October 2019

31 October 2019

ҚОНУНИ ҶУМҲУРИИ ТОҶИКИСТОН "ДАР БОРАИ АВФ"

Пешниҳоди Президенти Ҷумҳурии Тоҷикистон, Пешвои миллатро баррасӣ намуда, Маҷлиси намояндагони Маҷлиси Олии Ҷумҳурии Тоҷикистон ҷиҳати амалӣ намудани принсипи инсондӯстӣ ба муносибати 25 - солагии қабули Конститутсияи Ҷумҳурии Тоҷикистон Қонуни Ҷумҳурии Тоҷикистон «Дар бораи авф» - ро қабул мекунад.

Моддаи 1

Аз адои ҷазои маҳрум сохтан аз озодӣ, новобаста аз муҳлати ҷазои таъйиншуда ва аз адои ҷазоҳои дигари ба маҳрум сохтан аз озодӣ алоқаманднабуда маҳкумшудагони зерин озод карда шаванд:

- занон;

- ноболиғон;

- мардони аз синни 55 боло;

- маъюбони гуруҳҳои I, II ва III, инчунин шахсони гирифтори бемориҳои омоси бадсифати марҳалаи 4 ва гуруҳи клиникии 4 аз рӯи таснифи байналмилалӣ, омоси бадсифати бофтаҳои лимфоидӣ ва хунофар, сили фаъоли узвҳои нафас ва дигар узвҳои бадан, бемории ишемиявии дил - стенокардияи фаъолияти ҷисмонии гуруҳҳои III ва IV мансуб донисташуда;

- иштирокчиёни Ҷанги Бузурги Ватанӣ ва шахсони ба онҳо баробаркардашуда, иштирокчиёни амалиёти ҷангӣ дар ҳудуди дигар давлатҳо, инчунин шахсоне, ки бар асари фалокати Неругоҳи барқи атомии Чернобил зарар дидаанд;

- шахсоне, ки бо мукофотҳои давлатии ИҶШС, ҶШС Тоҷикистон ва Ҷумҳурии Тоҷикистон сарфароз гардонида шудаанд;

- шаҳрвандони хориҷӣ.

Моддаи 2

Маҳкумшудагоне, ки аз беэҳтиётӣ ҷиноят содир намудаанд, новобаста аз намуди ҷазои таъйиншуда, аз адои ҷазо озод карда шаванд.

Моддаи 3

Маҳкумшудагони зерин аз ҷазо ё адои ҷазо озод карда шаванд, агар:

- нисбати онҳо иҷрои ҳукм мавқуф гузошта шуда бошад;

- нисбати онҳо ҷазо шартан татбиқ накарда шуда бошад;

- онҳо ҷазоро дар колонияҳои ислоҳии сукунат адо карда истода бошанд;

- онҳо шартан пеш аз муҳлат аз адои ҷазо озод шуда бошанд;

- онҳо ба ҷазоҳои дигари ба маҳрум сохтан аз озодӣ алоқаманднабуда маҳкум шуда бошанд;

- онҳо барои содир кардани ҷиноятҳои дар қисмҳои 3 ва 4 моддаи 245, қисми 3 моддаи 246, қисмҳои 3 ва 4 моддаи 247, қисми 3 моддаи 253, қисми 3 моддаи 257 ва қисми 2 моддаи 264 Кодекси ҷиноятии Ҷумҳурии Тоҷикистон (таҳрири соли 1998) пешбинигардида маҳкум шуда, зарари моддии расонидашударо пурра талофӣ карда бошанд;

- онҳо барои содир кардани ҷинояти гирифтани пора (моддаи 319 Кодекси ҷиноятии Ҷумҳурии Тоҷикистон (таҳрири соли 1998) ё додани пора (моддаи 320 Кодекси ҷиноятии Ҷумҳурии Тоҷикистон (таҳрири соли 1998) ба маблағи то 10 000 (даҳ ҳазор) сомонӣ гунаҳгор дониста шуда, ба ҷазои маҳрум сохтан аз озодӣ маҳкум гардида бошанд;

- занҳое, ки барои содир кардани ҷиноятҳои махсусан вазнин зиёда аз дувоздаҳ сол ҷазои маҳрум сохтан аз озодиро адо намуда бошанд, новобаста аз маҳдудиятҳои дар ҳамин Қонун пешбинишуда;

- онҳо ба синни 70 расида бошанд, новобаста аз маҳдудиятҳои дар ҳамин Қонун пешбинишуда, ба истиснои шахсоне, ки барои содир кардани ҷиноятҳои дар моддаҳои 104, 138, 139, қисми 4 моддаи 249 ва моддаи 401 Кодекси ҷиноятии Ҷумҳурии Тоҷикистон (таҳрири соли 1998) пешбинишуда маҳкум шудаанд;

- шаҳрвандони хориҷие, ки барои содир кардани ҷиноятҳои дар моддаҳои 1301, 181, қисми 3 моддаи 200, моддаҳои 237, 244, қисмҳои 1, 2 ва 3 моддаи 247, моддаҳои 281, 284, 3071, 3072, 3073 ва 335 Кодекси ҷиноятии Ҷумҳурии Тоҷикистон (таҳрири соли 1998) пешбинишуда маҳкум шудаанд.

Моддаи 4

Маҳкумшудагони зерин, ки барои содир кардани ҷинояти қасдона маҳкум шудаанд, аз адои ҷазо озод карда шаванд:

- маҳкумшудагоне, ки барои содир кардани ҷиноятҳои начандон вазнин ва дараҷаи миёна ба муҳлати то панҷ сол аз озодӣ маҳрум сохта шудаанд;

- маҳкумшудагоне, ки барои содир кардани ҷиноятҳои вазнин маҳкум шудаанд ва на камтар аз се як ҳиссаи муҳлати ҷазоро дар ҷойҳои маҳрумӣ аз озодӣ адо кардаанд;

- маҳкумшудагоне, ки барои содир кардани ҷиноятҳои махсусан вазнин маҳкум шудаанд ва на камтар аз чор се ҳиссаи муҳлати ҷазоро дар ҷойҳои маҳрумӣ аз озодӣ адо кардаанд.

Моддаи 5

1. Маҳкумшудагоне, ки барои содир кардани маҷмӯи ҷиноятҳо ё ҷиноятҳои махсусан вазнин ба муҳлати зиёда аз понздаҳ сол аз озодӣ маҳрум шуда, то мавриди амал қарор додани Қонуни мазкур воқеан понздаҳ сол ҷазои маҳрум сохтан аз озодиро адо намудаанд ва муҳлати адонагардидаи ҷазо нисбаташон то се сол боқӣ мондааст, новобаста аз маҳдудиятҳои дар Қонуни мазкур пешбинигардида, аз адои ҷазо озод карда шаванд.

2. Шахсоне, ки барои содир кардани ҷинояти дар қисми 2, моддаи 3073 Кодекси ҷиноятии Ҷумҳурии Тоҷикистон (таҳрири соли 1998) пешбинишуда ба ҷавобгарии ҷиноятӣ кашида шудаанд ё маҳкум шудаанд, новобаста аз маҳдудиятҳои дар ҳамин Қонун пешбинишуда, аз ҷавобгарии ҷиноятӣ ва адои боқимондаи ҷазо озод карда шаванд.

Моддаи 6

Пешбурди парвандаҳои ҷиноятии зерин, ки таҳти таҳқиқ, тафтиши пешакӣ ва баррасии судӣ қарор доранд ё аз тарафи судҳо баррасӣ нагардидаанд, қатъ карда шавад:

- оид ба ҷиноятҳое, ки то рӯзи мавриди амал қарор додани Қонуни мазкур аз тарафи шахсони дар моддаҳои 1, 2, сархатҳои ҳафтум, нӯҳум, даҳуми моддаи 3 ва қисми 2, моддаи 5 ҳамин Қонун пешбинишуда содир гардидаанд;

- нисбати шахсоне, ки бори аввал қасдан ҷиноятҳои начандон вазнин ва дараҷаи миёна содир намудаанд;

- нисбати шахсоне, ки ҷиноятҳои пешбининамудаи қисмҳои 3 ва 4 моддаи 245, қисми 3 моддаи 246, қисмҳои 3 ва 4 моддаи 247, қисми 3 моддаи 253, қисми 3 моддаи 257 ва қисми 2, моддаи 264 Кодекси ҷиноятии Ҷумҳурии Тоҷикистон (таҳрири соли 1998) - ро содир карда, зарари моддии расонидашударо пурра талофӣ намудаанд.

Моддаи 7

Муҳлати ҷазои адонагардидаи маҳкумшудагоне, ки нисбати онҳо амали моддаҳои 1, 2, сархатҳои шашум, ҳафтум, даҳуми моддаи 3, моддаҳои 4 ва 6 Қонуни мазкур татбиқ намегардад, кам карда шавад:

- нисбати маҳкумшудагоне, ки барои содир кардани ҷинояти беэҳтиётӣ ба онҳо ҷазои маҳрум сохтан аз озодӣ таъйин карда шудааст - аз ду як ҳисса;

- нисбати маҳкумшудагоне, ки барои содир кардани ҷиноятҳои начандон вазнин ва дараҷаи миёна ба онҳо ҷазои маҳрум сохтан аз озодӣ таъйин карда шудааст - аз ду як ҳисса;

- нисбати маҳкумшудагоне, ки барои содир кардани ҷиноятҳои вазнин ба онҳо ҷазои маҳрум сохтан аз озодӣ таъйин карда шудааст - аз се як ҳисса;

- нисбати маҳкумшудагоне, ки барои содир кардани ҷиноятҳои махсусан вазнин ба онҳо ҷазои маҳрум сохтан аз озодӣ таъйин карда шудааст - аз чор як ҳисса.

Моддаи 8

Муқаррароти моддаҳои 6 ва 7 Қонуни мазкур нисбат ба шахсони зерин татбиқ карда намешаванд:

- шахсоне, ки барои содир кардани ҷиноятҳои дар моддаҳои 179, 186, 305, 306, 310, қисми 4 моддаи 319 (агар маблағи пора аз 10 000 (даҳ ҳазор) сомонӣ зиёд бошад), моддаи 328, қисми 2 моддаи 330, моддаҳои 401 ва 4011 Кодекси ҷиноятии Ҷумҳурии Тоҷикистон (таҳрири соли 1998) пешбинигардида ба ҷавобгарии ҷиноятӣ кашида шудаанд ё маҳкум шудаанд;

- шахсоне, ки ба ҷазои якумра аз озодӣ маҳрум сохтан маҳкум шудаанд;

- маҳкумшудагоне, ки нисбати онҳо ҷазои қатл ба ҷазои маҳрум сохтан аз озодӣ иваз карда шудааст;

- маҳкумшудагоне, ки барои содир кардани ҷинояти қасдона дар маҳали адои ҷазои маҳрум сохтан аз озодӣ маҳкум шудаанд.

Моддаи 9

1. Муқаррароти моддаҳои 1, 2, 4 ва 6 Қонуни мазкур нисбати шахсоне, ки барои ҷиноятҳои зерин ба ҷавобгарии ҷиноятӣ кашида шудаанд ё маҳкум гардидаанд, ба истиснои занон ва ноболиғон, татбиқ карда намешаванд:

- барои ҷиноятҳои пешбининамудаи моддаҳои 61, 62, 63, 64, 65, 66, 67, 68, 69, 70, 74, 104, 105 ва 121 Кодекси ҷиноятии Ҷумҳурии Тоҷикистон (таҳрири соли 1961);

- барои ҷиноятҳои пешбининамудаи моддаи 104, қисми 2, моддаи 109, қисми 3, моддаи 110, моддаи 122, қисмҳои 2 ва 3, моддаи 125, моддаҳои 130, 1301, қисми 3 моддаи 131, моддаҳои 137, 138, 139, қисмҳои 2 ва 3 моддаи 141, қисми 2 моддаи 142, қисми 2 моддаи 1421, моддаҳои 1431, 167, 179, 1791, 1792, 1793, 181, қисмҳои 3 ва 4 моддаи 184, қисмҳои 4 ва 5 моддаи 1841, қисмҳои 3 ва 4 моддаи 1842, қисмҳои 3 ва 4 моддаи 1843, моддаҳои 1844, 185, 186, 187, 188, 189, 193, 195, 196, 199, қисмҳои 3 ва 4 моддаи 200, қисми 4 моддаи 201, қисми 3 моддаи 202, қисми 3 моддаи 2021, қисми 3 моддаи 2022, қисми 3 моддаи 203, қисми 4 моддаи 204, қисми 2 моддаи 205, қисмҳои 3, 4 ва 5 моддаи 212, қисми 3 моддаи 237, қисми 4 моддаи 244, қисмҳои 3 ва 4 моддаи 248, моддаҳои 249, 250, қисми 3 моддаи 252, қисмҳои 3, 4 ва 5 моддаи 289, моддаҳои 305, 306, 307, 3071, 3072, қисми 1 моддаи 3073, моддаҳои 3074, 308, 309, 310, 313, қисми 3 моддаи 314, қисми 4 моддаи 319 (агар маблағи пора аз 10 000 (даҳ ҳазор) сомонӣ зиёд бошад), қисми 2 моддаи 320 (агар маблағи пора аз 10 000 (даҳ ҳазор) сомонӣ зиёд бошад), моддаҳои 328, 329, қисми 2 моддаи 330, моддаҳои 331, 332, қисми 3 моддаи 335, қисмҳои 2 ва 3 моддаи 3351, қисми 2 моддаи 3381, моддаи 347 (агар хабар надодан дар бораи ҷиноят ё пинҳон доштани он ба ҷиноятҳои хусусияти террористӣ ва экстремистидошта, инчунин ҷиноятҳо ба муқобили асосҳои сохти конститутсионӣ ва амнияти давлат вобаста бошад), қисмҳои 2 ва 3 моддаи 356, моддаи 365, қисми 2, моддаи 368, қисмҳои 2 ва 3, моддаи 369, қисмҳои 2 ва 3, моддаи 370, моддаҳои 374, 375, 382, 383, 384, 385, қисми 4, моддаи 386, қисми 4, моддаи 391, моддаҳои 393, 395, 396, 397, 398, 399, 400, 401, 4011, 402, 403, 404 ва 405 Кодекси ҷиноятии Ҷумҳурии Тоҷикистон (таҳрири соли 1998);

- нисбати шахсоне, ки ба ҷазои якумра аз озодӣ маҳрум сохтан маҳкум шудаанд;

- нисбати шахсоне, ки нисбати онҳо ҷазои қатл ба ҷазои маҳрум сохтан аз озодӣ иваз карда шудааст;

- нисбати шахсоне, ки барои содир кардани ҷинояти қасдона дар маҳали адои ҷазои маҳрум сохтан аз озодӣ маҳкум шудаанд;

- нисбати шахсоне, ки ҷиноятро дар ҳолати ретсидиви махсусан хавфнок содир кардаанд;

- нисбати шахсоне, ки барои содир кардани ҷиноятҳои дар қисмҳои 3 ва 4 моддаи 245, қисми 3 моддаи 246, қисмҳои 3 ва 4 моддаи 247, қисми 3 моддаи 253, қисми 3 моддаи 257 ва қисми 2 моддаи 264 Кодекси ҷиноятии Ҷумҳурии Тоҷикистон (таҳрири соли 1998) пешбинигардида маҳкум шуда, зарари моддии расонидашударо пурра талофӣ накарда бошанд.

2. Муқаррароти моддаҳои 1, 2, 4 ва 6 Қонуни мазкур нисбати занон ва ноболиғоне, ки ҷиноятҳои пешбининамудаи моддаи 104, қисмҳои 2 ва 3 моддаи 125, қисми 3 моддаи 1301, қисми 3 моддаи 138, қисмҳои 3 ва 4 моддаи 139, моддаҳои 179, 1791, 1792, 1793, 185, 186, 187, қисми 4 моддаи 200, қисмҳои 3, 4 ва 5 моддаи 212, моддаҳои 307, 3071, 3072, қисми 1 моддаи 3073, моддаҳои 3074, 308, 309, 310, 313, 395, 396, 397, 398, 399, 400, 401, 4011, 402, 403, 404 ва 405 Кодекси ҷиноятии Ҷумҳурии Тоҷикистон (таҳрири соли 1998) - ро содир намудаанд, инчунин нисбати занон ва ноболиғоне, ки онҳо барои содир кардани ҷиноятҳои дар қисми 4 моддаи 245, қисми 3 моддаи 246 ва қисми 4 моддаи 247 Кодекси ҷиноятии Ҷумҳурии Тоҷикистон (таҳрири соли 1998) пешбинигардида маҳкум шуда, зарари моддии расонидашударо пурра талофӣ накарда бошанд (агар маблағи зарар аз 100 000 (сад ҳазор) сомонӣ зиёд бошад), татбиқ карда намешаванд.

Моддаи 10

1. Амали Қонуни мазкур нисбати шахсоне, ки то мавриди амал қарор додани он ҷиноят содир кардаанд ё аз ҷониби мақомоти таҳқиқ ва тафтиши пешакӣ ба ҷавобгарии ҷиноятӣ кашида шудаанд ё парвандаи ҷиноятӣ нисбати онҳо дар судҳо баррасӣ нагардидааст ё мавриди баррасӣ қарор дорад ва ё аз ҷониби судҳо маҳкум шудаанд, инчунин нисбати шахсоне, ки аз ҷониби судҳои давлатҳои хориҷӣ маҳкум шуда, барои минбаъд адо намудани ҷазо ба Ҷумҳурии Тоҷикистон оварда шудаанд, паҳн мегардад.

2. Татбиқи Қонуни мазкур доғи судии шахсро намебардорад.

Моддаи 11

Иҷрои Қонуни мазкур ба зиммаи мақомот ва муассисаҳои зерин гузошта шавад:

1) мақомоти таҳқиқ ва тафтиши пешакӣ - нисбати шахсоне, ки мавод ё парвандаҳои ҷиноятӣ нисбати онҳо дар баррасии ин мақомот қарор доранд;

2) судҳо:

- нисбати шахсоне, ки мавод ё парвандаҳои ҷиноятӣ нисбати онҳо ба судҳо ворид гардидаанд, вале то мавриди амал қарор додани Қонуни мазкур баррасӣ нашудаанд ё баррасӣ гардидаанд, вале ҳукм нисбати онҳо эътибори қонунӣ пайдо накардааст;

- нисбати маҳкумшудагоне, ки иҷрои ҳукм нисбати онҳо мавқуф гузошта шудааст ва маҳкумшудагоне, ки нисбати онҳо бо ҳукми суд ҷазо шартан татбиқ карда нашудааст (бо пешниҳоди нозироти корҳои ислоҳӣ ва фармондеҳии қисмҳои ҳарбие, ки рафтори маҳкумшуда ва хизматчиёни ҳарбиро назорат менамояд, аз ҷониби суди маҳали иҷрои ҳукм ё зисти маҳкумшуда ва судҳои ҳарбӣ);

- нисбати маҳкумшудагоне, ки аз маҳали маҳрум сохтан аз озодӣ шартан пеш аз муҳлат аз ҷазо озод шудаанд ё қисми адонагардидаи ҷазои нисбати онҳо таъйиншуда то мавриди амал қарор додани Қонуни мазкур ба ҷазои сабуктар иваз карда шудааст (бо пешниҳоди нозироти корҳои ислоҳӣ аз ҷониби суди маҳали иҷрои ҳукм ё зисти маҳкумшуда);

- нисбати маҳкумшудагоне, ки ба ҷазои ҷарима маҳкум шудаанд (бо пешниҳоди иҷрочии Хадамоти иҷрои назди Ҳукумати Ҷумҳурии Тоҷикистон, аз ҷониби суде, ки ҳукм баровардааст);

3) муассисаҳои тобеи Сарраёсати иҷрои ҷазои ҷиноятии Вазорати адлияи Ҷумҳурии Тоҷикистон:

- нисбати шахсоне, ки ба ҷазои маҳрум сохтан аз озодӣ маҳкум шудаанду ба ҳабс гирифта нашудаанд ва ҳукм нисбати онҳо эътибори қонунӣ пайдо кардааст;

- нисбати шахсоне, ки ҷазоро дар намуди корҳои ҳатмӣ, корҳои ислоҳӣ дар ҷойи корашон ё дар ҷойҳои дигаре, ки мақомоти иҷрокунандаи ҳукм муайян менамоянд, адо мекунанд, инчунин шахсоне, ки ба маҳрум кардан аз ҳуқуқи ишғоли мансабҳои муайян ё машғул шудан ба фаъолияти муайян ҳамчун ҷазои асосӣ маҳкум карда шудаанд;

- нисбати маҳкумшудагоне, ки ҳукми суд нисбати онҳо эътибори қонунӣ пайдо кардааст ва дар ҷойҳои маҳрумӣ аз озодӣ қарор доранд;

- нисбати маҳкумшудагоне, ки ҷазоро дар колонияҳои ислоҳии сукунат адо мекунанд;

4) фармондеҳони қисмҳои ҳарбӣ - нисбати хизматчиёни ҳарбие, ки нисбаташон пешбурди таҳқиқ ё парвандаи ҷиноятӣ аз ҷониби мақомоти таҳқиқи қисмҳои ҳарбӣ оғоз карда шудааст.

Моддаи 12

1. Қарор дар бораи татбиқ кардан ё рад кардани татбиқи Қонуни мазкур нисбати ҳар шахс алоҳида қабул карда мешавад.

2. Қарор дар бораи татбиқи Қонуни мазкур нисбати шахсоне, ки дар кофтуков қарор доранд, бе даъват намудан ва бе розигии чунин шахсон қабул карда мешавад.

3. Дар сурати нокифоя будани маълумоти зарурӣ баррасии масъалаи татбиқи Қонуни мазкур то дастрас гардидани ҳуҷҷатҳои иловагӣ, вале ба муҳлати на дертар аз як моҳ мавқуф гузошта мешавад.

Моддаи 13

1. Мақомоти таҳқиқ ва тафтиши пешакӣ, фармондеҳони қисмҳои ҳарбӣ, муассисаҳои тобеи Сарраёсати иҷрои ҷазои ҷиноятии Вазорати адлияи Ҷумҳурии Тоҷикистон Қонуни мазкурро бо розигии прокурори дахлдор татбиқ менамоянд.

2. Қонуни мазкур аз ҷониби судҳо бо иштироки ҳатмии прокурор татбиқ карда мешавад.

Моддаи 14

1. Ҳангоми татбиқи Қонуни мазкур ҳолатҳои зерин бояд ба инобат гирифта шаванд:

1) сархатҳои якум ва дуюми моддаи 1 Қонуни мазкур нисбати занон ва ноболиғон ба шарте татбиқ мегарданд, ки онҳо то рӯзи мавриди амал қарор додани Қонуни мазкур ҷиноят содир карда бошанд ва ҷинояти содиркардаашон ҷиноятҳои пешбининамудаи моддаи 104, қисмҳои 2 ва 3 моддаи 125, қисми 3 моддаи 1301, қисми 3 моддаи 138, қисмҳои 3 ва 4 моддаи 139, моддаҳои 179, 1791, 1792, 1793, 185, 186, 187, қисми 4 моддаи 200, қисмҳои 3, 4 ва 5 моддаи 212, моддаҳои 307, 3071, 3072, қисми 1 моддаи 3073, моддаҳои 3074, 308, 309, 310, 313, 395, 396, 397, 398, 399, 400, 401, 4011, 402, 403, 404 ва 405 Кодекси ҷиноятии Ҷумҳурии Тоҷикистон (таҳрири соли 1998) ва ҷиноятҳои дар моддаи 8 ҳамин Қонун пешбинишуда набошанд. Инчунин нисбати занон ва ноболиғоне, ки онҳо барои содир кардани ҷиноятҳои дар қисми 4 моддаи 245, қисми 3 моддаи 246 ва қисми 4 моддаи 247 Кодекси ҷиноятии Ҷумҳурии Тоҷикистон (таҳрири соли 1998) пешбинигардида маҳкум шуда, зарари моддии расонидашударо пурра талофӣ накарда бошанд (ба истиснои ҳолатҳое, ки маблағи зарар то 100 000 (сад ҳазор) сомонӣ бошад), татбиқ карда намешаванд;

2) амали сархати дуюми моддаи 1 Қонуни мазкур нисбати шахсоне татбиқ мегардад, ки то рӯзи содир кардани ҷиноят ба синни 18 нарасидаанд;

3) амали сархати сеюми моддаи 1 Қонуни мазкур нисбати мардоне татбиқ мегардад, ки то рӯзи мавриди амал қарор додани Қонуни мазкур ба синни 55 расидаанд;

4) амали сархати нуҳуми моддаи 3 Қонуни мазкур нисбати шахсоне татбиқ мегардад, ки то рӯзи мавриди амал қарор додани Қонуни мазкур ба синни 70 расидаанд;

5) сархати чоруми моддаи 1 Қонуни мазкур нисбати шахсоне татбиқ карда мешавад, ки мувофиқи тартиби муқарраргардида то мавриди амал қарор додани Қонуни мазкур маъюбони гуруҳҳои I, II ва ё III дониста шудаанд, инчунин нисбати шахсоне, ки гирифтори бемориҳои омоси бадсифати марҳалаи 4 ва гуруҳи клиникии 4 аз рӯи таснифи байналмилалӣ, омоси бадсифати бофтаҳои лимфоидӣ ва хунофар, сили фаъоли узвҳои нафас ва дигар узвҳои бадан, бемории ишемиявии дил - стенокардияи фаъолияти ҷисмонии гуруҳҳои III ва IV буда, то рӯзи мавриди амал қарор додани Қонуни мазкур бо тартиби муқарраргардида дар муассисаҳои тиббӣ ба қайд гирифта шудаанд;

6) таҳти амали сархати панҷуми моддаи 1 Қонуни мазкур қарор мегиранд:

- иштирокчиёни Ҷанги Бузурги Ватанӣ ва шахсони ба онҳо баробаркардашуда, инчунин иштирокчиёни амалиёти ҷангӣ дар ҳудуди дигар давлатҳо, ки дар комиссариатҳои ҳарбии шаҳру ноҳияҳои маҳали зисташон расман ба қайд гирифта шудаанд;

- шахсони бар асари фалокати Неругоҳи барқи атомии Чернобил зарардида, ки мутобиқи Қонуни Ҷумҳурии Тоҷикистон «Дар бораи ҳифзи иҷтимоии шаҳрвандоне, ки бар асари фалокати Неругоҳи барқи атомии Чернобил зарар дидаанд» ба гуруҳи чунин шахсон дохил карда шудаанд.

2. Ҳангоми татбиқи моддаи 7 ҳамин Қонун қисми муҳлати ҷазои адонагардидае кам карда мешавад, ки то рӯзи мавриди амал қарор додани Қонуни мазкур боқӣ мондааст.

Моддаи 15

1. Қонуни мазкур нисбати шахсоне татбиқ карда намешавад, ки барои содир кардани маҷмӯи ҷиноятҳо айбдор дониста ва ё маҳкум шудаанд, агар яке аз ин ҷиноятҳо дар моддаи 8 Қонуни мазкур пешбинӣ шуда бошад.

2. Нисбати шахсоне, ки барои содир кардани маҷмӯи ҷиноятҳо ба ҷавобгарии ҷиноятӣ кашида шудаанд ва ё маҳкум шудаанд, вале қисми мавод ва парвандаи ҷиноятӣ нисбати онҳо дар пешбурди тафтишоти пешакӣ ё судӣ қарор доранд, масъалаи татбиқи Қонуни мазкур нисбати онҳо танҳо баъди қабул намудани қарори ниҳоӣ аз ҷониби мақомоти тафтишоти пешакӣ ё суд, мавриди баррасӣ қарор дода мешавад.

3. Амали сархати якуми моддаи 8 Қонуни мазкур нисбати шахсони дар сархати нуҳуми моддаи 3 ва қисми 1 моддаи 5 ҳамин Қонун зикргардида татбиқ намегардад.

Моддаи 16

Шахсони мувофиқи Қонуни мазкур авфшаванда аз ҷазои иловагӣ ва барқарор намудани товони зарари моддии бо кирдори ҷиноятӣ расонидаашон озод карда намешаванд.

Моддаи 17

Қонуни мазкур нисбати шахсоне, ки ҷиноятҳои давомдор ё дарозмуддат содир кардаанд, танҳо дар мавриде татбиқ карда мешавад, ки агар ин ҷиноятҳо то рӯзи мавриди амал қарор додани Қонуни мазкур анҷом ёфта бошанд.

Моддаи 18

Мақомоти иҷроияи ҳокимияти давлатии Вилояти Мухтори Кӯҳистони Бадахшон, вилоятҳо, шаҳри Душанбе, шаҳру ноҳияҳо, мақомоти худидоракунии шаҳрак ва деҳот, инчунин мақомоти дахлдор вазифадоранд:

- барои бо ҷойи кор таъмин кардани шахсоне, ки аз адои ҷазо тибқи Қонуни мазкур озод шуда, ба маҳали зисташон баргаштаанд, чораҷӯӣ намоянд;

- назорати ноболиғони мутобиқи Қонуни мазкур озодшударо ба падару модарон ё шахсони онҳоро ивазкунанда вогузор намуда, дар мавриди зарурӣ барои дар мактаб - интернатҳо ҷойгир кардани ноболиғони бесаробон чораҳо андешанд;

- шахсони озодгардидаи беморро дар муассисаҳои тиббӣ ва маъюбону пиронсолони бесаробонро дар интернат ва хонаҳои пиронсолон ҷойгир намоянд.

Моддаи 19

Вазорати корҳои дохилии Ҷумҳурии Тоҷикистон ва раёсату шуъбаҳои он дар шаҳру ноҳияҳо дар якҷоягӣ бо Сарраёсати иҷрои ҷазои ҷиноятии Вазорати адлияи Ҷумҳурии Тоҷикистон ва муассисаҳои тобеи он бақайдгирӣ ва баҳисобгирии ягонаи шахсони аз адои ҷазо озодшударо таъмин намуда, рафтори онҳоро таҳти мушоҳида ва назорат қарор диҳанд.

Моддаи 20

1. Иҷрои Қонуни мазкур дар давоми ду моҳ таъмин карда шавад.

2. Агар масъалаи татбиқи Қонуни мазкур нисбати шахсоне, ки то мавриди амал қарор гирифтани он ҷиноят содир намудаанд, пас аз муҳлати пешбининамудаи қисми 1 ҳамин модда ба миён ояд, Қонуни мазкур аз тарафи мақомоти дар моддаи 11 ҳамин Қонун пешбинишуда бо тартиби умумӣ татбиқ карда мешавад.

Моддаи 21

Суди Олии Ҷумҳурии Тоҷикистон, Прокуратураи генералии Ҷумҳурии Тоҷикистон, Вазорати корҳои дохилии Ҷумҳурии Тоҷикистон, Вазорати адлияи Ҷумҳурии Тоҷикистон, Кумитаи давлатии амнияти миллии Ҷумҳурии Тоҷикистон, Агентии назорати давлатии молиявӣ ва мубориза бо коррупсияи Ҷумҳурии Тоҷикистон, Агентии назорати маводи нашъаовари назди Президенти Ҷумҳурии Тоҷикистон, мақомоти иҷроияи ҳокимияти давлатии Вилояти Мухтори Кӯҳистони Бадахшон, вилоятҳо, шаҳри Душанбе ва шаҳру ноҳияҳои тобеи ҷумҳурӣ баъди ду моҳи мавриди амал қарор додани Қонуни мазкур дар хусуси иҷрои он ба Президенти Ҷумҳурии Тоҷикистон ҳисобот пешниҳод намоянд.

Моддаи 22

Қонуни мазкур пас аз интишори расмӣ мавриди амал қарор дода шавад.

Президенти Ҷумҳурии Тоҷикистон

Эмомалӣ РАҲМОН

шаҳри Душанбе, 25 октябри соли 2019, № 1648

Читать далее

Боздиди Раиси вилоят аз сардхонаҳои ноҳияи Бобоҷон Ғафуров

30 октябр Раиси вилояти Суғд Раҷаббой Аҳмадзода ба ноҳияи Бобоҷон Ғафуров ташриф оварда, бо фаъолияти сардхонаҳои ноҳия шинос гардид.

Раҷаббой Аҳмадзода нахуст дар Ҷамоати деҳоти ба номи Дадобой Холматов аз сардхонаи соҳибкор Абдуқаҳҳор Очилов боздид намуд. Тавре иттилоъ дода шуд, дар сардхона метавон то ҳазор тонна маҳсулотро нигаҳдорӣ намуд ва то имрӯз 200 тонна ангур захира карда шудааст.

Читать далее

Шиносоии Раиси вилоят бо раванди истеҳсолот дар ҶСП «Ариана Металл Пласт»

30 октябр Раиси вилояти Суғд Раҷаббой Аҳмадзода ба Минтақаи озоди иқтисодии «Суғд» ташриф оварда, бо раванди истеҳсолот дар ҶСП «Ариана Металл Пласт» шинос гардид.

Бояд таъкид кард, ки корхонаи «Ариана Металл Пласт» моҳи октябри соли 2018 дар Минтақаи озоди иқтисодии «Суғд» бо иштироки Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон мавриди истифода қарор гирифта буд. «Ариана Металл Пласт» аввалин корхонае ба ҳисоб меравад, ки тамоми қисмҳои бозичаҳо, дучархаҳои бачагона ва дигар таҷҳизоти маишӣ дар дохил истеҳсол карда мешавад.

Читать далее

Пешвои миллат Эмомалӣ Раҳмон Котиби Шӯрои амнияти Федератсияи Россия Николай Патрушевро ба ҳузур пазируфтанд

30 октябр дар Қасри миллат Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Котиби Шӯрои амнияти Федератсияи Россия Николай Патрушевро ба ҳузур пазируфтанд.

Президенти мамлакат муҳтарам Эмомалӣ Раҳмон дар оғози мулоқот таъкид доштанд, ки таъмини амнияту суботи умумии мо яке аз бахшҳои калидии ҳамгироии Тоҷикистону Россия мебошад ва дар ин ҷода ҳамкории мо ба таври матлуб рушд карда истодааст.

Читать далее

Пешвои миллат Эмомалӣ Раҳмон дар сохторҳои қудратӣ таъйиноти кадрӣ ба амал оварданд

Дирӯз Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон кадрҳоеро, ки ба вазифаҳои масъулу роҳбарикунандаи Кумитаи давлатии амнияти миллии Ҷумҳурии Тоҷикистон ва Вазорати корҳои дохилии Ҷумҳурии Тоҷикистон таъйин гардиданд, ба ҳузур пазируфтанд.

Зимни суҳбат бо кадрҳои ин ниҳодҳои давлатӣ Пешвои миллат асосан оид ба таъмини суботу амният, таҳкими волоияти қонун, мубориза алайҳи ҳама гуна ҷинояткорӣ, бахусус терроризму экстремизм, гардиши ғайриқонунии маводи мухаддир ва дигар ҷиноятҳое, ки дар шароити авзои мураккабу печидаи минтақа ба амнияту субот ва зиндагии осудаи мардум хатар доранд, таъкид намуданд.

Читать далее

Дасисаҳои ТТЭ ҲНИ

Ҳамасола конференсияи ҳисоботии ташкилоти байналмилалии САҲА бо иштироки ниҳодҳои демократӣ ва ҳуқуқи инсон баргузор мегардад. Дар конфронси имсола, намояндагони қариб 60 кишвари аъзои созмон ширкат карданд.

Дар конференсияҳои САҲА масъалаҳои марбут ба ҳуқуқи инсон ва амсоли инҳо баррасӣ мешавад.  ҳар як инсон  агар худро фарзанди халқи тоҷик ҳисобад, пеш аз сухан рондан, баромад кардан ба худ як бор ҳисобот диҳанд, ки чӣ кор карда истодаанд.

Дарҳақиқат, хоинон Ватан миллат, мазҳаб, виҷдон, падару модар надоранд!  Дар кишвари мо  ба созмони САҲА эҳтиром доранд. Аммо афсӯс, баъзан дар чорабиниҳои он масъалаи зидди қонунҳои байналмилалӣ ҳам  мавриди муҳокима мегардидааст, Дар он иштироки баъзе  гурӯҳҳои ғайриқонунии ифротӣ, аз ҷумла ТТЭ ҲНИ, ки берун аз ҳудуди кишвар фаъолияти террористӣ доранд, як иштибоҳи САҲА буд. Яъне онҳое, ки пуштибони кофӣ дар Тоҷикистон надоранду аз тӯдаи мардуми ғаразхоҳ иборатанд, ба ин конференсия даъват гардиданд.

Кишвари мо ҳам аъзои комилҳуқуқии САҲА аст. Аз Ҷумҳурии Тоҷикистон намояндагони расмӣ ва ҳам намояндагони ташкилоти ҷамъиятӣ иштирок доштанд ва ҳар кадоме доир ба воқеияти ҳол маълумот доданд ва мавқеи расмии Тоҷикистонро нисбати қазияҳои баррасишаванда изҳор карданд.                                                                                  

Сафар Эркаев,
устоди ДДХ

Читать далее

Кулӯхандозро подош санг аст!

Дар фарҳнаги миллати соҳибхираду ботамаддуни тоҷик оини ҳамсояву ҳамсоядорӣ соҳиби ҷойгоҳи махсусе мебошад, ки дар тӯли асрҳои дароз он муроот мешавад.

 Мо – мардуми тоҷик дар асоси таълимоти исломӣ ва фарҳанги пурғановати миллӣ ҳаққи ҳамҷаворро на камтар аз худ медонем ва барояш эҳтироми махсус қоил ҳастем, ки ин аз маданияти шаҳрнишинӣ ва созандагии мо башорат  медиҳад. Дар тӯли таърихи худ миллати тоҷдори тоҷик ҳеҷ вақт ба хотири ҷоҳу сарват бар хонаву дари ҳамсояи худ чашм ало накардааст. Ин маллат ҳеҷ вақт мисли дигарон барои ризқу рӯзии худ хун нарехтаву таҷовуз бар марз накардааст.

Аммо алорағми ин ҳама гуманистии мо ҳамсоягонамон, ки дар тӯли мавҷудияти худ ҳамеша чун дад зиставу ризқи худро аз қатлу куштор ва ғорату асорат ба даст овардаанд, аз ин сулҳпарвариву инсондӯстии мо сӯиистифода кардаанд.

Муноқишаи нангине, ки чанд рӯз қабл дар марзи Тоҷикистону Қирғизистон ба вуқӯъ пайваст ва натиҷааш боиси аз ҳаёт маҳрум сохтании афроди бегуноҳ аз ҳарду ҷониб шуд, мо тоҷиконро сахт нигарон кард. Ин бори нахуст набуд, ки марзбонон ва сокинони манотиқи марзии Қирғизистон даст ба шикастани оини бародариву ҳамҷаворӣ мезананд ва бо ин амали ноҷову ноҷавонмардона эътиқоди моро нисбати худ барҳам медиҳанд. Онҳо бо ин рафтори ғайриинсонии худ риштаи дӯстиву рафоқат ва ҳамсоягиеро, ки асрҳо инҷониб мардуми тоҷику қирғиз доштанд, гусаста, фарҳанги гуманизмро ба зери по меандозанд.

Ин рафтори онҳо аз шумо – омӯзгорони қирғиз вобастагии зиёд дорад, зеро дар кадом рӯҳия ташаккул ёфтани тафаккур ва ҷаҳонбинии шахсият ва дар маҷмӯъ, ҷомеа ба дидгоҳ ва мафкураи омӯзгор сахт алоқаманд аст. Фаромӯш насозед, ки беэҳтиромӣ нисбати ҳамсоя ва ё ҳадафи тир қарор додани он ҳунар ва ё шоистаи таҳсину қадршиносӣ, маданияту ҷасорат ва ҷавонмардиву далерӣ нест, балки ин терроризму ваҳшоният ва ҳайвоният аст. Зеро хуб бояд дар ёд дошт, ки кулӯхандозро подош санг аст!

Кафедраи умумидонишгоҳии забони тоҷикии
Донишгоҳи давлатии Хуҷанд ба номи академик Бобоҷон Ғафуров

Читать далее

Нест бод паймони хоинон

Ман ҳамчун як тан омӯзгор бо ҳалномаи Суди Олии Ҷумҳурии Тоҷикистонро дар бораи иттиҳоди террористӣ-экстремистӣ эътироф намудани ташкилоти «Паймони миллии Тоҷикистон», манъ намудани фаъолияти он дар Ҷумҳурии Тоҷикистон, бастани сомонаҳои интернетии ин ташкилот ва манъ кардани воридоту паҳни аудиосабтҳо, видеонаворҳо ва адабиёту варақаҳои он ба ҳудуди Ҷумҳурии Тоҷикистон розӣ ҳастам.

Ин ташкилотҳои нав ба нави дар хориҷ ташкилшудаву ғаразҳои бад дошта, ба мисоли “Анҷумани озодандешони тоҷик”, “Ҷунбиши ислоҳот ва рушд дар Тоҷикистон” ва “Ассотсиатсияи муҳоҷирони Осиёи Марказӣ”, бояд аз тарафи давлат несту нобуд карда шаванд. Зеро ин қабил гуруҳ ва паймонсозон  мехоҳанд  давлати тинҷу осудаи моро боз ба ҷанг андозанд ва худ ҳоким шаванд. Ин давлати азияткашидаву   бо душворӣ сулҳёфта намехоҳад боз ба доми душман афтад, лек ёфт мешавад онҳое, ки аз дур истода мехоҳанд давлатро нотинҷ  гардонанд. Хушбахтона тири онҳо хато хӯрд. Мо ҳамчун омӯзгорони ҷавон ва ҳам зиёӣ, то метавонем ба ин кор роҳ намедиҳем ва мегӯем нест бод ташкилоти экстремистиву террористии «Паймони миллии Тоҷикистон».

Абдуллоев М.М. – сармуаллими
кафедраи андоз ва андозбандии ДДҲБСТ

Читать далее

“Паймони миллӣ – иғвои навбатии ҲНИ

Аз таърихи эътилофи “Паймони миллӣ” ростӣ, ин қадар маълумоти дақиқе нест, чун далелҳо ҳама пурихтилофу гуногунмазмунанд ва ин аз он гувоҳӣ медиҳад, ки иттиҳодия дорои ҳадафҳои пасипардагӣ буда, алайҳи мардуми тоҷик ҳадафҳои иғвогарона дорад.

Мақсади асосии ин иттиҳодия муттаҳид сохтани ташкилотҳое чун “Анҷумани озодандешони тоҷик”, “Ҷунбиши ислоҳот ва рушди Тоҷикистон”, “Ассотсиатсияи муҳоҷирони Осиёи Марказӣ” ва “Ҳизби наҳзати ислом” буд. Лек чун дертар аён гардид, дар ташкил ва баргузории як қатор гирдиҳамоиҳову нишастҳои иғвогарона алайҳи сиёсати давлатии Тоҷикистон саҳмгузор будааст. Ногуфта намонад, ки ин тоифа талаботи молии худро аз тарафи хоҷагони хориҷиашон қонеъ карда, дар ин раванд ҳеҷ мушкилоте надоранд, ин ҳам аз он гувоҳӣ медиҳад, ки дар паси парда боз ҳамон “хайрхоҳон”-и аврупоиву амрикоӣ истода, идораи ин гурӯҳҳоро бар нафъи худ медонанд.

Ягон шаҳрванди баору номуси миллат, намехоҳад, ки фазои ороми сиёсии мамлакатамонро омилҳои беруна халалдор созад. Аз ин лиҳоз, зиракиву ҳушёрии сиёсиро аз даст надода, бар зидди чунин гурӯҳҳову фирқаҳои ғаразнок дастаҷамъона амал бояд кард. Ростӣ, ин ташкилоту иттиҳодияҳо қодир ҳам нестанд, ки фазои ороми сиёсии мамлакатамонро халалдор созанд. Зеро обруву нуфузи миллат ва ғояҳои миллии мо ба ҷаҳониён муаррифгари  хуб ҳам ҳастанд. Мурод аз ин гуфтаҳо он аст, ки ҳеҷ ягон ҷиноятпешаи мухолифин наметавонанд дар дохили мамлакат муқовимат нишон диҳанд ва маҷбуранд, ки аз хориҷа бар зарари мо амалҳои зишт анҷом диҳанд.

Пӯшида нест, ки мақсадҳои ғаразноки сиёсати иғвогаронаи абарқудратҳо маҳз бо воситаи чун ин ташкилотҳову иттиҳодияҳо амалӣ мегарданд.

Пас, моро лозим меояд, ки душманони пасипардагиямонро аз наздик шиносем, аз ҳадафҳояшон огоҳ бошем.

Ҷомеаи шуъбаи табъу нашри
Донишгоҳи давлатии Хуҷанд
ба номи академик Бобоҷон Ғафуров

Читать далее

Пайрави некон нагардад ҳар кӣ бунёдаш бад аст…

Пас аз тӯлуи офтоби сафобахши Истиқлолият дар зиндагии мардуми тоҷик, умуман тоҷикистониён саҳифаи тозае боз гардид ва ин санаи муборак дар китоби таърихи миллат бо ҳуруфи заррин навишта шуд. Ҳар касе, ки ақли солим дорад нисбат ба ин неъмати бебаҳо, Истиқлолияти Ҷумҳурии Тоҷикистон эҳтиром қоил аст ва ба қадри ҳар нафаси озод расида, шукр мекунад, ки дар ин сарзамин умр ба сар мебарад. Воқеан, имрӯз мардуми сарбаланди кишвар бо ақли комили худ ин ҳақиқати бебаҳсро дарк кардаанд ва онро пос доштаву эҳтиром намуда, чун гавҳараки чашми хеш ҳифз месозанд.

Аммо мутаассифона, чунонки мегӯянд, кӯрнамакону носипосон дар ҳар давру замон буданду имрӯз низ ҳастанд ва ақли сақиму ботини тираи эшон намегузорад, ки зиндагии шоистаи мардум, пешрафту тараққии Тоҷикистони ҳамешасабз ва дастоварду комёбиҳоро бубинанд. Зеро ин тоифаи худбехабару худобехабар чӣ будани амнияту осоиштагиро намедонанд ва дар рӯҳияе тарбия ёфта, ба воя расиданд, ки озори мардум, барҳам задани субот ва ноором сохтани кишвар асоси зиндагии онҳо мебошад. Далели ин гуфтаҳо рафтору кирдори ноҷавонмардонаи аъзо ва ҷонибдорони ташкилоти террористии Ҳизби наҳзат мебошад, ки дар хориҷ истода, мехоҳанд авзои кишварро ноором созанд.

Онон нафаронеанд, ки зодаи ин хоку бум, парвардаи ин кишвари биҳиштӣ мебошанд ва солиёни дароз ҳавои тозаи ин сарзаминро нафас гирифта, нони ин Ватанро хӯрда, ҷои шукру сипос ба он аз хориҷ истода, сангандозӣ мекунанд.

Миллати тоҷик ҳеҷ гоҳ ин бехирадиву кӯрнамакӣ ва носипосиву аъмоли ноҷавонмардонаро намебахшад ва рафтори ин тоифаро ҳамеша маҳкум менамояд.

Дигар фурсати он расидааст, ки мо сокинони кишвар зиракии сиёсиро аз даст надода, нагузорем, ки ин тоифа суботу оримии Ватани азизамонро барҳам зананд. Фурсати он расидааст, ки мо паҳлӯи ҳам истода, нагузорем, ки нопокдилону бадандешон андешаҳои пурғарази хешро дар ин сарзамини биҳиштӣ амалӣ озанд.     

Кафедраи умумидонишгоҳии забони тоҷикӣ
Донишгоҳи давлатии Хуҷанд

Читать далее