December 2019

02 December 2019

ХИЗМАТИ НАҚЛИЁТИ МУСОФИРБАР ТАНЗИМ МЕХОҲАД!

Солҳои охир дар вилоят, хусусан дар роҳҳои шаҳри Хуҷанд танбашавии воситаҳои нақлиёт дида мешавад. Маълум аст, ки ин ҳолат ҳамарӯза ҳангоми субҳу шом бештар ба назар мерасад, зеро вақти ба кор рафтану аз кор баргаштани мардум буда, равуои воситаҳои нақлиёт низ афзун аст.

Дар шумораҳои рӯзнома борҳо бобати бесарусомонии истгоҳи нақлиётии автовокзали шаҳри Хуҷанд, ба танзим даровардани ду тарафи кӯча ва зиёдшавии воситаҳои нақлиёт, аз ҷумла таксиҳои сабукрави сари кӯча мавод нашр намуда будем, вале то ҳол вазъият тағйир наёфтааст. Бино ба гуфти сокинон, онҳо борҳо ба мақомоти дахлдор бо ариза ва шикоятҳо муроҷиат кардаанд, вале то ҳол ягон чораҷӯӣ дида намешавад.

Дар ин минтақа маҳаллаи сераҳолии шаҳр - Масҷиди Савр ҷойгир буда, ҳамчунин хонандагони муассисаҳои таълимии ғайридавлатии «Паймони азизон», «Кавсар», муассисаи таҳсилоти миёнаи умумии № 16 ва боғчаи хусусии «Дилоро» рӯзе ду маротиба аз ин чорроҳа мегузаранд. Бино ба гуфти сардори Шуъбачаи ташвиқот ва тарғиботи шуъбаи БДА РВКД - Ҷумҳурии Тоҷикистон дар вилояти Суғд, подполковники милитсия Раҳимзода Карим Раҳим бо мақсади ба танзим даровардани ҳаракати воситаҳои нақлиёт, таъмини бехатарии пиёдагардон ва пешгирии ҳолатҳои танбашавии воситаҳои нақлиёт дар ин минтақа, тибқи нақшаи тасдиқнамудаи шуъбаи Бозрасии давлатии автомобилӣ, ҳамаруза, ду нафар нозирӣ хадамоти роҳбонӣ - дидбонии Бозрасии давлатии автомобилӣ ва 2 нафар милитсионери хадамоти посбонӣ - пайраҳадории шуъбаи ВКД Ҷумҳурии Тоҷикистон дар шаҳри Хуҷанд ба хизмат сафарбар мешаванд.

Аз ҷониби онҳо дар байни иштирокчиёни ҳаракат дар роҳ корҳои фаҳмондадиҳӣ гузаронида, нисбат ба ронандагоне, ки дидаву дониста Қоидаҳои ҳаракат дар роҳро вайрон мекунанд, маводи маъмурӣ тартиб дода мешавад. Ғайр аз ин, барои таъмини бехатарӣ ва аз роҳи асосӣ бехавф гузаштани хонандагони муассисаҳои таълимӣ дар асоси фармоиши Раёсати ВКД Ҷумҳурии Тоҷикистон дар вилояти Суғд аз санаи 3 – юми октябри соли 2019, таҳти №237 ҳамаи кормандони ШБДА ба муассисаҳои таълимие, ки дар шафати роҳҳои нақлиётгард ҷойгиранд, вобаста гардида, ҳар пагоҳӣ аз соати 07.00 то 08.30 дар якҷоягӣ бо омӯзгорон ва нозирони навраси ҳаракат дар гузаргоҳҳои пиёдагарди назди муассисаҳои таҳсилоти миёнаи умумӣ ва кӯдакистонҳо, аз ҷумла дар минтақаи «Автовокзали Пахтакор» навбатдорӣ мекунанд.

– Бояд қайд кард, ки оид ба риоя намудан ба талаботи Қоидаҳои ҳаракат дар роҳ ва пешгирии саривақтии ҳодисаҳои роҳу нақлиётӣ аз тарафи роҳбарият ва ҳайати шахсии ШБДА байни қишрҳои гуногуни ҷомеа корҳои ташвиқотиву тарғиботӣ вусъат дода шуда, дар давраи нӯҳ моҳи соли равон дар муассисаҳои нақлиётӣ – 142 маротиба, байни соҳибони воситаҳои нақлиёти шахсӣ – 261 маротиба ва дар муассисаҳои мактабӣ ва томактабии соҳаи маориф – 420 маротиба суҳбату вохӯрӣ гузаронида шудааст, – иброз дошт мавсуф. Бино ба гуфти ронандагони микроавтобусҳо, чанд сол қабл бо супориши масъулон ҳафтае фаъолияташонро дар минтақаи бозори "Суғдиён" - и микроноҳияи 3 - юм оғоз карда буданд, вале барои мусофирон мушкилӣ пеш омад. Зеро дар он ҷо ягон хатсайри байнишаҳрӣ фаъолият надошт.

Умуман, барои сокинон ва ронандагон ин мавзеъ қулай набуд. Баробари кӯчонидани терминал сокинони ноҳияҳои башаҳромада сарсон гардиданд ва мо дубора дар ин минтақа корамонро давом дода истодаем. - Наберагонам дар мактаби хусусии "Паймони азизон" таҳсил доранд.

Дар ин минтақа боз чанд мактаб ва кӯдакистон амал мекунанд. Аз нақлиёти бисёр волидон доимо дар хавотиранд, ки бачаҳо ба мактаб сиҳат раванду саломат баргарданд. Ғайр аз ин ҳанӯз аз субҳ овозҳои гӯшхарошу суханҳои беҷою хархашаҳои ронандагон табъи касро хира месозад, ҳатто наберагони хурдсолам бо асабоният аз хоб бедор мешаванд. Борҳо ба шуъбаҳои дахлдор мактуб равона кардем, то ки ин минтақа ба тартиб дароварда шавад ё истгоҳи нақлиёти байнишаҳрӣ ба дигар макон кӯчонда ва дар маҳалла тартибу низом ҷорӣ гардад, - мегӯяд сокини маҳалла Р. Неъматзода. Акмал Бобоев, сокини шаҳри Хуҷанд низ аз ин ҳол нигаронӣ дорад.

 - Ҳар субҳ, вақте бо автомашинаи шахсиам фарзандонамро ба мактабу боғча мебарам, дар минтақаи автовокзали шаҳрӣ душворӣ мекашам. Мошинҳо чунон бисёранд, ки ҳатто нозирони роҳ барои ба танзим даровардан мушкилӣ мекашанд. Қади роҳро таксиронҳо пур кардаанду ин ба танбашавӣ оварда мерасонад. Хоҳиш дорем, ки барои ба тартиб даровардани ин минтақа масъулон чораҷӯӣ намоянд, - мегӯяд ӯ.

 Бино ба гуфти сокинон, ронандагон аз кӯчаҳои маҳалла то назди истгоҳи автовокзал роҳро банд мекунанд. Хуб мешуд, масъулон ва роҳбарияти шаҳр барои бартараф кардани камбудиҳои ҷойдошта ва фароҳам овардани шароити мусоид ба кору зиндагии аҳолӣ чораҷӯӣ кунанд.

Шаҳноза ҲОМИДОВА,
“Ҳақиқати Суғд”

Читать далее

ХИРАДИ ПЕШВОИ МИЛЛАТ ВА ВОҚЕИЯТИ ИСТИҚЛОЛИ СИЁСӢ

Истиқлолияти давлатӣ ва сулҳу ваҳдати миллӣ дар Тоҷикистони маҳбуб имкон фароҳам овард, ки дар тамоми соҳаҳои иқтисодиву иҷтимоии мамлакат пешравиҳои назаррас ба даст оянд. Дар симои шахсияти оқилу дурандеш ва фидоии миллат муҳтарам Эмомалӣ Раҳмон ва сиёсати оқилонаву дурнигаронаи Ҳукумати Ҷумҳурии Тоҷикистон, ки бахши хориҷии онро сиёсати “дарҳои кушод” ташкил медиҳад, ҷаҳониён бори дигар бо фарҳанги инсонгароиву меҳанпарастии халқи шарифи кишвар ошноӣ пайдо намуданд.

Дар замони ҷанги шаҳрвандӣ иддае аз кишварҳои олам Тоҷикистонро ҳамчун кишвари ҷангзада ва ноамн шинохта, аз ҳамкориҳои дуҷониба худдорӣ мекарданд. Хушбахтона, дар натиҷаи таҳти роҳбарии фарзанди фарзонаи миллат муҳтарам Эмомалӣ Раҳмон ба даст омадани сулҳу ваҳдати миллӣ кишварҳои бонуфуз ва мутараққӣ, на балки бо Тоҷикистон ҳамкориҳои мутақобилан судманд ва робитаи дӯстӣ барқарор карданд, инчунин таҷрибаи нодири сулҳофарии кишвари моро мавриди ситоиш ва омӯзиш қарор доданд.

Аз ҷумла, таҷрибаи Тоҷикистон дар ҷодаи таъмини сулҳ, ба Ватан ва макони зисти доимиашон баргардонидани қариб як миллион гуреза ва ташкили ҳамгироии иҷтимоӣ аз ҷониби ташкилоту созмонҳои бонуфуз, аз ҷумла Созмони Милали Муттаҳид, Созмони Амният ва Ҳамкорӣ дар Аврупо воқеъбинона арзёбӣ шуда, ҳамчун шеваи нодири сулҳофарӣ эътироф гардид. Ба моҳияти сиёсати хориҷии Ҷумҳурии Тоҷикистон зери роҳбарии бевоситаи Асосгузори сулҳу ваҳдати миллӣПешвои миллат, Президенти Ҷумҳурии Тоҷикистон муҳтарам Эмомалӣ Раҳмон назар афканем, баръало мушоҳида мешавад, ки Пешвои муаззами миллат ҳанӯз аз рӯзҳои баҳодурона ба уҳда гирифтани зимоми давлатдории навини миллӣ то имрӯз ба сиёсати хориҷӣ аҳамияти хоса зоҳир намуда истодаанд.

Аз ҷумла, Сарвари давлат муҳтарам Эмомалӣ Раҳмон бори аввал моҳи сентябри соли 1993 аз минбари Созмони Милали Муттаҳид сухан ронда, ҷомеаи ҷаҳониро бо нияту нақшаҳои бунёдкорона, ҳадафҳои сиёсии сулҳҷӯёна, расидан ба ваҳдати миллӣ, инчунин, таҳкиму тақвияти ҳамкориҳо бо ҳама кишварҳои дӯсту сулҳпарвари ҷаҳон ошно намуданд. Ин андешаҳои некбинонаву дурнигарона бори дигар таваҷҷуҳи ҷомеаи ҷаҳонро ба Тоҷикистон ошно сохт. Маҳз, бо дарки сулҳҷӯиву сиёсати дурбинонаи Пешвои муаззами миллат муҳтарам Эмомалӣ Раҳмон, бахусус сиёсати умедбахши дӯстонаи хориҷӣ соли 1993 дувоздаҳ созмони байналмилалӣ, аз қабили Созмони Милали Муттаҳид, Созмони Амният ва Ҳамкорӣ дар Аврупо, Хазинаи байналмилалии асъор, Бонки ҷаҳонӣ ва Бонки Аврупоии таҷдид ва рушд, соли 1994 ҳашт созмони байналмилалӣ, соли 1995 ду созмон ва соли 1996 ду созмони дигар намояндагиҳои худро дар Ҷумҳурии Тоҷикистон таъсис дода, ба фаъолият шурӯъ намуданд. Қабули Қатъномаҳои Маҷмааи умумии СММ доир ба эълон гардидани соли 2003 - «Соли байналмилалии оби тоза», Даҳсолаи байналмилалии амал «Об - барои ҳаёт», солҳои 2005 – 2015 ва Даҳсолаи байналмилалии амал “Об барои рушди устувор", солҳои 2018 - 2028" аз иқдомоти судманд ва пешниҳодоти муфиди сатҳи ҷаҳонии Ҷумҳурии Тоҷикистон танҳо вобаста бо масоили об аст, ки Тоҷикистонро ба ҷаҳон ва ҷаҳонро бо Тоҷикистон қарину наздик гардонид. Ҷумҳурии Тоҷикистон дар доираи Созмони илмию фарҳангии СММ (ЮНЕСКО) низ ба дастовардҳое дар заминаи муаррифии осори фарҳангию таърихии миллати тоҷик ноил шуд, ки боиси ифтихори тамоми мардуми шарифи Тоҷикистон аст.

Аз ҷумла, соли 2002 ба ҳайси “Шаҳри сулҳ” сазовори ҷоизаи ин ташкилоти бонуфуз гардидани пойтахти кишвари азизамон - шаҳри Душанбе, соли 2003 ҳамчун мусиқии Тоҷикистон ва Ӯзбекистон ба ҳайси шоҳкориҳои шифоҳӣ ва фарҳангии мероси ғайримоддии башарият ба феҳрасти ЮНЕСКО ворид карда шудани “Шашмақом”, соли 2010 ба феҳрасти мероси фарҳангии умумиҷаҳонӣ ворид гардидани шаҳраки қадимаи Саразм, соли 2013 ба феҳрасти Мероси табиии умумиҷаҳонӣ шомил гардидани “Боғи миллии Тоҷикистон – Кӯҳҳои Помир”, ба феҳрасти ҷашнҳое, ки бо иштироки ЮНЕСКО дар солҳои 2014 - 2015 таҷлил шуданд, ворид гардидани 3000- солагии Ҳисор, 700 - солагии Мир Сайид Алии Ҳамадонӣ (дар ҳамкорӣ бо Ҷумҳурии Исломии Эрон) ва 600 - солагии Абдураҳмони Ҷомӣ шаҳодати гуфтаҳои болост.

Тавре огаҳӣ дорем, Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз 5 то 12 - уми ноябри соли равон бо сафари корӣ ба Конфедератсияи Швейтсария ва Ҷумҳурии Франсия ташриф оварда, бо роҳбарияти воломақоми ин кишварҳо, ташкилоту созмонҳои бонуфуз, соҳибкорон ва сармоягузорон, намояндагони доираҳои илму фарҳанг ва санъати тоҷик дар Ҷумҳурии Франсия суҳбат намуда, оид ба тақвияти ҳамкориҳои мутақобилан судманд ибрози назар карданд. Дар доираи ин сафари бобарор Пешвои муаззами миллат муҳтарам Эмомалӣ Раҳмон бо Дабири Кулли Созмони Милали Муттаҳид Антониу Гуттериш ва Директори кулли ЮНЕСКО хонум Одрӣ Азуле суҳбати самимӣ анҷом дода, аз робитаҳои дуҷониба бо ин ниҳодҳои бонуфузи ҷаҳонӣ изҳори қаноатмандӣ карда шуд.

Инчунин, боиси хушнудист, ки дар доираи сафари муваффақона ба Аврупо муҳтарам Пешвои миллат дар Форуми Париҷ оид ба масъалаҳои сулҳ ва ҷаласаи 40 - уми Конфронси Генералии ЮНЕСКО дар масъалаҳои вобаста ба тағйирёбии иқлим маърӯза карда, чанд пешниҳоди хешро гуфтанд. Ин иқдоми наҷиб ва ташаббусҳои созандаи Сарвари давлат бори дигар аз сиёсати башардӯстонаи мардуми шарифи Тоҷикистон дар ақсои олам бозгӯӣ мекунад.

Мо, халқи Тоҷикистон, бо азму иродаи матин бо пайравӣ ба сиёсати муваффақонаву меҳанпарастонаи Пешвои маҳбубу муаззами миллат муҳтарам Эмомалӣ Раҳмон дар роҳи эъмори давлати демократӣ ва ҳуқуқбунёд қадамҳои устувору баҳодурона гузошта, дар ояндаи наздик бо сарҷамъиву муттаҳидӣ Тоҷикистони азизу муқаддасро ба як кишвари пешрафта ва мутараққӣ табдил хоҳем дод.

Раъно ҲОШИМЗОДА,
раиси шаҳри Бӯстон

Читать далее

РИСОЛАТИ АСЛӢ - МАЪРИФАТИ МЕҲАНПАРАСТӢ

Ҳамоиши гирандагони Стипендияи Президенти Ҷумҳурии Тоҷикистон

Самимона ва сидқан дӯст доштани ин Ватан ва ин сарзамин, арҷ гузоштан ба арзишҳои неки миллӣ ва саъю талош кардан ба хотири ҳифзу густариши онҳо, инчунин оштинопазир будан бо ақидаву гароишҳои бегонапарастӣ дар маҷмӯъ андешаи миллиро ба вуҷуд меорад. Андешаи миллӣ раванди инкишофи ҷаҳонбинии афроди миллатро тақвият бахшида, ҷавононро ба худшиносиву худогоҳӣ ҳидоят месозад.

Эмомалӣ Раҳмон

Санаи 30 - юми ноябри соли равон дар Кохи фарҳанги “Суғдиён” – и маркази вилоят ҳамоиши гирандагони Стипендияи Президенти Ҷумҳурии Тоҷикистон таҳти унвони “Ҷавонон – пайрави Пешвои миллат” доир гардид. Дар ҳамоиш раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Абдуллозода Аҳтам Рустам ва муовини Раиси вилоят Баҳоваддин Баҳодурзода иштирок ва суханронӣ намуда, дар вазъияти мутантан ба гирандагони Стипендияи Президентӣ шаҳодатнома ва маблағи онро тақдим доштанд.

Баҳоваддин Баҳодурзода зимни суханронии хеш гирандагони Стипендияи Президенти Ҷумҳурии Тоҷикистонро барои мушарраф гардиданашон ба ин номи пуршараф табрик намуда, аз ҷумла таъкид дошт, ки ҷавонони кишвар, бахусус ҷавонони вилояти Суғд дар таҳкими пояҳои давлатдорӣ, рушди босуботи ҷомеа ва пешбурду татбиқи сиёсати Асосгузори сулҳу Ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Мақомоти иҷроияи ҳокимияти давлатии вилоят нақши муҳим доранд.

- Таваҷҷуҳ ба фаъолияти ҷавонон ва татбиқи муваффақонаи сиёсати давлатии ҷавонон имрӯз яке аз муҳимтарин самтҳои сиёсати давлатӣ маҳсуб ёфта, ба фаъолияти ҷавонон, бахусус хонандагони муассисаҳои таҳсилоти миёнаи умумӣ ва донишҷӯён дар қаламрави кишвар эътибори бештар зоҳир гардида, иқтидор ва имкониятҳои онҳо барои пешрафти самтҳои идоракунии давлатӣ босамар истифода мегардад. Ҷавонони вилоят низ дар ҷавоби ин ғамхориҳо пайваста мекӯшанд, ки бо хониши аъло, иҷрои корҳои таҳқиқотии илмӣ, хизмат дар сафи Артиши миллӣ ва муҳим аз ҳама, дар тарғибу татбиқи сиёсати Ҳукумати Тоҷикистон пешсаф ва садоқат ба марзу буми Ватан дошта бошанд, - зикр дошт муовини Раиси вилоят.

Воқеан ҳам тайи солҳои охир ҷиҳати дастгирии ҳамаҷонибаи ҷавонон ва мусоидат барои ташаккули фикриву эҷодии онҳо аҳамияти махсус зоҳир гардида, бо дарназардошти афзудани ҳаҷми музди меҳнати кормандони соҳаҳои таъминоти буҷавӣ зиёд шудани ҳаҷми намудҳои Стипендияҳои Президентӣ, Раиси вилояти Суғд ва раисони шаҳру ноҳияҳо аз муҳимтарин тадбирҳои дастгирикунандаи давлат ва Ҳукумати кишвар нисбат ба хонандагони аълохон маҳсуб меёбад.

Мавриди зикр аст, ки алҳол дар миқёси вилоят 928 муассисаи таҳсилоти миёнаи умумӣ фаъолият бурда, дар онҳо зиёда аз 550 ҳазор нафар ба таҳсил фаро гирифта шудаанд.

Боиси қаноатмандист, ки муассисаҳои таҳсилоти миёна ва олии касбии вилоят рисолати аслии хешро баҳри мусоидат ба рушди маърифатнокии ҷомеа, тарбияи шахсиятҳои бузург, арбобони давлативу сиёсӣ, ходимони ҷамъиятӣ, олимону адибон нигаронида, соҳаҳои гуногуни хоҷагии халқи мамлакатро бо мутахассисони дорои касбу кори гуногун таъмин менамоянд.

Муовини Раиси вилоят ҳамзамон, аз саҳми ҷавонони фаъол дар рушди ҷомеаи муосир ҳарф зада, мубориза бо амалҳои номатлубро яке аз вазифаҳои муҳимтарини ҷавонони фаъол арзёбӣ дошт.

- Аз касе пӯшида нест, ки экстремизми динӣ, таассуб ва хурофот, ки аз асолати дини мубини Ислом дур аст, дар ҷомеаи мо кӯшиши реша давонидан дорад. Ин решаҳоро ёфтан, шинохтан ва фош кардан вазифаи мову шумост, - гуфт Баҳоваддин Баҳодурзода. - Равандҳои таҳаввулоти ҷомеа имрӯз тақозо дорад, ки маҳз корҳои таблиғотӣ, маърифатию равшаннамоӣ дар маркази таваҷҷуҳи ҷавонони фаъол, онҳое, ки ба ояндаи миллату давлати хеш бепарво нестанд, бояд қарор гирад.

Дар ҷамъомад изҳори боварӣ карда шуд, ки ҷавонон дар замони рушди босуръати илму техника ба азхудкунии технологияи муосир, ташаккули фарҳанги техникии ҷомеа, омӯхтану истифода кардани дастовардҳои илм аҳамияти хоса дода, бо маърифати баланд, кӯшишҳову талошҳои пайгирона ва эҳсоси баланди ватандӯстию меҳанпарастӣ дар пешрафти кишвари соҳибистиқлоламон саҳми арзанда хоҳанд гузошт.

Чорабиниро барномаи рангини фарҳангӣ ҳусни тозае зам намуд. Баъди ҷамъбасти ҳамоиши гирандагони Стипендияи Президенти Ҷумҳурии Тоҷикистон дар кӯчаи марказии шаҳри Хуҷанд роҳпаймоӣ бо иштироки зиёда аз 1000 нафар ҷавон доир гашт.

Мухтори Абдулло,
“Ҳақиқати Суғд”

 

 

 

 

 

 

Читать далее