July 2019

03 July 2019

МУТАХАССИСОНИ САТҲИ ҶАҲОНИРО ОМОДА СОЗЕМ!

Ҷумҳурии Тоҷикистон имрӯз аз лиҳози вазъи иқтисодиву иҷтимоӣ миёни кишварҳои даҳгонаи рӯ ба рушд қарордошта талош мекунад, то баҳри расидан ба ҳадафҳо аз барномаҳои гуногуни созмонҳои байналмилалӣ самаранок истифода барад. Дар шароити глобализатсияи ҷаҳонӣ зарур аст, чун ҷузъи субъектҳои байналмилалӣ ба меъёрҳои омодасозии мутахассисон низ таваҷҷуҳи бештаре зоҳир шавад.

Чанд муддат мешавад, ки Барномаи Иттиҳоди Аврупо – «Гоп» дар доираи омода намудани омӯзгорони соҳибтахассус баҳри беҳтар кардани фаъолияти омӯзишгоҳҳои касбиву техникии мамлакат дар Раёсати Хадамоти назорати давлатӣ дар соҳаи меҳнат, муҳоҷират ва шуғли аҳолӣ дар вилояти Суғд амал менамояд ва дар ҳар манотиқи кишвар семинарҳо бо ширкати мутахассисони мактабҳои касбомӯзии коргарӣ баргузор мегардад.

Пешвои миллат муҳтарам Эмомалӣ Раҳмон ҳамеша дар вохӯриву мулоқоти хеш дар иртибот ба рушди иқтисодиёти кишвар таъкид бар он доранд, ки барои пешрафти соҳоти хоҷагии халқи мамлакат бояд мутахассисони сатҳи дараҷаи баланди мутобиқ ба талаботи меъёрҳои байналмилалиро омода созем. Дар ин самт омӯзишгоҳҳову литсейҳои касбӣ-техникӣ, коллеҷҳо, марказҳои касбтайёркунӣ ҳамеша фаъол ва бояд малакаву таҷрибаи устодон дар сатҳи баланд қарор дошта бошад.

Хайрулло Нурматов – директори литсейи касбии хизматрасонии шаҳри Хуҷанд дар суҳбат қайд намуд, ки Барномаи сатҳи байналмилалии «Гоп» бо баргузории чорабиниҳои худ воқеан ҳам баҳри дар сатҳи баланди ҷавобгӯй ба бозори байналхалқии меҳнат омода кардани мутахассисон мусоидат мекунад. Шахсан камина дар чандин семинару тренингҳо ширкат варзида, баҳри рушди таҳсилоти касбӣ барои худ чизҳои заруриро гирифтам. Дар литсейи касбии мо наздик 500 нафар ҷавон аз рӯи 8 ихтисоси ҷавобгӯй ба талаботи бозор, аз ҷумла, челонгари нақлиёт, устои барқӣ, ошпаз, қаннод касб омӯхта, дар минтақаҳои гуногуни мамлакат ва кишварҳои хориҷи дуру наздик муваффақона фаъолият доранд. Имсол ҳам теъдоди хоҳишмандон бамаротиб афзудааст, ки ин аз самари доиршавии чунин семинару тренингҳо ва саҳми Барномаи «Гоп» аст. Дар оянда низ бояд тамоми тадбирҳоро роҳандозӣ кард, ки мутахассисони мо ба бозори меҳнат комилан ҷавобгӯй бошанд.

Табиист, ки яке аз омилҳои муҳими баробар қадам задан бо коллеҷу литсейҳои сатҳи баланди ҷаҳонӣ ин қабл аз ҳама, иштирок дар семинару машваратҳои минтақавию байналмилалӣ ва тренингҳо маҳсуб меёбанд.

Аҳрорхон Сармисоқов – директори касбии саноатӣ - кишоварзии шаҳри Конибодом чунин баён дошт:

–Арзи вуҷуд кардани лоиҳаи мазкур пешравӣ барои фаъолияти босамар дар иртибот ба тайёр кардани касбҳои коргарии ҷавобгӯй ба бозори меҳнат аст. Он касбҳое, ки дар литсейи саноатӣ - кишоварзии Конибодом номнавис шудаанду аз рӯйи онҳо ҷавонон аз ҳамаи манотиқи кишвар таълим мегиранд, куллан ҷавобгӯй ба сиёсати Ҳукумати мамлакат оид ба саноатикунонии босуръат маҳсуб меёбанд. Чун сухан аз бозори меҳнат рафт, зикр бояд кард, ки ҳоло хатмкунандагони литсей дар худи Тоҷикистон, Ҷумҳуриҳои Қазоқистон, Россия шуғли хуби доимӣ доранд.

Лоиҳаи мазкур феълан дар шаҳру навоҳии кишвар бомуваффақият татбиқ ёфта, аз рӯйдодҳои муҳим дар соҳаи таҳсилоти ибтидоии касбӣ ва таълими калонсолон эътироф мешавад.

Гулҷаҳон Турсунзода,
«Ҳақиқати Суғд»

Читать далее

Понғоз мегӯяд бо сӯзу гудоз?!

Ҷамоати 31 ҳазорнафара ҳаммом надорад!

Имрӯз дар қаламрави кишвари азизамон баҳри сазовор пешвоз гирифтани ҷашни 30 - солагии Истиқлолияти давлатии Ҷумҳурии Тоҷикистон корҳои созандагиву бунёдкорӣ ва ободонӣ вусъати тоза гирифтааст. Бо мақсади огоҳӣ пайдо намудан аз рафти корҳои ободонию созандагӣ ба ноҳияи Ашт сафар намуда, хостем аз ҳолати кунунии клубу китобхона, ҳаммому сартарошхона ва бунгоҳҳои тиббӣ аз наздик ошно гардем.

Як рӯз пеш аз сафар тариқи телефон бо раиси Ҷамоати деҳоти Понғоз Бахтиёр Турсунзода ҳамсуҳбат шуда, мақсади сафарро фаҳмонидем. Вақте ба ноҳия омадем, сараввал хостем аз рафти корҳои созандагии ҷамоат ошно гардида, бо раиси он ҳамсуҳбат шавем, вале ӯро дар ҷойи кораш дарёфт карда натавонистем. Сониян, мақсади омадани худро ба муовини раиси ҷамоат Назира Бегматова фаҳмонидем. Номбурда гуфт, ки раиси ҷамоат ҳамроҳи раиси ноҳия аз кадом хоҷагии ҷамоат боздид дораду омада наметавонад.

Сипас, аз ӯ хостем бобати ба анҷом расонидани корҳои созандагиву бунёдкории иншооти ҷашнӣ, аз қабили ҳаммому сартарошхона, кошонаи ҳусну бунгоҳҳои тиббӣ, ки дар ҷамоат сохта мешаванд, маълумот гирем. Мавсуф гуфт, ки Ҷамоати деҳоти Понғоз дорои 31 ҳазор аҳолӣ буда, вале то имрӯз дар ҷамоат ягон ҳаммом вуҷуд надорад. Оиди сартарошхонаву мағоза ва кошонаи ҳусн бошад, дар деҳаҳо корҳои сохтмонӣ идома доранд.

Хостем яке аз китобхонаи ҷамоатро дидан намоем, вале бинобар маҳкам будани дар мо даромада натавонистем. Муовин бо узрхоҳии зиёд моро ба китобхонаи бахши 7 - уми воқеъ дар деҳаи Бободархон даъват кард. Аллакай аз даромад аён буд, ки китобхона дар кадом ҳолат қарор дорад. Даричаи хурдакаки кӯҳнашудаи фарсудаву деворҳои афтида, фаршу шифти таъмирталаб, мизу курсиҳои кӯҳна ва тирезаи ба чангу хок оғӯштаи дохили китобхонаро гӯё равшанӣ медод.

Гӯё китобхона неву анборчаи хурдакаке бошад. Хостем чароғро гирон намоем, вале бо сабабҳои номаълум нерӯи барқ низ равшан нашуд. Ҳолати китобҳо нигаронкунанда буданд, зеро аксар кӯҳнаву фарсуда ва бо забонҳои гуногун буданд.

Китобхона маконест, ки ҳар хонанда ва шахси китобдӯст омада, дар он ҷо китобҳои бадеӣ, рӯзномаву маҷалла мутолиа мекунад. Аксар вақт китоби лозимаро гирифта, ба хона мебаранд, то онро ба пуррагӣ хонда, аз худ намоянд. Вале дар китобхонаи мазкур на миз буду на курсӣ, пас хонандаи китоб дар куҷо бояд бо мутолиа машғул гардад? Ба ин суол мудири китобхона посухе ёфта натавонист, танҳо сар ҷунбониду халос!

Дар паҳлӯи бинои кӯҳнаи китобхона бо ҳарфҳои калон «Клуби деҳаи Бободархон» навишта шуда буд. Вақте вориди он гаштем, ҳуш аз сарамон парид. Он макон ба клуб монандие надошт, зеро таъмирталаб, ҳатто садамавӣ буд! Курсиҳои вайронаву шикаста, деворҳои кафидаву афтида ва тирезаҳои бо тунукаву тахта пӯшидашуда моро интизор буд. Вақте сар боло кардем, дидем, ки шифт ба афтодан наздик аст.

Директори клуб аз он изҳори нигаронӣ кард, ки барои таъмири он ягон маротиба маблағ ҷудо намешавад. Аз ҳисоби маоши худам каме ҳам бошад, таъмир карда истодаам.

- Имрӯз барои таъмиру ободонии ин макон касе маро дастгирӣ намекунад. Соҳибкоронро барои таъмиру азнавсозӣ ҷалб кардан лозим аст.

Суоле ба миён меояд, ки магар масъулон нисбат ба ҷойҳои фарҳангӣ, алалхусус клубу китобхонаҳо беаҳамиятанд? Чаро имрӯз китобхонаву клуб ба чунин ҳолат расидаанд? Ин суолест, ки масъулин бояд ба он ҷавоб диҳанд!

Шаҳбону ОЛИМОВА,
Нодир ТУРСУНЗОДА,
«Ҳақиқати Суғд»
Хуҷанд – Ашт – Хуҷанд

Читать далее

Об манбаи ҳает

Дар шароити тағйирёбии иқлим, ки масъалаи ҳифзи манбаъҳо ва захираҳои оби тозаи ошомиданӣ ба яке аз мушкилоти асосии мардуми сайёра табдил ёфтааст, Тоҷикистон дар ин самт ҳамчун кишвари ташаббускор ва пешсаф дар арсаи ҷаҳонӣ эътироф гардидааст.

Эмомалӣ Раҳмон

Бо ташаббуси Асосгузори сулҳу ваҳдати миллӣ – Пешвои миллат, Президенти мамлакат муҳтарам Эмомалӣ Раҳмон Даҳсолаи байналмилалии амал “Об – барои рушди устувор, солҳои 2018 - 2028” эълон гардид.

Ва дар пайравӣ ба ин пешниҳод, инчунин ба муносибати солҳои 2019 - 2021 “Солҳои рушди деҳот, сайёҳӣ ва ҳунарҳои мардумӣ” дар аксар маҳаллаҳои Ҷамоати деҳоти Хистеварзи ноҳияи Бобоҷон Ғафуров муаммои дастрасии оби ошомиданӣ ҳалли худро ёфта истодааст. Ба сабаби мавҷудияти мушкилоти дастрасии оби ошомиданӣ дар назди ҳар як хонавода ҳавз сохта шуда, аз Ҷамоати деҳоти Овчиқалъача об харидорӣ ва бо нақлиёт оварда мешуд. Яъне ҳар як оила дар ҳавлии худ ҳавзи худсохтро дар ҳаҷми гуногун омода кардааст ва дар он моҳе як ё ду маротиба оби нӯшиданиро захира менамояд. Ҳоло бошад, дар натиҷаи андешидани тадбирҳои мушаххас дар баъзе маҳаллаҳо аз лӯлаҳо оби нӯшиданӣ ҷорист.

Тибқи Барномаи Даҳсолаи байналмилалии амал “Об – барои рушди устувор, солҳои 2018 - 2028” барои беҳтар намудани вазъи дастрасии аҳолӣ бо оби тозаи нӯшиданӣ бо ҷонибдории мақомоти иҷроияи ҳокимияти давлатии ноҳия барои сохтмони хатти асосии об 3000 метр лӯлаи пластмасии қутраш 90 мм. дастрас гардид.

Ба ифтихори 30 - солагии Истиқлолияти давлатии Ҷумҳурии Тоҷикистон 1300 рӯзи меҳнати зарбдор бо дастгирии мақомотҳои иҷроияи ҳокимияти давлатии вилояту ноҳия ва бо ёрии соҳибкорону аҳолии деҳот аксар сокинони маҳаллаҳо бо оби нӯшиданӣ таъмин шуда истодаанд.

Ба пешвози ин ҷашни таърихӣ соли 2018 - ум дар маҳаллаи Баҳористон сохтмони хатти оби нӯшиданӣ дар масофаи 15 километр ба итмом расида, мушкилоти 320 хоҷагӣ ҳал гардид, ки дар 40 фоизи маблағи он аҳолӣ саҳмгузор шудааст.

Умуман, дар ободонии деҳот саҳми аҳолӣ хеле назаррас мебошад. Соли сипарӣ дар сохтмони хатти оби нӯшокӣ дар масофаи 1000 метр дар маҳаллаи Дӯстӣ ва дар таъмири 30 чоҳи амудӣ сокинон ба ҳар кадоме бист фоизӣ ҳиссагузорӣ намуданд. Аз ҳисоби хоҷагиҳои деҳқонӣ бошад, соли сипарӣ 18 километр заҳбуру заҳкашҳои ҳудуди деҳа тоза карда шуд. Сохтмони чоҳи амудии маҳаллаи Баҳористон бо дастгирии фонди Оғохон ва Ҷамъияти иштирокчиёни ҷанги Афғонистон анҷом пазируфт.

Бо мақсади амалигардонии “Барномаи рушди Ҷамоати деҳоти Хистеварз барои солҳои 2016 - 2020” соли равон сохтмону барқарорсозии зиёда аз 40 номгӯй иншоот вобаста ба соҳаҳои инфрасохторӣ, таъминоти аҳолӣ бо оби нӯшиданӣ, полезӣ, ободонии роҳҳо ва ғайраҳо ба нақша гирифта шудааст. То ин дам беш аз 20 километр заҳбуру заҳкашҳо, зиёда аз 10 километр Канали Фарғона, ки аз ҳудуди деҳа мегузарад, 18 километр ҷӯйбори байнихоҷагиҳо ва 1300 метр ҷӯйбори бетонии байнихоҷагиҳо пурра таъмир ва тоза карда шуд, ки дар ин саҳми хоҷагиҳои деҳқонӣ ва аҳолӣ хеле назаррас мебошад.

Чанде пеш мақомоти иҷроияи ҳокимияти давлатии ноҳия барои бо оби нӯшиданӣ таъмин намудани аҳолии маҳаллаҳои Чинор, Ҷавғал ва Фрунзе 2500 метр лӯлаи пластмассӣ ҷудо кард ва алҳол корҳо дар ин самт идома доранд.

Метавон гуфт, дар деҳаи Хистеварзи ноҳияи Бобоҷон Ғафуров баҳри сазовор пешвоз гирифтани 30 - солагии Истиқлолияти давлатии Ҷумҳурии Тоҷикистон омодагии хуб дида, дар рушду нумӯи деҳот саҳми арзанда мегузоранд.

Тавҳида ҶӮРАЕВА,
“Ҳақиқати Суғд”

Читать далее

02 July 2019

СОКИНОНИ БИНО КАЙ БО ОБИ НӮШОКӢ ТАЪМИН МЕГАРДАНД?!

Ҳолати «Барномаи беҳтар намудани таъминоти аҳолии Ҷумҳурии Тоҷикистон бо оби тозаи нӯшокӣ барои солҳои 2007 - 2020» дар ноҳияи Шаҳристон

Оби нӯшокӣ яке аз сарчашмаҳои асосии ҳаёт мебошад. Тоҷикистон аз ин неъмати бебаҳои табиӣ бой бошад ҳам, мутаассифона, он на ба ҳама дастрас аст. Дар ноҳияи Шаҳристон маҳаллаҳо ва деҳаҳое мавҷуданд, ки аз норасоии оби ошомиданӣ танқисӣ доранд.

ҳангоми сафари хизматӣ ба ин ноҳия аз мушкилоти мавҷудаи сокинони як бинои баландошёна, ки тайи чанд сол муаммои оби тозаи ошомиданӣ онҳоро ба ташвиш овардаву ҳеҷ ҳаллашро наёфтааст, дидан намудем. Бароямон аён гардид, ки бошандагони ошёнаҳои 3 ва 4 – уми бино аз набудани оби нӯшокӣ танқисӣ мекашанд. Дар суҳбат сокинон ибрози андеша намуданд, ки обро аз поёни бино ба хонаҳои худ мекашонанд. Аз танқисии об сокинон маҷбуранд, ки захираи ҳафтаинаи худро нигоҳ доранд. Ин дар ҳолест, ки дар сурати захира накардан маҷбуранд давоми рӯз чанд маротиба аз поёни бино ба ошёнаи чорум зарфи пур аз обро бо мушкилии зиёд кашонанд.

Бино ба иттилои масъулини Корхонаи давлатии фаръии обтаъминкунӣ ва канализатсияи ноҳияи бинои чорошёна дар мувозинаи Муассисаи давлатии таълимии литсейи касбии саноатӣ - кишоварзии ноҳия буда, он соли 1997 сохта шуда, дорои 32 ҳуҷраи истиқоматӣ мебошад. Бояд гуфт, ки бино дар ду соли аввали фаъолияташ пурра бо оби ошомиданӣ таъмин буд. Баъди аз кор мондани чоҳҳои амудӣ соли 2000 - ум таъминоти оби нӯшокӣ тағйир ёфта, ба тариқи худҷорӣ хатти об васл гардида, он аз масофаи 10 километр тариқи лӯлаҳои қутрашон 260 – 215 мм. аз чашмаи Шаҳристонсой ба маркази ноҳия оварда шудааст.

Бобати вазъи таъминоти оби нӯшокӣ ва муаммоҳои соҳа бо чанде аз сокинони бино ҳамсуҳбат гардидем.

- Солҳои зиёд аст, ки дар бинои баландошёнаи маҳаллаи мо, бинобар фарсудашавии қубурҳо об намеояд. Хурду бузурги маҳалла обро ба ошёнаҳои болоӣ аз поён мекашонанд. Борҳо масъулин ваъда доданд, ки ин муамморо ҳал хоҳанд кард, вале афсӯс, мушкилоти мо ҳалли худро наёфта истодааст, намедонем ба куҷо муроҷиат намоем, - иброз медорад яке аз сокинони кӯҳансоли ин бино.

Бино ба гуфти Назар Турсунов, истиқоматкунандаи ошёнаи чоруми бинои мазкур ин муаммо бошандагонро ҳанӯз аз соли 2005 ба ташвиш овардааст. Чанд сол пеш дар наздикии бино хонаҳои истиқоматӣ мавҷуд набуд. Бо мурури замон дар ин ҷо корхонаву ташкилот ва хонаҳои истиқоматӣ бунёд ва боиси сар задани муаммои мавҷуда гардид. Банда, ки аз соли 1997 дар ин макон иқомат дорам, ҳамарӯза ҳамроҳи фарзандон то ошёнаи 4 - ум об мекашонем, то эҳтиёҷоти худро қонеъ гардонем.

Мо - бошандагони бино чандин маротиба ба масъулини сохторҳои марбута, аз ҷумла идораи оби ноҳия муроҷиат намудем, ки мушкиламонро ҳал намоянд. Аммо аз чӣ сабаб бошад, ин муаммо то имрӯз ҳалли худро наёфтааст, - гуфт мавсуф.

Бино ба иттилои масъулини соҳа масъалаи таъминоти оби ноҳия солҳои пеш ба зиммаи хоҷагии манзилию коммуналии маҳал шомил буд. Аз соли 2017 барои беҳтар намудани хизматрасонии сокинон ба оби ошомиданӣ дар ноҳия Корхонаи давлатии фаръии обтаъминкунӣ ва канализатсия таъсис ёфт, ки ин муаммо ба зиммаи онҳо вогузор гардид.

Бояд зикр кард, ки сокинон бештар оби нӯшокиро аз нуқтаи марказӣ ва чашмаҳо истифода мебаранд. Новобаста аз он, ки баҳри аз байн бардоштани мушкилоти мавҷуда мақомоти иҷроияи ҳокимияти давлатии ноҳияи Шаҳристон кӯшиш ба харҷ медиҳад, мутаассифона, баъзе мушкилот то ҳол ҳалли худро наёфтааст.

Қайд кардан зарур аст, ки мувофиқи «Барномаи беҳтар намудани таъминоти аҳолии Ҷумҳурии Тоҷикистон бо оби тозаи нӯшокӣ барои солҳои 2007 - 2020», ки бо Қарори Ҳукумати Ҷумҳурии Тоҷикистон № 514 аз 2 - юми декабри соли 2006 тасдиқ шудааст, аз ҷониби Корхонаи фаръии давлатии обтаъминкунӣ танзими мунтазами сокинон бо оби тозаи нӯшокӣ бояд ба роҳ монда шавад.

Исмоил Абдураҳмонов - роҳбари Корхонаи давлатии фаръии обтаъминкунӣ ва канализатсияи ноҳия дар суҳбат иброз намуд, ки имрӯз истеъмолкунандагони оби нушокӣ, ки аз ҷониби ин идора таъмин карда мешавад, 10 ҳазор нафар сокини худи шаҳраки Шаҳристон ва деҳаҳои Турсунзодаву Ваҳдат 15 фоизро ташкил медиҳад. Боқимонда 85 фоизи дигари аҳолӣ аз хатҳои оби нӯшокии дар мувозинаи кооперативҳои истеҳсолӣ ва ташкилоти ҷамъиятӣ буда истифода мебаранд.

Дар асоси барномаи барқарорсозии таъминоти оби нӯшокӣ, ки аз тарафи Бонки аврупоии таҷдид ва рушд рафта истодааст, маблағи умумӣ 3,8 миллион доллари амрикоиро ташкил медиҳад. Алҳол 1,7 миллион доллари амрикоӣ ҷудо гардида, аз он ба маблағи 12 миллион сомонӣ корҳои сохтмонӣ ба итмом расидааст. Ҳамчунин, ду марҳалаи дигар ба тендери умумиҷумҳуриявӣ пешниҳод гардида, дар муҳлатҳои наздик сохтмонаш идома меёбад.

Дар маркази ноҳия мувофиқи нақша 50, 1 км. қубур хобонида мешавад. То ин дам 43, 3 км. қубур ва ҷӯйборҳои бетонӣ хобонида шуда, дар ин самт корҳо низ босуръат идома дорад. Дар сурати ба иҷро расидани корҳои сохтмонӣ дар маркази ноҳия таъминоти оби нӯшокӣ пурра ҳалли худро меёбад. Ин армуғони хубе ба истиқболи ҷашни 30 – солагии Истиқлолияти давлатии Ҷумҳурии Тоҷикистон ба сокинони ноҳияи Шаҳристон хоҳад шуд.

 Нодир ТУРСУНЗОДА,

Истамҷони НАҶМИДДИН,

«Ҳақиқати Суғд»

Хуҷанд - Шаҳристон – Хуҷанд

Читать далее

“Девон”-и Алишери Навоӣ

Дар фонди Осорхонаи таърихии вилояти Суғд зиёда аз 370 адад китобҳои нодир, ки ба давраи мухталифи таърихи халқи тоҷик  тааллуқ дорад, ҷамъоварӣ ва харидорӣшудааст. Дар радифи ин китобҳои нодир “Девон”-и Алишери Навоӣ мавҷуд аст. Навъи хат настаълиқ буда, яке аз дастхатҳои қадим ба ҳисоб меравад. Китоб аз 238 саҳифа, 119 варақ ва дар як варақ 10 сатр китобат шудааст. Нусхаи мазкур комил ва аз нигоҳи коғазшиносӣ арзиши баланд дорад ва гумони ғолиб бар он аст, ки нусхаи муаррифишаванда аз нусхаҳои беҳтарин ба шумор меравад.

Лозим ба ёдоварист, ки Алишери Навоӣ аз зумраи шоирони забардаст буда, инчунин шогирди Абдураҳмони Ҷомӣ мебошад ва дар таърихи адабиёти тоҷику ӯзбек нақши муассир дорад. Ӯ бо ғазалҳои нобу ошиқонааш дар асри хеш ва пас аз он саҳми назаррасеро соҳиб гаштааст.

Мавҷуда БОЙМАТОВА,
корманди илмии шуъбаи дастхатҳо ва
табъу нашри МД МФТ “Қалъаи Хуҷанд”

Читать далее

ОСИЁ - ХОНАИ УМУМИИ МО!

Дар ҳошияи Ҳамоиши панҷуми Машварати ҳамкорӣ ва тадбирҳои боварӣ дар Осиё

Мақсад ва ҳадафҳои Саммит

Барҳақ, Тоҷикистони азизи мо солҳои охир таҳти сарварии Пешвои муаззами миллат, Президенти мамлакат муҳтарам Эмомалӣ Раҳмон ба яке аз кишварҳои рушдёфта мубаддал гардида, дар арсаи ҷаҳон бо иқдомҳои беназири башардӯстона торафт соҳиби нуфузу эътибори баланд мегардад. Чандин ҳамоиш ва чорабиниҳои бонуфузи байналмилалӣ, ки тайи солҳои охир дар пойтахти кишварамон баргузор гардиданд, аз ҷониби ҷомеаи ҷаҳонӣ арзишманду муассир арзёбӣ гардида, боиси афзудани обрӯи меҳани азизи мо дар сатҳи байналмилалӣ гардид.

 Ҳамоише, ки санаҳои 14 - 15 - уми июни соли равон дар пойтахти мамлакати Тоҷикистон - шаҳри Душанбе доир гардид, бо шукӯҳу шаҳомат, фарогирии Сарони кишварҳои минтақа, сатҳи баланди омодагӣ ва ҳадафҳои худ нуфузу эътибори Тоҷикистонро бамаротиб боло кард.

Натиҷаҳои ин Саммит – Ҳамоиши панҷуми Машварати ҳамкорӣ ва тадбирҳои боварӣ дар Осиё бо муҳимии баргузории худ дар ҳавзаи Осиё то имрӯз дар сархати васоити ахбори оммаи мамолики ҷаҳон қарор дорад. Зеро Ҳамоиши панҷуми Машварат, ки Тоҷикистон садоратии онро давоми чаҳор соли минбаъда ба дӯш дорад, аввалан дар сатҳи беандоза баланди ташкилӣ, пазироии гарму самимӣ ва омодагии пухтаву ҳамаҷониба баргузор гардида бошад, аз ҷониби дигар байни кишварҳои аъзо як муҳити созгор ва ҳамдигарфаҳмиро ба миён овард. Машварати ҳамкорӣ ва тадбирҳои боварӣ дар Осиё бо фарогирӣ ва баҳамории мамлакатҳои қитъа, фарогирии сокинон аз созмонҳои бонуфузтарин ва муҳимтарин дар минтақа аст. Чунонки дар Машварат аз ҷониби Сарони давлатҳои аъзо зикр гардид, қариб аксари захираҳои боигариҳои ҷаҳон дар қитъаи Осиё ҷойгир аст. Аз ҷумла захираҳои табиӣ, боигариҳои рӯизаминӣ ва зеризаминӣ, захираҳои об, тилло, уран, сурб, ки дар дигар ягон минтақаи олам нест. Ҳамчунин захираҳои қувваҳои арзонтарини корӣ низ дар қитъаи Осиё ва Осиёи Марказӣ мавҷуд аст. Аз ҳамин лиҳоз аст, ки ин қитъа доимо таҳти назари давлатҳои абарқудрат қарор дорад ва тавре дар Ҳамоиш таъкид гардид, тақдири аҳолии ин давлатҳо, минтақаро ба ҷуз худи онон касе беҳтар, муаммоҳои онҳоро ҳал карда наметавонад. Торафт болоравии нуфузу эътибори Машварати ҳамкорӣ боз аз он ҷиҳат арзёбӣ мегардад, ки давлатҳои қитъаи Осиё имрӯз дарк намудаанд, ки ҷиҳати ҳалли муаммоҳои сатҳи глобалӣ - об шудани пиряхҳо ва таҳдиди хатари хушксолӣ, пешгирӣ аз амалҳои террористӣ ва экстремизм, қочоқи ғайриқонунии маводи мухаддир, паст кардани сатҳи камбизоатӣ ва дигарҳо ҳар кишвар дар алоҳидагӣ қодир нест. Ҳалли ин муаммоҳо амали якҷояву дастаҷамъона, бурдборӣ, муттаҳидиро тақозо менамояд. Дар Саммит сарони давлатҳо ҳар кадом роҳи ҳалли ин муаммоҳоро аз нуқтаи назари худ, аз диди худ таҳлилу баррасӣ намуданд.

Иттиҳоду муттафиқӣ ва нерӯи муқтадири ин созмон ҳанӯз аз Саммити соли 2002 - юм баргузоргардида баръало аён гардида буд: Он вақт, ки байни ду давлати бузурги қитъа - Ҳиндустону Покистон зиддияти шадид идома дошт, ҳарчанд нуқтаи назарҳо ба ҳам наздик буданд, ду кишвар ба мувофиқа омада наметавонистанд. Таҳти таъсиру нуфузи ин Саммит, гуфтушунидҳо ва ба миён даромадани давлатҳои аъзо муаммоҳои ду давлат ҳалли худро ёфта буданд.

Роҳбари давлати Тоҷикистон дар Саммит ҳини суханронии худ қайд намуданд, ки Осиё хонаи умумии мо - сокинони ин қитъаи азим аст. Мо бояд барои ҳалли масоили бамиёномада якҷоя амал намоем. Аввалан мамолики аъзо бояд аз сиёсати духӯра даст кашанд. Байни кишварҳо бояд робитаҳои иқтисодӣ, додугирифт ба роҳ монда шавад, барои ин бунёди роҳҳои байнидавлатӣ, аз ҷумла роҳҳои оҳан ва автомобилгард муҳим аст. Президенти мамлакат ҳамчунин ҷиҳати ҳифзи муҳити зист, истифодаи иқтидорҳои энергетикӣ сухан ронда, иброз доштанд, ки об шудани пиряхҳои азим, паст шудани сатҳи оби Баҳри Арал минбаъд хавфи хушксолӣ, норасоии об дар минтақаи Осиёи Марказӣ, пайдоишу афзоиши бемориҳои зиёд, аз ҷумла диққи нафас, шушу роҳи нафас ва ҷигарро ба миён оварда, боиси коҳиши вазъи экологӣ мегардад, ки пешгирии ин муаммоҳо миллиардҳо долларро талаб мекунад.

Миллати сулҳпарвар сулҳро ба ҷаҳон тарғиб кард

Чунонки гуфтем, имрӯз сархати бисёр расонаҳои мамолики ҷаҳонро натиҷаҳои Саммит ва бардоштҳо аз он ташкил медиҳад.

- Баҳри ҳамкории муштарак бар зидди терроризм, экстремизм ва сепаратизм, инчунин ҷинояткории муташаккилонаи фаромарзӣ, интиқоли маводи нашъадор ҳамеша ҷонибдорем. Мо тайёрем, ки якҷоя барои сулҳу суббот дар қитъаи Осиё талош варзем, - гуфт Раиси Ҷумҳурии Мардумии Чин Си Ҷинпин. ҳамчунин изҳор намуд, ки аз ширкат дар ҳамоиши сатҳи байналмилалӣ ва меҳмоннавозии дӯстонаву бародаронаи Сарвари давлати Тоҷикистон хеле хушҳол ва миннатпазир аст.

- Имрӯз ҷомеаи ҷаҳон як вазъи мураккаби беэътимодӣ ба якдигар, нобоварӣ ба ояндаи худро эҳсос мекунад, - изҳор дошт Президенти Ҷумҳурии Ӯзбекистон Шавкат Мирзиёев, - ба шуури аҳли ҷомеа як навъ хавфу ташвиш аз ояндаи сайёра ҷо шудааст. Мо аъзои ин Машварат бояд дар ҳамкории зич бо ҳамдигар бо фароҳам овардани шароитҳои мусоиди зиндагӣ ба он мусоидат кунем, ки ба рӯзгори босаодати фардо дили инсонҳо гарм бошад.

- Аз он рӯзе, ки мардуми тоҷик баъди ҷанги шаҳрвандӣ ба сулҳу суббот расид, 22 сол сипарӣ шуд. Аммо дар ин муддати начандон тӯлонӣ ин Тоҷикистон тамоман Тоҷикистони дигар гаштааст. Вақте чанд сол қабл ба ин кишвар омада будам, он вақт муаммои муҳимтарини мардум таъминот бо оби ошомиданӣ, танқисии таъминот бо барқ буд. Дар нерӯгоҳи Норак сатҳи об коҳиш ёфта, манзилҳои мардум сард буд. Имрӯз симои Тоҷикистон, бахусус шаҳри Душанбе ба таври куллӣ дигаргун гаштааст, гул - гул шукуфта, тамоми мушкилот бо нерӯи мардуми меҳнатқарин бартараф карда шудааст. Ба ҳар бобат, гузаштаро қатъи назар кардан даркор набудааст, барои ба қадри имрӯз расидан ба гузашта як назар андохтан лозим аст, - иброз дошт яке аз меҳмонони Саммит аз Федератсияи Россия ба мухбири шабакаи телевизиони кишвари худ.

- Миллати сулҳпарвар сулҳро ба ҷаҳониён тарғиб кард, - навиштааст яке аз нашрияҳои бонуфузи Ҷумҳурии Қазоқис-тон. - Тоҷикистон туфайли сиёсати башардӯстонаву сулҳдӯстонааш дар ҷаҳон шинохта шудааст. Сатҳи баланди омодагии Машварати Душанбе, пазироии самимона, меҳмоннавозии бошукӯҳ, ки маҳз бо ибтикори Президенти Тоҷикистон муҳтарам Эмомалӣ Раҳмон ташкил шуд, собит сохт, ки мардуми Тоҷикистон бо роҳбарии Президенти худ амалаш, ҳарфашон, ҳар қадамашон ба хотири сулҳ аст.

- Бетараф набудан ба тақдири халқи афғон, ки аз ҷониби иштирокчиёни Саммити Душанбе иброз дошта шуд, маро ба риққат овард. Мардуми афғон ташнаи сулҳ аст. Мо ба ҳамкорӣ омодаем, - изҳор дошт Роҳбари Ҷумҳурии Афғонистон Абдуллоҳ Абдуллоҳ.

Ҷомеаи ҷаҳон ба майдони васеи муколама ниёз дорад

- Якчанд амали террористӣ, ки соли равон кишвари моро такон доду мардумашро ба таҳлука мононд, собит сохт, ки бо ин падидаи мудҳиши даврон дар танҳоӣ мубориза бурдан ғайриимкон аст. Мо ба дастгирии ҳамдигар ниёз дорем, мо бояд бар зидди ин гуна зуҳуроти номатлуб, ҳамчунин алайҳи камбизоатӣ ва дигар муаммоҳои ҷомеа дастаҷамъона амал намоем, - гуфт Президенти мамлакати Шри Ланка Майтрипала Сирисена.

Дар Саммит Сарони мамлакатҳои аъзо ҳама иброз доштанд, ки ҷомеаи мо ба майдони васеи муколама ниёз дорад. Он муҳити созгори ҳамдигарфаҳмӣ, ки дар Саммит эҳсос гардид, тақозо менамояд, ки мо бояд аввал якдигарро шунида, сипас якҷоя амал намоем. Мебояд, ки ҳарчӣ бештар ба ҳам оем, гуфтушунид кунем, дар роҳи беҳтар намудани вазъи сиёсӣ, иқтисодӣ, иҷтимоии минтақа муттаҳид бошем...

Дарвоқеъ, солҳои охир таҳдиди падидаҳои хавфнок ба башарият, аз ҷумла терроризм, экстремизм, одамрабоӣ, қочоқи ғайриқонунии маводи нашъаовар ва дигарҳо ташвишовар гаштааст, ки мубориза бо ин зуҳурот амали якҷояро тақозо менамояд. Инчунин дар Саммит тамоми кишварҳо дар масъалаи амнияти Афғонистон изҳори андеша намуданд. Аз ҷумла зикр гардид, ки амнияти Афғонистон кафили амнияти минтақа аст.

Бо ҳамин ҳадафҳо раванди Саммити Душанбе фаъолияти худро ҷамъбаст намуд. Бояд гуфт, ки ба Машварати ҳамкорӣ 27 давлати ҷаҳон аъзо буда, дар ҳавзаи фарогирии ин Машварат бештар аз 4 миллиард сокинони рӯйи Замин зиндагӣ мекунанд. Дар кори Машварат намояндагони 8 давлати дунё ба ҳайси нозир ширкат намуда, инчунин намояндагони чандин созмонҳои бонуфузи байналмилалӣ меҳмони Машварат буданд.

Дар Саммит аз ҷониби Сарони давлатҳои аъзо ҳуҷҷати ниҳоӣ - Декларатсияи Душанбе қабул карда шуд, ки чунин ҳуҷҷатро танҳо Саммити Сарони давлатҳо қабул менамояд. Саммити минбаъда соли 2022 доир гардида, давоми чаҳор сол бояд қарорҳои дар Декларатсия қабулгардида татбиқи амалии худро ёбанд. Декларатсия дар асоси ҳамманфиатӣ, ҳамгироӣ қабул гардид.

Дар сатҳи баланду пуршаҳомат доир гаштани Машварати ҳамкорӣ ва давоми чанд рӯз маркази бузурги фарҳангии ҷаҳон қарор гирифтани пойтахти мамлакати тоҷикон - шаҳри Душанбе бори дигар собит сохт, ки Пешвои муаззами миллати мо муҳтарам Эмомалӣ Раҳмон имрӯз ҳамчун сиёсатмадори муваффақ дар сатҳи ҷаҳон шинохта шудаанд. Ин боиси сарбаландиву ифтихори ҳар яки мо-шаҳрвандони Тоҷикистони азиз аст!

Дар маҷлиси васеи Ҳукумати мамлакат, ки дирӯз доир гардид, Президенти мамлакат барои дар сатҳи баланди ташкилӣ, меҳмоннавозӣ, омодагии ҳамаҷониба баргузор гардидани Ҳамоиш ба тамоми сохторҳо, сокинони пойтахт барои пазироии самимона, зоҳир намудани фарҳангу маърифати баланди шаҳрвандӣ ва саҳми арзандаашон изҳори сипос намуданд.

Ин Ҳамоиш аз як ҷониб нуфузи кишвари азизи моро дар байни мамлакатҳои ҷаҳон дучандон баланд карда бошад, аз ҷониби дигар сокинони ин сарзамини кӯҳану тозаҷавонро дар атрофи Сарвари худ муттаҳидтар намуд.

Рафоат МӮЪМИНОВА,
Аълочии матбуот ва
фарҳанги Ҷумҳурии Тоҷикистон

Читать далее

«ПАНҶШАНБЕ»: ОБОДОНӢ ВА МАДАНИЯТИ БОЗОРДОРӢ

Дар доираи 1300 рӯзи ободонӣ бахшида ба 30 - солагии Истиқлолияти давлатии Ҷумҳурии Тоҷикистон дар шаҳру навоҳии вилоят корҳои созандагиву бунёдкорӣ ва ободонӣ бомаром идома дошта, иншооти хурду бузург сохта, ба истифода дода шуда истодаанд. Ба истиқболи ин ҷашн роҳбарияти бозори «Панҷшанбе» - и маркази вилоят иқдом пеш гирифтаанд, ки корҳои ободиро хуб ба роҳ монанд.

Чанде пеш Раиси вилояти Суғд Раҷаббой Аҳмадзода ба хотири огоҳ шудан аз вазъи нархи маҳсулоти ниёзи аввал ва шиносоӣ бо раванди корҳои ободонӣ аз бозори марказии шаҳр - «Панҷшанбе» боздид намуд.

Зимни суҳбат бо фурӯшандагони бозори «Панҷшанбе» аз тадбирҳои муҳими Ҳукумати мамлакат ва роҳбарияти вилоят дар самти таъмини амнияти озуқаворӣ маълумот дода, пешниҳод кард, ки барои афзун намудани маҳсулот ва дастрасии нархҳо саъй намоянд.

Ҳамзамон, Раиси вилоят ба тезонидани раванди корҳои ободонӣ дастуру супоришҳои мушаххас дод. Таъкид шуд, ки бозор оинаи шаҳр аст ва сайёҳони дохилию хориҷӣ аз бозор боздид мекунанд ва он бояд ҳамеша ободу зебо бошад.

Баъди гузаштани муддате аз ин сафар барои ошноӣ аз вазъи кунунии бозор ва дар кадом сатҳ қарор доштани иҷрои дастуру супоришҳои Раиси вилоят, ба бозори «Панҷшанбе» омадем.

Имрӯз дар ҳудуди мавзеи «Панҷшанбе» ҳашт бозор, аз қабили «Афросиёб», «Бадри Мунир», «Шарқ», «Ҳоҷӣ Абдулазиз», «20 - солагии Истиқлолият», «Афғонбозор», «Баҳор», «Панҷшанбе» фаъолият мебарад.

Дар назди бозорҳо намояндагони идораҳои байторӣ, санитарию эпидемиологӣ, «Тоҷикстандарт», мақомоти ҳифзи ҳуқуқ ва шуъбаи савдои шаҳри Хуҷанд фаъолият доранд. Дар бозори «Панҷшанбе» асосан маҳсулоти кишоварзӣ ба фурӯш гузошта шуда, нархи он нисбат ба дигар бозорҳои вилоят арзон аст. Ҳоло бозор шабонарӯзӣ фаъолият бурда истодааст. Дар дохил ва беруни бозори «Панҷшанбе» дар умум барои 600 нафар ҷойи савдо пешбинӣ шудааст. Тавре, сардори ташкилоти Ҷамъиятии «Соҳибкорони бозори марказии «Панҷшанбе» Ғанӣ Почоев иттилоъ дод, соли равон бозор аз таъмир бароварда, намои он гулкорӣ шуд. Тахминан 40 сол инҷониб бозор ин гуна таъмир нашуда буд. Боиси қайд аст, ки зимни боздид аз бозори марказии «Панҷшанбе» Раиси вилоят Раҷаббой Аҳмадзода бобати наққошӣ кардани болои даромадгоҳи бозор пешниҳод намуда буданд ва дар ин самт аллакай корҳо оғоз ёфтаанд.

Савдои сарироҳӣ хотима ёфт!

Солҳои охир бинобар зиёд шудани савдогарону фурӯшандагон дар роҳрав ва гирду атрофи бозор савдои номуташаккил афзуда буд. Ин вазъ барои харидорон, алалхусус, меҳмонону сайёҳон монеа эҷод мекард. Имрӯз якҷоя бо кормандони мақомоти ҳифзи ҳуқуқ фаъолияти фурӯшандагони сари роҳ ба танзим дароварда шуд.

Доир ба ин масъала Ғанӣ Почоев гуфт, ки бояд маданияти савдоро ба танзим дарорем, зеро дар қадди роҳ, кӯчаҳои мошингузар дар рӯи замин маҳсулотро ба фурӯш гузоштан аз рӯи маданият нест. Дар растаҳо ҷойи фурӯш ҳаст, вале савдогарон хоҳиши дар он ҷо нишастанро надоранд, зеро мехоҳанд дар сари роҳ савдо кунанд. Бинобар ин барои фурӯшандагони сари роҳ дар дохили чойхонаи «Озода», ки аз фаъолият бозмондааст, наздик ба 100 нафар барои фурӯши маҳсулот ҷой омода шудааст.

Танзими нарх ба зиммаи кист?

Имрӯз масъалаи асосие, ки роҳбарияти бозорро ба ташвиш андохтааст, ин фаъолият тариқи шартнома ва ё гирифтани шаҳодатномаи бақайдгирии андоз мебошад. Дар ин ҷода норозигӣ баён кардани баъзе фурӯшандагон боиси парешонхотирии масъулон гардидааст.

- Дар бозор нафароне ҳастанд, ки аз 10 то 25 сол фаъолият бурда истодаанд, вале аз қайди нозироти андоз нагузаштаанд. Алҳол нозироти андоз тасмим гирифтааст, ки фурӯшандагоне, ки ба таври доимӣ фаъолият мебаранд, бояд шаҳодатномаи андозро гиранд. Барои фурӯшандагоне, ки танҳо як рӯз савдо мекунанд, тариқи чипта иҷозат дода шудааст, - гуфт номбурда.

Нисо Каримова - сокини ноҳияи Бобоҷон Ғафуров мегӯяд, ки аз ҳолати кунунии бозори «Панҷшанбе» шод аст, зеро барои роҳгузарон ҷойи роҳрав қариб намонда буд. Фурӯшандагон дар сари роҳ нишаста, бо савдо машғул буданд. Таассуфовараш он аст, ки имрӯз нархи навои бозор боло рафтааст. Масалан, нархи як кило биринҷ аз 11 то 13 сомонӣ асту барои харидани он имконият надорад. Магар нархро ба танзим даровардан ғайриимкон аст?

Дар бобати нархгузорӣ ва назорати он роҳбарияти бозор гуфт, ки мо дар даврони иқтисоди бозоргонӣ қарор дорем, бинобар он ба нарх дахолат карда наметавонем. Дар ин ҷода танҳо барои арзонтар кардани он ташвиқот мебарему халос. Нархгузорӣ дар ихтиёри фурӯшанда аст. Доир ба гарон шудани нархи биринҷ ҳаминро гуфтаниам, ки андози замин, нархи истифодаи об, заҳрдору барои нобуд кардани ҳашароти зараррасон ва нуриҳои минералӣ боло рафта, ба гарон шудани нархи биринҷ таъсир расонидааст.

Маъмурияти бозор ният дорад, то ҷашни 30 - солагии Истиқлолияти давлатии Ҷумҳурии Тоҷикистон дастуру супоришҳои Раиси вилоятро ба иҷро расонда, камбудиҳои ҷойдоштаро бартараф, намуди зоҳирӣ ва гирду атрофи бозорро боз ҳам ободу зебо гардонанд.

Шаҳбону ОЛИМОВА,
«Ҳақиқати Суғд»

Читать далее

Пешвои миллат Эмомалӣ Раҳмон Президенти Бонки аврупоии таҷдид ва рушд Сума Чакрабартиро ба ҳузур пазируфтанд

1 июл дар Қасри миллат Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Президенти Бонки аврупоии таҷдид ва рушд Сума Чакрабартиро ба ҳузур пазируфтанд.

Дар ҷараёни мулоқот вазъи феълӣ ва дурнамои муносибатҳои ҳамкории Тоҷикистон бо Бонки аврупоии таҷдид ва рушд мавриди баррасӣ қарор дода шуд.

Президенти мамлакат муҳтарам Эмомалӣ Раҳмон бо итминон иброз доштанд, ки натиҷаи ин мулоқот имконоти густариши ҳамкорӣ ва самтҳои нави онро байни Тоҷикистон ва Бонки аврупоии таҷдид ва рушд, фароҳам меорад.

Читать далее

01 July 2019

Тарҷумаи “Маҳбуб – ул - Қулуб” - и Алишер Навоӣ

Чанде пеш бо ташаббуси академик Кароматулло Олимов «Маҳбуб - ул қулуб» - и Алишер Навоӣ ба забони тоҷикӣ тарҷума ва тавассути нашриёти «Ирфон» дастраси хонандагон гардид.

Асосгузори адабиёти классикии ӯзбек Алишер Навоӣ аз чеҳраҳои намоёни адабиёт ва сиёсати асрҳои ХIV - ХV дар замони ҳукмронии Темуриён мебошад.

Аз асарҳои  Навоӣ, аз ҷумла «Маҳбуб – ул - қулуб» авзои замон ва фитнаҳои дарбор, манфиатҷӯию бадхоҳии мансабталабон, бесалоҳиятӣ, майпарастӣ ва бебандубории Султон Ҳусайн Бойқаро ба назар мерасад.

 «Маҳбуб – ул - қулуб»  миёни доираи адабии Хуросону Мовароуннаҳр машҳур будааст. Нусхаи хаттии ин асар дар китобхонаҳои Ӯзбекистону Тоҷикистон ва кишварҳои дигар  маҳфуз буда, хушхат аст ва ороиши зебо дорад. Аз ҷумла, дар нусхаҳои дастхати Академияи илмҳои Ҷумҳурии Тоҷикистон шаш нусхаи ин асар мавҷуд аст. Соли таълифи асар 906 - уми ҳиҷрии қамарӣ буда, аз ҷумлаи охирин асарҳои Алишер Навоӣ мебошад.

Он аз ҷиҳати услуб ва тарзи баён то ҳадде ба «Гулистон»-и Саъдӣ ва «Баҳористон» - и Абдураҳмони Ҷомӣ монанд буда, Навоӣ таҳти таъсири китобҳои мазкур асари худро эҷод кардааст.

«Маҳбуб - ул қулуб» - ро аз забони туркии чағатоӣ - ӯзбекии қадим, аз рӯи нусхаи чопи кириллии соли 1966 - уми Тошканд, академик Кароматулло Олимов ба забони тоҷикӣ тарҷума намуда, таъкид месозад, ки ин асар бо он веҷагӣ, ки танқиди шадиди иҷтимоӣ дорад, аз «Гулистон» ва «Баҳористон» фарқ карда, Навоӣ гурӯҳҳои гуногуни аҳолиро бо хислатҳояшон тасвир намуда, ба онҳо баҳо додааст.

Асар аз се қисмат иборат аст ва ҳар яки он чандин фасл дорад, ки дар ҳар фасл аҳволу афъоли гурӯҳҳои муайяни иҷтимоӣ  аз ҷиҳати мақоми иҷтимоӣ ва хислатҳои мушаххаси он тасвир ва тавсиф шудаанд.

«Маҳбуб – ул - қулуб» асари тарҷумаҳолист, ки дар баробари нақли ҳаёти муаллиф баёнгари ҳаёти иҷтимоии замони нависандаи асар  мебошад.

Дар асар Навоӣ чун мунаққиди ҷасур аз давлат ва давлатдории Темуриён маълумот дода, дар бораи подшоҳони золим, вазирону ноибони тороҷгару ноинсоф, судурон ва соҳибмансабони ҳукумат, ҳамзамон шоирону нависандагон, паҳлавонону ҳунармандон, санъаткорон, тоҷирон ва бисёр дигарон маълумоти дақиқ пешниҳод карда, фикру андешаи хешро баён доштааст.

Академик Кароматулло Олимов ҳадафи тарҷумаи «Маҳбуб – ул - қулуб» - ро ошно кардани хонандагони тоҷик бо ин асари  мутафаккири бузург унвон кардааст, ки хидмате дар таҳкими робитаҳои илмӣ ва адабии ду халқи ҳамсоя ва бародар мебошад.

Сурайё ҲАКИМОВА,
«Ҳақиқати Суғд»

Читать далее

Фаъолияти судманди дастҷамъона

Ҷаласаи навбатии Шӯрои ҷамъиятии вилоят санаи 28 - уми июни соли 2019 дар толори Кохи Рӯдакӣ баргузор гардид. Дар ҷасласа аъзои Шӯро, намояндагони ташкилоти ҷамъиятӣ ва васоити ахбори оммаи вилоят иштирок доштанд.

Дар Шӯрои ҷамъиятӣ пас аз тасдиқи рӯзномаи кори ҷаласа бинобар тағйироти кадрӣ ба ҷои Раҳматзода Рустам Мирзо Баҳодурзода Баҳоваддин Баҳодур ба ҳайси намояндаи комилҳуқуқи Раиси вилоят дар Шӯрои ҷамъиятии вилояти Суғд, ба ҷои Сарфароз Фаттоҳзода Сатториён Матлуба Амонзода раиси Кумитаи иҷроияи Ҳизби Халқии Демократии Тоҷикистон дар вилоят ва ба ҷои Толмас Душабоев, раиси кунунии Ҷамъияти Ӯзбекони вилояти Суғд Фарҳод Ҷӯраев ба аъзои Шӯрои ҷамъиятӣ интихоб шуданд.

Дар кори ҷаласа аъзои Шӯрои ҷамъиятии вилоят рафти иҷрои Фармони Президенти Ҷумҳурии Тоҷикистон «Дар бораи Стратегияи миллии Ҷумҳурии Тоҷикистон оид ба муқовимат ба экстремизм ва терроризм барои солҳои 2017 - 2020», иҷрои қарори Маҷлиси намояндагони Маҷлиси Олии Ҷумҳурии Тоҷикистон «Стратегияи миллии рушди Ҷумҳурии Тоҷикистон барои давраи то соли 2030» ва таъмини иҷрои Қонуни Ҷумҳурии Тоҷикистон «Дар бораи танзими анъана ва ҷашну маросим дар Ҷумҳурии Тоҷикистон» - ро муҳокима ва таҳлилу баррасӣ намуданд.

Мудири шуъбаи маъмурию ҳуқуқии дастгоҳи Раиси вилоят Темур Тӯйчизода оид ба рафти иҷрои Фармони Президенти Ҷумҳурии Тоҷикистон «Дар бораи Стратегияи миллии Ҷумҳурии Тоҷикистон оид ба муқовимат ба экстремизм ва терроризм барои солҳои 2017 - 2020» маърӯза намуд. Зимни гузориши хеш мавсуф қайд кард, ки баҳри таҳкими фаъолият, такмил ва ҳамоҳангсозии кори мақомоти ҳифзи ҳуқуқ ва сохторҳои қудратӣ ба масъалаҳои ошкор намудан, пешгирӣ ва аз байн бурдани ҳодисаҳои экстремистию террористӣ аҳамияти махсус дода мешавад. Баҳри пешгирии паҳншавии ғояҳои террористию экстремистӣ гурӯҳҳои корӣ ҷиҳати ташкили корҳои фаҳмондадиҳӣ дар байни аҳолӣ фаъолияти густурда доранд. Кори ин гурӯҳҳо махсусан дар минтақаҳои наздисарҳадӣ ҷоннок ба роҳ монда шудаанд.

Зимни музокирот Шуҷоат Ҳасанова, Дилбар Самадова, Илҳоми Ҷамолиён ва чанде дигар аз аъзои Шӯрои ҷамъиятӣ роҷеъ ба ин масъалаи муҳими ҷомеа ибрози назар намуда, роҳи ҳалли муамморо дар фаъолияти дастҷамъона унвон карданд.

Пешниҳод шуд, ки бо Раёсатҳои тандурустӣ, маориф, фарҳанг, кор бо занон ва оила, ҷавонон ва варзиши вилоят гурӯҳҳои кории доимамалкунанда таъсис дода, байни аҳолӣ, бахусус ҷавонон, донишҷӯён, хонандагони муассисаҳои таҳсилоти миёнаи умумӣ корҳои фаҳмондадиҳӣ пурзӯр карда шавад.

Чунончӣ раиси бахши Суғдии Иттифоқи ҷурналистони Тоҷикистон Илҳоми Ҷамолиён баланд бардоштани саводи расонавии ҷавонони кишварро айни зарурат ва ба манфиати кор дониста, таъкид дошт, ки маҳз камсаводии гурӯҳи ҷавонон, маълумоти кофӣ надоштани онҳо зимни истифодаи интернет, бавиҷа шабакаҳои иҷтимоӣ боиси шомилшавии онҳо ба ҳизбу ҳаракатҳои ифротӣ мегардад.

 Пешниҳод карда шуд, ки барои баланд бардоштани саводи расонавии ин насли ҷомеа талоши бештар ба роҳ монда шавад.

Иҷрои қарори Маҷлиси намояндагони Маҷлиси Олии Ҷумҳурии Тоҷикистон «Стратегияи миллии рушди Ҷумҳурии Тоҷикистон барои давраи то соли 2030» дар гузориши сардори Раёсати минтақавии рушди иқтисод ва савдои вилоят Ҳакимҷон Ҳакимзода мавриди баррасӣ қарор гирифт. Дар муҳокимаи масъалаи мазкур таъкид шуд, ки барои дар амал татбиқ намудани стратегияи миллии рушд тадбирҳо бояд ҷоннок гардад ва дар ин робита мақомоти дахлдор чораҳои мушаххасро саривақт амалӣ созанд.

Аъзои Шӯро Маъруф Юсуфов ва Парвиз Ҷабборзода зимни музокирот бо таъкиди ин маънӣ фаъолияти дастҷамъонаи тарғиботиву ташвиқотии ташкилоти ҷамъиятии миқёси вилоятро саривақтӣ маънидод карданд.

Таъмини иҷрои Қонуни Ҷумҳурии Тоҷикистон «Дар бораи танзими анъана ва ҷашну маросим дар Ҷумҳурии Тоҷикистон» дар маърӯзаи мудири шуъба оид ба корҳои дин, танзими анъана ва ҷашну маросими миллии Мақомоти иҷроияи ҳокимияти давлатии вилоят Сӯҳроб Рустамзода бозгӯ шуд. Мавсуф корҳои фаҳмондадиҳиро дар ин самт миёни аҳолии вилоят қаноатбахш унвон карда, зикр намуд, ки сол то сол мардум моҳият ва манфиати ин қонунро дарк намуда истодаанд. Таъкид шуд, ки роҳандозии ин қонун аз омилҳои таҳрикдиҳанда дар самти беҳдошти некӯаҳволии сокинони кишвар мебошад.

Аъзои Шӯрои ҷамъиятӣ пешниҳод намуданд, ки фаъолият дар самти иҷрои қонуни мазкур пурзӯр шавад.

Дар интиҳои ҷаласа Баҳодурзода Баҳоваддин Баҳодур дар маҷмӯъ фаъолияти Шӯрои ҷамъиятии вилоятро хуб арзёбӣ карда, барои беҳтар шудани сифати кори Шӯро чанд пешниҳоди судмандро арза дошт. Аз ҷумла, пешниҳод шуд, ки минбаъд ба хотири таъмини сифати баланди фаъолият аъзои Шӯрои ҷамъиятӣ соле ду маротиба ба раиси Шӯро аз натиҷаи фаъолияти хеш ҳисобот пешниҳод намоянд, ҳамзамон барои самаранокии корҳо фаъолияти Шӯрои ҷамъиятии шаҳру навоҳии вилоят марҳала ба марҳала натиҷагирӣ шавад.

Баъди музокираву мубодилаи афкор роҷеъ ба масъалаҳои баррасишуда қарорҳои дахлдор қабул гардида, ҷаласаи Шӯрои ҷамъиятӣ ба кори хеш анҷом бахшид.

Сурайё ҲАКИМОВА,
«Ҳақиқати Суғд»

Читать далее