАНТ-БАҲРИ РУШДИ ҲУНАР

- Ҳеҷ бовариам намеомад, вақте бо воситаи телефон аз ғолибияти лоиҳаи ман хабар доданд, ба қавле, дар куртаам нағунҷидам. Охир, шукри даврони имрӯз дорам, ки меҳнати маро қадр мекунанд, - мегӯяд Адолат.

- Сол аз сол анъанаҳои хубро Пешвои муаззами миллат ҷорӣ намуда истодаанд. Эҳёи ҳунарҳои аҷдодӣ, озмунҳои мухталиф баҳри рушди соҳаҳои илму маориф, тандурустӣ ва фарҳанг. Тавассути телевизион аз боби озмуне, ки давоми ду сол дар мавзӯи «Фурӯғи субҳи доноӣ китоб аст» идома дорад, бинед, ҳамаро – пиру барноро ба хондан ҷалб намуда истодаанд.

Ин иқдоми хубест. Солҳои пешин, дар даврони бачагиамон асарҳои зиёдеро бо шавқ мехондем ва ҳоло бо дастуру ҳидояти Пешвои миллат боз ба асли худ - ба хондану шеърхонӣ пардохта истодаем. Ҳамаи инро аз меваҳои даврони Истиқлолият медонам.

АНҶОМБАХШИ СУҲБАТ

Адолат Ҳоҷиеваро чун зани фаъол, меҳнатӣ, ҳунарманди асил ва кордон муаррифӣ сохтем. Ӯ соҳиби гранти Президентӣ гардид, ҳоло муҳлате нагузашта, аллакай нақшаҳои хешро амалӣ сохта истодааст.

Ҳафт мошини дардӯзӣ, ки аз ин ду дастгоҳи йӯрмадӯзӣ, се мошини барқӣ, ду мошини пуриқтидор, яъне барои дӯхтани палто, нимтана, дарзмол, мизи корӣ, ашёи хом, аз ҷумлаи риштаи пахтагӣ дастрас кардааст. Шумораи кормандонашро аз ҳашт нафар то ба бист нафар расонида, дар назди осоишгоҳи «Баҳористон» низ як нуқтаи фурӯш ташкил карданист, зеро дар ин мулки ободу зебо, дар як мавзеи биҳиштосо месазад, ки як нуқтаи намоиши либосу анъанаҳои миллиро таъсис диҳем, то ин ки бори дигар аз халқи эҷодкору зебоипараст буданамон ба ҷаҳониён дарак диҳем, - гуфт дар хотимаи суҳбат бонуи ҳунарманд Адолат Ҳоҷиева.

Тавҳида ҶӮРАЕВА,

Аълочии матбуоти Ҷумҳурии Тоҷикистон

Читать далее

ҲАДАФ: ОМОДА НАМУДАНИ МУТАХАССИС БА САФИ АРТИШ

Дар самти омода намудани мутахассис ба сафи Артиши миллӣ аз ҳисоби ҷавонони болаёқат ва далеру шуҷоъ саҳми Ташкилоти ҷамъиятии мададгори мудофиаи вилояти Суғд ва зерсохторҳои он дар шаҳру ноҳияҳо басо назаррас аст. Алҳол ин ташкилот дар тобеияти худ се мактаби муттаҳидаи техникӣ, як мактаби ронандагӣ, як клуби минтақавии ҳавопаймоӣ, панҷ кумитаи шаҳрӣ, даҳ кумитаи ноҳиявӣ ва ду ташкилоти ибтидоии ҳуқуқи кумитадоштаро муттаҳид намуда, дорои 41269 нафар аъзо мебошад.

Бино ба маълумоти ташкилоти мазкур, аз оғози соли 2020 бо мақсади тарбияи ҳарбӣ - ватанпарастии ҷавонон, алалхусус, байни ҷавонони синни даъватӣ ва тодаъватӣ ва дар сатҳи баланд таҷлил намудани 27-умин солгарди таъсисёбии Қувваҳои Мусаллаҳи кишвар “Нақшаи моҳонаи корҳои ташкилӣ-оммавӣ ва таблиғотии ҳарбӣ-ватанпарастӣ» тасдиқ гардид ва дар доираи он моҳи феврал бо ҳамкории Комиссариати ҳарбӣ ва Раёсати кор бо ҷавонон ва варзиши вилоят байни сарбозону хизматчиёни сохторҳои қудратӣ спартакиадаи ҳарбӣ-варзишии «Ҳомии Ватан» баргузор шуд.

Давоми соли 2020 бо мақсади ҷалби ҷавонон ба сафи Қувваҳои Мусаллаҳи кишвар созмонҳои мудофиавии ТҶММ-и шаҳру ноҳияҳои вилоят мусобиқаҳои ҳарбӣ-варзишӣ, аз ҷумла тирпарронӣ, ба қисмҳои нопурра ҷудо ва ҷобаҷокунии автомат, норинҷакпартоӣ, турниккашӣ, давидан, велосипедронӣ, гузаштан аз монеаҳоро баргузор намуда, инчунин баҳри аз наздик шинос намудани ҷавонони синни даъватӣ ва тодаъватӣ бо шарту шароити хизмат дар сафи Қувваҳои Мусаллаҳи кишвар дар ҳамкорӣ бо комиссариатҳои ҳарбӣ «Рӯзҳои дари кушод» дар қисмҳои ҳарбии №№01972, 14356б, 051056, 3501, 05170, 0202, 04533, 0216 ва 07746 ташкил ва баргузор намудаанд.

Давоми соли гузашта кумитаҳои шаҳрию ноҳиявӣ ва ташкилотҳои ибтидоии ҳуқуқи кумитадоштаи ТҶММ - и вилоят баҳри беҳтар намудани фаъолият ва дар сатҳи баланд омода намудани мутахассисон ва кадрҳои техникии ниёзи хоҷагии халқ чораҳои зарурӣ андешида, аз рӯи нақша - вазифаи Қувваҳои Мусаллаҳи кишвар 423 нафар мутахассис тайёр намудаанд. Ҳамзамон, баҳри мусоидат намудан барои иҷрои даъвати баҳориву тирамоҳӣ барои хизмати ҳарбӣ дар ҳамкорӣ бо мақомоти иҷроияи ҳокимияти давлатии шаҳру ноҳияҳо иловатан 1150 нафар ҷавонони синни даъватиро ҳамчун мутахассис омода намуда, барои сафарбар намудан ба хизмати Ватан-Модар ба комиссариатҳои ҳарбӣ пешниҳод карданд.

Тибқи иттилои масъулин, дар тобеияти ин ташкилот се Мактаби муттаҳидаи техникӣ мавҷуд аст, ки яке аз онҳо дар шаҳри Хуҷанд ҷойгир буда, ҳамасола барои омода намудани мутахассис барои сафҳои артиш фаъолият менамояд. Мактаби мазкур ронандагон ва алоқачиёни касбиро, ки барои Қувваҳои Мусаллаҳ лозиманд, тайёр мекунад. Базаи техникии мактаб мукаммал буда, дорои машқгоҳҳои автомобилии “Автодром”, обии “Вододром”, утоқҳои кории “ЛПЗ - ТО”, синфхонаи радиотехникӣ ва бунгоҳи тиббӣ буда, барои босифат гузаронидани дарсҳо мусоидат менамоянд. Мақсади ягонаи ин мактаб омода намудани ҷавонони синни даъватӣ ба сафи артиш мебошад. Ҷавононро дар риштаи ронандаи дараҷаҳои “С”, “В” ва алоқачӣ омода менамояд.

Ташкилоти ҷамъиятии мададгори мудофиаи вилоят ва зерсохторҳои он дар шаҳру ноҳияҳо кӯшиш менамоянд, то аз ҳисоби ҷавонони чусту чолок ва қавиирода мутахассисони хуб омода намуда, ба сафи Артиш равона намоянд.

Истамҷони НАҶМИДДИН,

“Ҳақиқати Суғд”

Читать далее

ИҶРОИ БАРНОМА - ТАЛАБОТИ ЗАМОН

Соҳаи маориф яке аз самтҳои муҳими кишвар ба ҳисоб меравад, зеро маҳз таълиму тарбияи дуруст метавонад дар оянда мутахассисони пурқувват ва соҳибтахассусро ба воя расонад.

Аз ин лиҳоз, дар ин самт барномаҳои давлатии гуногун ба тасвиб расидаанд. Яке аз онҳо «Барномаи рушди таҳсилоти томактабӣ ва миёнаи умумии хусусӣ барои солҳои 2014 -2020» аст. Тавре аз Раёсати маорифи вилоят иттилоъ доданд, дар ин самт сохтмон, ташкил ва бунёди иншооти таълимӣ хуб ба роҳ монда шудааст.

Алҳол дар вилоят 55 муассисаи таълимии томактабӣ ва 13 муассисаи таҳсилоти миёнаи умумии хусусӣ ва дар умум 60 муассисаи таҳсилоти томактабии хусусӣ ва 30 муассисаи таҳсилоти миёнаи умумии хусусӣ таъсис ёфта, бомаром фаъолият намуда истодаанд.

Иҷрои ин барнома дар ноҳияи Спитамен чӣ гуна ба роҳ монда шудааст ва оё давоми 6 сол он ба пуррагӣ амалӣ гардид?

Тибқи маълумоти Раёсати маориф нақшаи иҷрои барнома дар самти ташкил ва ба истифода супоридани муассисаҳои таҳсилоти томактабӣ ва миёнаи умумии хусусӣ дар ноҳияи Спитамен 25 фоиз иҷро шудааст. Боиси зикр аст, ки алҳол дар ноҳия 32 муассисаи таҳсилоти миёнаи умумӣ, 1 литсей, 2 муассисаи таҳсилоти умумии ғайридавлатӣ ва 11 муассисаи томактабӣ амал менамояд.

Инчунин, интернати наздимактабӣ, Маркази технологияи информатсионӣ ва коммуникатсия, Маркази дарёфт ва рушди истеъдодҳо, Маркази таҳсилоти иловагӣ фаъолият менамоянд. Теъдоди умумии хонандагони муассисаҳои таълимӣ дар соли таҳсили 2020-2021-ум 30839 нафар буда, аз ҷумла 15068 нафар духтар ба таҳсил фаро гирифта шудааст. Соли 2017 дар Ҷамоати деҳоти Истиқлол Муассисаи таҳсилоти умумии ғайридавлатӣ (хусусӣ) - и “Мактаби Акрам” ба фаъолият оғоз кард.

 Муассиса аз 12 синфхона иборат буда, ҳамаи онҳо синфхонаҳои фаннӣ мебошанд. Бино ба гуфти директори муассиса Иноят Холмуродова ба кори таълим 24 нафар омӯзгор аз шаҳри Хуҷанд ҷалб шудаанд. Дар мактаб толори маҷлисгоҳ ва ошхонаи алоҳида мавҷуд аст, хонандагону омӯзгорон як маҳал бо хӯроки гарм таъмин ҳастанд.

- Хонандагони мо дар олимпиадаву озмунҳои ноҳиявӣ, вилоятӣ ва ҷумҳуриявӣ ширкат варзида, ҷойҳои намоёнро ишғол кардаанд.

Имрӯз талабот ба муассисаи таълимӣ зиёд аст, зеро хатмкунандагони мо аксар дар донишгоҳҳои олии кишвар ва берун аз он таҳсил карда истодаанд, - гуфт Иноят Холмуродова.

Боиси таъкид аст, ки толибилмони муассисаи мазкур на танҳо аз худи ноҳия, балки аз шаҳру навоҳии Хуҷанд, Мастчоҳ, Зафаробод, Ҷаббор Расулов, Деваштич мебошанд. Барои баланд бардоштани савияи дониши хонандагон дар муассиса дар як моҳ ду маротиба озмуни “Заковат” баргузор шуда, ғолибон ҳавасманд гардонида мешаванд. Баробари ин муассиса дорои тахтаи электронӣ, синфхонаи компютерӣ ва китобхонаи беҳтарин аст.

- Дарсҳои хонандагон тариқи электронӣ гузаронида шуда, дар синфхонаи компютерӣ барои омӯзишу азхудкунии барномаҳои компютерӣ тамоми шароит муҳайёст. Барои фаъолияти кории омӯзгорон мактаб ба шабакаи интернетӣ пайваст буда, дорои сомонаи худ мебошад ва ҳамаи чорабиниву дарсҳои кушод, ҳунаромӯзиву маҳфил ва озмунҳои дохилии хонандагону омӯзгорон дар сомона ҷой дода мешавад.

 Бо боварӣ метавон гуфт, ки толибилмони мо аз таҷҳизоти омӯзишии муосир васеъ бархурдоранд. Ҳамчунин, китобхонаи мо дар ноҳия ҳамчун “Китобхонаи беҳтарин” дониста шуд, - изҳор дошт Иноят Холмуродова.

Муовини мудири шуъбаи маорифи ноҳия Алимардон Абдуллозода изҳор дошт, ки аксари хатмкунандагони макотиби ноҳия ба муассисаҳои олии кишвар ва берун аз он дохил шуда, ҳамчун мутахассисони соҳибкасб ба ноҳия бармегарданд.

 - Боиси зикр аст, ки дохилшавӣ ба донишгоҳҳои олӣ 1032 нафарро ташкил медиҳад, ки бо тариқи Маркази миллии тестӣ 1003 нафар, тариқи квотаи Президентӣ 16 нафар ва ба хориҷи кишвар 13 нафар дохил шудаанд, - гуфт Алимардон Абдуллозода.

Дар ноҳия ҳамчунин кӯдакистони хусусии “Шалола” фаъолият мебарад. Кӯдакистон соли 2015 ба фаъолият оғоз карда, аз ду гурӯҳ иборат аст. Барои кӯдакон тамоми шароит муҳайё буда, бо се маҳал хӯроки гарм таъминанд. Масъулин дар самти тарбияи ватандӯстию ифтихори миллии кӯдакону наврасон тадбирҳои судманд меандешанд.

Шаҳбону ОЛИМОВА,

«Ҳақиқати Суғд»

Читать далее

14 January 2021

Шиносоии Раиси вилоят бо рафти корҳои ободонӣ дар ноҳияи Ҷаббор Расулов

Дар ноҳияи Ҷаббор Расулов ба истиқболи ҷашни 30-солагии Истиқлолияти давлатии Ҷумҳурии Тоҷикистон корҳои ободониву бунёдкорӣ вусъати тоза пайдо намуда, сохтмони иншооти ҷашнӣ бомаром идома дорад.

Тавре зимни шиносоии Раиси вилоят Раҷаббой Аҳмадзода бо ҷараёни корҳои ободонӣ иттилоъ дода шуд, ба пешвози ҷашни таърихӣ тибқи нақшаи чорабиниҳои тасдиқшуда дар ноҳия бунёди 394 иншоот ба нақша гирифта шудааст. То имрӯз бошад 309 иншооти гуногун мавриди истифода қарор гирифта, дар иншооти боқимонда корҳои сохтмонӣ идома дорад.

Читать далее

Боздиди кории Раиси вилоят Раҷаббой Аҳмадзода аз ноҳияи Спитамен

Дар ноҳияи Спитамен ба истиқболи 30-солагии Истиқлолияти давлатии Ҷумҳурии Тоҷикистон корҳои ободониву бунёдкорӣ ҷараён дошта, сокинон барои дар сатҳи баланд таҷлил намудани ҷашни таърихӣ аҳлона меҳнат намуда истодаанд.

Раиси вилояти Суғд Раҷаббой Аҳмадзода ҷиҳати шиносоӣ бо рафти корҳои ободонӣ аз ноҳияи Спитамен боздид намуд. Чуноне иттилоъ дода шуд, соли 2020 дар ноҳияи Спитамен рушди соҳаи саноат таъмин гардида, ҳаҷми истеҳсоли маҳсулоти саноатӣ 668 млн. 687,9 ҳазор сомониро ташкил дод.

Читать далее

ҚАРОРИ РАИСИ ВИЛОЯТИ СУFД аз 6 январи соли 2021, №02

ҚАРОРИ РАИСИ ВИЛОЯТИ СУFД 

аз 6 январи соли 2021, №02, шаҳри Хуҷанд

Дар бораи расонидани кӯмаки моддӣ ба иштирокчиёну маъюбони

Ҷанги Бузурги Ватанӣ ва ҳамсарони бесаробонмондаи ҷанговарони дар ин ҷанг ҳалокгардида

Мутобиқи моддаҳои 19 ва 20 Қонуни конститутсионии Ҷумҳурии Тоҷикистон «Дар бораи мақомоти маҳаллии ҳокимияти давлатӣ», бо назардошти хизматҳои бузург ба иштирокчиёну маъюбони Ҷанги Бузурги Ватанӣ ва ҳамсарони бесаробонмондаи ҷанговарони дар ин ҷанг ҳалокгардида, бо мақсади қадршиносӣ ва дастгирии иҷтимоии онҳо ба муносибати 76 – солагии Рӯзи Ғалаба дар Ҷанги Бузурги Ватании солҳои 1941-1945 ва дархости сардори шуъбаи ҳифзи иҷтимоии аҳолии вилоят аз 25 декабри соли 2020, №831, ҚАРОР МЕКУНАМ:

1. Шуъбаи ҳифзи иҷтимоии аҳолии вилоят вазифадор карда шавад, ки аз 1 январи соли 2021 ба иштирокчиёну маъюбони Ҷанги Бузурги Ватанӣ ва ҳамсарони бесаробонмондаи ҷанговарони дар ин ҷанг ҳалокгардида ба ҳар яке ҳар моҳ дар ҳаҷми 200 сомонӣ аз ҳисоби маблағҳои ба шуъбаи ҳифзи иҷтимоии аҳолии вилоят дар соли 2021 ба ин мақсад пешбинишуда кӯмакпулӣ пардохт намуда, истифодаи мақсаднок ва босамари маблағи ҷудошударо таъмин намояд.

2. Раёсати Агентии суғуртаи иҷтимоӣ ва нафақаи назди Ҳукумати Ҷумҳурии Тоҷикистон дар вилояти Суғд вазифадор карда шавад, ки барои сари вақт пардохт гардидани кӯмакпулӣ дархостро то санаи 5-уми ҳар моҳ ба шуъбаи ҳифзи иҷтимоии аҳолии вилоят пешниҳод намояд.

3. Қарори Раиси вилояти Суғд аз 6 январи соли 2020, № 2 «Дар бораи расонидани кӯмаки моддӣ ба иштирокчиён ва маъюбони Ҷанги Бузурги Ватанӣ, маъюбони амалиёти ҷангӣ дар қаламрави давлатҳои дигар, маъюбони барқароркунии сохти конститутсионӣ дар Ҷумҳурии Тоҷикистон, инчунин аъзои оилаи ҷанговарони дар ин ҷангҳо ҳалокгардида» аз эътибор соқит дониста шавад.

4. Назорати иҷрои қарори мазкур ба зиммаи муовинони Раиси вилоят Зайнура Азимӣ ва Анвар Яъқубӣ гузошта шавад.

 

Раиси вилоят             Раҷаббой АҲМАДЗОДА

Читать далее

ЗАХИРАИ МАҲСУЛОТ ДАР САРДХОНАҲО КОФИСТ

Соли гузашта кишоварзони вилоят майдони кишти зироатҳоро бештар намуда, бо талошу заҳмати худ ҳосили фаровон руёнида, имрӯз ҳосили дастранҷи худро пешниҳоди аҳолӣ намуда истодаанд.

Аз ин рӯ, бо мақсади муътадил нигоҳ доштани нархи маҳсулоти кишоварзӣ дар давраи тирамоҳу зимистон Мақомоти иҷроияи ҳокимияти давлатии вилоят тадбирҳои судманд андешида, дар ин замина Раёсати иттифоқи матлуботи вилоят ва бозорҳои марказии шаҳру ноҳияҳои вилоят вазифадор шуданд, ки маҳсулоти кишоварзиро захира намоянд.

Иброҳим Мутуллозода, сардори Раёсати Ҷамъияти иттифоқҳои матлуботи вилоят гуфт, ки дар асоси қарори Ҳукумати Ҷумҳурии Тоҷикистон, қарори Раиси вилоят ва инчунин нақшаи тарҳрезишудаи Иттифоқи Тоҷикматлубот дар бораи захира ва харидорӣ намудани маҳсулоти кишоварзӣ аз шахсони инфиродӣ, хоҷагиҳои деҳқонӣ Иттифоқи матлуботи вилоят як қатор корҳоро ба сомон расонид. Бояд гуфт, ки аз моҳи сентябр ва инчунин аз моҳи октябр захираи маҳсулоти кишоварзиро оғоз намуда, ҳамаи анборҳое, ки зертобеъ ҳастанд, безарар гардонида, дар асоси нақша зиёда аз 500 тонна маҳсулоти кишоварзӣ захира намуданд. Аз ҷумла, дар шаҳру ноҳияҳои Истаравшан, Спитамен, Ҷаббор Расулов ва Мастчоҳ ва дар маҷмуъ дар он минтақаҳое, ки зертобеи матлубот ҳастанд, 100 фоиз маҳсулоти кишоварзӣ захира шуд. Маҳсулоти захирашуда, аз қабили пиёз, картошка, сабзӣ, себу ангур ва дигар намуд мебошад, - гуфт номбурда.

Дар ноҳияи Деваштич бо мақсади бе мушкилӣ паси сар намудани давраи тирамоҳу зимистони имсола тадбирҳои судманд андешида шудааст. Дар анбори нигаҳдории маҳсулоти иттифоқи матлуботи ноҳия дар ҳамкорӣ бо соҳибкорон якчанд тонна пиёз захира шуда, илова бар ин дар минтақаҳои дигари ноҳия ба қадри зарурӣ картошка нигоҳдорӣ ва пешниҳоди аҳолӣ гардонида хоҳад шуд.

Дар асоси дастуру супоришҳои Ҳукумати Ҷумҳурии Тоҷикистон Ҷамъияти матлуботи ноҳияи Деваштич барои самарабахш гузаронидани тирамоҳу зимистони солҳои 2020 - 2021 барои боло нарафтани нархи маҳсулоти хоҷагии қишлоқ ба қадри зарурӣ дар анбор пиёз захира шудааст ва дар минтақаи Калининобод 40 тонна картошка дар сардхона нигаҳдорӣ карда мешавад.

Масъулини иттифоқи матлуботи ноҳияи Деваштич бар он боваранд, ки дар ҳар хонадон мардум аз 1 то 100 тонна картошка ва дигар номгӯи маҳсулоти кишоварзиро захира намуданд.

Дар ноҳияи Шаҳристон бошад, барои захираи картошка ва мева сардхонаҳои нав бунёд гардиданд. Дар бунёди ин гуна сардхона талаботи муосир барои нигоҳдории ҳаҷми зиёд ва усулу анъанаҳои миллӣ ҷорӣ шуданд.

Иттифоқи ҷамъиятҳои матлуботи вилоят барои захираи маҳсулоти кишоварзӣ аз анборҳои мавҷуда ва сардхонаҳои нав истифода мебарад.

Аз ҷумла, дар шаҳри Исфара сардхонаи нав сохта, қисми бештари маҳсулоти кишоварзӣ захира шудааст. Мусоидати Иттифоқи Тоҷикматлубот ба захираҳои молиявӣ аз роҳҳои хариду захираи маҳсулот аз кишоварзон мебошад.

Дар Бозори марказии шаҳри Истаравшан зимни суҳбат бошандагон изҳор доштанд, ки фаровонии ҳосил ба поён рафтани нархи молу маҳсулот таъсир гузоштааст.

Бино ба гуфти Сафар Шодиев - сокини шаҳр, соли гузашта як килограмм пиёз аз 1 сомонию 80 дирам то 2 сомонӣ арзиш дошт. Имсол бошад, ин маҳсулот аз 1 то 1 сомониву 30 дирам нарх дорад. Бино ба иттилои Бахтиёр Саидзода - директори Бозори марказии шаҳри Истаравшан бозори марказии шаҳр, дар ҳамкорӣ бо соҳибкорон 100 тонна пиёз, 35 тонна картошка захира намудааст. Зимни омӯзиши ин мавзуъ дар анбори Иттифоқи матлуботи шаҳр захираи 20 тонна пиёз ва 10 тонна картошка ба назар расид. Бо мақсади сари вақт захира намудани маҳсулот иттифоқи матлуботи шаҳри Истаравшан бо се хоҷагии деҳқонӣ шартномаи ҳамкорӣ ба имзо расонидааст, тибқи ин қарордод, 10 тонна картошка захира карда шудааст.

Роҳбарияти Ҷамъияти иттифоқи матлуботи вилоят бар он боваранд, ки зарфият ва имконоти зерсохтори ҷамъият дар ҳамаи шаҳру ноҳияҳо мақсаднок истифода шуда, молу маҳсулоти кишоварзӣ захира карда мешавад. Дар Муассисаи давлатии «Боғи миллии Ваҳдат» сохта шудани сардхонаи замонавӣ имкон дод, ки қисми ҳосили боғоти муассиса захира карда шавад. Масъули Муассисаи давлатии «Боғи миллии Ваҳдат» гуфт, ки мо сардхонаро дар се марҳала истифода мебарем. Алҳол барои давраи зимистон сардхонаҳоро барои нигоҳдории меваю сабзавот баҳри таъмини бозори дохилӣ бо меваҳои тару тоза истифода бурда истодаем.

Тибқи иттилои Анвар Обидҷонов - раиси Иттифоқи матлуботи ноҳияи Спитамен анбори нигоҳдориро тоза ва безарар намуда, 15 тонна пиёз ва 10 тонна картошка захира намудаанд. Тавре ки зикраш рафт, омодагӣ ба давраи тирамоҳу зимистон яке аз масъалаҳои муҳим дониста шуда, тибқи вазифагузориҳо, дар баробари сохторҳои дахлдор иттифоқи матлубот, бозорҳо, инчунин мардум низ бояд ба қадри зарурӣ маҳсулоти ниёзи аввалияро захира намоянд ва давраи сарморо бе мушкилӣ паси сар созанд.

Нодир ТУРСУНЗОДА,

«Ҳақиқати Суғд»

Читать далее

БАШОРАТДЕҲИ РОҲИ МУНИРИ ФАРДО

Ҳукумати кишвар бо роҳбарии Асосгузори сулҳу ваҳдати миллӣ – Пешвои миллат муҳтарам Эмомалӣ Раҳмон тамому чораву тадбирҳои заруриро ҷиҳати рушди соҳоти гуногуни кишвар, аз ҷумла маориф ва фарҳанг равона карда истодааст.

Воқеан, таваҷҷуҳи аввалиндараҷа ба соҳаи маориф ва баланд бардоштани сатҳи донишу ҷаҳонбинии насли навраси кишвар тақозои замон ва шарти аслии рушду инкишофи давлат дар замони муосир мебошад. Имрӯз дар шароити ҷаҳонишавӣ ва рушди босуръати технологияҳои иттилоотӣ ҷавобгӯи сатҳу сифати ҷаҳонӣ будани мутахассисони ҷавон имкон медиҳад, ки Тоҷикистон дар арсаи байналмилалӣ мавқеи хешро муайян ва муаррифӣ кунад. Чунонки Сарвари давлат борҳо таъкид намудаанд, ояндаи Тоҷикистон дар дасти насли нав мебошад, тарбияи дуруст ва додани дониши ҷавобгӯи талаботи замони муосир бошад, вазифаи ҳар шаҳрванди кишвар, насли калонсоли ҷомеа аст.

Дар раванди бемайлони ҷаҳонишавӣ муҳимтарин омили пешгирии воридшавии унсурҳои бегона ба фарҳанги миллӣ ин рӯ овардан ба таърих ва огоҳ будан аз аслу насаби хеш мебошад. Расидан ба ин шинохт танҳо тавассути донишу хирад ва касби илм муяссар мешавад.

Сарвари давлат дар Паёми хеш ба ин нукта ишора намуда, таъкид намуданд, ки барои ҳар як фарди миллат, хусусан насли наврасу ҷавон дониши баланду хиради муосир зарур ва ҳатмӣ мебошад. Албатта, дар ин замина омӯхтани забонҳои хориҷӣ барои ҳар нафари худогоҳ шарти нахустини рушд ба ҳисоб меравад. Бинобар ин баҳри такмили таълим ва омӯзиши забонҳои русӣ ва англисӣ дар муассисаҳои таҳсилоти умумии шаҳру ноҳияҳои вилоят ҷиҳати тақвияту густариши омӯзиши забонҳои хориҷӣ, бахусус забонҳои русӣ ва англисӣ чораҳои зарурӣ андешида шуданд. Алҳол дар муассисаҳои таълимии вилоят 3280 нафар омӯзгори забони русӣ ва 2814 нафар омӯзгори забони англисӣ фаъолият доранд. Тавсеаи марказҳои забономӯзӣ дар маркази вилоят ва шаҳру навоҳии дурдаст низ аз самараи таваҷҷуҳи махсуси масъулин ба рушди забономӯзӣ мебошад.

Хурсандиовар аст, ки бо илҳом аз ҳидоят ва раҳнамоиҳои Асосгузори сулҳу ваҳдати миллӣ –Пешвои миллат муҳтарам Эмомалӣ Раҳмон пиру барно ба илму дониш ва китобхонӣ таваҷҷуҳи бештар зоҳир намуда истодаанд. Диққати аввалиндараҷа додан ба мутолиаи китоб ҷиҳати баланд бардоштани маърифатнокии худ, саъю талоши ҷавонон моро хушбин месозад, ки Тоҷикистони азиз дар ояндаи наздик бо мутахассисони сатҳи ҷаҳонӣ маъруфу машҳур гашта, хидмати фарзандон ба ободии кишвар дучанд мегардад.

Албатта, то имрӯз Ҳукумати Ҷумҳурии Тоҷикистон барои рушду тараққиёти соҳаҳои илму маориф, тандурустӣ, ҳифзи иҷтимоии аҳолӣ, фарҳанг тадбирҳои судмандро роҳандозӣ намуда, дар ин замина татбиқи сиёсати ҷавонон, занон ва оила ва рушди варзиш низ шоистаи зикр аст.

Дар Паёми гузашта Сарвари давлат таъкид намуданд, ки то ҷашни 30 - солагии Истиқлолияти давлатӣ 128 муассисаи томактабӣ ва 338 муассисаи таҳсилоти умумӣ бунёд гардида, дар маҷмӯъ 1332 муассисаи таълимӣ ва томактабӣ тармиму таҷдид карда мешавад.

Имрӯз мо мушоҳида мекунем, ки воқеан дар ин самт корҳо хеле хуб ҷараён дорад: Ҳукумати кишвар ва соҳибкорони ватаниву бурунмарзиамон ва дигар шахсони ҳимматбаланд дар амалӣ шудани ин нақшаҳои пешбинишуда талоши пурбор доранд. Зимнан гуфтанист, ки дар вилояти Суғд бо мақсади бо дастовардҳои назаррас истиқбол гирифтани санаи таърихии 30-солагии Истиқлолияти давлатии Ҷумҳурии Тоҷикистон дар асоси Фармони Президенти Ҷумҳурии Тоҷикистон аз 19-уми декабри соли 2017, №968 “Дар бораи ҷашни 30-солагии Истиқлолияти давлатии Ҷумҳурии Тоҷикистон”, қарори Раиси вилоят аз 14-уми марти соли 2018, №89 “Дар бораи эълон намудани 1300 рӯзи меҳнати зарбдор ба истиқболи 30-солагии Истиқлолияти давлатии Ҷумҳурии Тоҷикистон” ба тасвиб расида, нақшаи чорабиниҳо тасдиқ шуданд. Бо гузашти наздик ду сол мо муҳимият ва саривақтӣ будани ин қарори Раиси вилоятро эҳсос мекунем. Тадбирҳое, ки дар доираи шиори “1300 рӯзи меҳнати зарбдор ба истиқболи 30-солагии Истиқлолияти давлатии Ҷумҳурии Тоҷикистон ” амалӣ шуданд, ба низом ва баракати кор мусоидат кард. Иншооти зиёди ҷашнӣ сохта, ба истифода дода шуданд. Дар соли 2020 –ум низ бо вуҷуди соли вазнин будан корҳои созандагиву ободонӣ вусъати тоза гирифтанд. Новобаста аз он, ки пандемия ба буҷаи давлат хисороти ҷиддӣ овард, нақшаҳо бо низом амалӣ гаштанд. Чуноне аз ҳисоботи Раиси вилояти Суғд бармеояд, танҳо дар 11 моҳи соли 2020 барои 660 ҷойи нишасти талаба дар муассисаҳои таҳсилоти миёна, барои 510 ҷой дар муассисаҳои таҳсилоти томактабӣ иқтидорҳои иловагӣ ба истифода дода шуданд.

Давоми соли 2020-ум баҳри таҳкими корҳои ободониву созандагӣ бо маблағгузории буҷети ҷумҳуриявӣ, вилоятӣ ва шаҳру ноҳияҳо, инчунин бо ҷалби сармояи ватанӣ чандин иншооти ҷашнӣ бунёд гардиданд, ки дар ин миён мактабу кӯдакистон кам набуданд. Чунончӣ, соли гузашта кӯдакистони хусусии соҳибкорон Н.Ғафурова ва И.Исроилов барои 150 кӯдак, муассисаи таҳсилоти миёнаи умумии №12 барои 640 хонанда дар ду баст дар деҳаи Нови Ҷамоати деҳоти ба номи Турсун Ӯлҷабоев, муассисаи таҳсилоти миёнаи умумии замонавӣ барои 1280 хонанда дар ду баст, дар ноҳияи Спитамен, дар Ҷамоати деҳоти Саразм, дар Ҷамоати шаҳраки Суғдиёни шаҳри Панҷакент бинои муассисаи таҳсилоти миёнаи умумӣ барои 1200 хонанда дар ду баст дар маҳаллаи Ганҷободи Ҷамоати шаҳраки Суғдиён, кӯдакистони хусусии «Насли Ориё» барои 120 кӯдак бо 15 ҷойи нави корӣ, дар маҳаллаи «40-солагии Дилварзин»-и Ҷамоати деҳоти Палдораки ноҳияи Мастчоҳ, бинои нави сеошёнаи муассисаи таҳсилоти миёнаи умумии №36 барои 720 хонанда дар Ҷамоати деҳоти Понғози ноҳияи Ашт ва ғайраҳо сохта, ба истифода дода шуд.

11 муассисаи таълимии садамавӣ барқарор гардида, дар 15 бинои садамавии муассисаҳои таълимӣ корҳои сохтмонӣ идома доранд.

Ҳамзамон, таъмиру таҷдиди 228 муассисаи таълимӣ ба нақша гирифта шудааст ва то ҳол 199 муассисаи таълимӣ аз таъмири куллӣ бароварда шуда, дар 26 муассиса корҳо идома доранд. Ин тадбирҳои амалӣ ва ғамхории пайвастаи давлат моро рӯҳбаланд сохта, ҳидоятгари ободиву созандагиҳои нав ба нав мегардад.

Боиси хурсандист, ки ҳар сокини бонангу ори кишвар дар бунёду таҷдиди муассисаҳои маориф ва фарҳанг саҳми ватандӯстона гузошта истодаанд. Устодон назорати азхудкунии донишҳои замонавиро пурзӯр гардонида, ба наврасону ҷавонон барои мутолиаи китобҳои бадеиву илмӣ раҳбалад гашта, анъанаи устодиву шогирдӣ таҳким ёфта истодааст. Ин амал, албатта, қобилияти эҷодии насли ҷавонро тақвият мебахшад.

Бояд қайд кард, ки дар Паёми хеш Сарвари давлат ба таълиму тадриси чуқури фанҳои табиатшиносӣ, дақиқ ва риёзӣ таваҷҷуҳи бештар зоҳир намуда, дар замони муосир аҳамияти аввалиндараҷа доданро ба фанҳои дақиқ амри зарурӣ унвон намуданд. Аз ин ҷост, ки бо пешниҳоди Эмомалӣ Раҳмон ба хотири боз ҳам беҳтар ба роҳ мондани омӯзиши илмҳои табиатшиносӣ, дақиқ ва риёзӣ, инчунин барои тавсеаи тафаккури техникии насли наврас солҳои 2020 -2040 “Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф” эълон шуд.

Дар соли нахустини бистсолаи омӯзиш ва рушди фанҳои дақиқ мо аллакай аз самараи ин ташаббуси бесобиқа баҳравар шуда истодаем. Таваҷҷуҳ ба фанҳои даққиқ боиси афзун шудани корҳои созанда ва ташаббусҳои нек дар ин самт шуда истодааст. Дар макотиби оливу миёнаи кишвар озмунҳои гуногунҷабҳа аз фанҳои дақиқ баргузор гардида, истеъдодҳои нав ба навро пайдо карда истодааст. Мутмаинем, ин 20 сол барои Тоҷикистон олимони забардасти фанҳои дақиқро омода хоҳад сохт.

Сарвари давлат арзиши илмии ин ташаббусро ниҳоят бузург арзёбӣ намуда, тазаккур доданд, ки бо заҳмати чандинсолаи мо дар ин самт барои насли оянда меваи шакарбор хоҳад овард.

Дар шароити кунунӣ, яъне замоне, ки ҳар як фарди ҷомеа ба худшиносӣ ва ҳифзи хотираи таърихии худ беш аз пеш ниёз дорад, ба илмҳои дақиқ, ба ободиву созандагӣ ва густариши эҳсоси ватандӯстиву ифтихори миллӣ ва болоравии сатҳи маърифатнокии ҷомеа ҳамаҷониба мусоидат хоҳад кард.

Дар ин робита роҳбарону масъулони соҳа низ ба сатҳу сифати таълим аҳамият дода, ҷиҳати боло рафтани савияи донишу маърифатнокии хонандагону донишҷӯён тадбирҳои иловагиро роҳандозӣ намуда истодаанд. Дар ин ҷода диққати бештар додан ба тарбияи насли наврас боиси хушнудист. Баргузории озмуни “Фурӯғи субҳи доноӣ...” аз рӯи се самт: якуммиёни тарбиягирандагон ва хонандагони муассисаҳои таҳсилоти томактабӣ ва миёнаи умумӣ; дуюм - таҳсилоти ибтидоӣ, миёна ва олии касбӣ ва сеюм - дар байни калонсолон, ки ҳамасола баргузор шуда, натиҷаҳои қонеъкунанда дода истодааст башорати роҳи мунир аст, ки миллати тоҷик бо роҳбарии Пешвои муаззами хеш интихоб кардааст.

Сурайё ҲАКИМОВА,

“Ҳақиқати Суғд”

Читать далее