July 2019

22 July 2019

Муроҷиати Гулнора Воҳидова ба мухолифини дузд

Аз номи модари ман истифода набаред. Мо ба ташкилотҳои байналмилалӣ аз болои Шумо шикоят мекунем.

Суханони волои Гулнора Воҳидова мушти обдорест ба пешонии кӯтаҳақлони аср – наҳзатиҳои бериё, ки аз обрӯи ҳамсари Воҳидов бе иҷозати ӯ истифодаи сӯ мекунанд.

Читать далее

"Одам як бор мегӯяд: ё баро аз ин ҷо ё..."

ё шинос биёрам?

Мадина Сангинова зодаи ноҳияи Деваштич асту мехоҳад ба шуъбаи магистратураи донишгоҳ дохил шавад. Барои ин ба ӯ лозим омад, ки боз аз муоинаи тиббӣ гузарад. Вай чанд сол пеш аз муоина гузашта, мисли имрӯз ду рӯзи дароз дар навбат наистода буд.

Рӯзи аввал ба Маркази саломатии № 5 - уми шаҳри Хуҷанд рафтаму барои кушодани варақа 25 сомонӣ супоридам. Барои оиладорон 35 сомонӣ будааст. Намедонам ин чӣ гуна нархнома аст? Соат наздики чаҳордаҳ буд, аммо аксари духтуроне, ки ман бояд аз назорати онҳо мегузаштам, дар ҷои кор набуданд. Фикр кардам, ки онҳо дар рухсатии меҳнатианд, аммо... Рӯзи дигар назди духтури гӯшу бинӣ ва гулӯ рафтам. Хостам аз муоинаи онҳо гузарам, аммо бо шавқ донаи офтобпарастро шикаста нишастани хоҳарони шафқатро дида, аз нияти хеш баргаштам, байни “суҳбати қаймоқин” - и онҳо даромадан нахостам.

Мегуфтам ҳам, суде надошт, зеро ҳамшира машғули фикри дигар буд. "Ягон шикоят доред?" - гӯён пурсиду посухашро нагирифта, имзояшро монд. Барои ташхиси рентгенӣ бояд ман ба беморхонаи дигар мерафтам, зеро дар ин марказ таҷҳизот аз кор баромада буд. Ин ҳам як оворагии беморону корафтодагон аст. Муносибати "хуб" - и духтурони ин ҷо кам буд, ки бар болояш ин масъала зам шуд. Соат шонздаҳ, ки шуд, ночор ба хона баргаштам. Рӯзи дигар соати 8:20 ба беморхонаи шаҳрӣ ҳозир шудам. Хушбахтона, духтур маро қабул карда, саволи болоиро такрор кард. Ду муҳр заду аз ман 10 сомонӣ талаб кард. 5 сомонӣ диҳам бо овози баланд "10 сомонӣ!" гуфт. Бо алам пулро додаму садқаи сар гуфта, аз дар баромадам. Аз он ҷо боз ба Маркази саломатии №5 омадам. Ибтидо ба хазина 57 сомониро супурда, интизори навбат шудам. Аз соати нӯҳ то соати 12:00 дар назди дари ташхисгоҳи беморхона дар навбат истодам. Духтурони "харобакак" - у "меҳрубон" - и он ҷо "чаққонакак" варақаҳои омадаистодаро бо шавқ пур карда, бар ивазаш коғазаке, ки дар онҳо акси Ҳамадониву Сино, Айниву Бобоҷон Fафуров буд, мегирифтанд. Холаҳои “харобакак” - и хилъати сафедпӯш дар даст варақаҳо медаромаданду мебаромаданд. Баъд навбати "амакҳои галстукдор" омад. Ба онҳо дар ҳамин ҷо ҳам "котибаҳо" хизмат мекарданд. Варақаро гирифта медароварду аз қафо онҳоро ҷеғ мезад. Ниҳоят варақаҳои "ҳавоии тиллоӣ" магар тамом шуд, ки навбат ба мо омад. Ба утоқе, ки ду рӯз боз даромаданашро «орзу» мекардам, ворид шудам. Духтурон бо лафзи "ширин" - и заҳргину чеҳраҳои "кушод", ки аз онҳо қариб барфу борон борад, маро қабул карданд. Қариб ба меҳмоннавозии онҳо одат карда будам, ки боз як "холаи хилъатпӯш" даромаду ба ҷайби духтур даст андохту бо овози паст маслиҳат карданд. "Вай одам баъди ним соат мебиёд. Ҳаминро пур карда монед". Духтур камтар аз Худо метарсидагӣ будааст магар ки «ақалан хунашро гирифта анализ кунем охир» гӯён ба ӯ нигоҳ кард. Холаи харобакак "не ӯ даркор не. Ҳаминро пур кунед бас. Чаро ин қадар худатонро азоб медиҳед? Хуб, майлаш - мӣ?".

Маслиҳаташон пухту хола баромада рафт. Духтури чанд лаҳза пеш меҳрубону ширинсухан, дилу бедилон варақаи маро гирифту "ба он ҷо гузашта шинед" - гӯён ба ман фармон дод. Хунро гирифту ду ташхиси дигарро ба фардо монд. Ман, ки чанд лаҳза пеш шоҳиди як воқеаи аҷоиб гардидам, духтуронро хуб шинохта монда будам, гуфтам: "Муаллимаҷон, биёед маро бори дигар овора накунеду ҳамонро навишта диҳед" - гӯён илтиҷо кардам. Бо овози баланд гуфт: "Мумкин не. Чӣ хел анализ насупорида, ман навишта диҳам. Аҷаб одамое!". Ба назди духтури дигар, ки даромади нимрӯзаашро ҳисоб мекард, рафтам. Варақаамро дароз кардам. Бо овози баланд: “Аз наздам дур шав. Ё берун баро ё...” - гӯён сарашро хам карда машғули кор шуд. Симову гуфтори вайро дида, аз духтуру дармонаш дилам монд. Маълум шуд, ки ман усули “амакҳои галстукдор” - ро дуруст истифода бурда натавонистаам.

Боз пагоҳ меоям гӯён баромадам. Ба худ гуфтам, канӣ ман ҳам усули дигари онҳоро истифода барам - чӣ гӯён як холаи халатпӯшро дида, наздаш рафта, вазъиятро фаҳмонидаму ба болои варақаам як расми бобои Ҳамадониро мондам. Холаи меҳрубон ба ман ин усулро ёд доданӣ шуда, онро ба қабати коғазҳо монду рафт. Баъд аз як соат варақаамро пурра карда овард. Ҳамроҳаш ҳамон духтури "меҳрубон" - у "ширинзабон" буд, ки акнун аз муносибати нешдори пештарааш нишоне намонда буд. Вай ба ман нигоҳ карда гуфт: "Укоҷон, ҳама ҳуҷҷатҳоятон шуд".

Хуллас, ҳуҷҷатҳоямро гирифтаму ба ҳамаи холаҳоям раҳмат гуфта баромадам. Аҷаб замоне шуд. Ҳама касу ҳама чиз пул шудааст. Одам мурда равад фарқ надорад, муҳим ки пулашро гирифта бошанд шуд. Албатта, ин ба баъзе аз холаҳои "меҳрубон" дахл дорад. Ҳастанд духтуроне, ки ҳаёти беморон барои онҳо аз ҳама чиз болотар меистад».

Ҳар фарди солим бояд дар давоми сол ақаллан як маротиба аз назорати духтур гузарад, зеро бо ин роҳ худро аз бисёр бемориҳо пешгирӣ мекунад. Аммо, аз рӯи гуфти қаҳрамони мо, барои ин ба ӯ лозим меояд, ки ё вақти зиёди худро сарф кунад ва ё маблағро, ки на ҳама чунин имкониятро доранд. Барои санҷиши хизматрасонии кормандони тиб мо пурсиши афкор гузаронидем, ки зиёда аз 45 фоизи онҳо гуфтаҳои қаҳрамони моро дастгирӣ намудаанд. Пас, мо метавонем бо маблағи муайян муносибати хуби онҳоро харидорӣ намуда бошем.

Ҳафиза БЕГОВА,
рӯзноманигор

Читать далее

Пажӯҳиши бунёдӣ – талаби замон

Дар Донишгоҳи давлатии ҳуқуқ, бизнес ва сиёсати Тоҷикистон нишасти матбуотии ректори донишгоҳ, профессор Муъмин Шарифзода бо намояндагони васоити ахбори омма оид ба ҷамъбасти натиҷаҳои фаъолияти донишгоҳ дар нимсолаи аввали соли 2019 баргузор гардид.

Сараввал ректор мухтасар аз дастовардҳои донишгоҳ маълумот дода, қайд намуд, ки натиҷаҳои ҷамъбасти нимсолаи аввали соли 2019 ва омодагӣ ба истиқболи 30-солагии Истиқлолияти давлатии Ҷумҳурии Тоҷикистон марҳалаи нав ба шумор меравад.

Ҳамчунин, ректори донишгоҳ аз аккредитатсияи байналмилалӣ гузаштани ихтисосҳои ҳуқуқшиносӣ, муносибатҳои байналмилалӣ, молия ва қарзро падидаи муҳим ва дастоварди арзандаи муассисаи олии таълимии касбӣ дар нимсолаи аввали соли равон арзёбӣ намуд.

Теъдоди таълифоти рисола ва корҳои илмӣ дар нимсолаи якуми соли 2019 аз 8 монография, 55 мақола дар маҷаллаҳои илмии аз тарафи КОА (ВАК) тасдиқшуда, 66 мақола дар конференсияҳои илмии байналмилалӣ, 104 мақола дар конференсияҳои ҷумҳуриявӣ, 398 навиштаи илмӣ дар маҷмӯаи дохилидонишгоҳӣ иборат аст.

Натиҷаҳои паҷӯҳишот ва теъдоди ҳимояҳои рисолаҳои илмӣ дар ин давр 8 ададро ташкил медиҳад. Теъдоди ҳимояи рисолаҳои илмӣ дар Шӯрои диссертатсионии назди ДДҲБСТ бошад, ба 7 адад баробар аст.

Иштироки донишҷӯёни донишгоҳ дар мусобиқаҳои варзишии вилоятию ҷумҳуриявӣ ва байналмилалӣ назаррас арзёбӣ гардид.

Дар радифи корҳои омодагӣ ба ҷашни 30-солагии Истиқлолияти давлатии Ҷумҳурии Тоҷикистон дар назди факултети инноватсия ва телекоммуникатсия маркази тестӣ ташкил ёфта, бунёди толори варзишӣ ба итмом расида, гармхонаи макони омӯзиш ва таҷрибаомӯзӣ барои ихтисоси маркетинг ва агробизнес сохта шудааст.

Рӯзноманигорон вобаста ба сифати таълиму тарбия дар донишгоҳ, тарзу усули гузаштан аз аккредитатсияи байналмилалӣ ва талаботи он, вазъи моддиву техникии донишгоҳ суолҳо дода, посухҳои мушаххас гирифтанд.

Улуғбек МАХФИРАЛИЗОДА,
«Ҳақиқати Суғд»

Читать далее

Саноат: Истеҳсоли маҳсулот меафзояд

- Ҳаҷми истеҳсоли маҳсулоти саноатӣ дар вилояти Суғд дар шаш моҳи соли ҷорӣ нисбат ба соли гузашта 116,1 фоизро ташкил дод, - зикр намуд мудири шуъбаи саноат ва энергетикаи Мақомоти иҷроияи ҳокимияти давлатии вилоят Озифхон Шарифзода. 

Ҳамзамон, мавсуф иттилоъ дод, ки ҳаҷми истеҳсоли маҳсулоти саноатӣ дар вилоят дар ин давр ба 5,7 миллиард сомонӣ расонида шуд, ки нисбат ба ҳамин даври соли гузашта бо нархҳои муқоисавӣ 786,1 миллион сомониро ташкил медиҳад.

Таҳлили истеҳсолоти вилоят нишон дод, ки бинобар кам шудани ҳаҷми истеҳсоли маҳсулоти корхонаи саноатии ҷумҳурӣ - “Ширкати кӯҳӣ - саноатии Тоҷикистону Хитой”, ки яке аз коргоҳҳои калонтарин маҳсуб ёфта, ҳиссаи он дар саноати вилоят 21,8 фоизро ташкил мекунад, истеҳсолот дар вилоят, паст гардидааст.

Суръати афзоиши ҳаҷми истеҳсоли маҳсулоти саноатии вилоятӣ бидуни фаъолияти корхонаи мазкур нисбат ба ҳамин даври соли гузашта бо нархҳои муқоисавӣ 827,9 миллион сомонӣ зиёд буда, он 123 фоизро ташкил дод.

Шаҳри Гулистон нимсолаи аввалро бо қафомонии ҳаҷми истеҳсоли маҳсулоти саноатӣ - 98,1 фоиз ҷамъбаст намуд. Сабаби асосии қафомонӣ коҳиш ёфтани ҳаҷми истеҳсоли маҳсулот дар “Ширкати кӯҳӣ - саноатии Тоҷикистону Хитой” бо нархҳои амалкунанда 322,9 миллион сомонӣ ва дар КМ “Апрелевка” 29,6 миллион сомонӣ зоҳир мешавад.

Дар шаш моҳи соли равон дар вилоят 59 корхонаву коргоҳи нав бо таъсиси 642 ҷойи корӣ ташкил гардид.

Бинобар иҷрои супориши Роҳбари давлат соли ҷорӣ дар вилоят таъсиси 13 коргоҳи дӯзандагӣ дар шаҳру ноҳияҳои Панҷакент, Бобоҷон Ғафуров, Мастчоҳ, Айнӣ, Ашт, Исфара, Деваштич, Конибодом, Ҷаббор Расулов ва Кӯҳистони Мастчоҳ ба нақша гирифта шудааст.

То ин дам аллакай 8 корхонаву коргоҳи нави дӯзандагӣ бо 61 ҷойи корӣ боз шуда, мавриди баҳрабардории мардум қарор гирифтанд. Инчунин соли ҷорӣ дар шаҳру ноҳияҳои вилоят бунёди 6 коргоҳи коркарди шир дар назар дошта шудааст.

Дар ноҳияи Мастчоҳ бошад, имсол дар заминаи иқтидори истеҳсолии Ҷамъияти саҳҳомии пӯшидаи “Олим текстайл” Ҷамъияти дорои масъулияташ маҳдуди “Ангубин” ба фаъолият оғоз намуда, аз ҷониби ин коргоҳ ба маблағи умумии 12,9 миллион сомонӣ маҳсулоти саноатӣ истеҳсол гардидааст.

Мутахассисони соҳа зимни гузаронидани таҳлилҳо бар он ақидаанд, ки шумораи корхонаҳои бефаъолият нисбат ба шашмоҳаи соли гузашта 44 адад кам шуда, маҳсулоти истеҳсолнагардида дар ин корхонаҳо 0,2 фоизи маҷмӯи маҳсулоти саноатии вилоятро ташкил медиҳад.

Дар маҷмуъ дар вилоят дар нимсолаи аввали соли равон аз 605 корхонаи саноатӣ 506 корхона фаъолият бурда, истеҳсолот дар 51 корхона ба роҳ монда нашудааст. Илова бар ин, 48 корхонаи дигар мавсимӣ буда, ҳанӯз ба фаъолият оғоз накардааст.

Масъулин сабабҳои фаъолият набурдани корхонаҳои саноатиро нарасидани ашёи хому маблағҳои гардишӣ, фарсуда гаштани таҷҳизоти технологӣ, маҳдуд шудани бозорҳои анъанавии фурӯши маҳсулот, рақобат карда натавонистани маҳсулоти онҳо ва иваз намудани самти фаъолият, ҳамчунин баҳсҳои амволӣ зикр намуданд.

Соруҷ (семент) дар истеҳсолоти вилоят мавқеи муҳимро ишғол менамояд. Дар шаш моҳи аввали соли равон дар вилоят 605,5 ҳазор тонна соруҷ истеҳсол гардидааст, ки нисбат ба ҳамин даври соли пешин 115,8 ҳазор тонна ё ба миқдори 1,2 маротиба зиёд аст. Содироти соруҷи ватанӣ ба давлатҳои Ӯзбекистону Қирғизистон ба роҳ монда шуда, тибқи маълумоти раёсати гумруки вилоят, давоми 6 моҳи соли 2019 дар маҷмуъ 322,5 ҳазор тонна соруҷ ба хориҷи кишвар содирот шудааст.

Консентрат ва маъдан бошад, солҳои охир ба яке аз маҳсулоти асосии содиротӣ табдил ёфта, он дар ин давр ба маблағи умумии 147,3 миллион доллари амрикоӣ содирот шудааст.

Дар конҳои ангишти вилоят истихроҷ ба андозаи 1,2 маротиба зиёд гардида, дар нимсолаи соли равон 660,1 ҳазор тоннаро ташкил намуд.

Тибқи нишондодҳо ба 1-уми июни соли ҷорӣ дар соҳаи саноати вилоят 29385 нафар корманд дар рӯйхат буда, шумораи кормандони маошгиранда 22966 нафарро ташкил медиҳад.

Ҳолати мазкур барои таҳкими нуфузи вилоят ҳамчун минтақаи саноатии кишвар, ба кор андохтани иқтидорҳои нав, роҳандозии истеҳсоли маҳсулоти нави рақобатноку воридотивазкунанда ва ниҳоят дар бобати расидан ба ҳадафи чоруми миллӣ – саноатикунонии мамлакат саъйу кӯшиши боз ҳам бештари масъулин ва мутахассисони соҳаро дар ҳалли масоили мавҷуда ва ҷустуҷӯи роҳҳои нави самарабахши истеҳсолот тақозо дорад.

Улуғбек ХУДОЙБЕРДИЕВ,
“Ҳақиқати Суғд”

Читать далее

ОВЧИҚАЛЪАЧА: РАВАНДИ ОБОДКОРИҲО

Ҷамоати деҳоти Овчиқалъача аз мавзеъҳои сарсабзу хушобуҳавои ноҳияи Бобоҷон Ғафуров маҳсуб ёфта, он дар ҳамворӣ дар масоҳати 4057 гектар доман паҳн кардааст. Қаламрави ҷамоат бо ноҳияи Қулундии Ҷумҳурии Қирғизистон, деҳаи Ӯзбекқишлоқи ноҳияи Ҷаббор Расулов, Ҷамоати деҳоти Исфисор, деҳаҳои Хистеварзу Унҷӣ ҳамҳудуд аст.

Боғоти сарсабз ва дарахтони азими мевадору сояафкани дар қадди роҳу кӯчаҳо шинонидашуда дар ин мавсими гармои тобистон низ ин мавзеъро салқин нигоҳ доштааст, ки аз ин боис ва бо сабаби мавҷуд будани ҷойҳои таърихӣ ба ҷойи истироҳату фароғати мардум табдил ёфтааст. Дар деҳаҳои ҳудуди ҷамоат - Овчӣ, Қалъача, Шайхон, Боғпарвар, Деҳнав, Пахтаобод, Себзор, Наврӯз дар ёздаҳ маҳалла наздик 25 ҳазор нафар сокинон бо меҳнати созанда ва бунёдкорӣ машғуланд. Дар қаламрави ҷамоат ҳафт муассисаи таълимӣ, ду кӯдакистон, беморхонаи ноҳиявӣ, се маркази саломатӣ ва се Хонаи саломатӣ, ду корхонаи саноатӣ, 12 нуқтаи хӯроки умумӣ, 58 нуқтаи савдову хизматрасонӣ мавҷуд аст. Бахши вилоятии Институти илмӣ - истеҳсолии ҷумҳуриявии «Боғпарвар», ки олимони он дар миқёси мамлакат бо ихтирои навъҳои баландсифати зироатҳои кишоварзӣ, аз ҷумла пахта, меваву сабзавот, зироатҳои техникӣ ва дигар маҳсулот шуҳрат доранд, дар ҳудуди ин ҷамоат ҷойгир аст. Ҳамчунин, дар хоҷагии «Ниҳолпарвар» ҳар сол ҳазорон бех ниҳоли дарахтони мевадиҳандаву сояафканро парвариш намуда, ба кишоварзону сокинони диёр ба фурӯш бароварда мешавад.

Имрӯзҳо мардуми меҳнатқарини ҷамоат бо заҳмати бунёдкоронаву созанда ба истиқболи ҷашни азизу табарруки мамлакат - 30 - солагии Истиқлолияти давлатии Ҷумҳурии Тоҷикистон машғуланд.

Тавре раиси ҷамоат Ғайрат Гадойбоев изҳор дошт, дар асоси дастуру ҳидоятҳои Асосгузори сулҳу ваҳдати миллӣ - Пешвои миллат, Президенти мамлакат муҳтарам Эмомалӣ Раҳмон мардуми боору меҳнатқарини ҷамоат корҳои созандагиву бунёдкоронаро баҳри истиқболи сазовори ҷашни фархундаи кишварамон - 30 - солагии Истиқлолияти давлатӣ ба таври густурда ба роҳ мондаанд. Мувофиқи нақшаи чорабиниҳои вилоят ва ноҳия дар ҷамоат ба истиқболи ин ҷашни таърихӣ тибқи қарори раиси ноҳияи Бобоҷон Ғафуров бунёди беш аз 106 иншоот тарҳрезӣ шудааст. Дар соли 2019 бунёди 22 иншоот назардошт шуда, давоми шаш моҳ ҳафт иншоот мавриди баҳрабардорӣ қарор гирифт. Аз ҷумла аз ҳисоби маблағҳои буҷети маҳаллӣ ва аҳолӣ бо маблағи 450 ҳазор сомонӣ кӯчаи ба номи Юнус Зуҳур дар масофаи 2 километр асфалтпӯш шуд. Аз ҷониби соҳибкори маҳаллӣ Дилшод Қодиров бо сарфи 80 ҳазор сомонӣ баҳри беҳтар намудани сатҳи хизматрасонӣ ба мардум мағозаи молҳои талаботи ҳаррӯза ба фаъолият оғоз намуд, бо мақсади ба варзиш ҷалб намудани наврасону ҷавонон соҳибкор Исломҷон Иброҳимов ба маблағи 200 ҳазор сомонӣ дар назди таълимгоҳи рақами 71 варзишгоҳи замонавии хурди футбол бо тамоми шароит сохта ба истифода дод. Дар деҳаҳои Қалъача, Шайхон, Наврӯз аз ҳисоби сокинони деҳаҳо бо маблағи 35 ҳазор сомонӣ ба тариқи ҳашар 5,6 километр роҳ шағалпӯш гардид. Ҳамчунин, бо маблағгузорӣ ва кӯшиши сокинон дар деҳаи Овчӣ ба маблағи 21 ҳазор сомонӣ ба 30 хонадон хатти барқ кашида шуд. Бо дастгирии Корхонаи воҳиди давлатии хоҷагии коммуналӣ ва саҳмгузории аҳолӣ ба маблағи 100 ҳазор сомонӣ хатти оби нӯшокӣ кашида шуда, сад оила бо оби тозаи ошомиданӣ таъмин гашт. Ҷоиз ба зикр аст, ки соҳибкор Раҳимҷон Моликов пасандози бо мақсади зиёрати Хонаи Худо ҷамъкардаи худро баҳри ободонии диёри хеш масраф намуда, ба маблағи 20 ҳазор сомонӣ кӯчаҳои Ҳалим Бобо ва Юнус Зуҳури деҳаи Қалъачаро ба масофаи 2,8 километр чароғон намуд.

Ба қарибӣ соҳибкори маҳаллӣ Ӯктамҷон Шарифов бо маблағи 500 ҳазор сомонӣ дар назди таълимгоҳи рақами 37 - и деҳаи Шайхон варзишгоҳи замонавӣ бунёд карда, ба истифодаи хонандагон супурд. Бояд зикр кард, ки дар мактаби мазкур беш аз 700 нафар таҳсил карда, то ин вақт муҳассилин барои бо варзиш машғул шудан ба маркази ноҳия мерафтанд, ки сарфи зиёди вақт ва, албатта, маблағро тақозо мекард. Бо мавриди истифода қарор гирифтани варзишгоҳ акнун хонандагон имкон пайдо намуданд, бо бозиҳои варзишӣ машғул бошанд.

Ба наздикӣ, дар арафаи таҷлили ҷашни Истиқлолияти давлатӣ бо маблағгузории мақомоти иҷроияи ҳокимияти давлатии ноҳия дар маҳаллаи «Боғпарвар» назди мактаби рақами 41 низ варзишгоҳ ба истифода дода ва бештар аз 500 нафар хонандагони таълимгоҳ соҳиби майдони варзишии худ хоҳанд гашт.

- Дар Паёми навбатии худ Президенти мамлакат солҳои 2019 - 2021-ро «Солҳои рушди деҳот, сайёҳӣ ва ҳунарҳои мардумӣ» эълон намуда, таъкид карданд, ки дар ҳар деҳа бояд кошонаи ҳусн, сартарошхона, ҳаммомхонаи замонавӣ, сехҳои дӯзандагӣ фаъолият барад ва торафт сатҳи зиндагии сокинони деҳот баланд бардошта шавад. Баҳри амалигардонии ин дастуру супориши Сарвари давлат тадбирҳои амалӣ андешида шуда, то имрӯз дар деҳаҳои Қалъача, Шайхон, Овчӣ кошонаи ҳусн, сартарошхона, ҳаммом бунёд ва ба истифода дода шуд. Ин амал идома дорад, - гуфт раиси ҷамоат.

Фаъолияти соҳибкорони маҳаллӣ дар ободонии маҳал, бунёдкориву созандагӣ шоиста буда, дар ин радиф раиси ҷамоат номи соҳибкорони саховатманд Умарҷон Умаров, Ӯктамҷон Шарифов, Амирҷон Ӯлмасов, Дилшод Қодиров, Исломҷон Иброҳимов, Лутфуллохӯҷа Акрамов, Раҳимҷон Моликов ва дигаронро дар пешрафту шукуфоӣ ва ҳалли масоили иҷтимоии аҳолӣ бориз арзёбӣ кард. Воқеан, зикри он далел ҷоиз аст, ки феълан бо қувваи соҳибкор Лутфуллохӯҷа Акрамов дар деҳаи Қалъача бунёди фермаи чорвопарварӣ бо маблағи 400 ҳазор сомонӣ ва таъсиси дувоздаҳ ҷои корӣ идома дорад.

Тавре раиси ҷамоат таъкид намуд, барои беҳтаргардонии шароити зисту зиндагии мардуми деҳот бо иқдомҳои некукоронаи худи сокинон низ иншоот бунёд ёфта истодаанд, ки аксари онҳо инфрасохторӣ мебошанд ва ин иншоот дар нақшаи чорабиниҳои ҷашнӣ ворид нестанд. Чунончӣ дар маҳаллаи Овчӣ истиқоматкунандагони панҷоҳ хонавода маблағ ҷамъ карда, 300 метр ҷӯйбори кӯчаро бетонпӯш намуданд.

- Дар мавзеи иқлимаш мувофиқу мусоид ҷойгир будани ҷамоати деҳоти Овчиқалъача, ба қавле, сарчашмаи иқболу саодати сокинонаш мебошад, - мегӯяд Ғайрат Гадойбоев, - дар ҷойҳои мо нағз нашъунамо кардани мармиҷон (малина) ва тути заминӣ (клубника) ба мардум имкон медиҳад, ки аз паси парвариши ин меваҳо рӯзгорашонро хеле обод кунанд.

Дар бобати муроҷиати шаҳрвандон ҳарф зада, раиси ҷамоат қайд кард, ки мардум асосан бо масоили ҳуҷҷатгузории замин, гирифтани қитъаи замини наздиҳавлигӣ, баҳсҳои оилавӣ, сохтмони манзили истиқоматӣ, таъмири роҳҳои байни маҳаллаҳо, таъминоти оби ошомиданӣ, соҳибкорони маҳаллӣ бо нияти бунёди иншоот ва бо ин мақсад ҷудо кардани замин ва дигар корҳои ободонӣ муроҷиат менамоянд. Тавре аён гашт, давоми шаш моҳи соли равон 55 нафар муроҷиат намуда, аксари масъалаҳои онҳо мусбат ҳал шудааст.

Дар доираи корҳои ободонӣ ва кабудизоркунии маҳал соли равон дар қадди роҳи асосии ҷамоат беш аз 100 бех ниҳоли дарахти сӯзанбарг, ҳамчунин дар деҳаву маҳаллаҳо зиёда аз 1500 бех гули садбарг, 2000 адад қаламчаи сафедор ва намудҳои гуногуни гулҳои ороишӣ шинонида шудааст.

Дар маҷмуъ, ҳарчанд дар қаламрави ҷамоат корҳои ободониву созандагӣ баҳри истиқболи шоистаи ҷашни таърихии мамлакат бомаром ҷараён доранд, баъзе масоиле ҳастанд, ки ҳалли худро тақозо мекунанд. Аз ҷумла, то ҳанӯз дар ҷамоат ба аҳолӣ дастрас набудани оби тозаи ошомиданӣ муаммо боқӣ мемонад. Сокинон оби ҷӯйборро барои нӯшидан низ истифода мебаранд. Гарчи ин масъала дар назар одӣ намояд ҳам, ҳаллу фасли худро металабад, зеро оби тозаи ошомиданӣ сарчашмаи нахустини солимии инсон аст.

Масъалаи дигаре ташвишовар аст, ки бо вуҷуди он, ки солҳои 2019-2021 аз ҷониби Сарвари давлат «Солҳои рушди деҳот, сайёҳӣ ва ҳунарҳои мардумӣ»эълон гардидааст, эътибор ба таъсиси сехҳои атласу адрасбофӣ, дигар ҳунарҳои мардумӣ заиф буда, дар ягона сехи адрасбофӣ бо сабаби тангии ҷо ва сифати номувофиқи ресмон истеҳсоли он ба роҳ монда нашудааст ва кор дар ин самт хеле дар сатҳи паст қарор дорад. Дари бастаи бинои дигареро, ки онро «сехи дӯзандагӣ» муаррифӣ намуданд ва хорҳои дар саҳни он рӯида шаҳодат медиҳанд, ки ин ҷо қадами бонувони ҳунарвар нарасидааст.

Иҷрои дастуру ҳидоятҳои Асосгузори сулҳу ваҳдати миллӣ - Пешвои муаззами миллат, татбиқи нуктаҳои нақшаи тарҳрезишудаи омодагиҳо ба ҷашни фархундаи мамлакат - 30 - солагии Истиқлолияти давлатӣ аз масъулон тақозо менамояд, ки ба ҷараёни корҳои созандагиву бунёдкорӣ суръати нав бахшида шавад, то ки ба ҷашни азизи Ватан армуғонҳои арзанда омода намоем.

Рафоат МӮЪМИНОВА,
Гулҷаҳон МАХКАМОВА,
«Ҳақиқати Суғд»

Читать далее

19 July 2019

Пешвои миллат Эмомалӣ Раҳмон дар сатҳи роҳбарикунандаи сохторҳои низомӣ ва ҳифзи ҳукуқу тартибот тағйироти кадрӣ ба амал оварданд

Имрӯз Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон зимни мулоқот бо кадрҳое, ки ба вазифаҳои сатҳи роҳбарикунандаи сохторҳои низомӣ ва ҳифзи ҳукуқу тартибот таъин гардиданд, иброз доштанд, ки вазъи имрӯзаи ҷомеаи ҷаҳонӣ аз ҳар як хизматчии оддӣ ва роҳбари воҳиду сохторҳои давлативу низомӣ муносибати ҷиддӣ дар доираи оиннома ва дигар санаду меъёрҳои танзимкунандаи фаъолияти соҳа талаб карда мешавад.

Бо фармонҳои Президенти Ҷумҳурии Тоҷикистон муовинони Фармондеҳ, командирони бригада ва қисмҳои алоҳидаи Гвардияи миллии Ҷумҳурии Тоҷикистон, муовини якум ва муовини директори Агентии назорати давлатии молиявӣ ва мубориза бо коррупсияи Ҷумҳурии Тоҷикистон аз ҳисоби хатмкардагони муассисаҳои олии ҳарбии ватанӣ ва ҳориҷӣ таъин гардиданд.

Читать далее

«ШОҲИН - БМТ» - «АРТЕК» ДАР ТОҶИКИСТОН

- Ҳанӯз аз давраи фарорасии таътили тобистонаи мактабиён урдугоҳи мо серодам буд. Аз 1 то 14 - уми июн аллакай хонандагони муассисаҳои таълимии миёнаи Ҷумҳурии Қазоқистон аз имкониятҳои мавҷудаи урдугоҳ бархурдор буданду истироҳати бофароғат мегузарониданд, - иброз дошт муовини директори Ҷамъияти дорои масъулияташ маҳдуди «Шоҳин - БМТ» - и шаҳри Гулистон Умеда Раҳимова.

Боиси қайд аст, ки урдугоҳи «Шоҳин - Бонки Миллии Тоҷикистон» дар як вақт метавонад 700 нафарро бо истироҳат фаро гирифта, бо ҷои хоб таъмин намояд.

Вақте вориди урдугоҳ шудем, аллакай машғулиятҳои амалӣ оғоз ва роҳбарони маҳфил бо наврасону ҷавонон машғули эҷодиёти навбатӣ буданд. Табиати зебою нотакрори соҳили Баҳри тоҷик, дарахтони ҳамешасабзу ороишӣ, пешайвонҳои барҳаво, толорҳои варзишиву истироҳатӣ, маҳфилҳои кулолгариву дӯзандагӣ, рассомиву муҳрабофӣ, рақсу шиноварӣ ба истироҳаткунандагон руҳияи нек бахшида, истироҳати онҳоро бофарғат мегардонад.

Аз 18 маҳфиле, ки дар урдугоҳ амал менамояд, ҳашт маҳфил варзишӣ буда, 3 ҳавзи шиноварӣ бо назардошти синну соли истироҳаткунандагон ҳамарӯза пуроб асту барои обутоб ёфтани кӯдакон хизмат мерасонад.

Алҳол дар урдугоҳ басти сеюм амал менамояд. Агар аз 1 то 14 - уми июн дар урдугоҳ дар баробари мактабиёни Ҷумҳурии Қазоқистон наздик 70 нафар аз вилоят ва 48 наврас аз шаҳри Душанбе истироҳат карда бошанд, дар басти дуюм, ки аз 25 - уми июн то 5 - уми июл давом кард, 510 нафар истироҳткунанда аз имкониятҳои мавҷудаи истироҳатгоҳ бархурдор шуданд. Аз ҷумлаи бо истироҳат фарогирифтагон 85 нафар аз ҳисоби соҳибкори саховатпеша дар урдугоҳ фароғат доштанд. Зиёда аз ин донишомӯзони ташкилоти ҷамъиятии «Эҳё, фарҳанг ва тараққиёт», 80 нафар камбизоату нимятимон, 23 нафар аъзои маркази забономӯзии «Аркон» дар басти дуюм ҳамроҳи мураббиёни соҳибтаҷриба дар фазои сулҳу оромихоҳи кишвар истироҳати бофароғат доштанд. Дар басти сеюм бошад, беш аз 650 нафар қабул шуданд, ки 60 нафар намояндагони ташкилоти ҷамъиятии «Илмхона», 140 нафар аъзои маркази империяи «Дониш», 14 нафар ятими кулл аз шаҳри Гулистон ва 20 нафар кӯдаку навраси Ҷумҳурии бародарии Қирғизистон дар биноҳои хуштарҳи замонавӣ таътили худро хуш мегузаронанд. Истироҳаткунандагон бо панҷ маҳал хӯроки гарм таъмин буда, ҳамарӯза барномаҳои фарҳангию фароғатӣ бо иштироки онҳо ҳусни тоза мегирад. Азбаски урдугоҳ байналмилалӣ асту аз ҷумҳуриҳои Қирғизистону Ӯзбекистон, Украинаву Федератсияи Россия ҷавонону наврасонро ба оғӯш мегирад, бештар бо забони русӣ муошират менамоянду дар омӯзиши забонҳои дигар низ таваҷҷуҳ менамоянд.

Як фарқияти хоси урдугоҳи «Шоҳин - БМТ» аз дигар истироҳатгоҳҳо дар он аст, ки барномаи истироҳатӣ ва ҳам шароити онҳо ба лагери байналхалқии «Артек» - и Қрим бисёр монандӣ дорад. Барномаҳои фарҳангии як бахш, албатта, аз дигараш фарқ дошта, маротибаи дуюм такрор намешавад. Бачаҳо давоми даҳ рӯзи истироҳат дар урдугоҳ бо ҷамъоварии ашёи табиати гирду атроф машғул мешаванду кӯдакони хурдсол ҷобаҷокунии расмҳои омехтаро меомӯзанд. Бозиҳои волейболу футбол, тенниси рӯи миз, сурудхониву рақси милливу хориҷӣ машғулияти дӯстдоштаи кӯдакону наврасон ба ҳисоб меравад.

Мураббиён, роҳбарони маҳфилу сарварони созмон, ки аз ҳисоби донишҷӯёни курсҳои дувуму сеюм тариқи озмун аз рӯи шартҳои дастурамали «Роҳнамои коргар» ғолиб омада, ба кор ҷалб шудаанд, мекӯшанд, ки давраи таътили истироҳаткунандагон хотирмон гузарад. Сарвари созмон Улуғбек Хоҷаев, ки худро охирин хатмкунандаи лагери «Орлёнок» меҳисобад, иброз медорад, ки ҳамаи кӯшиши роҳбарияти урдугоҳ баҳри ҷолиб гузаштани давраи кӯдакию наврасии дар «Шоҳин» - будагон равона шудааст. Ҳамчунин истироҳаткунандагон аз таомҳои лазизи кормандони ошхона Мухтор Дадоҷонов ва Мавлуда Шеронова тановул намуда, ба онҳо аҳсант мехонанд.

Дар толори хурди синамо бошад, ҳафтае чанд маротиба филмҳои гуногун ба намоиш гузошта шуда, китобҳои пурмазмуни китобхонаи урдугоҳро метавонанд ҳаводорони каломи бадеъ мутолиа намоянд.

Сардори урдугоҳ Мадина Дадохонова иброз медорад, ки кормандон тамоми кӯшишу ғайраташонро баҳри хушу хотирмон гузаронидани таътили тобистонаашон равона месозанд.

Шоира САЛИМОВА,
«Ҳақиқати Суғд»

Читать далее

Ҳунари миллии қуроқдӯзӣ

Дар китоби “Фарҳанги забони тоҷикӣ” қуроқ ба маънои чизи аз порчаҳои гуногунранг бо тартиби махсус дӯхташуда маънидод гардидааст. Қуроқ яке аз ҳунарҳои қадимаи мардуми тоҷик буда, аз замонҳои қадим дӯхтани он маъмул мебошад. Дар шаҳри Панҷакент ҳунармандон ба ин касб шавқ доранд. Пораҳои матоъро, ки дорои сифати баланданд, ба ҳам пайваста, барои дастархону кӯрпача, болишту ҷузвдонҳои ороишӣ истифода мебаранд. Чунин амал аз сарфаву сариштакор будани занони тоҷик дарак медиҳад.

Ҳунар инсонро бузургию шаҳомат бахшида, ӯро болидарӯҳ мегар-донад.

Он ганҷинаи пурзар ва ҳунарманд заргари бузургест, ки бо офаридаҳои ҷолибаш мафтунгари дилҳои инсонист. Боиси қаноат- мандист, ки зебоӣ ва ҳунари қуроқдӯзӣ ҳаводорон ва харидорони зиёде дорад, хоса хориҷиён бо як дид шефтаи ин ҳунари воло мегар-данд.

Қуроқдӯзӣ аз матоъпораи гуногун ҳунари баландро талаб мекунад. Агар ҳавасу шавқ бошад, барои ҳунарманд хеле осон аст. Имрӯз замони пешрафти илму техника буда, хонаи арӯсонро бо мебелҳои замонавию қолинҳо оро медиҳанд. Мо набояд фарҳанги миллии худро фаромӯш созем.

Анъанаи густурдани кӯрпача ва дастархони қуроқ зеби хонаи тоҷикон аст ва аз нав эҳё гардидани он суннати фарҳанги мардуми тоҷик ба шумор меравад.

Ҷавонони замони истиқлол дар баробари илмомӯзӣ касберо ҳам бояд интихоб намоянд, ки дар оянда барои пешрафти зиндагӣ кӯмак кунад, он анъанаҳои гузаштаи сарфаву сариштакории занони ҳунармандро аз нав эҳёгар бошанд.

Имрӯз мо - омӯзгорон вазифадор ҳастем, ки дар интихоби касби шогирдон бештар аҳамият диҳем, чунки дар баъзе маврид баъди хатми мактаб ба душвориҳо рӯ ба рӯ мешаванд. Ҷавонон бояд касберо интихоб намоянд, ки шавқманд бошанд ва дар оянда аз онҳо манфиат гиранд.

 Манзура ХОЛОВА,
 омӯзгори МТМУ № 30
 шаҳри Панҷакент

Читать далее

ДАРМОН ОЁ АЗ FИЗОИ СОЛИМ САРЧАШМА НАМЕГИРАД?!

Тавре огоҳем, дар даромадгоҳи Беморхонаи клиникавии вилояти Суғд ба номи С.Қутфиддинов, шаҳри Хуҷанд дӯконҳои фурӯши маҳсулоти ғизоӣ ташкил шудааст, ки аз он дар ҳолати зарурӣ аёдаткунандагон харидорӣ менамоянд. Дар рӯзи гармои фасли тобистон ба аёдати хешовандон рафтему шоҳиди он гардидем, ки тарзи нигаҳдории маҳсулот ва шароити санитарӣ - гигиении он ба талабот мувофиқ нест.

Гармии баланд асар карду барои харидани оби нӯшокӣ вориди мағоза гардидам. Он рӯз тибқи маълумоти обуҳавосанҷон ҳаво аз 40 то 42 дараҷа гармиро нишон медод. Дар мағоза баробари нӯшокиҳои ташнашикан маҳсулоти ширӣ, йогурт, равғани зард, қиёми шир, майонез ва шарбатҳои мевагиро дар рафҳо (на дар яхдон!) гузошта буданд. Магар таркиби маҳсулоти ширӣ дар ҳарорати 40 дараҷа гармӣ вайрон намешавад? Сабаби аз яхдонҳо берун мондани маҳсулоти шириро фурӯшандаҳо дар нарасидани яхдонҳо маънидод намуданд. Бояд гуфт, ки яхдонҳо бо обҳои ташнашикан пур карда шудаанд.

Дар кунҷи дигар тухм зери гармии шадиду ҳавои кушод фурӯхта мешуд. Оё Маркази назорати давлатии санитарию эпидемиологӣ ин ҳамаро зери назорат намегирад? Дар ҳоле, ки ба ин гармои шадид дар яхдонҳо маҳсулоти хӯрока дар ду - се рӯз вайрон шуда истодааст. 

Дар маконе, ки кор аст, камбудӣ низ дида мешавад, вале то дараҷае нест, ки ҳамаро ба ҳоли худ гузорем ва касе хоҳад ба таври худ фаъолият барад.

Дар беморхонаи вилоятӣ аз шаҳру навоҳии вилоят беморон бистарӣ мешаванд ва ба аёдати онҳо хешовандон меоянд, ҳол он ки ин мавзеъро маркази шаҳр меноманд. Масъулинро мебояд сари ин масъала андешанд. Зеро нодида гирифтани камбудӣ ба муаммои рӯз табдил хоҳад ёфт!

Шаҳноза ҲОМИДОВА,
«Ҳақиқати Суғд»

Читать далее

18 July 2019

Ҳар касе гавҳари мақсуд ёбад бо саъй

Деҳаи Унҷӣ дар миқёси кишвар ҳамчун як макони қадимаи имрӯза дар ноҳияи Бобоҷон Ғафуров ҷойгоҳи хосу мавқеи қиёснопазири хешро дошта, ҳамчун чароғи ҳастии сокинон дар роҳи рӯзгор дар чашми аҳли биниш, ҷомеа ва диёри азизамон ба мисоли равзанаест, то медарояд офтоб чеҳранамоӣ кардаасту дорад имрӯз ҳам. Одамонаш меҳнативу созанда, ободгару вусъатманданд.

- Борҳо ба Унҷӣ, бо мақсади дидорбинии хешону наздикони авлодиам рафтаму меравам. Ободӣ, зебоиаш, торафт ҷаззоб шудани симои нави деҳаро дида, бовар мекунед, аз нав ҷавондил мешавам, бахтёр мегардам, - мегӯяд марди шукронапазир, собиқадори меҳнат Оқилбой - саркор, ки имрӯз синнаш аз ҳафтод болост.

- Имрӯз мо аз сулҳу оромиву таҳкими паҳлуҳои зиндагиамон ифтихор менамоем. Дуо мекунам, ки чунин ифтихорро ҳар як фарди солимфикр, ҷавонони саодатманд соҳиб бошанд. Таҳкими ғояҳои давлати миллӣ кӯшишу мароми ҳар сокини кишвар дар нуру сафои сиёсати оқилонаву мардумпарваронаи Пешвои муаззами миллат, Президенти муҳтарам Эмомалӣ Раҳмон бомаром ҷараён дорад, - изҳор менамояд ин марди некниҳод.

- Яъне, миллати тоҷик таҳти сарварии Пешвои муаззами худ бо ифтихор ва ҳадафмандона ба пеш қадамҳои устувор мениҳад, - фикри ӯро тақвият дода мегӯяд Абдуҷаббори муаллим, собиқадори соҳаи маориф аз деҳаи Ғозиёни ҳамин ноҳия, ки навакак аз як чорабинии хотирмоне аз рустои Унҷӣ баргашта омадааст. - Деҳа аҷаб обод, дилрабо ва фараҳафзо гардида, як эҳсоси мутантан маро фаро гирифт. Шояд ин аз дидори одамони маҳбуб, боғи муҳташаму нозанини он бошад, ки пештар чунин саодатмандӣ дар чашму қалбам падид намеомад.

Нияти боздид аз деҳаи Унҷӣ моро сӯяш даъват кард ва мо ба онҷо бовару эътимоду эътиқод бастем. Аз шаҳри Хуҷанд - аз истгоҳи «Панҷшанбе» бо воситаи нақлиёти мусофиркашони «Газел» ба гардишгоҳи деҳа, онро маркази Унҷӣ ҳам мегӯянд, расидем. Ҳавову мавҷи фараҳмандӣ дар ин гӯшаи биҳиштосои Ватанамон маҳзари муҳаббат, саодат ва маҳбубият гардидааст. Дар маҳаллаҳои деҳа ободонӣ, сабзу хуррамгардонӣ самаровар, сафооваранд. Аз муҳаббати мардум ва маҳбубияти ватанпарастона, бунёдкорона ва созандаи Пешвои миллат муҳтарам Эмомалӣ Раҳмон ва иқдомҳои шоистаи Раиси вилоятамон Раҷаббой Аҳмадзода дар як муддати кӯтоҳ чунин мавзеъ, гӯша ва маъвои фирдавсмисол бунёд гардид, дар зери осмони нилгуни диёрамон доман густурда, хиёбоне дар партави нури хуршеди оламтоб падид омад. Ба хотир овардан муҳим аст: дар доираи иқдоми «1300 рӯзи меҳнати зарбдор ба истиқболи ҷашни таърихӣ, санаи бузурги миллӣ – 30 - солагии Истиқлолияти давлатии Ҷумҳурии Тоҷикистон, ҳанӯз бистунӯҳуми майи соли гузашта Раиси вилоятамон Раҷаббой Аҳмадзода ба Ҷамоати деҳоти Унҷӣ ташриф оварда, бобати бунёди як мавзеи тозанамуд - Боғи фарҳангиву фароғатии хоси русто санги асос гузошта, ба сохтмончиёну мутахассисон ва роҳбарияти Ҷамъияти дорои масъулияташ маҳдуди «Барқарор» дастуру супориш дода буд, ки корҳои бунёдсозии боғи фарҳангиву фароғатиро бо дарбаргирии фаввора, майдончаи бозӣ ва машқу тамрин барои кӯдакону наврасон, гулгашту сабзгардонӣ, нишастгоҳҳои истироҳатӣ бо тамоми шароитҳои фароҳам бахшида ба ҷашни навбатии Истиқлолияти давлатии Ҷумҳурии Тоҷикистон бо сифати баланд, ҷавобгӯй ба талаботи замони муосир ба анҷом расонида шаванд.

Хушбахтона, ҳамин тавр ҳам шуд. Боғи фароғативу истироҳатӣ ва фарҳангӣ дар Унҷӣ чун рамзи болидасозии дилу рӯҳи мардум падид омад.

Дидори боғи рустоӣ, замони худшиносӣ ва ҳуввиятбахши миллӣ сокинони таҳҷоӣ, меҳмонон ва дӯстдорони сайру саёҳатро эҳсоси мутантан мебахшад.

Мегӯянд: боғ дар нигоҳу чашм саргарми ҷустуҷӯи зебоӣ, нуру сафову фараҳбахшист. Ин боғ, ки порае аз замини муҳаббату маҳбубияти Ватани соҳибихтиёру шукуфону сарсабз маънӣ пазируфтааст, аз табассуму хандаҳои гулҳо, кӯдакону ҷавонони хуштолеву болидарӯҳи мо саршору лаболаб аст, ҳунармандона бунёд ёфтааст. Ба хонандагону омӯзгорони алалхусус яке аз макотиби муқаддастарини таҳсилоти миёнаи умумии рақами чордаҳи ноҳия он қадар хуҷастагиҳо, он дараҷа зебоиҳо, хушрӯиҳои дилпазире дорад, ки имрӯз яке аз мавзеъҳои писандидаву дӯстдоштаи мардуми Унҷӣ мебошад.

Дар назди даромадгоҳи Боғи фарҳангиву фароғатӣ моро шиноси деринаамон, марди навҷӯву ташаббускор Абдураҳмон Ҳалимов истиқбол гирифт. Ӯ инсонест ҳақиқатгуфтор, ҳамеша дар талоши манфиати мардум ва ҷомеа буда, чун шахси ташаббускор масъули мавзеъҳои Инқилоб, Ҳақиқат, қисман 1 - Май, Сирдарё, Лаби ҳавз, яъне раиси кумитаи маҳалла дар Ҷамоати деҳоти Унҷӣ шинохтаву эътироф гардидааст. Гуфт, ки дар ин минтақаҳои аҳолинишин бештар аз чаҳор ҳазор аҳолӣ иқомат менамоянд. Худи ӯ давоми ҳафт сол инҷониб вазифаи раисии кумитаи маҳалларо бар уҳда дорад, дар иҷрои кору уҳдадорӣ муваффақ аст. Пайваста аз корҳои бобарори ободонӣ ва созандагӣ дар масири сулҳу суботи кишвар, сиёсати хирадмандонаи Пешвои миллат, Президенти маҳбубамон, ташаббусҳои созандаи Раиси вилоятамон, шукронаи замон, таҳаммулпазирии одамон, тарбияи ахлоқи ҳамида дар вуҷуди ҷавонон сухан мегӯяд, фикрҳои худро иброз медорад.

Бо хурсандӣ ва дилгармии хоси худ гуфт: - Ҳамон вақт баробари ба бунёди ин боғ санги асос гузоштан, Раиси вилоятамон Раҷаббой Аҳмадзода инчунин ба мумфаршкунии кӯчаи 1 - Май ҳусни оғоз бахшида, бо ҳамин дар Унҷӣ тадбирҳои ободонӣ ҷараёни тоза гирифта буд. Имрӯз ҳама бо ақли солим эҳсос менамоем, ки бо дастуру ҳидоятҳои Пешвои миллат, Президенти азизамон барои беҳдошти шарту шароити зисту зиндагонии мардум то ҷашни сисолагии Истиқлолияти давлатӣ - ин неъмати миллӣ, башорати саодатмандӣ давоми се сол дар ҳамаи ҷамоатҳои шаҳраку деҳоти шаҳрҳо, ноҳияҳои вилоят коргоҳҳои дӯзандагӣ дар масири рушди сайёҳӣ, ҳунарҳои мардумӣ, майдончаҳои варзишӣ, қасрҳои фарҳангӣ, бунгоҳҳои тиббӣ, кошонаи ҳусн, ҳаммом, сартарошхона, боғҳои фарҳангиву фароғатӣ бо тарҳу услуби хоси замони муосир бунёд кардаву ба истифодаи умум дода мешаванд. Аз ин тадбирҳои ҷадид Ҷамоати деҳоти Унҷӣ ҳам шарафёбу баҳраманд мебошад, ки завқи хоса ба самар овардааст. Муҳити рӯзгор хуҷастагиҳо, шукуфоиҳои нурбор дорад, - самимона ҳарф мегӯяд ин собиқадори меҳнат.

Чанд соли пешро ба хотир меорад Абдураҳмон Ҳалимов: - вақте маро ба вазифаи раиси кумитаи маҳаллаҳо таъин намуданд, кӯчаҳои Инқилобу Ҳақиқат ва 1 - Май аз соли дуҳазору чордаҳум шаш километр мумфарш карда шуданд. Халқ як ифодаи раҳнамоӣ дорад - «Шунидан кай бувад, монанди дидан». Биёед, аз рӯи ин гуфтор амал менамоем, - гӯён моро барои дидани паҳлуҳои ободкорӣ таклиф кард. Агар ташаббус ва иқдомот самар оварад, ин башорати осудаҳолисту ободии рӯзгор аст.

Абдураҳмон Ҳалимов чунин ташаббускору роҳбалади мардум барои амалҳои нек, корҳои пурманфиат аст. Баробари қавитар гардонидани алоқаву муносибати мардум бо мақомоти маҳаллии ҳокимияти давлатӣ, ба ҳалли мушкилоти ҳаёти деҳот саҳм мегирад. Ҳамин тавр, бо ҷонибдории сохторҳои марбута ва иқдомоти мардум дар маҳалла барои чароғон намудани мавзеъ, роҳу манзилҳои аҳолӣ се трансформатори баландшиддати пурқувват насб шудааст, ки ба яксаду бист хоҷагӣ хизмат мерасонад. Беш аз ду километр кӯчаву тангкӯчаҳо шағалпӯш шуданд. Аҳолии маҳаллаҳои Ҳақиқат, 1 - Май, Инқилоб, Сирдарё ва Лаби ҳавз пурра бо оби нӯшокӣ таъмин гардиданд, ки ҳама болидахотиранд. Рақамҳои ҳавлии мардум бо навъу талабот ба шароити имрӯз мутобиқ иваз шуданд, ки ин нишони хуби маҳалладорӣ низ ҳаст. Амали хайру савоб ҷараён дорад: барои беморони гирифтори сактаи мағзи сар дар маҳалла ду аробачаи маъюбӣ ройгон хизмат мерасонад. Ҳалли масъаларо Абдураҳмон Ҳалимов саривақт ёфт: бинои масҷидҳои фаъолияташ бозмондаро бо мақсади неку пурманфиат истифода бурд - сехҳои либосдӯзӣ, атласбофӣ, кошонаи ҳусн созмон дод, ки айни ҳол занону духтарони ҳунарманди маҳалла кор мекунанд, касб меомӯзанд, ҳунарашонро сайқал медиҳанд. Ҳоло дар маҳаллаҳо як идораи кумитаи маҳалла бо шароити хубу замонавӣ фаъолият мебарад, маҷлисгоҳу нуқтаҳои коргузорӣ, беш аз шаст ҷои нишаст дорад.

- Соли дуҳазору чордаҳум дар маҳалла чойхона, мағозаи хӯрокворӣ сохта шуда, имрӯз талаботи мардумро қонеъ мегардонанд. Тадбирҳои тарбиявӣ, тарғибу ташвиқи дастовардҳои даврони соҳибистиқлолӣ, танзими анъана, ҷашну маросим, корҳои фаҳмондадиҳӣ хуб ба роҳ монда шудааст, - зикр намуд А.Ҳалимов. - Бо сардории раиси занҳои маҳалла Турсуной Ҳасанова моҳе як маротиба бо оилаҳои ҷавону бонувони калонсол вохӯриву мулоқот ташкил карда мешавад. Маҳалла обод бошад, мардум шоданд. Ҳар узви он барои тозаву аз партовҳо озод кардани ҷӯйборҳову кӯчаҳо, маҳалли зист кӯшишу азм дорад. Ин нишони завқи зиндагонии ҳар сокини маҳалла таҷассуми зебоипарастӣ ва табиатдӯстист.

Рӯ овардан ба шукуфоиву сарсабзӣ, ободӣ ва хуррамӣ, рушди маҳалли зист - деҳоти худ хурду калонсоли рустои Унҷиро нерӯи рӯҳониву бовар бахшида, завқашонро бо амалашон решапайванд мегардонад. Рӯзона ва бегоҳ боғи Унҷӣ ҳамеша серодам аст ва иншооти он ба рушди сайёҳӣ, пешрафти деҳот мусоидат менамояд. Мавриди ҷолиби дигар ин аст, ки ҷозибаи ташаббусҳо, иқдомҳо ва кору пайкор дар тифоқу сарҷамъӣ, шукргузорӣ ва эҳсоси ватандорӣ баландтар нерӯ мепазирад.

Файзулло АТОХОҶАЕВ,
Муқими АЛИШЕХЗОД,
Рӯзноманигорон

Читать далее