07 August 2019

Талабот ба муассисаи томактабӣ меафзояд

Дар нишасти матбуотии сардори Раёсати маорифи вилоят Осим Каримзода, ки бо иштироки намояндагони ВАО баргузор гардид, нишондиҳандаҳои асосии фаъолияти маорифчиёни вилоят дар шаш моҳи сипарӣ баррасӣ шуд.

Қайд гардид, ки тибқи дастури Раиси вилоят ҷиҳати азнавсозӣ ва таъмиру тармими бинои 46 муассисаи таълимии садамавии дар вилоят буда, таъмири 22 тои он дар соли равон ба нақша гирифта шуда, дар 20 мактаб алҳол корҳо оғоз ёфтааст. Ҳамзамон, алҳол 728 муассисаи таҳсилоти миёнаи умумӣ, аз он 32 гимназия, 25 литсей, як мактаби Президентӣ, се мактаб барои хонандагони лаёқатманд, се мактаб - кӯдакистон, як интернати санаторӣ, 4 мактаб - интернати махсус, 3 интернат барои кӯдакони ятиму бепарастор фаъолият дошта, 533692 нафар хонанда бо таълиму тарбия фаро гирифта шудаанд.

Дар вилоят 263 муассисаи томактабӣ, аз ҷумла 203 муассисаи томактабии тобеи шуъбаҳои маориф, 13 муассисаи томактабии тобеи корхонаю ташкилот ва 47 муассисаи томактабии хусусӣ фаъолият доранд. Алҳол шумораи кӯдакони дар навбат истода 11423 нафарро ташкил медиҳанд.

Бо ибтикори Раиси вилоят соли равон 250 нафар омӯзгори пешқадам ва эҷодкору навовар, собиқадорони соҳа дар осоишгоҳи «Зумрад» - и шаҳри Исфара ва 300 нафар хонандаи ятиму бепарастор, ғолибони озмуну олимпиадаҳои ҷумҳурӣ ва байналмилалӣ бо истироҳату фароғат фаро гирифта мешаванд.

Дар соли хониши 2019 - 2020 муассисаҳои таълимии вилоят ба 660 нафар омӯзгор эҳтиёҷ дошта, бо дастгирии Вазорати маориф ва илми Ҷумҳурии Тоҷикистон ба ин муассисаҳои таълимӣ мутахассисони ҷавон аз оғози моҳи августи соли равон ба ҷои корӣ ҳозир мегарданд ва ин муаммо аз байн меравад,- иброз дошт Осим Каримзода.

- Ҳамзамон, ба муассисаҳои таҳсилоти олии касбӣ тибқи квотаи Президенти Ҷумҳурии Тоҷикистон аз 302 ҷои муқаррар гардида, 301 нафар ба квота соҳиб шуданд. Дар ноҳияи Кӯҳистони Мастчоҳ аз сабаби пайдо нагардидани довталаб як ҷой холӣ монд. Дар 204 маҳфили фаннии назди Маркази дарёфт ва рушди истеъдодҳои Раёсат ва шуъбаҳои маорифи шаҳру ноҳияҳо 2 ҳазору 308 хонандагони болаёқат фаъолият мекунанд. Инчунин, дар назди Марказ 40 маҳфили маърифатӣ - фарҳангӣ бо ҷалби 435 нафар хонандаи боистеъдод ташкил шудааст.

Боиси тазаккур аст, ки дар шаш моҳи соли равон муассисаҳои таҳсилоти умумии таълимии вилоят бо 846 компутер таъмин гардида, алҳол дар 1099 синфхонаи компутерӣ 17 ҳазору 914 компутер ва 2 ҳазору 725 принтер мавҷуд аст. Инчунин, дар ин давр 95 тахтаи электронӣ харида шуд, ки 61,7 фоизи нақшаро ташкил медиҳад.

Дар вилоят 19 урдугоҳ - лагери беруназшаҳрӣ фаъолият менамоянд, ки аз ин шумора, даҳтои он дар тобеъияти шуъбаҳои маорифи шаҳру ноҳияҳо ва кумитаи вилоятии иттифоқҳои касабаи маориф ва илм қарор доранд.

Суолу ҷавоби рӯзноманигорон бо масъулини соҳа анҷомбахши нишасти матбуотӣ гардид.

Шаҳноза ҲОМИДОВА,

«Ҳақиқати Суғд»

Читать далее

Арзиши нерӯи барқ боло меравад

- Бо сабаби оне, ки истифодабарандагон пардохти нерӯи барқи истифодашударо пурра иҷро нанамудаанд ва бо дарназардошти қарзҳои кӯҳна, ба санаи 1 – уми июли соли 2019 қарзи умумии истифодабарандагон 450 миллион сомониро ташкил намуд, аз ҷумла қарзи истифодабарандагони корхонаҳои саноатӣ 26,4 миллион сомонӣ, ғайрисаноатӣ 43,8 миллион сомонӣ, буҷавӣ 28,1 миллион сомонӣ, хоҷагии қишлоқ 46 миллион сомонӣ, хоҷагии об 124,9 миллион сомонӣ ва аҳолӣ 149,2 миллион сомонӣ мебошад, - гуфт зимни нишасти матбуотӣ сардори Шабакаҳои барқии вилояти Суғд Тӯра Атамов.

Иттилоъ дода шуд, ки энергосистемаи вилоятро шаш шабакаҳои барқии минтақавӣ, ки дар таркиби худ 18 шабакаи барқии шаҳру ноҳияҳоро муттаҳид менамоянд ва нерӯгоҳи барқи обии Қайроққум ташкил медиҳанд. Дар шабакаҳои барқӣ корҳои таъмиру барқароркунӣ иҷро гардида, азхудкунии фонди таъмирӣ давоми шаш моҳи соли равон зиёда аз 11 миллион сомониро ташкил намуд.

Оид ба омодагӣ ба мавсими тирамоҳу зимистон гуфта шуд, ки барои барқарорсозӣ ва ба истифода додани ҳамаи иқтидорҳои мавҷудаи системаи энергетикӣ ба ҳамаи шабакаҳои барқии дар вилоят ҷойгирбуда ва нерӯгоҳи барқии Қайроққум нақша - чорабиниҳои техникӣ тасдиқ шудааст.

Аз тарафи мутахассисон то ба имрӯз як қатор корҳои таҳқиқотӣ ва омодасозӣ, аз ҷумла корҳои топографӣ, андозагирии қисми обгузар ва бетонии нерӯгоҳҳо, корҳои таҳқиқотии қисми зериобӣ, сохта тайёр намудани модели қисми обгузари нерӯгоҳ ва лӯлаҳо, лоиҳакашии обгузар доир ба таҷҳизоти борбардор, корҳои омодасозӣ ва ғайра ба анҷом расидаанд.

Ҳамзамон, Тӯра Атамов қайд кард, ки аз 1 - уми сентябри соли равон нархи истифодаи нерӯи барқ ба аҳолӣ боло меравад.

Аз ҷониби рӯзноманигорон бо масъулини соҳа доир ба боло рафтани нархи истифодаи нерӯи барқ, қарзи корхонаҳои саноатӣ дар назди шабакаҳои барқӣ, фаъолияти ҳисобченкунакҳои биллингӣ, таъмиру тармими нерӯгоҳҳои барқии обӣ суолу ҷавоб доир гардид.

Шаҳбону ОЛИМОВА,
«Ҳақиқати Суғд»

Читать далее

Воридот ва савдои маҳсулоти пастсифат то ҳол ҷой дорад!

Директори Маркази стандартизатсия, метрология, сертификатсия ва нозироти савдо дар вилояти Суғд Муҳаммадӣ Давлатов зимни нишасти матбуотӣ ба рӯзноманигорон оид ба ҷамъбасти фаъолияти Марказ дар шашмоҳаи аввали соли 2019 маълумот дода, қайд кард, ки дар вилоят 1602 санҷиши назорати давлатӣ гузаронида шуд, ки нисбат ба ҳамин давраи соли гузашта 10 адад зиёд мебошад. Дар рафти санҷиш дар 1830 субъекти хоҷагидор камбудиву қонуншиканӣ ошкор намуда, ба маблағи 309220 сомонӣ ҷаримаи маъмурӣ таъин карданд.

Дар самти пешгирии воридот ва савдои молу маҳсулоти пастсифат дар бозорҳо ва марказҳои савдо Муҳаммадӣ Давлатов гуфт, ки чанд номгӯи маҳсулоти муҳлати истеъмолаш гузашта, ғайристандартӣ ва бе сертификат, аз ҷумла маҳсулоти хӯрокворӣ, чойи хушки сиёҳ, равғани растании нахл, нӯшокиҳои спиртӣ, нӯшокиҳои ташнашикан, қандчаҳои хитоӣ, тухми мурғ, маҳсулоти гӯштӣ, қаннодӣ ва ширӣ ошкор ва мусодира шуданд. Дар маҷмуъ маблағи умумии маҳсулоти пастсифат, муҳлати истеъмолаш гузашта, бе сертификат ва бо роҳи қочоқ воридгардида зиёда аз 3.956593 сомониро ташкил дод.

Доир ба натиҷаи фаъолияти шуъбаҳо Муҳаммадӣ Давлатов қайд кард, ки фаъолияти шуъбаҳои бамеъёрдарории техникӣ ва стандартонии Маркази вилоят ва марказҳои ташхиси минтақавӣ 337 корхонаи истеҳсолӣ ва хизматрасонии шаҳру ноҳияҳои вилоят корҳои омӯзишӣ ва тарғиботию фаҳмондадиҳиро ба роҳ монданд, ки нисбат ба ҳамин даври соли гузашта 11 адад кам гардидааст. Дар ин радиф дар ҳамкорӣ бо прокуратураи ҳарбӣ вобаста ба маҳсулоти хӯрокаи қисмҳои ҳарбӣ 6 санҷиши муштарак гузаронида шуда, як қонунвайронкунӣ ошкор ва ба маблағи 550 сомонӣ ҷарима баста шуд.

Дар нишасти матбуотӣ рӯзноманигорон бобати сифати маҳсулоти воридгардида, аз ҷумлаи бозичаҳои бачагона, маҳсулоти хӯрока ва либос, қочоқи молу маҳсулот, таъминот бо таҷҳизоти муосир ва низоми идоракунии сифат суолу ҷавоб доир карданд.

Ш.СИДДИҚ,
«Ҳақиқати Суғд»

Читать далее

Роҳи оҳан бунёд мешавад

Давоми шаш моҳи аввали соли равон маҷмӯи маҳсулоти саноатӣ, хизматрасонӣ ва амалиёти воридоту содиротӣ ба 70,4 миллион сомонӣ баробар гардид, ки ин нишондиҳанда нисбат ба шаш моҳи соли гузашта 21, 4 миллион сомонӣ зиёд аст. Молу маҳсулоти субъектҳои Минтақаи озоди иқтисодӣ ба ғайр аз кишвар ба давлатҳои ҳамҷавори Афғонистон, Қирғизистон, Ӯзбекистон ва Туркманистон содирот шуда истодаанд, ки маблағи он зиёда аз 19,2 миллион сомониро ташкил дод.

Дар Минтақаи озоди иқтисодии «Суғд» миқдори умумии ҷойҳои корӣ аз оғози фаъолият ба 565 адад расида, боз ташкили якчанд корхонаи дигар дар назар аст. Айни замон дар МОИ «Суғд» 26 субъект ба қайд гирифта шуда, мувофиқи ҳисоботи охирин 13 адади онҳо бо фаъолияти истеҳсолӣ, хизматрасонӣ ва савдо, боқимонда бо корҳои сохтмонӣ, ободонӣ, ворид намудани таҷҳизот ва ба кор андохтани иқтидорҳои нав машғуланд. Дар нимсолаи аввали соли равон ду субъекти нав – ҶДММ «Корхонаи муштараки тоҷикӣ - туркии «Афранг Пластик» ва филиали Ширкати канадагии «Хантана Канада» - ро ба қайд гирифт, ки аввалӣ тибқи лоиҳаи сармоягузорӣ бо истеҳсоли профилҳои пластикии дару тирезаҳо машғул шуда, 28 ҷойи нави корӣ ташкил менамояд. Ширкати канадагии «Хантана» бо ҷалби 15 нафар коргари маҳаллӣ бо коркард, бастабандӣ ва содироти асал машғул хоҳад шуд.

Ҳаҷми сармоягузории мустақим дар шаш моҳи соли равон ба маблағи 2 миллион сомонӣ ва аз оғози фаъолияти минтақа зиёда аз 72,6 миллион сомонӣ таъмин гардид. Дар даври ҳисоботӣ андози иҷтимоӣ ба миқдори 946,3 ҳазор сомонӣ, андоз аз даромади шахсони воқеӣ ва ҳуқуқӣ 487,8 ҳазор сомонӣ ва пардохтҳои гумрукӣ ва андозҳо ба миқдори 9,4 миллион сомонӣ таъмин шуд.

– Маъмурият барои амалисозии стратегияи рушди минтақа ва дар ҳамин замина оид ба амалигардонии лоиҳаи сохтмони хатти роҳи оҳани «Спитамен – МОИ «Суғд» – Истиқлол» корбарӣ намуда истодааст, – изҳор дошт Фирдавс Олимзода, сардори Минтақаи озоди иқтисодии «Суғд».

Мувофиқи талаботи Бонки Осиёии рушд ҷиҳати пайдо намудани дастрасӣ ба маблағгузории ин Бонк ва дар ҳолати омода гардидани ҳуҷҷатҳои боқимонда Бонк тасмим гирифтааст, ки масъалаи маблағгузории онро баррасӣ намояд.

Яке аз мушкилиҳои ҳалталаби рӯз ин норасоии нерӯи барқ ҷиҳати таъмини эҳтиёҷи субъектҳои МОИ «Суғд» бо ҳаҷми басандаи нерӯи барқ мебошад, ки масъалаи барқароркунии зеристгоҳи барқии «Fарбӣ» - ро дар ҳудуди минтақа ба миён меорад. Муроҷиати субъектҳои минтақа, аз ҷумла ҶДММ «Оҳанкор», ки аз тарафи Ҷумҳурии Ӯзбекистон ташкил шудааст, ба нерӯи барқ дар ҳаҷми 25000 Квт/с талабот дорад.

Гулҷаҳон Турсунзода,

«Ҳақиқати Суғд»

Читать далее