14 August 2019

ПАЙВАСТШАВӢ БА СИСТЕМАИ НАВ

 Дар маҷлисгоҳи Раёсати андоз дар вилояти Суғд нишасти матбуотӣ бо намояндагони васоити ахбори омма доир гардид.

Абдуқаюм Воҳидов - сардори Раёсати андоз дар вилоят оид ба ҷамъбасти фаъолияти мақомоти андоз дар нимсолаи аввали соли 2019 пурра маълумот дод. - Нақшаи даромади буҷети давлатӣ ва дигар пардохтҳои ҳатмӣ аз ҷониби Раёсати андоз дар вилоят дар нимсолаи аввали соли 2019 - ум 102,4 фоиз иҷро гардидааст, ки дар натиҷа ба буҷа бо назардошти андози иҷтимоию ғайрибуҷавӣ 1 миллиарду 400,2 миллион сомонӣ ворид шуд.

Ин шумора назар ба ҳамин даври соли гузашта 175 миллион сомонӣ зиёд мебошад, - қайд кард Абдуқаюм Воҳидов. Аз ҷумла, вобаста ба кормандони кироя ва ташкили дафтарчаҳои меҳнатӣ иттилоъ дода шуд, ки ҳар хоҷагии деҳқонӣ новобаста аз он, ки кормандонро ба корҳои мавсимӣ кор мефармоянд, бояд ба ҳар яки онон дафтарчаи меҳнатӣ кушоянд.

Дар нақша аст соли 2020 ба Кодекси андоз тағйиру иловаҳо ворид гардида, он дар таҳрири нав таҳия ва мавриди истифода қарор дода шавад. - Моҳи июли соли 2019 - ум 50,3 фоизи андозсупорандагон ба шакли электронии тарзи ҳисоботи андоз гузаронида шуданд. 70,1 фоизи ба системаи электронӣ пайвастшудагон шахсони ҳуқуқӣ буда, 45,4 фоизи дигар соҳибкорони инфиродӣ мебошанд. Дар ҷараёни пайвастшавӣ ба шакли электронӣ пешниҳоди ҳуҷҷатҳои андоз ройгон мебошад, - иттилоъ доданд масъулини мақомоти андоз дар вилоят.

Дар анҷоми нишаст рӯзноманигорон дар бобати масъалаҳои гуногуни марбути мақомоти андоз ба саволҳояшон посух гирифтанд.

У.МАХФИРАЛИЗОДА,
«Ҳақиқати Суғд»

Читать далее

Ҳифзи саломатӣ - пурсавобтарин кор

- Баҳри таҷлили бошукӯҳи ҷашни 30 - солагии Истиқлолияти давлатии кишвар тибқи нақша сохтмону азнавсозӣ ва таъмири 577 иншооти соҳаи тандурустӣ, аз ҷумла сохтмони шуъбаҳои марказҳои табобатӣ ва беморхонаҳо дар шаҳру ноҳияҳои Хуҷанд, Панҷакент, Конибодом, Айнӣ, Деваштич, Кӯҳистони Мастчоҳ бомаром идома доранд, - гуфт зимни нишасти матбуотӣ сардори Раёсати тандурустии вилоят Фаррух Мақсудзода.

Дар ин раванд дар шаш моҳи соли равон бо маблағгузорӣ аз сарчашмаҳо сохтмон, азнавсозӣ ва таъмиру тармими 9 беморхона, 24 бунгоҳи саломатӣ, 17 Маркази саломатӣ, 10 таваллудхона, 24 нуқтаи хатнаи кӯдакон ва 21 дорухона ба итмом расонида шудааст, ки 39 фоизи нақша мебошад.

Тибқи иттилои масъулин ба аҳолии вилоят 5143 табиб ва 17393 корманди миёнаи тиббӣ хизмат расонида истодаанд. Дар вилоят нишондоди таъминот бо табибон ба 10 ҳазор аҳолӣ 19,3 ва бо кормандони миёна 65,5 – ро ташкил медиҳад. Нишондоди нисбатан пасти таъминот бо духтурон дар ноҳияҳои Зафаробод 10, Деваштич 10,7, Айнӣ 11, 4, Мастчоҳ 11,9, Бобоҷон Ғафуров 12 ва Кӯҳистони Мастчоҳ 12,2 ба назар мерасад.

То ба даври болозикр баъди хатми интернатура ва ординатура 126 нафар мутахассиси ҷавон, аз ҷумла 51 нафар хатмкардаи тариқи буҷавӣ бо ҷойи корӣ таъмин шуданд.

- Айни замон 3019 бемори сил дар сатҳи вилоят қарор доранд, ки аз ин 2316 нафар бо сили шушҳо, сили ғайришушӣ 703 нафар ва бо бемории шакли мутобиқгашта 43 нафар мебошад. Дар шаш моҳи соли равон 484 нафар бемори сил дарёфт гардиданд, ки нисбат ба соли гузашта 35 нафар кам мебошад, - афзуд Ф.Мақсудзода.

Тибқи маълумоти масъулин дар ин давр 771 нафар диабети қанд ба қайд гирифта шудааст, ки ин нисбат ба соли гузашта 27 нафар зиёд аст. Ҳамагӣ дар вилоят 11057 нафар дар қайди диспансерӣ қарор доранд.

Аз меҳнату фаъолият ва таваҷҷуҳи касбии табибон дар маълумоти масъулон эҳсос ба амал меояд, ҳифзу нигаҳдории саломатии сокинон пурсавобтарин кори хилъати сафедпӯшон аст.

Дар кори нишаст ҳамзамон сардори шуъбаи ҳифзи иҷтимоии аҳолии Мақомоти иҷроияи ҳокимияти давлатии вилоят Саидамин Исомаддинзода баромад намуда, мухтасар оид ба фаъолияти шашмоҳа маълумот дод.

Дар фарҷом байни масъулини сохторҳо ва рӯзноманигорон суолу ҷавоб баргузор гардид.

Маъмурахон САМАДОВА,
«Ҳақиқати Суғд»

Читать далее

Баҳри таҳкими волоияти қонун

Дар нишасти матбуотии Суди иқтисодӣ ва Раёсати адлияи вилояти Суғд рӯзноманигорон аз натиҷаҳои фаъолияти ин ду сохтор дар шашмоҳаи аввали соли 2019 маълумот гирифтанд.

Бино ба иттилои раиси Суди иқтисодии вилоят Сулаймон Қосимзода ин ниҳод дар нимсолаи аввали соли 2019 - ум 813 аризаҳои даъвогиро ба маблағи 2 571 608 сомонӣ мавриди баррасӣ қарор додааст.

Давоми нимсолаи аввал 49 аризаи даъвогии мақомоти прокуратура ба манфиати давлат ба маблағи умумии 63 781 059 сомонӣ пешниҳод шуда, дар 45 ҳолат пурра ва дар 3 ҳолат қисман ба маблағи 63 706 888 сомонӣ қонеъ, дар 1 ҳолат рад шудааст.

Сулаймон Қосимзода гуфт, ки 13 аризаи даъвогӣ ба манфиати мақомоти андоз оид ба рӯёнидани 46 514 300 сомонӣ баррасӣ шуда, бо ҳалномаи судӣ даъвоҳо дар 12 ҳолат пурра ва 1 ҳолат қисман ба маблағи 46 511 010 сомонӣ қонеъ карда, ба фоидаи буҷет рӯёнида шудааст.

Ҳамзамон, дар ин фурсат 73 вохӯриву баромад дар ташкилоту корхонаҳо баргузор шуда, мутахассисон корҳои фаҳмондадиҳӣ ва тарғибу ташвиқи қонунгузориро ба роҳ мондаанд.

Мамлакат Раҳматзода аз натиҷаи фаъолияти Раёсати адлияи вилоят сухан карда, зикр дошт, ки дар шашмоҳаи аввали соли 2019 ба Раёсати адлияи вилояти Суғд барои бақайдгирии давлатӣ 63 ариза ворид гаштаанд. Ҳамагӣ дар вилоят 698 ташкилоти ҷамъиятӣ ва 82 филиалу намояндагиҳои ташкилоти ҷамъиятӣ ба қайди давлатӣ гирифта шудаанд.

 Зимни суолу ҷавоб рӯзноманигорон роҷеъ аз масъалаҳои гуногуни Раёсати адлияву Суди иқтисодии вилоят пурсон шуда, ба суолҳои хеш ҷавобҳои мушаххас гирифтанд.

Сурайё ҲАКИМОВА,
«Ҳақиқати Суғд»

Читать далее

Кишти такрорӣ: Муҳлат, сифат ва дурнамо

Аҳамият ва фоидаву ғановати нишондиҳандаҳои иқтисодии самти муҳими соҳаи кишоварзӣ - кишти такрории зироатҳои гуногуни хоҷагии қишлоқ дар сатҳи намоён қарор дорад. Барои пешрафти соҳаи мазкур дар вилоят тамоми шароиту имкониятҳои зарурӣ вуҷуд дорад, танҳо ба гуфтаи худи деҳқонон, чашми корро дониста, ба замину об, вақту марҳалаи киштукор эътибор додан муҳим аст, - чунин дастуру супоришҳо ҳангоми сафари кории Раиси вилоят Раҷаббой Аҳмадзода ба ноҳияи Спитамен ба миён гузошта шуд, ки иҷрои он танҳо ба манфиати умум маҳсуб мешавад.

Воқеан, дар ҳамаи хоҷагиҳои кишоварзӣ, деҳқонӣ ва инфиродӣ гузаронидани кишти такрории зироатҳои гуногун дар арафаи анҷомёбист, ки ин сазовори зикр аст.

Ба фактҳо муроҷиат мекунем: аввалан, бино ба иттилои масъулони Сарраёсати кишоварзии вилоят имсол бояд дар замини 16 ҳазор гектар кишти такрорӣ гузаронида шавад. Ин меъёри кору фаъолият дар ин самт дониста мешавад. Бо азму кӯшишҳои аҳли заҳмати саҳро то имрӯз дар 16218 гектар кишти такрорӣ таъмин гардидааст, ки 101,4 фоизи дурнамо мебошад.

Чунонки мебинем, нишондиҳанда хуб буда, аз масъулияти мутасаддиёни обу замин ва таваҷҷуҳу эътибору кори ҷомеаи хоҷагиҳои кишоварзӣ шаҳодат медиҳанд.

Дар ҳошияи сафари кории Раиси вилоят Раҷаббой Аҳмадзода кору пайкори заҳматкашон – кишоварзони ноҳияи Спитаменро хостем аз таҳлилҳои сардори Раёсати кишоварзии ноҳия Муҳаммадҷон Обидзода натиҷабардорӣ намоем. Аён гардид, ки дурнамои кишти такрорӣ дар ноҳия 1700 гектарро бояд ташкил намояд. То санаи 8 - уми августи соли равон дар ноҳия дар масоҳати 1704 гектар замин кишти такрорӣ гузаронида шудааст, ки дурнамои ин самти кори хоҷагии қишлоқ аз сад фоиз афзунтар аст. Дар ҷараёни ин тадбири муҳими кишоварзӣ дар қаламрави ноҳия, хосса, истифодаи самараноку оқилонаи обу замин, баланд бардоштани маданияти заминдорӣ ва зироаткорӣ – аз маҷмӯи кишти умумӣ 285 гектар сабзавот, 5 гектар картошка, 120 гектар шолӣ, 15 гектар ҷуворимакка барои дон, 30 гектар полезиҳо ва 1059 гектар зироатҳои хӯроки чорво ба ҳисоб мераванд.

Баробари шиносоӣ бо рафти кору меҳнати кишоварзони ноҳияи Спитамен Раиси вилоят Раҷаббой Аҳмадзода дар назди мутахассисон, масъулони соҳаи кишоварзӣ, алалхусус заминдорон – роҳбарони хоҷагиҳои деҳқонӣ, инфиродӣ ва оилавӣ, ки онҳо соҳибони комилҳуқуқу истифодабарандагони заминанд, масъалагузорӣ намуда, дастуру супориш дод, ки кишти такрорӣ дар ҳамаи шаклҳои хоҷагидорӣ бояд сад фоиз таъмин карда шавад. Аз захираву имконият истифода бурда, масоҳати майдонҳои шолӣ, пиёз васеъ карда шаванд. Дар ин замина дастур ва ҳидоятҳои Пешвои муаззами миллат муҳтарам Эмомалӣ Раҳмон дар бобати баланд бардоштани ҳосилнокии замину зироатҳо ва аз як замин ду - се ҳосили баландсифат рӯёнидан вазифаи ҷонии кишоварзону мутахассисони ин соҳаи муҳими иқтисодиёти миллӣ ба шумор меравад. Ин азму субот ва ҳиссаи арзанда гузоштан дар таъмини амнияти озуқавории кишварамон боиси саодатмандӣ ва шарафмандӣ аст.

Воқеан, кишоварзони хоҷагиҳои ба номи Т.Ӯлҷабоев, «Тағояк», «Истиқлол», «Куруш», «Сарбанд», «Хуррамзамин» бо дарбаргирии нӯҳ Ассотсиатсияи истифодабарандагони оби ноҳия дар ҳамкорӣ бобати мувофиқи мақсад гузаронидани кишти такрорӣ фаъоланд. Дар ин раванд заҳмату нақши хоҷагиҳои инфиродӣ бараъло намоён мебошад.

Имрӯзҳо Ассотсиатсияҳои истифодабарандагони оби ба номи Сатторов, А.Бобоев, «Тоҷикистон», «Саидқӯрғон», ба номи Аҳмадалиев, «Зарзамин» дурнамои кишту парвариши зироатҳои такрориро бомуваффақият таъмин кардаву пеш бурда истодаанд.

Улуғбек ХУДОЙБЕРДИЕВ,
«Ҳақиқати Суғд»

Читать далее

Ҳамчу оина дари дидаи худ во дорем…

Мегӯянд, ки боғбон, он шахсе дили софу дастони пок, нияти неку орзуву ормонҳои ширину фараҳафзо дораду заҳматаш, ранҷу кораш ба манфиати долу дарахтон, мардумон - хурду калонсолон самар меоварад, бино ба таъкиди донишманде ҳосилу мева, бори давлати замину хоку об эҳсони хуршед асту бар дилҳо нури моҳ бувад. Мисли ҳамин даврони соҳибихтиёрӣ, давлати соҳибистиқлол - Тоҷикистони биҳиштосоямон чун боғоти пурмеваю пурбор нашъунамо дорад, сарсабзу баҳороғӯш аст ва аз сарчашмаи сиёсати хирадмандонаву мардумпарварӣ, ҳувияти миллатдӯстӣ ва рисолати ватандории Асосгузори сулҳу ваҳдати миллӣ - Пешвои миллат муҳтарам Эмомалӣ Раҳмон рушду нумӯъ дорад, таровату фасоҳат, рангу нур мегирад. Шояд ташбеҳ мувофиқ ояд, ки як сифати самару ҳосили соҳибмустақилӣ ин вусъатпазирӣ, озодӣ ва кушоиши сайру саёҳат, ҷаҳонгардӣ ва баҳра бардоштан аз табиати нотакрор, обҳои софу ширини наҳру дарёҳои кӯҳӣ, мавзеъҳои хосу сабзпӯшу гулу гиёҳҳо, манзилу маконҳои таърихӣ - пурасрору тамаддунмаъонӣ, муоширати наслҳову қарнҳо, гуфтугӯйҳои самимиву шавқмандии сайёҳони чӣ дохилӣ ва чӣ беруна мебошад.

Миллати тамаддунсози тоҷик солҳои дур ҳамчун як халқи соҳибфарҳангу соҳибдонишу эҷодкори асил дар ҳаёт хешро мардуми ҷаҳонгарду саёҳатдӯст муаррифӣ намуда, ки таърих гувоҳ аст. Шоирону донишмандон, мутафаккирону файласуфони миллати тоҷик бештаринашон ҷаҳонгаштаву ҷаҳондида буданду дар қӯраи тамаддунҳо, фарҳангҳои мардумони олам нерӯмандӣ, устувории тафаккуру диди хос бардоштаанд, эҷод намудаанд, асарҳои мондагор аз худ мерос гузоштаанд. Устоди суханварони тоҷику форс, Малик – уш - шуарои Аҷам Абӯабдуллоҳи Рӯдакӣ, Шайх Саъдӣ, Мир Сайид Алии Ҳамадонӣ, Зайниддин Маҳмуди Восифӣ, Ҳаким Носири Хусрави Қубодиёнӣ, Аҳмад Махдуми Дониш, Ҳоҷӣ Юсуфи Хуҷандӣ, устод Мирзо Турсунзода шахсиятҳои фозили ҷаҳонгард буданд, дидаву эҷодашон, суханашон аз наҳри сабоҳати инсонӣ баҳра гирифтааст. Эҷоду осори онҳо сарчашмаи ғановати тамаддунҳо дониста шудаанду боз солҳои тӯлонӣ дар ҳамин сатҳ қарор мегиранд.

Ба навиштаҳои онҳо зеҳн мемонему маънӣ мегирем, ки ин қабил мутафаккирони мумтози тоҷик аз сайру саёҳати олам саодатмандӣ, фараҳмандӣ ва дилбастагӣ ба ҳаёту зиндагӣ, маросиму ойинҳои хоси мардумон, табиату обу ҳавои кишварҳо дошта, худро накӯном гардонидаанд ва ба таъбире «ғунчаи гулро ба нафас бикшодаанд». Аз ҷумла, донишманд, орифи ҷаҳонгард Мир Сайид Алии Ҳамадонӣ аз ҳаёту зиндагӣ ва сокинони маконе чунин тасвирот намудааст:

Бӯе зи зулфи он маҳ бигзашт дар ду олам,

Зарроти кавн аз он бӯй масти май уфтоданд.

Чандин ҳазор бедил аз бӯи он саодат,

Дилҳо нисор карданд, ҷонҳо ба бод доданд…

Донишманди ҷаҳонгард Носири Хусрав дар вақташ ба сафари ҳафтсола мебарояд, қариб ҳамаи асарҳояшро дар Хуросон - пас аз сафар навиштааст. «Сафарнома» - и ӯ асари насрӣ буда, он аҳамияти бадеию таърихӣ дорад ва нависанда ҳар он чизеро, ки дар сафар дидааст ва таассуроте, ки ҳосил кардааст, айнан баён намудааст. Ҳакими ҳамадон дар асараш манзараҳои табиати кишварҳои гуногун, анъанаҳои мардум, ободии шаҳрҳоро муфассал баён кардааст, ки хеле ҷолиб аст.

Чунонки дар боло ишора намудем, барои сайру саёҳат ва омадурафти меҳмонон ба сарзамини тоҷикон ду неъмати пурбаҳо ва меваи боғоти таърихӣ - Истиқлолияти давлати миллӣ ва Ваҳдати хоси тамаддунсози миллӣ шароиту имконияти мувофиқу мусоид фароҳам гардонидааст. Ҳамаи ин имконоту шароит дар партави сиёсати оқилонаву ҳидоятҳои ҳадафманду вусъатободи Пешвои муаззами миллат муҳтарам Эмомалӣ Раҳмон ҷаҳонӣ гардидаву сайру саёҳат дар кишвари тоҷикон комил, болиғ шуд, рушд пазируфт ва Тоҷикистони зеботабиату хушобу хушҳаво дар сатҳи ҷаҳонӣ сайру саёҳат шинохта гардидааст. Хушбахтӣ, саодатмандӣ ва ҳувияти таърихиву миллӣ доштани ҳар тоҷику тоҷикистонӣ аст.

Ҳамагӣ чанд рӯз қабл, яъне 2 - юми августи соли равон болидарӯҳии мардуми кишвари саодатмандамон боз ҳам болиғ эҳсос шуд. Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар дараи афсонавии нотакрори Ромит Маҷмааи сайёҳии «Арху» - и назди мақомоти иҷроияи ҳокимияти давлатии шаҳри Ваҳдатро бо меҳмонхонаи замонавии хоси тоҷикӣ мавриди истифода қарор доданд. Ин ҷо дар асоси маълумоти муътамад зикри онро салоҳ донистем, ки иншооти мазкур чӣ тарҳу чӣ услуби хос дорад, кадом маъниро ифода месозад. Ҳамин тавр, меҳмонхона навбунёд аст, он аз панҷ ошёна иборат буда, дар мавзеи хушманзара ва канори дарёи пуртуғёни Арху қомат афрохтааст. Дар ошёнаи якуми бино нишастгоҳ, ҷои қабули меҳмонон ва ошхона барои панҷсад нафар мавҷуд мебошад, ки дар он тамоми шароити замони муосир муҳайё гардидааст.

Чаҳор ошёнаи дигар барои истироҳати меҳмонон пешбинӣ шуда, ҳама ҳуҷраҳо бо рахти хоб, телевизору дигар шароити зарурӣ муҷаҳҳазанд. Меҳмонхона имкон дорад, ки дар як вақт ба ҳафтод нафар сайёҳ, меҳмон хизмат расонад. Дар дохили ҳуҷраҳои он ҳаммом бо буғи хушк ва тар, сауна ва таҷҳизоти варзишӣ муҷаҳҳаз гардонида шудааст. Иншооти бузурги сайру саёҳат дар доираи омодагӣ ба ҷашни умумимиллӣ – 30 - солагии Истиқлолияти давлатии Ҷумҳурии Тоҷикистон сохта шудааст, кушоду барҳаво, ҳуҷраҳояш барои истироҳат яке аз дигаре бо шароит ва тарҳи хосса фарқ мекунад.

Дар деҳоти дурдаст муҳайё намудани чунин шароити истироҳату фароғат ин самараи сулҳу субот, оромиву осоиштагӣ дар кишвари соҳибистиқлоламон аст. Иншооти сайёҳӣ, истироҳативу фароғатӣ солиёни зиёд ба сокинони Тоҷикистон ва меҳмонони диёрамон хизмати мусоид менамояд.

Боиси зикри махсус мебошад, ки бинои дуошёнаи қадима дар шафати рости дарёи Арху бо расму русум ва анъанаҳои ниёгони миллати тоҷик дар масоҳати яксаду шасту ҳашт метри мураббаъ бунёд шудааст, ки аз хусусиятҳои дигари маҷмааи мазкур маҳсуб меёбад. Деворҳои дохили бино бо сарулибос, ҳунарҳои дастӣ, аз қабили асбобҳои рӯзгор, чакану кашидадӯзӣ ва дигар ҳунарҳои қадимаи миллати тамаддунофари тоҷик ба таври хосса ва зебо оро ёфтааст. Аз ин хонаи ба таври тоҷикона ороёфта меҳмонон - сайёҳони дохиливу хориҷӣ метавонанд бо урфу одат ва шароити зисту зиндагонии мардуми тоҷик дар замонҳои гузашта шиносоии бештаре пайдо намоянд.

Корҳои сохтмонӣ дар биноҳои Маҷмааи сайёҳии «Арху» моҳи апрели соли дуҳазору ҳаҷдаҳ дар доираи аз ҷониби Пешвои миллат муҳтарам Эмомалӣ Раҳмон эълон гардидани Солҳои рушди деҳот, сайёҳӣ ва ҳунарҳои мардумӣ оғоз гардида буд ва давоми беш аз як сол бо ҷалби зиёда аз сесад нафар кормандону мутахассисони ватанӣ мутобиқ ба стандартҳои байналмилалӣ бо сатҳу сифати баланд ба итмом расидааст. Маҷмааи нотакрори сайёҳӣ дар масофаи ҳафтод километр дуртар дар қисми шимолу ғарбии шаҳри Ваҳдат қарор дошта, масоҳати умумиаш бисту се гектарро дарбар мегирад ва иншооти дар ҳудудаш сохташуда ҳазору панҷсад метри мураббаъро ташкил додааст. Иншооти хеле бузург ва қиёснопазир падид омада, аз нерӯи созандагии мардуми сипосманду ғайратманди тоҷик шаҳодат аст.

Бо чашми дилу ақли басар дидаву эҳсос менамоем, ки ободониву бунёдкориҳои ҳадафмандона дар доираи Солҳои рушди деҳот, сайёҳӣ ва ҳунарҳои мардумӣ аз таваҷҷуҳи хосаи Ҳукумати мамлакатамон, хосатан Пешвои муаззами миллат муҳтарам Эмомалӣ Раҳмон ба рушди соҳаи туризм ва фароҳамгардонии имконоти васеи истироҳату фароғат барои сайёҳони ватаниву хориҷии манотиқи Тоҷикистони зебоманзар ба ҳисоб меравад.

Натоиҷи ниҳоии корҳои ободонӣ ва тадбирҳои созанда дар чӣ зуҳур мекунад? – Пеш аз ҳама, дар ҷалби бештари ҷаҳонгардон - сайёҳон, меҳмонон ба Тоҷикистони озоду фирдавсмисол, беҳтар гардидани сатҳу сифати зиндагии мардум ва таъсиси ҷойҳои нави корӣ мусоидат менамояд. Дар нимсолаи якуми соли дуҳазору нуздаҳум дар вилоят шаш ширкати нави сайёҳӣ таъсис ёфтаву бист хатсайри тозаасоси сайргардӣ роҳандозӣ гардиданд, ки аз рушди ин соҳаи муҳими иҷтимоиёту иқтисодиёти замони муосир далел буда, аз вазифагузориҳо ва дастурҳои Раиси вилоят Раҷаббой Аҳмадзода асос мегирад. Воқеан, имрӯз дар бозори сайёҳии ҷаҳонӣ ду соҳаи мустақили сайёҳӣ: байналмилалӣ ва дохилӣ бо низом ва сохторҳои махсуси худ амал менамоянд ва дар байни ҷомеа низ маъруфият пайдо кардаанд. Молу маҳсулот ва маснуоти сайёҳӣ дар шакли савғотӣ, туҳфа ва амсоли инҳо мавқеъ пазируфтааст. Ин аст, ки ҳавасмандгардонӣ ва имтиёзгузории ҳунармандӣ - рушди ҳунарҳои мардумӣ аз ҷониби Пешвои миллат бисёр муҳим арзёбӣ гардидааст, ки он метавонад ба ташкил ёфтани ҳазорҳо ҷойи нави корӣ ва ба ин восита беҳтар шудани имкониятҳои иҷтимоию иқтисодии оилаҳои косибӣ - ҳунармандӣ сабаб гардидааст. «Шароити мусоиди табиӣ ва иқлими Тоҷикистон барои ба роҳ мондани хизматрасонии муосири сайёҳӣ ва инкишофи намудҳои гуногуни он имконияти беҳтарин муҳайё кардааст», - иброз намуданд Президенти Ҷумҳурии Тоҷикистон муҳтарам Эмомалӣ Раҳмон дар Паёми худ ба Маҷлиси Олии Ҷумҳурии Тоҷикистон.

Дар оғози мақола ишора намудем, ки аслан, миллати тоҷик аз қадимулайём дӯстдори сайру саёҳат ва фарҳанг мебошад, бахусус наврасон ва ҷавонон дар роҳи пайдо кардани маълумоти беш аз таъриху тамаддун ва дастовардҳои даврони соҳибистиқлолии кишвар ба боздиди ҷойҳои таърихӣ, мавзеъҳои сайёҳӣ ва шаҳрҳои бузурги ҷумҳурӣ завқи баланд ва хоҳиши зиёд доранд. Барои ин Қонуни Ҷумҳурии Тоҷикистон «Дар бораи сайёҳии дохилӣ» мусоидат менамояд. Дар ин марҳалаи сол - яъне шаш моҳ шумораи ҷойгиркунии сайёҳон, меҳмонони вилоят дар осоишгоҳҳо ва меҳмонхонаҳо ба чилу шаш ҳазор нафар бештаре расонида шудааст, ки аз ин ҳисоб зиёда аз сию нӯҳ ҳазор нафар сайёҳони дохилӣ - аз шаҳри Душанбе, вилоятҳои Хатлону Кӯҳистони Бадахшон ва ноҳияҳои тобеи Марказ мебошанд. Ин нишондиҳанда дар муқоиса нисбат ба ҳамин даври соли гузашта саду яку се дарсадро ташкил медиҳад.

Вожаҳои «деҳот», «сайёҳӣ», «ҳунарҳои мардумӣ» тавъами ободгарӣ, созандагӣ ва зебоиофаранд. Биноан, тоҷикон дар рушди фарҳанги башарӣ аз замонҳои қадими бостон то имрӯз бо ҳунарҳои гуногуни мардумии хеш ҳиссаи арзанда гузоштаанд ва мегузоранд. Сарчашмаҳои таърихӣ шаҳодатанд, ки бозёфтҳои бостоншиносӣ, осори адабии классик ва рӯзгори кунунии мардуми тоҷик далолат бар он медиҳанд: пеши назарҳо ҳунарҳои зебое ҷилвагар мешаванд, ки ҳазорон сол аст онро тоҷикон то замони мо овардаанд. Ё худ, нафақат овардаанд, балки нишонаҳои фарҳанги бостонии хешро дар пайванд бо табиат, дар ҳунарҳои мардумӣ инъикос кардаанд. Аз ин лиҳоз, омӯзиши амиқи таъриху фарҳанги гузаштаву муосири халқамон ифтихори миллӣ ва эҳсоси баланди ватандӯстиву ватандорӣ шинохта мегардад.

Сайёҳиву ҷаҳонгардӣ ин пайванди ҳаёт, нишони зиндагӣ ва эҳсоси муҳаббати инсонист, дӯстиву дӯстдорист, оини садоқату эҳтироми ҳам меҳмон ва ҳам мизбон аст. Ба факту рақамҳо рӯй меоварем: дар шаш моҳи аввали соли равон тавассути гузаргоҳҳои сарҳадӣ ба вилоятамон беш аз сесаду шасту се ҳазор нафар шаҳрванди хориҷи дуру наздик бо мақсадҳои тиҷорат, сайёҳӣ ва меҳмонӣ ташриф овардаанд. Онҳо аз кишварҳои Ӯзбекистон, Қазоқистон, Қирғизистон, Федератсияи Россия, давлатҳои ИДМ, Амрико ва Аврупо буданд ва дар қиёс нисбат ба соли қаблӣ афзун, аз ҳисоби ширкатҳои сайёҳӣ ба амал оварда шудаанд. Сайёҳон аз кишварҳои хориҷи дур дуҳазору дусаду ёздаҳ нафарро ташкил доданд, ки назар ба соли гузашта бисту ҳафт фоиз зиёд мебошанд.

Хулоса, тадбирҳо андешида мешаванд. Нафақат андешидан, балки барои иҷрои онҳо камари ҳиммат бояд бибаст.

Ва дар интиҳо: бо фараҳмандӣ аз гулшани дидори сайру саёҳату ҷаҳонгардӣ чидем гуле…

Файзулло АТОХОҶАЕВ,
узви Иттифоқи журналистони Тоҷикистон

Читать далее

3175 ҷиноят ошкор гардид

- Дар шаш моҳи соли 2019 дар қаламрави вилоят аз ҷониби мақомоти ҳифзи ҳуқуқ 3851 ҷиноят ба қайд гирифта, ошкоршавии 3175 ҷиноят таъмин карда шуд. Ҷиноятҳои қаллобӣ, сӯиқасди таҷовуз ба номус, роҳзанӣ, авбошӣ, дуздии амволи ғайр, ғорати манзили зист, кисабурӣ, дуздии маблағ, телефонҳои мобилӣ, ҷиноятҳои иқтисодӣ, азонихудкунӣ ё исрофкорӣ, тасарруф ба миқдори махсусан калон, муомилоти ғайриқонунӣ бо асъори хориҷӣ ва ҷиноятҳои вобаста ба дигар самтҳои хизматӣ нисбат ба ҳамин даври соли сипаришуда зиёд ба қайд гирифта шудааст, - гуфт зимни нишасти матбуотӣ ба рӯзноманигорон сардори Раёсати Вазорати корҳои дохилии Ҷумҳурии Тоҷикистон дар вилояти Суғд, генерал - майори милитсия Назарзода Қудратулло Бобо.

Ҳамчунин, қайд гардид, ки аз 1686 нафар ҷинояткори ҷустуҷӯшаванда 419 нафар дастгир ва аз 177 нафар шахсони беному нишон гумшуда 126 нафар дарёфт шуданд.

Давоми шаш моҳ 5 нафар донишҷӯ, аз шаҳру навоҳии Панҷакент, Исфара, Ашт ва Бобоҷон Ғафуров аз донишгоҳҳои динии хориҷи кишвар ба Ватан баргардонида шуданд. То ба имрӯз дар донишгоҳҳои динии хориҷи кишвар ҳамагӣ 34 нафар донишҷӯ боқӣ мондаанд, ки сокинони шаҳру навоҳии Хуҷанд, Истаравшан, Конибодом, Панҷакент, Исфара, Ашт, Бобоҷон Ғафуров, Мастчоҳ ва Бӯстон мебошанд.

Назарзода Қудратулло Бобо аз он изҳори нигаронӣ кард, ки аз ҷониби ноболиғон 82 ҷиноят содир шуда, аз ин ҳисоб 52 нафар хонандагони муассисаҳои таълимӣ мебошанд. Ҳамчунин, ноболиғон 57 ҷиноятро дар танҳоӣ ва 25 ҷиноятро гурӯҳӣ содир кардаанд.

Аз ҷониби ҷавонон бошад, давоми шаш моҳ 876 ҷиноятро 814 нафар содир карданд, ки ин шумора нисбат ба ҳамин даври соли сипаришуда зиёд аст.

Дар рафти нишасти матбуотӣ доир ба гирифтани шиносномаи дохилӣ ва хориҷӣ, ошкоршавии парвандаҳои ҷиноятӣ, куштор, худкушӣ, экстремизму терроризм, ҳодисаҳои роҳу нақлиёт, хушунату зӯроварӣ маълумот дода шуд.

Аз ҷониби рӯзноманигорон бештар дар масъалаи иваз намудани шиносномаи дохилӣ ба пластикӣ суолу ҷавоб доир шуд. Бобати масъалаи мазкур гуфта шуд, ки аз ҷониби кормандони Хадамоти шиносномавию бақайдгирии мақомоти корҳои дохилӣ ба 95 ҳазору 253 нафар сокини шаҳру навоҳии вилоят шиносномаи шаҳрвандӣ ва ба 76 ҳазору 706 нафар шиносномаи хориҷии биометрии дорои маълумоти электронӣ дода шудааст.

Ҳамчунин, зикр гардид, ки иваз кардани шиноснома маҷбурӣ набуда, он танҳо барои аз нав ба қайд гирифтани симкортҳо амалӣ мешавад.

Шаҳбону ОЛИМОВА,
«Ҳақиқати Суғд»

Читать далее