12 August 2020

ОFОЗИ ТАҲСИЛ 17 АВГУСТ

Аз санаи 17-уми августи соли 2020 таҳсили хонандагони муассисаҳои таҳсилоти миёнаи умумӣ ва олӣ оғоз мегардад. Овозаҳои мухталифи мардум ҷиҳати саршавии таҳсили нав, фурӯши либоси ягона, пардохти маблағи таҳсил, харидани лавозимоти хониш ва баъди он бозпас ба карантин фаро гирифта шудани толибилмон моро водор сохт, ки бо сардори Раёсати маорифи вилоят, муҳтарам Осим Каримзода ҳамсуҳбат шавем.

- Устод, ҳадафи аз санаи 17-уми август ба фаъолият оғоз кардани муассисаҳои таҳсилоти миёнаи умумиро шарҳ медодед?

- Дар мувофиқа бо Вазорати маориф ва илми Ҷумҳурии Тоҷикистон санаи 17 - уми август тасодуфӣ интихоб нашудааст. Ба ҳамагон маълум аст, ки бинобар дар кишвари мо низ пайдо шудани нишонаҳои бемории сироятии коронавирус ва пешгирии он мо, маорифчиён имкони ба пуррагӣ ҷамъбаст намудани чоряки чорумро дар муассисаҳои таҳсилоти миёнаи умумӣ пайдо накардем. Соатҳои дарсие, ки дар барномаи таълимӣ омадаанду бояд давоми чоряки чорум гузашта мешуданд, ҳамагӣ 84 фисад мебошанду бас. Он замон умед бар он буд, ки баъди чанде беморӣ аз байн меравад ва ё коҳиш меёбаду барномаи таълимӣ идома дода мешавад. Агар хонандагони рӯзнома огоҳ бошанд, он замон супоридани имтиҳонҳои аз синф ба синфгузаронӣ ва хатм низ дар назар дошта шуда буд. Аз сабаби вазъияти ногувори баамаломада аз рӯи баҳоҳои пешин чоряки чорум, солона ва имтиҳонҳо гузошта шуданд. Ҳадаф аз муайян кардани ин сана он аст, ки аз санаи 17 - уми август то 31 - августи соли 2020 соатҳои боқимондаи барномаи таълимии соҳаи маориф бояд азхуд карда шаванд. Аз оғози моҳи сентябр бошад, ҳам муаллимон ва ҳам хонандагони муассисаҳои таълимӣ ба соли таҳсили нав шуруъ хоҳанд кард.

- Дарс дар ин муддат чӣ гуна ҷараён мегирад?

- Бо қарори ҳайати мушовараи Вазорати маориф ва илми Ҷумҳурии Тоҷикистон аз 27-уми июли соли 2020, таҳти рақами 11/19 тартиби омодагӣ ва баргузории Рӯзи донишу дарси сулҳ дар муассисаҳои таълимии Ҷумҳурии Тоҷикистон тасдиқ шуда, он дар асоси Қонуни Ҷумҳурии Тоҷикистон «Дар бораи маориф», Низомномаи намунавии муассисаҳои таҳсилоти ибтидоӣ, миёна ва олии касбии Ҷумҳурии Тоҷикистон ва қарори тавсиявии ситоди ҷумҳуриявӣ оид ба пурзӯр намудани чораҳои зиддиэпидемикӣ барои пешгирии интиқол ва пайдоиши сирояти нави коронавирус (КОВИД-19) таҳия гардидааст. Тибқи он соли таҳсил дар муассисаҳои таълимӣ аз 17 – уми августи соли 2020 оғоз гардида, 14 - уми июни соли 2021 ба анҷом мерасад. Дарсҳо дар муассисаҳои таҳсилоти умумӣ чун пешин дар ду баст ташкил шуда, мувофиқи барномаи таълимӣ ҷадвали дарс аз ҷониби маъмурият тартиб дода мешавад. Давомнокии дарсҳо дар муассисаҳои таълимӣ барои синфҳои якум 35 дақиқа, барои синфҳои 2-11 на зиёда аз 45 дақиқаро ташкил медиҳад. Машғулиятҳои таълимӣ дар муассисаи таҳсилоти умумӣ дар басти якум соати 8-00 оғоз ёфта, соати 12-55 ба охир мерасад. Басти дуюм соати 13:10 оғоз шуда, соати 17:55 анҷом мепазирад.

- Риояи қоидаҳои беҳдоштӣ чӣ гуна бояд сурат гирад?

- Бо мақсади риояи масофаи байни хонандагон пеш аз ҳама, дар саҳни муассиса ба андозаи 1,5 – 2 метр хатҳои уфуқӣ кашида шуда, дар даромадгоҳи муассисаҳои таълимӣ аз ҷониби кормандони тиб ва омӯзгорон муоинаи мунтазами саломатии хонандагон гузаронида мешавад. То оғози соли таҳсил бо гузаронидани маҷлиси падару модарон аз хонандагон даъват ба амал оварда мешавад, ки дар машғулиятҳои таълимӣ ҳатман бо ниқоби муҳофизатӣ ва маҳлули безараргардонӣ (антисептикӣ) иштирок намоянд.

Ҳамчунин, ҷиҳати пешгирии беморӣ воридшавӣ ва баромадани хонандагон аз даромадгоҳи алоҳида ба роҳ монда шуда, зинапояҳои бино ва баромадгоҳи эҳтиётӣ дар ҳолати истифодабарӣ қарор дода шавад. Машғулиятҳои таълимӣ аз ҳамаи фанҳо дар синфхонаҳо, бе назардошти кабинети фаннӣ ба роҳ монда шуда, машғулиятҳои тарбияи ҷисмонӣ, суруд ва мусиқӣ, омодагии ибтидоии ҳарбӣ мувофиқи имконият аз синфхона берун гузаронида мешавад. Боиси қайд аст, ки дар раванди дарсҳои технологияи меҳнат ба роҳ мондани дӯхтани ниқобҳои муҳофизатӣ ба мақсад мувофиқ мебошад.

Аз омӯзгорон даъват ба амал оварда мешавад, ки дар раванди таълим фосилаи байни онҳо ва хонанда то 2 метр риоя гардад. Толорҳои варзишӣ, маҷлисгоҳ ва дигар иншооти ёрирасон муваққатан ҳамчун синфхонаи таълимӣ ба истифода дода шуда, дару тирезаҳои синфхонаҳо новобаста ба вазъи обу ҳаво бо мақсади таъмин намудани ҳавои тоза ва шамолдиҳии синфхона мунтазам кушода шавад.

- Ошхонаи муассисаҳои таълимӣ фаъолият мекунанд?

- Бале, аммо дар давоми рӯз ва дар байни бастҳо ҷое, ки рафту омади хонандагон зиёд аст, аз қабили ошхонаи муассиса, ҷойҳои дастшӯӣ, ҳоҷатхона мунтазам безарар гардонида, бояд тоза нигоҳ дошта шаванд. Аз омӯзгорон даъват ба амал оварда мешавад, ки ба хонандагон мунтазам шустани дастонро таъкид намоянд. Мавҷудияти собун, маҳлули антисептикӣ ва дезинфексионӣ пеш аз оғози дарс ва басти навбатии муассиса зери назорати роҳбарият қарор гирифта, то ҳадди имкон маҳдуд намудани тамоси байни хонандагон тавассути ба низом даровардани ҷадвали дарсҳо ва вақти танаффус (масалан 5 дақиқа пеш аз ҷавоб додани хонандагони синфҳои ибтидоӣ аз дарс ва бо навбат ба танаффус ҷавоб додани хонандагон) риоя гардад. Барои истифода аз ошхонаи муассиса дар вақти муайян хонандагон ба гурӯҳҳо тақсим шуда, бо навбат аз хизматрасониҳои ошхона бархурдор хоҳанд гашт. Дар ҳолати будани имконият хонандагони синфҳои ибтидоӣ бо риояи талабот дар синфхонаҳои таълимии худ ғизо мехӯранд. Вақти хӯрокхӯрии хонандагон аз тарафи маъмурияти муассиса ба танзим дароварда мешавад, ки ин ҳама барои пешгирии омма, бахусус, насли наврас аз бемории сироятӣ маҳсуб меёбад.

- Вазъият дар муассисаҳои таҳсилоти томактабӣ чӣ гуна сурат мегирад?

- Ҳамаи муассисаҳои томактабии вилоят ба қабули кӯдакон омодаанд , аз ин рӯ, гуфта метавонем, ки ба таври мукаммал кӯдаконро ба муассисаҳои томактабӣ қабул намоем. Бояд гуфт, ки кӯдакистонҳо безарар гардонида шуда, қабули кӯдакон аз даромадгоҳи ҳавлии муассисаҳои таҳсилоти томактабӣ ба роҳ монда мешавад. Ба дохили бинои муассиса даромадани падару модар ва шахсони бегона қатъиян манъ буда, ҳамаи кормандон низ пеш аз ба кор оғоз намудан ҳатман аз ташхиси тиббӣ бояд гузаранд. Аз ҷониби маъмурияти муассисаи томактабӣ гурӯҳ, айвонча ва ҳоҷатхонаҳо бояд безарар гардонда ва тоза нигоҳ дошта шаванд. Машғулиятҳо низ бо назардошти риояи қоидаҳои санитарӣ – эпидемиологӣ дар саҳни ҳавлӣ ва айвончаҳои тобистона гузаронида мешаванд. Аз падару модароне, ки имконияти дар хона тарбия ва нигоҳ доштани кӯдакро доранд, хоҳиш менамоем, ки то ба эътидол омадани вазъият кӯдакашонро дар муҳити оила нигоҳ доранд. Дар чунин ҳолат ҷои кӯдак дар кӯдакистон нигоҳ дошта шуда, дар ин муддат маблағ барои нигоҳубини кӯдак пардохт намешавад.

- Дар бобати либоси ягонаи муассисавӣ чанд сухан мегуфтед?

- Ба ҳамагон, бахусус, падару модарон ва хонандагони муассисаҳои таҳсилоти миёнаи умумӣ маълум бояд бошад, ки ҳадаф аз либоси ягонаи мактабӣ аз байн бурдани нобаробарӣ байни толибилмон аст.

Як ҳадафи дигари ба тасвиб расидани ин дастурамал ҷилавгирӣ аз фарҳанги бегона мебошад. Дастурамали либосҳои тавсиявӣ барои хонандагони мактабҳои миёнаи Тоҷикистон соли 2007 ва барои либоси омӯзгорон соли 2009 ба тасвиб расида, мавриди истифода қарор гирифтааст. Бояд гуфт, ки харидории либоси ягона ба ҳеч кас маҷбурӣ нест.

Ҳарчанд бо гузашти 11 – 13 сол аз ҷорӣ шудани либоси ягонаи мактабӣ баҳсҳо миёни хонандагон ва омӯзгорон ҳанӯз идома доранд ва дар оғозу анҷоми ҳар соли таҳсили нав баҳсҳо авҷ мегиранд, аммо бояд дар хотир дошт, ки дар аксари макотиб масъулон бо розигии кумитаи падару модарон тибқи дархости онҳо бо ширкатҳои дӯзандагӣ шартнома баста, бо як нархи муайян либоси мактабӣ пешниҳод мекунанд.

- Чӣ гуфтаниҳое ногуфтанӣ монд?

- Аллакай чанд рӯзи дигар боқӣ мондааст, ки тамоми таълимгоҳҳо дари худро ба рӯи ташналабони илму дониш боз намоянд. Аз масъулини соҳаи маориф, бахусус, омӯзгорону устодон хоҳиш менамоем, ки дар ин вазъияти мураккаб, ки ҷомеаи ҷаҳониро бемории коронавирус фаро гирифтааст, такя ба донишу малакаи касбӣ намуда, пеш аз ҳама, рисолати касбиашонро масъулиятшиносона иҷро намоянд, ба гуфтаҳои беасос бовар накунанд, дарси аввали худро дар ҳамаи муассисаҳои таълимӣ, новобаста аз шакли ташкилию ҳуқуқӣ ҳамчун дарси Сулҳ гузаранд.

Дар машғулияти аввал барои баланд бардоштани руҳияи хонандагон моҳияти сулҳу ваҳдат, арҷгузорӣ ба дастовардҳои Истиқлолияти давлатӣ, саҳми Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар пойдории сулҳу ваҳдати миллӣ мавриди баррасӣ қарор диҳанд. Масъулини муассисаҳои таълимӣ вазифадор ҳастанд, ки дар муассиса барои тамошои суханронии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон ба муносибати Рӯзи дониш ва Дарси сулҳ шароит муҳайё намоянд.

Мусоҳиб

Шоира КАРИМЗОДА,

«Ҳақиқати Суғд»

Читать далее

ШАҲРИСТОН: ДУРНАМО ИСТЕҲСОЛИ ЗИЁДА АЗ 60 ҲАЗОР ТОННА КАРТОШКА

Дар асоси дастуру супоришҳои Ҳукумати Ҷумҳурии Тоҷикистон бо мақсади танзими нархи картошка дар бозорҳои истеъмолӣ ва афзун намудани иқтидори содиротии маҳсулоти кишоварзӣ, дар мавсими имсола нисбат ба васеъ намудани масоҳати кишти картошка дар хоҷагиҳои кишоварзии вилоят таваҷҷуҳи хоса зоҳир гардида, дурнамои кишти картошка ба 15900 гектар пешбинӣ гардид.

Соли ҷорӣ хоҷагиҳои кишоварзии вилоят дар ин бахш дар майдони 15632 гектар кишти картошка ҷойгир намуданд, ки 97,3 фоизи нишондоди пешбинишударо дарбар гирифта, нисбат ба соли сипаришуда 437 гектар кам мебошад. Дар натиҷа дар давраи ҳисоботӣ паст рафтани ҳаҷми истеҳсоли картошка, ба ҳолати санаи 1-уми августи соли ҷорӣ дар ҳамаи шаклҳои хоҷагидории вилоят 77 ҳазору 10 тонна картошка истеҳсол гардид, ки нисбат ба ҳамин давраи соли гузашта 916 тонна кам мебошад. Дар хоҷагиҳои кишоварзии вилоят бошад тибқи маълумоти оморӣ 53 ҳазору 399 тонна картошка истеҳсол гардид, ки нисбат ба соли гузашта 7 ҳазору 212 тонна кам шудааст.

Кишоварзони ҳамаи шаклҳои хоҷагидории ноҳияи Шаҳристон тавонистанд, ки дар ду ҳазору як гектар кишти босифати картошка доир намоянд. Ин нишондиҳанда ҳарчанд аз ҳамин давраи соли гузашта ҳазор гектар зиёд аст, лекин аз дурнамои кишти соли равон 653 гектар кам мебошад. Нисбат ба дурнамо кам шинонида шудани тухмии картошка кишоварзонро заррае ҳарос ва яъсу ноумедӣ нагузошт. Картошкапарварон имрӯз азми зиёд гардонидани ҳосилнокии майдонҳои картошка кишткардаро дар замир мепарваранд ва бо мақсади амалисозии паймони хеш каландию обёрӣ ва озуқадиҳии мазраъҳоро бо азми дучанд роҳандозӣ намуданд. Дар ин маврид хоҷагидорон бештар аз маслиҳатҳои судманди олимони соҳаи картошкапарварӣ, пирони кор ва мутахассисони раёсати кишоварзии ноҳия баҳравар мегарданд. Гузашта аз ин бо иқдоми мақомоти иҷроияи ҳокимияти давлатии ноҳия, олимону мутахассисони бахши суғдии Институти зироаткории Академияи илмҳои кишоварзии Ҷумҳурии Тоҷикистон бо картошкапарварон ҳамкории дутарафаи хуб доранд.

Бояд гуфт, ки имрӯз нашъунамои картошка дар 2 ҳазору 300 хоҷагии деҳқонию инфиродию оилавӣ, 13 кооперативи истеҳсолию тиҷоратии ҷамоату деҳоти Шаҳристон ва Бунҷикат, хоҷагиҳои давлатии тухмипарварию ниҳолпарварӣ, Муассисаи давлатии хоҷагии ҷангал, хоҷагиҳои ёрирасони шуъбаи марориф ва заминҳои наздиҳавлигии аҳолӣ густурда ба назар мерасад.

Кооперативи истеҳсолию тиҷоратии ба номи Мардонқул Шукурови ноҳия соли равон дар 30 гектар замин кишти картошка гузарониданд, ки нисбат ба ҳамин давраи соли гузашта 15 гектар зиёд мебошад.

Картошкапарварони ноҳияи Шаҳристон соли равон аз ду ҳазору як гектар майдони картошка, рӯёнидани зиёда аз 60 ҳазор тонна картошкаи аз ҷиҳати эколлогӣ тозаро дурнамо интихоб намуда, ба ин васила ният доранд, ки бозорҳои шаҳру навоҳии вилоят ва ҷумҳуриро таъмин намоянд.

Нодир ТУРСУНЗОДА,

«Ҳақиқати Суғд»

Читать далее

Раиси вилояти Суғд Раҷаббой Аҳмадзода ба шаҳри Панҷакент сафар кард

Субҳи рӯзи 12 август Раиси вилояти Суғд Раҷаббой Аҳмадзода ба шаҳри Панҷакент сафар кард.

Зимни ин сафар Раиси вилоят бо ҷараёни корҳои ободониву созандагӣ ба истиқболи 5500-солагии шаҳри Саразми бостонӣ шинос хоҳад шуд.

Бояд зикр кард, ки дар доираи корҳои ободониву созандагӣ ба истиқболи ҷашни таърихӣ дар шаҳри Панҷакент сохтмони 30 иншооти гуногун, аз ҷумла бинои нави табобатӣ бо 200 кат дар беморхонаи марказӣ, меҳмонхонаи "Саразм плаза", бинои муассисаи таҳсилоти миёнаи умумӣ барои 1280 хонанда дар Ҷамоати деҳоти Саразм, бинои нави Раёсати Агентии назорати давлатии молиявӣ ва мубориза бо коррупсия дар водии Зарафшон, мумфаршкунии роҳҳо, дӯконҳои фурӯши маҳсулоти дастии ҳунармандон, рамзи 5500-солагии Саразм, дарвозаи Саразм, осорхона дар "Пойгоҳи бостоншиносии Саразм" ҷараён дорад.

Читать далее

Боздиди кории Раиси вилоят Раҷаббой Аҳмадзода аз ноҳияи Ашт

11 август Раиси вилояти Суғд Раҷаббой Аҳмадзода бо мақсади шиносоӣ бо ҷараёни корҳои ободониву созандагӣ ба ноҳияи Ашт сафари корӣ анҷом дод.

Дар ноҳияи Ашт дар доираи 1300 рӯзи ободонӣ ба истиқболи 30-солагии Истиқлолияти давлатии Ҷумҳурии Тоҷикистон сохтмони иншооти гуногун идома дошта, соҳибкорону саховатмандон ва сокинони ноҳия барои бо дастовардҳои арзанда истиқбол намудани ҷашни таърихӣ аз тамоми имкониятҳо истифода бурда истодаанд.

Читать далее

ФАЪОЛИЯТИ ПУРСАМАР ВА НИШОНДИҲАНДАҲОИ НАЗАРРАС

Дар даврони истиқлолият бо ҷалби сармояи дохиливу хориҷӣ даҳҳо корхонаву коргоҳҳои хурду бузурги саноатӣ бунёд гардиданд, ки дар соҳаҳои истихроҷ ва коркарди маъдан, ангишт, саноати сабук ва кимиё, мошинсозӣ, коркарди металлҳои қиматбаҳо ва ранга, масолеҳи сохтмон ва саноати хӯрокворӣ фаъолият менамоянд.

То ба имрӯз ҷиҳати ба кор андохтани иқтидорҳои нав дар соҳаи саноат ва истифодаи самараноки корхонаҳои мавҷуда, ба роҳ мондани истеҳсоли маҳсулоти рақобатпазир ва ивазкунандаи воридот, тақвияти имкониятҳои содиротии кишвар ва умуман, дар самти иҷрои барномаҳои стратегии мамлакат як силсила тадбирҳои судманд амалӣ гардидаанд.

Маҳз рушди соҳаҳои воқеӣ, фароҳам овардани фазои мусоиди сармоягузорӣ, ҷалби сармояи мустақим ва воридоти технологияҳои нави инноватсионӣ имкон медиҳад, ки раванди саноатикунонии мамлакат таъмин гардида, ҳаҷми истеҳсоли маҳсулоти саноатӣ ва шумораи ҷойҳои нави корӣ мунтазам афзоиш дода шавад.

Ин аст, ки ҳамасола дар вилоят шумораи корхонаҳои саноатӣ беш гардида, сокинон маҳсулоти зарурии ватаниро бемамониат дастрас мекунанд. Боиси таъкид аст, ки ҳанӯз соли 2003 - ум корхонаи ордбарории «Фаровон - 1» ба фаъолият оғоз карда буд. Дар аввали фаъолият коргоҳ танҳо орд истеҳсол мекарду халос. Тӯли 17 соли фаъолият коргоҳи мазкур ба яке аз корхонахои саноатии пешрав мубаддал гаштааст. Дар ин муассиса 98 нафар корманд дар се баст, дар чор самти фаъолият, аз ҷумла истеҳсоли орд, паррандапарварӣ, истеҳсоли ғизои парранда ва чорво ва истеҳсоли масолеҳи металлӣ фаъолияти пурсамар доранд.  

Роҳбари ҶДММ «Фаровон - 1»   Исроилхӯҷа Самандаров изҳор дошт, ки коргоҳи мазкур барои хуб ба роҳ мондани фаъолият таҷҳизоти наву ҳозиразамонро аз Ҷумҳурии Мардумии Чин ворид карда истодаанду барои азхуд кардани он мутахассисон даъват карда мешаванд. Тӯли аз ду то чор моҳ мутахассисони худӣ ба пуррагӣ омӯзонида мешаванд.   

Оид ба нишондиҳандаҳои корхона изҳор дошт, ки агар ҳаҷми истеҳсоли маҳсулот бо нархҳои муқоисавӣ соли 2015 беш аз 11 миллион бошад, соли 2019 он ба зиёда аз 86 миллион сомонӣ расонида шудааст, аз ҷумла дар нимсолаи аввали соли равон ин нишондиҳанда наздик 9 миллион сомониро ташкил дод.

Агар истеҳсоли орд соли 2015 - ум 3,8 ҳазор тоннаро ташкил намояд, соли 2019 ин нишондиҳанда наздик ба 24 ҳазор тонна расонида шуд.

Тибқи маълумоти омории масъулин соли 2015 музди миёнаи маоши кормандон 700 сомонӣ бошад, соли равон он се маротиба зиёд шудааст.    

Ҳамчунин Исроилхӯҷа Самандаров қайд кард, ки феълан дар коргоҳи ордбарорӣ дар як шабонарӯз 200 тонна орд истеҳсол мешавад, дар коргоҳи паррандапарварӣ зиёда аз 100 ҳазор мурғ буда, зиёда аз 6 ҳазор тонна хӯроки парранда ва чорво истеҳсол карда мешавад. Истеҳсолоти масолеҳи сохтмонӣ бошад, мувофиқи фармоиш фаъолият дорад. Дар ин коргоҳ 30 нафар бо ҷойи корӣ таъмин ҳастанд. 

Доир ба болоравии нархи орд, ки бо сабаби паҳншавии бемории COVID – 19 ба амал омад, Исроилхӯҷа Самандаров гуфт, ки ин ба қурби асъор вобаста аст, зеро намояндагони Ҷумҳурии Қазоқистон нархро чанд маротиба боло бардоштаанд. Хушбахтона, охири моҳи май нарх ба эътидол оварда шуд ва сокинон ордро бо нархи пешин дастрас карданд.

Боиси таъкид аст, ки ҳоло коргоҳи мазкур се навъи орд, аз ҷумла навъи олӣ,  якум ва дуюм ба фурӯш бароварда истодаанд. Корхонаи ордбарорӣ ба ғайр аз бозорҳои дохилии вилоят ҳамчунин ба дигар манотиқи ҷумҳурӣ маҳсулот интиқол карда истодаанд.

Дар вақти авҷгирии пандемия сокинони ҷумҳурӣ аз меъёр зиёд ордро харидорӣ карданд. Доир ба сифат ва нархи орд сокинон ақидаҳои гуногунро пеш оварданд. Сокини ноҳияи Бобоҷон Ғафуров Фарида Абдураҳмонова гуфт, ки тӯли чанд сол маҳсулоти коргоҳҳои гуногунро истифода намудааст,  аз ҳама бештар орди «Фаровон» босифат ва арзиши баланд дошта, барояш писанд омадааст.

Баробари ин фурӯшандагони орд изҳор доштанд, ки имрӯз сокинон бештар орди «Фаровон» - ро мехаранд.

Муталлиб Каримов - фурӯшандаи орд:

- Ҳафт сол инҷониб бо фурӯши орд машғул ҳастам ва пай бурдам, ки харидорон бештар ба коргоҳи ордбарории «Фаровон» боварӣ доранд. Дар як рӯз қариб тамоми орди ин коргоҳ ба фурӯш меравад, сабабашро дар сифати баланд ва нархи дастраси он медонанд.

Бино ба маълумоти Хадамоти матбуоти Раиси вилояти Суғд дар вилоят 27 корхонаи истеҳсоли орд мавҷуд аст, ки бештари он дар шаҳру навоҳии Бобоҷон Ғафуров, Гулистон, Ҷаббор Расулов, Спитамен, Бӯстон ва Истаравшан фаъолият доранд.

Дарвоқеъ, тӯли 17 соли фаъолияти пурсамар коргоҳи мазкур тавонист ба боварии мардум сазовор гардида, маҳсулоти худро дар бозори ҷумҳурӣ рақобатпазир гардонад.        

Боиси таъкид аст, ки имрӯз дар бозори ҷумҳурӣ маҳсулоти паррандаи коргоҳи мазкур низ харидоргир аст ва дар ин самт низ онҳо ба натиҷаҳои баланд ноил гардидаанд.

- Талабот нисбат ба маҳсулоти мо зиёд аст, зеро сифати он ба талаботи кунунӣ ҷавобгӯ буда, дар муддати начандон тӯлонӣ тавонистем мавқеи худро дар бозори ҷумҳурӣ ишғол кунем. Дар оянда низ нақшаҳои зиёд дорем ва кӯшиш ба харҷ медиҳем, ки истеҳсоли маҳсулотро зиёд гардонида, ҷойҳои нави корӣ таъсис диҳем, - гуфт Исроилхӯҷа Самандаров.

Шаҳбону ОЛИМОВА,

«Ҳақиқати Суғд»

Читать далее

ОБОДИВУ ШУКУФОИИ ВАТАН АЗ ҶОМЕАИ СОЛИМ МАНШАЪ МЕГИРАД

Ба истиқболи сазовор пешвоз гирифтани ҷашни 30 – солагии Истиқлолияти давлатии Ҷумҳурии Тоҷикистон дар шаҳри бостонии Хуҷанд сохтмони иншооти таъиноташ гуногун бо маром идома дорад.   Бинои нави Муассисаи давлатии маркази бемориҳои дил ва ҷарроҳии дилу рагҳои вилояти Суғд ба номи профессор Амонулло Орифов аз ҷумлаи онҳост ва имрӯз корҳои сохтмонӣ дар он бомаром идома дорад.

Қобили қайд аст, ки сохтмони бинои нави табобатӣ дар асоси дастуру ҳидоятҳои Асосгузори сулҳу ваҳдати миллӣ – Пешвои муаззами миллат, Президенти Ҷумҳурии Тоҷикистон муҳтарам Эмомалӣ Раҳмон моҳи августи соли 2018 оғоз ёфта буд. Мувофиқи лоиҳа бинои нави табобатӣ аз таҳхона ва чор ошёна иборат буда, барои 200 кат пешбинӣ шудааст.  Фармоишгари иншоот Идораи сохтмони асосии вилоят буда, корҳои сохтмониро ҶДММ «Евростройсервис» ба анҷом расонида истодаанд.

Бино ба иттилои Фурқат Орифов, прораби ширкати Ҷамъияти дорои масъулияташ маҳдуди «Евростройсервис» то имрӯз 85 фоизи корҳои сохтмонӣ иҷро гардида, айни замон корҳои ороишиву рангуборкунӣ, сафолакпӯш кардан, ойинабанӣ ва дигар корҳо бо маром ҷараён дорад.

Дар ин мавзеъ айни замон ба корҳои сохтмонӣ беш аз 100 нафар сохтмончӣ ҷалб шудаанд.

Бояд гуфт, ки бинои нави Муассисаи давлатии маркази бемориҳои дил ва ҷарроҳии дилу рагҳои вилояти Суғд тибқи меъёрҳои замони муосир сохта шуда, бо таҷҳизоти муосири тиббӣ барои баланд бардоштани солимии ҷомеа муҷаҳҳаз гардонида мешавад. Ин марказ дар оянда натанҳо ба мардуми кишвар балки ба сокинони кишварҳои ҳамсоя низ хизмати тиббӣ мерасонад.

Расул Абдуллоев, роҳбари ҶДММ «Евростройсервис» иброз дошт, ки сохтмони биноро ба ӯҳда гирифта, он дар масоҳати 1440 метри мукааб сохта шуда, он аз чор ошёна ва таҳхона иборат аст. Тибқи лоиҳаи пешбинӣ гардида, дар  он 200 кат барои бемор дида мешавад. Мувофиқи плани куллии сохтмон барои ободонӣ дар ҳаҷми 3500 метри мукааб буда, саҳни он ду фаввора, таваққуфгоҳ, панҷарабандӣ ва кабудизоркунии гирду атроф дида мешавад.

Фурқат Орифов зимни боздид гуфт, ки сохтмончиён  бо як маҳал хӯроки гарм таъмин мебошанд. Аксарияти маҳсулоти сохтмонӣ ватанӣ буда, шароит барои сохтмончиён муҳайё гардидааст ва ҳаҷми кори онҳо аз 1700 то 3000 сомонӣ пешбинӣ шудааст. Ӯ барои сохтмон хушсифату дар мӯҳлати муайян ба сомон расонидан ва сари вақт дастрас намудани масолеҳи сохтмонӣ саҳмгузор аст.

Дар рафти кор бо сохтмончӣ Ҳалим Ваҳҳобов ҳамсуҳбат гардидем, ӯ иброз дошт, ки таи бист сол аст, ки бо соҳаи сохтмон сару кор дошта, ризқу рӯзиашро аз ҳамин касбаш мебинад.  Кормандон дар ҳар се моҳ бо либоси махсус таъмин мешавад ва маоши моҳона вобаста, ба ҳаҷми кор аз 1200 сомонӣ оғоз мешавад. Шукргузор аз даврони тинҷиву оромӣ дорам, ки ба ватани худ хизмат дорам, аз шароите, ки барои мо омода кардаанд, қаноатмандем.

Мурод Дадобоев, сохтмончӣ мегӯяд, ки маҳз ҳидоятҳои  Асосгузори сулҳу ваҳдати миллӣ - Пешвои миллат муҳтарам Эмомалӣ Раҳмон мӯҷиб гардид, ки рӯз то рӯз сартосари кишварамон ободу зебо гардад.

- Мо корҳои сохтмониро ба ӯҳда дошта, бо дасту дили гарм меҳнат намуда, ҷавобан ба ин ибтикор ваъда медиҳем, ки бо ғайрати дучанд саъйу кӯшишамонро баҳри гулгулшукуфии Ватани азиз равона сохта, бо сифати баланд корҳоро анҷом диҳем ва итминон аст, ки беморхона солиёни зиёд ба мардум хизмат намояд, мегӯяд ӯ.

Бояд зикр намуд, ки дар арафаи ҷашни 30-умин солгарди Истиқлолияти давлатии Ҷумҳурии Тоҷикистон мавриди истифода қарор гирифтани ин иншооти замонавӣ далели ғамхориҳои пайвастаи давлату Ҳукумати Ҷумҳурии Точикистон нисбат ба рушду такоммули соҳаи ҳифзи иҷтимоии аҳолӣ мебошад.

Нодир ТУРСУНЗОДА,

  «Ҳақиқати Суғд»

Читать далее