September 2020

30 September 2020

Боздиди кории Раиси вилоят Раҷаббой Аҳмадзода аз шаҳри Хуҷанд

Раиси вилояти Суғд Раҷаббой Аҳмадзода бо мақсади шиносоӣ аз фаъолияти гармхонаҳо ва ҳолати нашъунамои гулу ниҳолҳо аз КДК «Кабудизоркунӣ ва гулпарварӣ» боздид намуд.

Чуноне иттилоъ дода шуд, Корхонаи давлатии комуналии «Кабудизоркунӣ ва гулпарварӣ»-и шаҳри Хуҷанд дорои 8 гектар замин буда, айни замон дар панҷ адад гармхонаи он навъҳои гулу ниҳолҳои ардач, каталпа, бирючина, виола ва амсоли ин парвариш карда мешавад.

Читать далее

ТАҲАММУЛ МЕБОЯД, НА ИҒВОГАРӢ…

Посух ба гуфтаҳои Чингиз Макешов, роҳбари як ҳизби Қирғизистон

Медонем, ки  дар бисёр минтақаҳои наздисарҳадӣ, аз ҷумла  Овчиқалъача, Қулунди, баъзе манотиқи Исфара тоҷикону қирғизҳо  бо ҳамдигар дар муҳити ҳамдигарфаҳмӣ, дӯстиву рафоқат, ҳамкорӣ зиндагонӣ мекунанд. Чунонки сардухтури беморхонаи ноҳиявии ноҳияи Ҷаббор Расулов иброз медорад, дар беморхона ва осоишгоҳҳои ноҳия  даҳҳо сокинони минтақаҳои наздисарҳадӣ табобат мегиранду дар дили ягон нафари онон эҳсоси кинаву адоват ҷой надорад.

Вале  имрӯз  кирдори муғризонаи  роҳбари ҳизби ба ном «Йимон Нури» Чингиз Макешов  мардумони  сарзамини моро  нисбат ба амнияти хеш ба  ташвиш меандозад. Суханони ин саркардаи ҳизб  касро ба андеша водор месозад. Ин фард  гӯё дар фикри минбаъд  дар муросову мадоро  умр ба сар бурдани мардуми тоҷику қирғиз нест. Зеро иброз медорад,   ки «муаммои муноқишаҳои наздисарҳадиро дар сатҳи  роҳбарони ду кишвар ҳал кардан мумкин нест, муноқишаҳоро Бишкек ҳал намекунад, худи мардуми минтақаҳои наздисарҳадӣ ҳал мекунанд.  Ин суханон баръало бар он далолат мекунанд, ки  яъне,  тирпаррониву куштор дар минтақаҳои наздисарҳадӣ идома хоҳад ёфт. Охир чигуна  мешавад, ки  дар як гӯшаи ин мамлакат вазъияи муташанниҷ бошаду роҳбарияти кишвараш ба он дахолат накунад!

Боз  ӯ  дар ин минтақа  ба вазъият роҳбарӣ намудани  Ӯринбой Сапаралӣ  ном шахсро таъкид менамояд. Ҳол он ки  ин фард  барои авбошӣ  ҳабс гаштааст.

Чингиз Макешов  имрӯз мардумро  баҳри аз ҳар ҷиҳат фишороварӣ ба сокинони минтақаҳои наздимарзӣ даъват мекунад. Яъне бо надодани об ва ё  аз лиҳози иқтисодӣ фишор овардан ва ғайраҳо. Ӯ мардумро  ба он даъват карда истодааст, ки  яроқнок шаванд ва ҳар лаҳза  ба зарба задан омода бошанд.

Ҳамаи ин андешаҳои  муғризона ва  сабукфикронаи як нафар фард аст.  Вале  бояд андеша кард, ки Тоҷикистон ҳам  мамлакати бедарвоза нест.  Он Ҳукумат, роҳбар дорад ва ба  на як бору ду бор ба  амалҳои  иғвоангезона  посухи сазовор додааст. Ин ҷо як нуктаи муҳимро набояд аз мадди назар дур кард, ки мардумони тоҷику қирғиз  асрҳо инҷониб дар дӯстиву  рафоқат, ҳамдигарфаҳмӣ,  додугирифту равуо умр ба сар мебаранд. Як рафтори  беандешаёна  метавонад  ба решаи ин муносибат теша занад. Мо бо ҳам ҳамсоя, ҳамҷавор, ҳаммарз ҳастем ва  бояд ҳадду андозаи ин  муносибатҳоро нигаҳ дошт.

Р.Неъматзода,

«Ҳақиқати Суғд»

Читать далее

ҶАББОР РАСУЛОВ ИСТЕҲСОЛИ БЕШ АЗ 5 ҲАЗОР ТОННА ШОЛӢ

Дар вилояти Суғд ба кишту парвариши шолӣ аҳамияти ҷиддӣ зоҳир мешавад. Махсусан дар шаҳру навоҳии Исфара, Панҷакент, Бобоҷон Ғафуров, Ҷаббор Расулов бештар кишти шолӣ ба роҳ монда шудааст. Пас аз ҷамоварӣ ва коркард намудан аз он ба қавли мардум биринҷ ҳосил мешавад.

Биринҷро сокинони кишвари мо дар таомҳои миллӣ бештар  истифода мебаранд. Аз ин лиҳоз, майдони кишти ин навъи зироят ҳамасола васеъ карда мешавад. Масалан, агар соли 2019 дар миқёси вилоят 8920,5 гектар кишт шуда бошад, ин рақам давоми соли равон ба 9200,3 гектар баробар шуда, нисбат ба соли гузашта 208 гектар зиёд кишт шудааст.

Ҷаббор Расулов низ яке аз ноҳияҳои шоликор ба ҳисоб рафта, майдони кишти он сол ба сол зиёд мешавад. Бино ба иттилои муовини раиси ноҳия оид ба кишоварзӣ Тӯйчибой Отамуродзода имсол кишоварзон дар майдони беш аз 1100 гектар кишти шолӣ гузарониданд. Алҳол маъракаи дарави он бомаром ҷараён дорад. Ҳосилокии он дар ноҳия аз рӯи нишондиҳандаҳо бояд аз ҳар як гектар замин то 55 сентнерӣ ҳосил рӯёнида шавад. Мувофиқи дурнамо имсол уме даст, ки беш аз 5 ҳазор тонна шолӣ истеҳсол гардад. Дар ноҳия 1750 хоҷагии деҳқонӣ мавҷуд буда, аксарияти ин хоҷагиҳо ба кишту парвариши шолӣ машғуланд.

Зикриддин Султонов роҳбари Хоҷагии деҳқонии «Зикриддин» буда, дар 3,84 гектар замин кишти ҳама гуна зироатҳои кишоварзиро ба роҳ мондааст. Номбурда дар 1 гектар замин кишти шолӣ гузаронида буд, ки дарави онро аз санаи 28 – уми сентябр шуруъ намуд. Роҳбари хоҷагии мазкур мегӯяд, ки ҳосилнокии шолиро аз ҳар гектар замин беш аз 50 – 60 сентнерӣ умедвор аст.

Тибқи иттилои масъулин асосан кишти шолӣ дар Ҷамоати деҳоти Деҳмой ба роҳ монда шудааст. То имрӯз беш аз 100 гектар замини шолӣ даравида шуда,  барои коркард омода мебошад.    

Тӯйчибой Отамуродзода мегӯяд, ки кишти шолӣ асосан дар заминҳои шӯр ба роҳ монда мешавад. Зеро оби зери он намакҳои таркиби хокро шуста мебарад ва аз он ҳосили баланди шолӣ ба даст оварда мешавад. Пас аз кишти шолӣ заминҳои шӯрзада дубора ба кишти ҳамагуна зироатҳо омода мегарданд. Тавсияи мутахассисон ин аст, ки дар заминҳои шӯрзада дар сурати мавҷуд будани об кишти шолиро ба роҳ монда онро ба кишти дигар зироатҳои кишоварзӣ мутобиқат намоянд ва бозорҳои вилоятро бо ҳама намуди сабзавоту меаваҷот дар ҳама фасли сол таъмин намоянд, хубтар аст.

Истамҷони НАҶМИДДИН,

«Ҳақиқати Суғд»

Читать далее

Ворух рух во кардааст!...

Деҳоти Ворухи шаҳри Исфара аз минтақаҳои дурдасти Тоҷикистони соҳибистиқлол ба шумор рафта, дар роҳи рушд қадамҳои устувор мегузорад. Дар зарфи наздик 30 соли Истиқлолияти давлатӣ дар ин куҳандиёри аҷдодӣ иншооти зиёди таъиноташ гуногун сохта, мавриди истифода қарор дода шудааст. Мардуми меҳнатқарини деҳоти Ворух аз ғамхориҳо ва дастгириҳои ҳамешагии Асосгузори сулҳу ваҳдати миллӣ–Пешвои миллат муҳтарам Эмомалӣ Раҳмон бархурдоранд ва ҳамаи дастовардҳои худро натиҷаи талошҳои шабонарӯзии Сарвари давлат ва кӯшишу меҳнатҳои ҳалоли халқи меҳнатқарин медонанд.

Агар ба таърих назар афканем, деҳоти Ворух чун дигар минтақаҳои қадимаи Тоҷикистон таърихи ҳазорсолаҳо дорад. Дар китобҳои қадим, ба мисли «Авесто» ва «Бобурнома»-и Зуҳриддин Бобур доир ба Исфара маълумот дода шуда, аз Ворух ном бурда мешавад. Дар «Бобурнома» аз ҷумла омадааст ки: «Дар кӯҳпоя воқеъ аст. Обҳои равон, боғчаҳои босафо дорад. Дарахтони босамараш бисёр, вале бештари боғчаҳояш рахти бодоманд. Мардумаш тамом сорт ва кӯҳӣ, форсӣ гӯянд. Вилояти Исфара чор қисм кӯҳпоя аст: яке Исфара, дигаре Ворух, сеюм Сӯх, чорум Ҳушёр». Таърихнигорон чунин мешуморанд, ки: «Дар Авесто сухан аз ҳафт кишвари яздонӣ меравад, ки дар замони тӯфони ҷаҳонӣ наҷотгоҳи башар маҳсуб мешуданд. Он ду кишвари шимолӣ бо номҳои Воруба раштӣ ва Воруҷа раштӣ бо Румон чун наҷотгоҳ сутуда шудаанд ва дар замони Фаридун номи ин ду кишвар ба Саразм табдил ёфт. Ворӯи Панҷакенти имрӯза, Ворухи ноҳияи Исфара ва Румони шаҳри Хуҷанд дар Авесто бо номи ҳиндуаврупоӣ башорат медиҳад».

Имрӯз дар деҳоти Ворух беш аз 30 ҳазор нафар аҳолӣ умр ба сар мебаранд. Мардумаш дар пос доштани анъанаҳои гузаштагон ва рушди ҳунарҳои аҷдодӣ саҳми арзанда мегузоранд. Масалан, ҳунари оҳангарӣ, ки таърихи куҳан дорад, дар Ворух то ба ҳол побарҷост. Мардум бо истифода аз ҳунари оҳангарӣ на танҳо зиндагиашонро пеш мебаранд, балки онро аз насл ба насл мерос мегузоранд. Агарчи имрӯз ба маҳсулоти оҳангарӣ таваҷҷуҳ камтар аст, вале муҳим ин аст, ки дар ҳеҷ давру замон оҳангарӣ аз байн намеравад.

Осиё бештар аз 50 сол мешавад, ки фаъолият дорад. Мардуми маҳаллаи Сариқурумаи деҳоти Ворух гандум ва дигар ғалладонагиҳоро ба ин ҷо меоваранд, то орд кунанд. Бо ибтикори соҳибкорону саховатмандони маҳал соли ҷорӣ бинои осиё таъмиру навсозӣ гардида, дар шафати он обҷувоз қомат афрохтааст. Корҳои сохтмониву навсозӣ дар арафаи анҷомёбӣ қарор дорад. Сокинони деҳоти Ворух ба иншооти таърихӣ бо назари нек менигаранд ва дар ҳифзу гиромӣ доштани он кӯшиш ба харҷ додаанд. Дар иҷрои корҳои созандагӣ мардуми Ворух дастаҷамъона саҳми арзанда мегузоранд ва навсозии бинои осиё нишонаи иттифоқу ҳамдилии меҳнаткашони деҳоти Ворух мебошад.

Дар деҳоти Ворух ба ифтихори 30-солагии Истиқлолияти давлатии Ҷумҳурии Тоҷикистон бунёд, таъмиру навсозии беш аз 40 иншооти таъиноташ гуногун дар назар дошта шуда, дар қисме аз он корҳои сохтмонӣ бомаром пеш мераванд. То ба имрӯз як қисмати иншооти ҷашнӣ мавриди баҳрабардорӣ қарор гирифтааст, ки дар беҳбудии сатҳи зиндагии мардум нақши худро мегузорад. Дар баробари маблағгузории Ҳукумати Ҷумҳурии Тоҷикистон, Мақомоти иҷроияи ҳокимияти давлатии вилояти Суғд ва мақомоти маҳаллии шаҳри Исфара, соҳибкорони баландҳиммат ва саховатпешагони деҳоти Ворух барои бунёди иншоооти гуногун камари ҳимат бастаанд. Илова бар ин, мардуми бонангу номуси деҳоти Ворух кӯчаҳои деҳотро мумфарш намуда, бо ин васила дар ободонии маҳалли зисти хеш ҳиссагузорӣ мекунанд. Мардум тасмим гирифтаанд, ки ҷашни бузурги миллӣ - 30-солагии Истиқлолияти давлатиро бо меҳнати содиқона ва дастовардҳои арзанда истиқбол бигиранд. Қомат афрохтани иншооти мухталиф, ба монанди сартарошхона, марказҳои савдо, мактабҳои наву замонавӣ, қасри фарҳанг, майдончаҳои варзишӣ ва даҳҳо иншооти дигар нишонаи возеҳи ободкориҳо ва пуштибонии мардуми Ворух аз сиёсати пешгирифтаи Пешвои миллат муҳтарам Эмомалӣ Раҳмон мебошад. Кормандони касбу кори гуногун бо шукргузорӣ аз фазои сулҳу субот ва пойдории Истиқлолияти давлатӣ имрӯзҳо фаъолияти пурсамар доранд.

Маориф яке аз соҳаҳои афзалиятнок ба шумор рафта, бо дастгирӣ ва таваҷҷуҳи хосаи Ҳукумати Ҷумҳурии Тоҷикистон маблағгузорӣ ба ин соҳа сол аз сол зиёд мегардад. Беҳтар шудани шароити таълиму тарбия дар деҳот имкон фароҳам овард, ки сатҳи донишу маърифати наврасону ҷавонон боло равад. Айни замон дар деҳоти ворух 11 муассисаи таълимӣ мавҷуд буда, дар онҳо зиёд аз аз 5300 нафар хонанда ба таълиму тарбия фаро гирифта шудаанд. Бо мақсади фароҳам овардани шароити хуби таълим дар назди муассисаҳои таълимӣ биноҳои нави иловагӣ сохта, мавриди баҳрабардорӣ қарор мегиранд. Мисоли ин гуфтаҳо дар шафати бинои яке аз муассисаи таълимии деҳоти Ворух бо маблағгузории Мақомоти иҷроияи ҳокимияти давлатии вилояти Суғд 8 синхонаи барҳавои замонавӣ бунёд шудааст. Омӯзгорону хонандагони ин боргоҳи маърифат аз ин таваҷҷуҳ ва ғамхорӣ рӯҳбаланд гардида, изҳор медоранд, ки ҷавобан ба таълиму тарбияи наврасон дучанд кӯшиш ба харҷ медиҳанд.

Китобхониву китобдорӣ чун дар гузашта имрӯз ҳам муҳимияти худро гум накарда, баръакс ба он ибтикори бештар равона шудааст. Дар муассисаҳои таълимии деҳоти Ворух бо таваҷҷуи Ҳукумати мамлакат ва саҳми соҳибкорони ватандӯст шароити китобхониву китобдорӣ ба талаботи замони имрӯз мутобиқ гардонида шудааст. Хонандагон бо шавқи зиёд дар чунин ҳуҷраҳои барҳаво ба мутолиаи адабиёти гуногун машғул мешаванд. Дар доираи эълон гардидани Озмуни ҷумҳуриявии «Фурӯғи субҳи доноӣ китоб аст» ба китобхонаҳои муассисаҳои таълимии деҳоти Ворух номгӯи зиёди асарҳои тозанашр дастрас карда шудааст. Илова бар ин солҳои охир ба масъалаи тарбияи ҷавонон дар рӯҳияи ватандӯстӣ ва ифтихори миллӣ эътибори хоса дода шудааст. Ҳамин аст, ки ҷавонон дар ҳифзи марзу бум садоқати худро нишон дода, ихтиёран ба хидмати Модар-Ватан равона мешаванд.

Бо назардошти зиёд шудани аҳолӣ дар деҳоти Ворух маҳаллаҳои нави аҳолинишин бунёд гардида истодаанд. Яке аз чунин маҳаллаҳо ин маҳаллаи Сангтӯда аст, ки қисми зиёди мардум аллакай манзилҳои истиқоматии худро бунёд намудаанд. Дар ин маҳаллаи нав бо супориши Пешвои миллат муҳтарам Эмомалӣ Раҳмон муассисаи таҳсилоти миёнаи умумӣ сохта мешавад. Корҳои сохтмонӣ дар иншоот бо маблағгузории Мақомоти иҷроияи ҳокимияти давлатии вилояти Суғд оғоз гардидааст. Бино ба маълумоти масъулини Кумитаи идораи замини шаҳри Исфара, дар ин маҳалла ҳамзамон инфрасохтори зарурӣ низ қомат хоҳад афрохт.

Аз тозакориҳо ва ободониҳо пай бурдан мумкин аст, ки деҳоти Ворух сол аз сол симои худро дигар намуда, ба як макони ободу ҳамешабаҳор ва маҳалли зисти мардуми меҳнатдӯсту сулҳпарвар табдил ёфта истодааст. Сокинони деҳоти Ворух аз хурд то бузург дар ҳифзи манофеъи миллӣ, марзу бум ва гиромӣ доштани ҳар зарра хоки Ватан ва ҳар қатра оби он ҷоннисорӣ мекунанд. Мардум на бо забон, балки бо амалу рафтор гуфтаҳои болоиро тасдиқ менамояд. Зиёд шудани сафи соҳибкорони баландҳиммат дар деҳоти Ворух ба рушди ҳамаҷонибаи соҳаҳои мухталиф замина мегузорад. Мисоли равшан дар минтақаи Чорчинори деҳоти Ворух бо саҳми соҳибкори маҳаллӣ ду майдончаи варзишии замонавӣ бунёд гардида, дар хизмати мардум қарор доранд. Наврасону ҷавонон вақтҳои фориғ аз дарс ва ташвишҳои рӯзгор дар чунин майдончаҳои замонавӣ ба варзиш машғул гардида, саломатии худро нигоҳ медоранд. Бино ба маълумоти додашуда, дар ояндаи наздик дар шафати иншооти варзишӣ як меҳмонхона ва як ҳавзи шиноварӣ сохта шуда, мавриди баҳрабардорӣ қарор мегирад. Бо амалӣ шудани ин нақшаҳои нек минбаъд сайёҳон метавонанд аз манзараҳои дилфиреби Ворух баҳраманд гардида, дар меҳмонхонаи навбунёд ҷой бигиранд. Қобили қайд аст, ки дар деҳоти Ворух зарфиятҳои сайёҳӣ то ба ҳол ба пуррагӣ истифода нашудааст ва дар сурати бунёди инфрасохтори зарурӣ дар ин самт дастовардҳо бештар мегардад.

Дар деҳоти Ворух ба рушди ҳамаҷонибаи соҳаи тандурустӣ диққат дода шуда, бо дастгирии Ҳукумати мамлакат ва Мақомоти иҷроияи ҳокимияти давлатии вилояти Суғд ба беморхонаи Ворух таҷҳизоти зарурии тиббӣ дастрас карда шудааст. Ҳамин аст, ки амалиёти ҷарроҳӣ ва дигар намудҳои хизматрасонии тиббӣ дар худи беморхонаи деҳоти Ворух анҷом дода мешаванд. Мутахассисони соҳаи тиб маҳорату малакаи хуб доранд ва таҷрибаҳои қаблӣ нишон дод, ки табибони беморхона дар ҳифзи солимии аҳолӣ ҳамеша омода ҳастанд.

Дар гузашта беморхонаи деҳоти Ворух ба таъмир ниёз дошт ва соҳибкорони бурунмарзӣ, ки парвардаи ин хоку оби ин минтақа ҳастанд, тасмим гирифтанд, ки дар ҳошияи ҳидоятҳо ва раҳнамоиҳои пайвастаи Пешвои миллат муҳтарам Эмомалӣ Раҳмон беморхонаро таъмир намоянд. Айни замон корҳои навсозӣ дар бархе аз шуъбаҳо, аз ҷумла таваллудхона қисман анҷом ёфта, дар шуъбаҳои дигар ҷараён дорад. Бинои дигари беморхона пурра таъмир ва мавриди баҳрабардорӣ қарор гирифтааст. Сокинони деҳоти Ворух аз ин таваҷҷуҳ ва ғамхорӣ изҳори хушҳолӣ ва қаноатмандӣ мекунанд. Мусаллам аст, ки деҳоти Ворух аз маркази шаҳри Исфара дар масофаи беш аз 40 километр дуртар ҷойгир аст. Аз ин лиҳоз, дар беморхонаи марказӣ ва дигар иншооти соҳаи тандурустӣ барои сари вақт ташхису табобат намудани беморон шароити зарурӣ муҳайё шудааст. Мақомоти иҷроияи ҳокимияти давлатии вилояти Суғд ва мақомоти маҳаллии ҳокимияти давлатии шаҳри Исфара барои рафъи мушкилоти мавҷуда дар соҳаи тандурустӣ тадбирҳои саривақтӣ меандешанд.

Дар деҳоти Ворух рушди соҳаи кишоварзӣ низ ба чашм мерасад. Дар ин минтақаи кӯҳсор мардум асосан ба чорводорӣ ва боғдорӣ машғуланд. Дар доираи Барномаҳои давлатӣ оид ба рушди боғу токпарварӣ дар деҳоти Ворух боғҳои кӯҳна барқарор ва майдони боғоти нав зиёд мегардад.

Дар ин боғот асосан дарахтони себу зардолу ва олуву дигар намуди дарахтони ба иқлим мувофиқ парвариш карда мешаванд. Ҳоло дарахтони себи боғҳои Ворух пур аз ҳосил буда, бо фаро расидани мавсими ҷамъоварӣ ин меваҳои шаҳдбор ба бозори истеъмолӣ ворид мешаванд. Заҳмати мардуми меҳнатқарини ин минтақаро дарахтони себ бозгӯӣ мекунанд.

Моҳипарварӣ аз ҳар нафар сабру таҳаммули зиёдро талаб мекунад. Баҳодур Сангинов дар ташкили хоҷагии моҳипарварӣ ҷоеро интихоб намуд, ки дар гузашта замини аз истифодаи умум берун ва як мавзеи нообод будааст. Шавқи беандоза ва заҳмати чандинсола ниҳоят самар дод ва кори моҳипарварии ин хоҷагӣ баъди чандин сол пеш меравад. Се соли аввал хоҷагии моҳипарварӣ фоида ба даст наовардааст. Вале умеду боварӣ ба фардо аҳли заҳматро рӯҳбаланд менамуд. Имрӯз дар чор ҳавз навъи моҳиҳо парвариш меёбанд ва рӯзҳои наздик ба бозори истеъмолӣ ворид мешаванд. Рушди моҳипарварӣ ва фароҳам овардани шароит имкон медиҳад, ки дар ин минтақа, яъне деҳоти Ворух сайёҳӣ низ ривоҷ ёбад. Сайёҳон минбаъд на танҳо моҳиро харидорӣ мекунанд, балки метавонанд, сайди онро низ анҷом бидиҳанд. Баҳодур Сангинов дастуру ҳидоятҳои Пешвои миллатро дар мавриди рушди моҳипарварӣ сармашқи кори худ намуда, барои ноил гардидан ба дастовардҳои бештар талош намуда истодааст. - Моҳипарварӣ хусусияти хоси худро дорад ва дар сурати камтаваҷҷуҳӣ саршумори он зиёд намегардад, - мегӯяд ин моҳипарвар.

Таърих гувоҳ аст, ки Ворух дар тӯли 29 соли пойдории Истиқлолияти давлатӣ дар маркази таваҷҷуҳи Сарвари давлат муҳтарам Эмомалӣ Раҳмон ва Ҳукумати Тоҷикистон қарор дошт ва минбаъд ин таваҷҷуҳ дучанд гардида, нақшаҳои нек амалӣ мешаванд. Сокинони меҳнатқарини Ворух чун дигар минтақаҳои кишвар дар рушди тамоми соҳаҳо, ободии диёри худ, ҳифзу гиромӣ доштани дастовардҳои замони соҳибистиқлолӣ ва арзишҳои миллӣ, манофеи давлатӣ саҳми арзанда мегузоранд. Зеро мо як Ватан ва як модар дорем, ки номаш Тоҷикистон аст. Рушди Ворух ин рушди Тоҷикистон мебошад.

Субҳиддин Қодиров,

рӯзноманигор

Читать далее

Шиносоии Раиси вилоят бо рафти ҷамъоварии пахта дар ноҳияи Ҷаббор Расулов

Имсол дар ноҳияи Ҷаббор Расулови вилояти Суғд дар 5800 гектар пахта кишт гардида, имрӯзҳо ҷамъоварии ҳосил муташаккилона ҷараён дорад.

Раиси вилояти Суғд Раҷаббой Аҳмадзода зимни сафари корӣ ба ноҳия рафти ҷамъоварии пахтаро мавриди таваҷҷуҳ қарор дода, дар ғуну чини ҳосил ба кишоварзон кӯмаки амалии худро расонид. Тавре зимни боздиди Раиси вилоят аз хоҷагии деҳқонии “Элдор” иттилоъ дода шуд, дар ноҳия ҳамарӯза беш аз 300 тонна пахта чида шуда, то имрӯз 2660 тонна пахта ҷамъоварӣ гардидааст.

Читать далее

СИҲАТИИ МАРДУМ - ГАВҲАРИ НОЁБ

Дар шаҳри Ухани Ҷумҳурии Халқии Хитой паҳн гардидани вируси коруно ҷомеаи ҷаҳониро ба ташвиш овард. Зеро ин вабои аср тамоми дунёро фаро гирифта, мардуми зиёд қурбони он гардиданд. Аз сабаби тамоми ҷаҳонро фаро гирифтани ин вабо Ташкилоти Умумиҷаҳонии Тандурустӣ онро пандемия эълон кард. Паҳн гардидани ин беморӣ боз як бори дигар нишон дод, ки тамоми мутахассисони ҷаҳон дар роҳи муолиҷаи ин вируси бо дидан назарногир ноилоҷ монданд.

Бемории вируси коруно ба Ҷумҳурии Тоҷикистон моҳҳои апрел - май ворид гардид ва нафарони зиёде ба ин беморӣ мубтало гардиданд. Айни ҳол даври дуюми бемории коруно дар ҷумҳурӣ ба қайд гирифта шудааст. Баҳри пешгирӣ намудани бемории мазкур дар Ҷамоати деҳоти Ёваи ноҳияи Бобоҷон Fафуров корҳои зиёде ба сомон расонида шуда истодааст. Бино ба гуфти муовини раиси ҷамоат Раъно Холматова, корҳои зиёде ба сомон расонида шуд.

Дар даври аввали беморӣ сокинони ҷамоат дар худи беморхонаи ҷамоати Ёва табобат гирифта буданд. Айни замон сокинони ноҳия, ки ба бемории илтиҳоби шуш гирифтор шудаанд, дар беморхонаҳои Ҷамоати деҳоти Унҷӣ ва беморхонаи вилоятӣ дар муолиҷаанд. Аз оғози паҳн гардидани бемор коруно дар ҷамоат 14 нафар беморон фавтидаанд. Айни замон дар ҷамоат баҳри пешгирӣ намудани беморӣ дар байни сокинон корҳои фаҳмондадиҳӣ гузаронида шуда истодааст.

Дар асоси қарори раиси ноҳияи Бобоҷон Fафуров Зариф Назирӣ «Дар бораи ба роҳ мондани корҳои омодагӣ ҷиҳати пешгирии интиқол ва паҳншавии каронавирус» қарори раиси ҷамоат ба тавсиб расида, дар ин замина ҳайати ситоди ҷамоатӣ ва нақша - чорабинӣ оид ба пурзӯр намудани чораҳои зиддиэпидемикӣ тасдиқ карда шудааст. Бояд зикр кард, ки гурӯҳи тарғиботӣ аз ҳисоби кормандони дастгоҳи ҷамоат, соҳаи тандурустӣ, раисони кумитаи маҳаллаҳо, омӯзгорони муассисаҳои таълимӣ таъсис дода шуда, корҳои фаҳмондадиҳӣ ба роҳ монда шудааст. Дар ҷамоат барои пешгирии интиқол ва пайдоиши сирояти нави коронавирус оид ба масъалаи дарёфт намудани беморон, азназаргузаронӣ тариқи «хона ба хона» корбарӣ намуда истодаанд.

Ҳамчунин, бо дастгирии раиси ноҳия ба Ҷамоати деҳоти Ёва гипрохлориди натрий дастрас карда шуда, дар тамоми маҳаллаҳо ва кӯчаҳои ҷамоат безараргардонӣ гузаронида шуда истодааст. Ҳамчунин, соҳибкорону сокинон низ бо роҳи худ баҳри безарар намудани кӯчаву хиёбонҳо кӯшиши зиёд ба харҷ дода истодаанд.

Гулҷаҳон МАҲКАМОВА,
«Ҳақиқати Суғд»

Читать далее

Президенти Ҷумҳурии Тоҷикистон Эмомалӣ Раҳмон бо Сарвазири Ҷумҳурии Ӯзбекистон Абдулло Орипов мулоқот намуданд

29 сентябр дар Қасри миллат Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Сарвазири Ҷумҳурии Ӯзбекистон Абдулло Ориповро, ки бо сафари корӣ ба Душанбе ташриф овардааст, ба ҳузур пазируфтанд.

Дар ҷараёни мулоқот ҷонибҳо дар фазои дӯстию ҳамдигарфаҳмӣ ҳолат ва дурнамои маҷмуи муносибатҳои Тоҷикистону Ӯзбекистон ва роҳҳои тавсеаи онҳоро баррасӣ карданд.

Читать далее

29 September 2020

Паёми табрикии Раиси вилоят ба муносибати Рӯзи Мавлоно Ҷалолуддини Балхӣ

Дар партави сиёсати фарҳангпарваронаи Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар кишвари мо ба масъалаи арҷ гузоштан ба гузаштаи пурифтихор, гиромӣ доштани таъриху фарҳанги ғании аҷдодӣ, таҷлили солгарди шахсиятҳои арзандаи таърихӣ, бузургони илму адаб ва ба ин восита бедор намудани руҳияи худшиносю худогоҳӣ ва эҳсоси баланди ватандории сокинон таваҷҷуҳи пайваста зоҳир мегардад.

Дар ин замина, дар асоси Қонуни Ҷумҳурии Тоҷикистон “Дар бораи рӯзҳои ид” ҳамасола санаи 30-юми сентябр Рӯзи Мавлоно Ҷалолуддини Балхӣ  бо шукуҳ таҷлил гардида, ба ин восита руҳи бузургону нобиғагони миллат, ки дар пешрафти илму маърифату фарҳанг ва адабиёти оламшумули тоҷик саҳм гузоштаанд, қадр карда мешавад.

Читать далее

Ҳадаф: Омода намудани мутахассисон ба сафи Артиши Миллӣ

Мактаби муттаҳидаи техникии Ташкилоти ҷамъиятии мададгори мудофиаи шаҳри Хуҷанд баҳри тарбияи ҳарбӣ - ватанпарастии ҷавонону наврасон, алалхусус байни ҷавонони синни тодаъватӣ ва даъватӣ бо иштироки собиқадорони ҷанговарони интернатсионалист чорабиниҳои мухталиф, аз ҷумла мусобиқаҳои ҳарбӣ - варзишӣ ва чорабиниҳои тарғиботию тарбиявӣ барои ҷавонону наврасонро амалӣ менамояд.

Қайд кардан бамаврид аст, ки кормандони ин мактаб низ барои ташкил ва баргузории чорабиниҳову мусобиқаҳо фаъолона ширкат меварзанд. Аз ҷумлаи чорабиниҳо шинос намудани ҷавонони синни тодаъватӣ бо шароити хизмат дар сафҳои Қувваҳои Мусаллаҳи Ҷумҳурии Тоҷикистон бевосита дар қисмҳои низомӣ, вохӯрии ҷавонони синни тодаъватӣ ва даъватӣ бо собиқадорони Қувваҳои Мусаллаҳ, ҷанговарони байналмилал ва муҳофизатгарони сохти конститутсионӣ, ҷамъомад дар мавзӯи «Ҳифзи Ватан қарзи ҳар як шаҳрванд аст» ба ҳисоб мераванд.

Зимни суҳбат муовини сардори мактаб Ғуфрон Воҳидов қайд намуд, ки мактаб асосан сарбозони оянда ва ронандагони касбиро, ки барои - қувваҳои Мусаллаҳ ва соҳаҳои хоҷагии халқ лозим аст, омода менамояд. Ин даргоҳ аз базаи техникӣ бой буда, дорои машқгоҳҳои автомобилии “Автодром”, обии “Вододром”, утоқҳои кории “ЛПЗ - ТО”, синфхонаи радиотехникӣ ва бунгоҳи тиббӣ буда, барои босифат гузаронидани дарсҳо мусоидат менамояд. Мақсади ягонаи ин мактаб омода намудани ҷавонони синни даъватӣ ба сафи артиш мебошад. Ҷавононро дар риштаи ронандаи дараҷаҳои “С” ва “В” ва алоқачӣ омода менамояд.

- То имрӯз дар мактаби муттаҳидаи техникӣ 90 нафар аз шаҳру навоҳии вилоят касби ронандагиро омӯхта, барои хизмат дар сафи Артиш омода мебошанд. Инчунин, аз ҷониби масъулини мақомоти иҷроияи ҳокимияти давлатии шаҳри Хуҷанд 40 ва ноҳияи Бобоҷон Ғафуров 120 нафар ҷавонони синни даъватӣ ба таҳсил фаро гирифта, соҳиби шаҳодатномаи ронандагии дараҷаи “В” гардида, дар рӯзи аввали гусел наваскарон ба сафи артиш шомил мегарданд, - гуфт Ғуфрон Воҳидов.

Барои сарбозони оянда то имрӯз устодони соҳибтаҷриба, ба монанди А.Қаюмов, Ф.Наҷмиддинов, К.Латифов, А.Воҳидов, А.Мӯҳсинов, И.Мадазимов, Т.Шукуров ва дигарҳо дарс гузашта, аз таҷрибаи бойи худ барои бедор сохтани ҳисси ватандӯстии ҷавонон қисса мекунанд.

Ҳусейнбой Ҷабборов, Меҳрозбек Бобохонов аз ноҳияҳои Спитамену Ҷаббор Расулов ва Исмоилу Мирсалимҷон аз шаҳри Гулистон буда, чанд муддат дар ин мактаб ба таҳсил фаро гирифта шуданд. Онҳо барои ба хизмати Модар - Ватан рафтан ба ин мактаб омадаанд, то аз нозукиҳои қадамзанӣ ва яроқдориву тирпарронӣ огоҳӣ пайдо намоянд. Шароити таҳсил хуб буда, техникаву таҷҳизоти заруриро то ин вақт истифода бурданд ва соҳиби шаҳодатномаи ронандагӣ гардида, ба хизмат омодаанд.

Масъулини мактаб ҷавононро ҳамаҷиҳата барои хизмат омода намуда, барои онҳо дарсҳои назариявӣ ва амалиро низ гузаштаанд. Бештар ба мусобиқаҳои варзишӣ машғул мешаванд, то аз ҷиҳати ҷисмонӣ обутоб ёфта бошанд.

Истамҷони НАҶМИДДИН,

“Ҳақиқати Суғд”

Читать далее

Шаҳристон: Меҳнати софдилонаю суботкорона

Вусъати корҳои ободонию созандагӣ дар вилоят аз ташаббусҳои неки Асосгузори сулҳу ваҳдати миллӣ - Пешвои миллат Президенти Ҷумҳурии Тоҷикистон муҳтарам Эмомалӣ Раҳмон сарчашма гирифта, ҷиҳати ободу зебо намудани шаҳру навоҳӣ тадбирҳои судманд андешида мешаванд, ки бунёди биноҳои истиқоматӣ, иншооти соҳаи фарҳангу маориф ва тандурустӣ аз қабили чунин иқдомҳост.

Тавре, ки дар Паёми навбатии Пешвои миллат муҳтарам Эмомалӣ Раҳмон ба Маҷлиси Олии кишвар зикр гардидааст, таҳкими иқтидори иқтисодии мамлакат ва дар ин замина таъмин намудани шароит барои зиндагии шоистаи сокинони кишвар ҳадафи олии давлат ва Ҳукумати мамлакат ба ҳисоб меравад ва барои расидан ба ин мақсад тамоми захираву имкониятҳо сафарбар карда мешаванд.

Маҳз, ба хотири таъмини шароити хубу мусоид ва арзандаи кору зиндагӣ барои шаҳрвандон имрӯзҳо дар вилоят низ чун дигар минтақаҳои ҷумҳурӣ иқдомҳои бузурги ободониву созандагӣ вусъати бештар мегиранд.

Бахусус, бунёди шаҳраку маҳаллаҳои нави замонавӣ ва биноҳои истиқоматӣ аз иқдомҳои асосии Мақомоти иҷроияи ҳокимияти давлатии вилоят дар чанд соли охир ба ҳисоб мераванд, ки аз ҷониби соҳибкорони ватанӣ ҳамовозии гарм пайдо кардаанд.

Дар ноҳияи Шаҳристон низ бахшида ба сазовор таҷлил намудани ҷашни 30 - солагии Истиқлолияти давлатии Ҷумҳурии Тоҷикистон сохтмон, таъмир ва азнавсозии зиёда аз 112 бино ва иншооти ҷашнӣ ба нақша гирифта шудааст. То ба имрӯз 76 иншоот, аз қабили муассисаи таълимӣ, фарҳангӣ, яъне Қасри фарҳанг, муассисаи тиббӣ, дорухона, майдончаи варзишӣ, сартарошхона, кошонаи ҳусн, марказҳои савдою хизматрасонӣ, сехи дӯзандагӣ ва дигар иншоот мавриди истифода қарор гирифтанд.

Инчунин, бахшида ба ҷашн чандин тадбирҳои дигар, аз он ҷумла мумфаршкунии роҳҳову чароғонкунии кӯчаҳо ба анҷом расонида шудааст.

Бояд гуфт, ки дар соли 2020 сохтмони 40 адад иншоот ба нақша гирифта шуда, ба ҳолати якуми сентябри соли ҷорӣ 37 иншоот ба истифода дода шуд. Айни замон аз ҳисоби маблағҳои мақомоти иҷроияи ҳокимияти давлатии ноҳия ва соҳибкорон сохтмони якчанд иншоот бомаром идома доранд. Аз ҷумла, корҳои сохтмонии бинои гимназия дар маркази ноҳия барои 400 нафар хонанда сохта шуда истодааст. Бинои мазкур дуошёна буда, зиёда аз 70 фоизи корҳои сохтмонӣ ба итмом расонида шудааст. Дар деҳаи Чашмасори Ҷамоати деҳоти Шаҳристон бо ташаббуси соҳибкор Санҷар Ортиқбоев сохтмони бинои мағоза, дар деҳаи Фирдавсии Ҷамоати деҳоти Шаҳристон, дар қади шоҳроҳи Хуҷанд - Душанбе бо ташаббуси соҳибкор Набиҷон Пӯлодов нуқтаи такягоҳи занбӯрпарварӣ, фурӯши асал ва ошхона, дар деҳаи Гулистони Ҷамоати деҳоти Бунҷикат аз тарафи соҳибкор Анвар Ҳотамов бинои мағоза мавриди истифода қарор дода шуд.

Дар ошхона низ ба мусофирон, сайёҳони дохиливу хориҷӣ шароити хуби хизматрасонӣ муҳайё буда, 8 нафар бо ҷойи кори доимӣ таъмин мебошанд.

Сокинони заҳматкаши ноҳияи Шаҳристон чун дигар сокинони кишвар ҳадафҳои неку созанда ва бунёдкоронаи Сарвари давлат муҳтарам Эмомалӣ Раҳмонро, ки ба рушди мамлакат ва баланд гардидани сатҳу сифати зиндагии мардум нигаронида шудаанд, бо ҳамовозии баланд истиқбол намуда, ҳамзамон баҳри иҷрои саривақтии дастуру супоришҳои Раиси вилоят бо меҳру самимият барои обод кардани диёри худ камари ҳиммат бастаанд.

Вусъати корҳои ободонӣ нишон медиҳад, ки соҳибкорону сокинони ин ноҳияи кӯҳистон азм доранд, ҷашни 30 - солагии Истиқлолияти давлатии Ҷумҳурии Тоҷикистонро бо дастовардҳои намоён истиқбол намуда, ин гӯшаи диёрро боз ҳам ободу зебо гардонанд.

Нодир ТУРСУНЗОДА,

 “Ҳақиқати Суғд”

Читать далее