06 August 2019

Пешвои миллат Эмомалӣ Раҳмон бо фаъолону сокинони ноҳияи Балҷувон мулоқот намуданд

Имрӯз Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар доираи сафари корӣ ба ноҳияи Балҷувон бо фаъолону сокинони ноҳия мулоқот намуданд.

Пешвои миллат муҳтарам Эмомалӣ Раҳмон бо натиҷагирӣ аз нишондиҳандаҳои рушди иқтисодию иҷтимоии ноҳия ва тадбирҳои ободонию бунёдкорӣ ба истиқболи ҷашни 30-солагии Истиқлолияти давлатии Ҷумҳурии Тоҷикистон таъкид намуданд, ки Балҷувон ҳамчун ноҳияи навтаъсис бо дастгирии Ҳукумати мамлакат ва ҷалби соҳибкорону дигар шахсони саховатпешаи ин диёр дар кӯтоҳтарин фурсат ободу зебо гардида, барои зиндагии шоистаи сокинони он шароити зарурӣ фароҳам оварда шудааст.

Читать далее

Пешвои миллат Эмомалӣ Раҳмон роҳи автомобилгарди Кангурт-Балҷувон-Ховалингро ифтитоҳ намуданд

6 августи соли равон дар ноҳияи Балҷувони вилояти Хатлон Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон роҳи автомобилгарди Кангурт-Балҷувон-Ховалингро мавриди баҳрабардорӣ қарор доданд.

Бояд таъкид намуд, ки роҳи автомобилгарди Кангурт-Балҷувон-Ховалинг валангор шуда буд ва ронандагону мусофирон ҳангоми рафту омад ба мушкилӣ рӯ ба рӯ мешуданд. Роҳи мазкур бо дастгирии Ҳукумати Ҷумҳурии Тоҷикистон навсозӣ гардида, имрӯз бо сифати баланд ва ҷавобгӯ ба стандартҳои байналмилалӣ  ба истифода дода шуд.

Читать далее

Президенти мамлакат Эмомалӣ Раҳмон коргоҳи коркарди сангҳои маҳаллии ҶДММ «Элегант-Балҷувон»-ро ифтитоҳ карданд

6 августи соли 2019 Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар деҳаи Калтачинори деҳоти Тоҷикистони ноҳияи Балҷувон коргоҳи коркарди сангҳои маҳаллии Ҷамъияти дорои масъулияти маҳдуди «Элегант-Балҷувон»-ро ифтитоҳ карданд. Самти асосии коргоҳ коркарди сангҳои маҳаллӣ мебошад. Ҷамъияти дорои масъулияти маҳдуди «Элегант-Балҷувон» дар доираи эълон гардидани солҳои 2019-2021 ҳамчун Солҳои рушди деҳот, сайёҳӣ ва ҳунарҳои мардумӣ бунёд ёфтааст.

Корҳои сохтмонӣ дар коргоҳ моҳи ноябри соли 2018 оғоз шуда, он имрӯз мавриди баҳрабардорӣ қарор дода шуд. Ҷамъияти дорои масъулияти маҳдуди «Элегант-Балҷувон» бо технологияи муосир муҷаҳҳаз гардонда шуда, бо истифода аз он сангҳои маҳаллӣ коркард карда мешаванд. Дар коргоҳи «Элегант-Балҷувон» коркарди сангҳои табиии маҳаллӣ, аз ҷумла, санги хоро, мармар ва ғайра ба роҳ монда мешавад.

Читать далее

Саҳна ҷойнамози ҳунарманд аст!

Афзалшои Шодӣ мухлисонашро санаҳои 7-8-уми август дар шаҳри Хуҷанд интизор аст!

Чанд рӯз аст, ки ҳунарманди маҳбуби кишвар дар шаҳри Хуҷанд машғули машқу тамрин мебошад ва ба консерти навбатии хеш, ки санаҳои 7-8- уми августи соли равон, соати 17.30 дар Қасри ҷавонон ба номи Лоиқ Шералӣ баргузор мегардад, омодагӣ мебинад.

 Ин аввалин консерти Афзалшои Шодӣ баъд аз беморӣ ва табобат дар Олмон аст.

Афзалшои Шодӣ мутаассиф аст, ки консерти хешро дар шаҳри Хуҷанд бинобар беморӣ дар вақташ баргузор карда натавонист. Ӯ мегӯяд, ки бемории ногаҳонӣ боиси ба таъхир афтодани консерт шуд.

 Ва тӯли беш аз 70 рӯзе, ки дар Олмон бо табобат машғул буд, ҳамеша  Тоҷикистонро ёд ва муҳаббати мардумро эҳсос мекард.

-Айни ҳол табобати ман ба пуррагӣ анҷом наёфтааст ва санаи 17-уми август бояд барои ҷарроҳии навбатӣ дубора ба Олмон равам. Аз он сабаб, ки ба мардуми Хуҷанд ваъдаи сахт дода будам, консертро баргузор хоҳам кард. Табибон иҷозати суруд хонданро доданд, аммо зиёд на. Ин аст, ки барномаи фарҳангии мо фақат дар шаҳри Хуҷанд баргузор хоҳад шуд, дар шаҳрҳои дигар баъд аз итмоми табобат ҳунарнамоӣ хоҳем кард. Сарбаландам, ки ба муҳаббату садоқати мардуми азизам сазовор гаштаам. Ман ин  муҳаббатро ҳангоми  бемор буданам ва дар хориҷа табобат гирифтанам сахт эҳсос кардам, мегӯяд ин ҳунарманди маҳбуи тоҷик.

Дар консерти навбатӣ мухлисони Афзалшоро суруду оҳангҳои нав интизор аст.

-Ҳангоми бемориву ғурбат чанд суруди нав эҷод шуд, ки аввалин бор дар консерт хонда хоҳад шуд. Воқеан саҳна ҷойнамози ҳунарманд аст ва ду қувваи бузург Худову халқ ҳамеша дастгири ман буданду ҳастанд, ман бо инояти Худованд ва дуои пайвастаи мухлисонам шифо ёфтам. Аз ин муҳаббату самимият сафарозу сипосмандам,-  мегӯяд ҳофизи мумтози тоҷик.

Сурайё ҲАКИМОВА,

«Ҳақиқати Суғд»

Читать далее

Сайҳун: об ба боғот чу пари товус бувад…

Аҳли маърифат, алалхусус деҳқонон - кишоварзон, ки бо замину об, долу дарахтон, ҳосили боғот, зироатҳои полезӣ бе ягон муболиға решапайванданд, гуфтаанду мегӯянд, об ҳусну нури замин, хуни ҳаётбахши хоки самарабахш аст. Ин ифодаро мо дар симо, чеҳра ва манзараи боғоти интенсивии шаҳраки навбунёдшавандаи Сайҳун равшан ва гуворо эҳсос менамоем.

Ҳамагӣ чанд соли наздик домони дашти Сомғор дар ноҳияи Бобоҷон Ғафуров аз мавриди зикру гуфтори мардумон дур, ноаёну ҳамчун як мавзеи бекорхобидае буд. Иқдом, ташаббус ва эътибору эътимод зиндагиро мунаввару суръатбахш месозад. Маҳз бо дастуру ҳидоятҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва ҳиссиёти мукаммали роҳбарияти вилояти Суғд дашти Сомғор номбардор гардид. Имрӯз ҳаёти Сайҳуни дурнамои дурахшон, шукуфон ва ободон дошта эҳсос мешавад. Аз дарёи Сири пуртамкин ба воситаи пойгоҳҳои обрасонии Сумчак - 1, Сумчак - 2 бо лӯлаҳои калонҳаҷму бузургдиаметр ба домани дашти Сомғор оби ҷонбахш, нури ҳаёт расидааст. Болотар дар паҳнои шаҳраки акнун чеҳракушода истода як ҳавзи бузурги захираи об аз оби дарёи Сир ҳамеша лаболаб буда, дар мавриди муайян ба боғоти муосири интенсивӣ об мерасонад, ки ниҳолҳояшон, бо гузашти се - чаҳор сол пурмева гардида, комҳоро ширин намудаанд. Ҳам мутахассисони иморатсоз ва ҳам донандаҳои асрори замину об, боғу боғчакорӣ, алалхусус, мардуме, ки барои худ манзили истиқоматӣ бунёд карда истодаанд, дар фикру хаёлҳои хеш тасаввур менамоянд, ки кунун – ба ҳамин наздикиҳо инҷо хонаи умед мешавад, боғҳо камол ёфта, шаҳдрез мегарданд, рӯи ҳавлиҳо гулзор шуда, хандаи бахти худу фарзандон ва наберагон хоҳад шуд.

Дар рабти ин созандагиҳо, ин обрасониҳо, ин нашъунамои боғу ҳаёти шаҳрак бо Мӯъминҷон Лакимзода – сардори Идораи беҳдошти замин ва обёрии ноҳияи Бобоҷон Ғафуров суҳбате доштем. Ӯ гуфт: айни замон тадбирҳои созандагӣ дар Сайҳун пеш меравад ва панҷоҳ фоизи корҳои васлкунии лӯлаҳои обрасониву обгузар ба анҷом расидаанд. Оби ҷонбахш ба боғҳои интенсивӣ тариқи канали Сумчак, пойгоҳи обкашии Сумчак расонида мешавад. Баробари ин муаммо – таъминот бо барқ ҳанӯз боқӣ мемонад. Идораи мо имконият дорад, дар як ҳафта ду маротиба – рӯзҳои душанбе ва панҷшанбе майдони боғотро – беш аз ҳазор гектар аст, бо оби полезӣ таъмин созад. Боғоти интенсивии ин мавзеъ ҳоло аз канали Сумчак обёрӣ карда мешаванд.

Дар саҳифаҳои рӯзномаи «Ҳақиқати Суғд» аз кору пайкор, ободгариҳо ва бунёди иншооти обрасониву ташкили боғҳои интенсивӣ борҳо навиштаем. Вале имрӯз онро салоҳ донистем, ки ишора бар он намоем – боғҳои интенсивӣ дар домони шаҳрак тӯл кашидаанд – ниҳолҳои зардолу, сиёҳолу, ангуру шафтолу қомат афрохтаанд, ба назарҳо ҳамчун қомати наварӯсон ҷилвагаранд. Дар ёд дорем, ки аввалин шуда дар боғ ниҳолони шафтолу ба ҳосил даромада буданд, зери ниҳолон лӯбиёю нахӯд, тарбузу харбуза ва каду кошта, аз ҳосилаш табъу вуҷуди фардони заҳматкаш фараҳафзо гардида буду ҳаст.

Марҳалаи якуми бунёди боғоти интенсивӣ муваффақона шуд, даври дуюми ташкили боғҳои интенсивии ҷавобгӯ ба талаботи имрӯз бомаром оғоз шуда, идомаи некбинона дорад. Ниҳолони боғҳои интенсивӣ ба таври қатрагӣ об мехӯранд, найчаҳои обгузар ба ниҳолон сабзишу нумӯъ ва ҳосил мебахшанд. Ин тарзи обёрӣ, албатта, ба сарфаю сариштаи об мусоидат мекунад ва ниҳол аз об сер мегардад. Азбаски заминҳои дашти Сомғор санг надоранду хокашон бисёру таркибаш ҳосилбахш аст, ин шарти ба даст овардани муваффақият буда, заҳмати боғдорон асло зоеъ намеравад.

Ба Сайҳун оби полезӣ меояд, оби ошомиданӣ низ хоҳад расид. Ҳар муаммо, ҳар мушкилоте, ки дар масоили обу ободонӣ, эъҷози замину ниҳолон, фаъолияти пойгоҳҳои обкашӣ ва умуман ҷӯшу хурӯши ҳаёти Сайҳун пеш меоянд, бо азму суботи масъулини ин мавзеъ саривақт ҳаллу фасл мегарданд. Оби Сайҳун боғҳои Сайҳунро сарсабзу пуртароват месозад, ки мавзӯи ояндаи мақолаи мо хоҳад шуд.

Улуғбек ХУДОЙБЕРДИЕВ,
«Ҳақиқати Суғд»

Читать далее

Мақсади бонки миллӣ: НИГОҲ ДОШТАНИ САТҲИ ТАВАРРУМ

Маҷмӯи маҳсулоти дохилии вилоят дар шаш моҳи соли равон 7,8 миллиард сомониро ташкил медиҳад, ки ин нисбат ба ҳамин даври соли гузашта 6,8 фоиз зиёд мебошад. Яке аз нишондиҳандаҳои асосие, ки ҳадафи фаъолияти бонки миллӣ ва ташкилоти қарзии вилоят ба ҳисоб меравад, нигоҳ доштани сатҳи таваррум аст.

Дар шаш моҳи соли ҷорӣ сатҳи таваррум 3,9 фоизро ташкил намуд, ки нисбат ба ҳамин давраи соли гузашта 2,4 фоиз зиёд мебошад. Зимни нишасти матбуотӣ мудири шуъбаи минтақавии Бонки миллии Тоҷикистон дар шаҳри Хуҷанд Наврӯз Валиев ба рӯзноманигорон гуфт, ки тамоми сохторҳои иқтисодии вилоят барои беҳтар намудани ҳолати савдои хориҷӣ тадбирҳо меандешанд. Нишондиҳандаҳои савдои хориҷӣ моро ба ташвиш меорад.

 Гардиши савдои хориҷӣ 1 миллиарду 11 миллион доллари амрикоиро ташкил намуд, ки нисбат ба ҳамин даври соли сипаришуда 0,7 фоиз зиёд аст. - Яке аз нишондиҳандаҳои асосие, ки боиси нигаронист, ин содироти мол аз тарафи субъектҳои хоҷагидори вилоят аст, ки дар ин давра 224,5 миллион долларро ташкил дода, нисбат ба ҳамин даври соли гузашта 20,2 фоиз коҳиш ёфт, - афзуд Наврӯз Валиев.

Дар нишасти матбуотӣ ҳамчунин бобати дастгирии рушди иқтисодиёти миллӣ, нигоҳ доштани сатҳи таваррум, суботи низоми қарзӣ, вусъат бахшидан ба ҳисоббаробаркунии ғайринақдӣ, такмил додани идораи кооперативӣ, ҷалби сармояи дохиливу хориҷии арзон, паст кардани фоизҳои қарзӣ ва умуман истифодаи намудҳои гуногуни хизматрасонии муосири бонкӣ ва ба ин васила баланд бардоштани сатҳи хизматрасонии бонкӣ маълумот дода шуд. Аз ҷониби рӯзноманигорон бо масъулин, роҳбарон ва намояндагони бонкҳо доир ба фаъолияти ташкилоти қарзӣ суолу ҷавоб доир гардид.

Ш.СИДДИҚ,
«Ҳақиқати Суғд»

Читать далее