15 May 2019

Оғози мусобиқаи шоҳмот барои дарёфти Ҷоми Раиси вилояти Суғд

Дар доираи чорабиниҳои марбут ба Рӯзи ҷавонони Тоҷикистон дар ноҳияи Мастчоҳ мусобиқаи кушоди вилоятӣ оид ба шоҳмот барои дарёфти Ҷоми Раиси вилояти Суғд баргузор гардид.

Тавре аз мақомоти иҷроияи ҳокимияти давлатии ноҳия иттилоъ доданд, дар мусобиқаи мазкур наздик 100 нафар шоҳмотбозон иштирок доранд. Мусобиқа ду рӯз давом мекунад ва шоҳмотбозон барои дарёфти Ҷоми Раиси вилояти Суғд миёни ҳам сабқат мекунанд.

Ёдовар бояд шуд, ки бо ташаббуси роҳбарияти вилоят ба муносибати Рӯзи ҷавонони Тоҷикистон ва як моҳи ҷавонӣ барои дарёфти Ҷоми Раиси вилояти Суғд аз рӯи намудҳои тенниси рӯи миз, футбол, шоҳмот, бокс, гӯштини камарбандӣ, гӯштини миллӣ, гӯштини тарзи озод, волейбол, камонварӣ, дастхобонӣ, велосипедронӣ, баскетбол, шиноварӣ, тирпаронӣ ва картинг мусобиқаҳои варзишӣ гузаронида шуда истодааст.

Хадамоти матбуоти

Раиси вилояти Суғд

Читать далее

ВАРЗИШ ОМИЛИ РАФОҚАТУ ДӮСТИСТ!

Ба муносибати таҷлили Рӯзи ҷавонон дар вилоят чорабиниҳои варзишӣ барои дарёфти Ҷоми Раиси вилоят баргузор гардида истодааст. Ҳадаф аз баргузории чорабиниҳои мазкур тарғиби тарзи ҳаёти солим ва ҷалби наврасону ҷавонон ба варзиш мебошад. Инчунин, дар чорабинӣ варзишгарони кишварҳои ҳамсояи Ҷумҳуриҳои Ӯзбекистон, Қирғизистон ва Қазоқистон низ сабқат менамоянд.

Заррина Алибердиева варзишгардухтари ӯзбекистонӣ дар суҳбат қайд намуд, ки мақсади асосии ӯ ва ҳамдастагонаш ғолибиятро ба даст оварда, сазовори Ҷом гардидан аст.

- Хурсанд аз он ҳастам, ки ба кишвари дӯсту бародари Тоҷикистон омадам. Варзиш омили асосии дӯстии байни миллатҳо буда, қосиди сулҳ унвон доштанаш бесабаб нест. Дар ин чорабиниҳо ба ҷузъ аз иштирок, дӯстони зиёд пайдо намуда, шаҳри зебои Хуҷандро аз наздик тамошо хоҳем кард, - иброз намуд З. Алибердиева

Мурат Аллаев бошад, дар намуди варзиши бокс кишвари худ - Қазоқистонро муаррифӣ мекунад. Дар ин самт ӯ омодагии хуб дида, орзу дорад ғолиби мусобиқа шавад ва Ҷоми Раиси вилоятро ба кишвари худ барад.

- Ба ташкилкунандагони мусобиқот миннатдорӣ намуда, гуфтаниям, ки бояд чунин чорабиниҳо дар байни кишварҳои ҳамсоя ва дӯсту бародар гарданд. Зеро, маҳз варзиш аст, ки боиси афзудани дӯстиву рафоқат зиёд мешавад. Тайи чанд рӯзе, ки дар шаҳри Хуҷанд ҳастем, ба ҷуз аз иштирок дар чорабиниҳои варзишӣ боз аз мавзеъҳои таърихиву тамошобоби ин шаҳри воқеан афсонавӣ дидан хоҳем кард, - илова намуд номбурда.

- Мехостам ба тамошои шаҳри зебои Хуҷанд, ки васфашро шунида будам, биёям. Имрӯз маҳз бо ташаббус ва дастгириҳои роҳбарияти вилоят, ки чорабиниро ташкил намуданд, ба ин шаҳри зебо омадам. Мақсади омадан агар иштирок дар мусобиқоти варзишӣ бошад, пас аз он зебогиҳои шаҳрро дидан орзуи асосии ман аст. Дар ин чорабинӣ банда аз рӯи намуди футбол бо ҳамроҳии ҳамдастагонамон Қирғизистонро муаррифӣ намуда, умед дорем натиҷаҳои хубро ба даст орем, - гуфт зимни сӯҳбат Далер Мусаев.

Барои иштирок дар ин мусобиқот, ки ҳамасола аз ҷониби Раиси вилоят, барои дарёфти Ҷоми Раиси вилоят ташкил мешавад, тайёрии хуб дидам. Умед дорам, аз рӯи варзиши тирпарронӣ ширкат намуда, сазовори Ҷом гардам, - мегӯяд варзишгари тоҷик Алишер Баҳромов.

Ҷоиз ба зикр аст, ки мусобиқаҳои варзишӣ барои дарёфти Ҷоми Раиси вилоят аз рӯи намудҳои гӯштини тарзи озод, камарбандӣ, гӯштини миллӣ, волейбол, камонварӣ, дастхобонӣ, велосипедронӣ, баскетбол, шиноварӣ, тенниси рӯи миз, футбол, шоҳмот, бокс ва тирпарронӣ баргузор мегардад. Мусобиқаҳои мазкур то 21 – уми майи соли равон сурат гирифта, ғолибон бо мукофот ва Ҷоми Раиси вилоят қадрдони карда мешавад.

Истамҷони НАҶМИДДИН,
“Ҳақиқати Суғд”

Читать далее

МАҚСАДИ МУСОБИҚА - ДӮСТИЮ РАФОҚАТ

Дар доираи чорабиниҳо бахшида ба Рӯзи ҷавонон баргузории чорабиниҳои варзишӣ барои дарёфти Ҷоми Раиси вилояти Суғд оғоз гардида, варзишгарон аз рӯи намудҳои тенниси рӯи миз (байни бонувон), футбол байни наврасон, шоҳмот, муштзанӣ, гӯштини камарбандӣ, волейбол (байни бонувон), гӯштини миллии гӯштингирӣ, гӯштини тарзи озод, камонварӣ, дастхобонӣ, велосипедронӣ (трек), шиноварӣ, картинг ва тирпарронӣ давоми рӯзҳои баргузории мусобиқа ҳунари варзишии худро намоиш хоҳанд дод.

14-уми май варзишгоҳи «Спартак» - и шаҳри Хуҷанд пур аз тамошобину мухлис буд. Мусобиқаи кушоди вилоятӣ оид ба бокс байни ҷавонони соли таваллудашон 2001-2002 барои дарёфти Ҷоми Раиси вилоят бо иштироки варзишгарони Ҷумҳуриҳои Қазоқистону Қирғизистон, Ӯзбекистону Тоҷикистон оғоз гардида, он давоми 4 рӯз идома хоҳад ёфт.

Мудири бахши варзиши Раёсати кор бо ҷавонон ва варзиши вилоят Фирдавс Фахриддинзода мақсади баргузории мусобиқаро пеш аз ҳама, ҷалби наврасону ҷавонон ба варзиш, тарғиби тарзи ҳаёти солим, дарёфти истеъдодҳои нав, шиносоӣ ва ҳамкорӣ бо варзишгарони кишварҳои бо мо дӯсту бародар арзёбӣ намуда, изҳор дошт, ки давоми чаҳор рӯзи баргузории мусобиқа беш аз 100 нафар варзишгар бо ҳам сабқат хоҳанд кард.

Бояд тазаккур дод, ки мусобиқа аз вазни варзишгарони 49 килограмм оғоз шуда, Ҷумҳурии Ӯзбекистонро дар даври аввал Арслон Аъзамов, Азиз Нуртуллоев ва Шавкат Ахмедов, муаррифи намуданд.

Муштзани ӯзбекистонӣ Арслон Аъзамов дар даври аввал бар рақиби худ ғолиб омада, шарафи кишвари худро боло бардошт. Варзишгар ғолибияташро на дар боқуввату пурзӯр ва муштзан будани хеш, балки дар дӯстию рафоқати байни кишварҳо маънидод намуд. Зиёда аз ин ободию зебогии шаҳри Хуҷанд ӯро мафтун гардонидааст.

Fаниҷон Юсуфов сармураббии варзишгарони ӯзбекистонӣ иброз дошт, ки дар мусобиқа 10 нафар то даври охирин сабқат хоҳанд кард.

- Тӯли чаҳор - панҷ сол аст, ки ба Ҷумҳурии Тоҷикистон меоем. Муштзанон то кунун дар мусобиқаҳои вилоятӣ барои дарёфти Ҷоми ба номи Исмоил Ҳамзаалиев иштирок мекарданд. Боиси хурсандист, ки Хуҷандшаҳрро аз пештара дида зебову дилрабо дарёфтем. Дар рӯзҳои фориғ аз мусобиқа ният дорем, ки сайри мавзеъҳои таърихӣ ва ҷойҳои тамошобоби шаҳр намоем. Зиёда аз ин меҳмондӯстии мардум эҳтироми моро нисбат ба халқи тоҷик афзуд, - қайд кард Fаниҷон Юсуфов.

Шоира САЛИМОВА,
«Ҳақиқати Суғд»

Читать далее

ҲАЛЛИ САРИВАҚТИИ МАСЪАЛАҲО

11-уми майи соли равон баҳри таъмини иҷрои дастуру супоришҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон ҷиҳати аҳамияти зарурӣ додан ба муроҷиатҳои шаҳрвандон ва ҳалли саривақтии масъалаҳои пешниҳодшудаи сокинон чун анъана, дар мақомоти иҷроияи ҳокимияти давлатии ноҳияи Бобоҷон Ғафуров бо иштироки Раиси ноҳия Назирӣ Зариф Вализода «Рӯзи қабули шаҳрвандон» доир гардид. Дар он муовинон, мудирони шуъбаву бахшҳои мақомоти иҷроияи ҳокимияти давлатии ноҳия, намояндагони ҷамоатҳои шаҳраку деҳот ширкат доштанд.

Он рӯз 28 нафар шаҳрванд бо масъалаҳои гуногун муроҷиат карданд, аз он ҷумла, иваз намудани қитъаи замин, кӯмак барои табобат, кӯмаки моддӣ, харидории трансоформатор ва насби он, таъмин шудан бо манзили истиқоматӣ ва ҷои корӣ, гирифтани шиносномаи хориҷӣ ва дигар масъалаҳо аз ин шумор мебошанд.

Чунончӣ Мамлакат Алибоева - сокини Ҷамоати деҳоти Исфисор барои мусоидат намудан ба гирифтани табобат ва кӯмаки молиявӣ муроҷиат намуда, ба гуфти ӯ вазъи саломатиаш хуб нест, алъон иҷорашин аст. Баъди шунидани дарди дили ин зан бобати кӯмакпулӣ ва гирифтани табобат ба масъулини соҳаи тандурустӣ супориш дода шуд, ки ӯро дастгирӣ намоянд .

Маҳмудҷон Ҷӯраев - сокини Ҷамоати деҳоти Унҷӣ, хоҳиш намуд, ки замини барояш аз минтақаи Хомрабод ҷудошуда ба шаҳраки Сайҳун иваз карда шавад.

Акбар Шарифов - сокини ҷамоати деҳоти Исфисор барои пайдо кардани ҷои кор ва сокинони дигари деҳаи Некроҳи Ҷамоати деҳоти Чашмасор ҷиҳати харидории трансформатор ва насби он дар ин деҳа муроҷиат карданд.

Қайд кардан ба маврид аст, дар се моҳи аввал, бо масъалаҳои гуногун 322 нафар ба мақомоти иҷроияи ҳокимияти давлатии ноҳия муроҷиат намуданд, ки муаммои онҳо саривақт ҳаллӣ худро ёфтаанд.

Шаҳноза ҲОМИДОВА,
 «Ҳақиқати Суғд»

Читать далее

МУАММОҲО ҲАЛЛИ ХУДРО МЕЁБАНД

Тибқи дастуру супоришҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳар ҳафта аз ҷониби раисони шаҳру навоҳии вилоят рӯзи қабули шаҳрвандон баргузор мегардад.

Давоми 4 моҳ дар ноҳияи Спитамен аз ҷониби раиси ноҳия Сулаймонзода Акрам Раҳим 104 нафар шаҳрванд қабул шудааст. Рӯзҳои қабул дар як ҳафта ду маротиба доир гардида, сокинон бештар бо масъалаҳои ҷудо намудани қитъаи замини наздиҳавлигӣ, ҳуҷҷатгузории манзили истиқоматӣ, кӯмаки молиявӣ, таъмири роҳҳо, ободонӣ, оби нӯшокӣ муроҷиат кардаанд.

11 - уми майи соли равон қабули шаҳрвандон аз ҷониби муовини аввали раиси ноҳия Зоҳидзода Даврони Абдуқодир баргузор шуд. Дар ин рӯз ҳамагӣ 7 нафар шаҳрванд барои ҳаллу фасли мушкилоти хеш муроҷиат карданд, аз ҷумла се сокини Ҷамоати деҳоти Хуррамзамин: - Олтиной Каримқулова бобати мусоидат ҷиҳати ҳуҷҷатгузории манзили истиқоматии додараш, Гавҳар Мамараҳимова барои ҳалли баҳси маблағи пиллаи соли гузашта ва Шералӣ Мамадхӯҷаев барои гирифтани шиноснома ба писараш муроҷиат намуданд.

Бояд гуфт, ки шавҳари Мубина Шерматова, сокини Ҷамоати деҳоти Куруш чанд вақт инҷониб аз бемории ҷигар азият мекашад ва барои табобат маблағ надорад, аз ин рӯ барои кӯмаки пулӣ муроҷиат кард. Худи ҳамон рӯз аз ҳисоби соҳибкорон ба Мубина Шерматова кӯмакпулӣ дода шуд.

Сокини Ҷамоати деҳоти ба номи Т.Улҷабоев Дилбар Турдимуродова ҷиҳати ҷудо намудани қитъаи замини наздиҳавлигӣ муроҷиат кард.

Имрӯз масъалаи асосие, ки сокинонро ба ташвиш андохтааст, ин гирифтани қитъаи замини наздиҳавлигӣ мебошад. Гуфта шуд, ки алҳол дар ноҳия фонди замин мавҷуд нест ва барои ҷудо кардани фонди манзил дар ҳаҷми 355 гектар ба Ҳукумати Ҷумҳурии Тоҷикистон муроҷиат кардаанд. Дар ҳолати тасдиқ гардидани фонди манзил нафароне, ки дар навбат истодаанд, бо қитъаи замини наздиҳавлигӣ таъмин мегарданд.

Бобати муроҷиатҳои шаҳрвандон шахсони масъул вазифадор карда шуданд, ки аризаҳои қабулшуда сари вақт баррасӣ ва ҳалли худро ёбанд. Сокинон умед доранд, ки муаммоҳои онҳо рӯзҳои наздик ҳал мешаванд.

Алҳол дар ноҳияи Спитамен 7 ҷамоати деҳот мавҷуд буда, 139 ҳазор аҳолӣ ба қайд гирифта шудааст. Пас суоле ба миён меояд, ки чаро дар рӯзи қабули шаҳрвандон танҳо 7 нафар сокини ноҳия иштирок карданд? Оё дар ноҳия муаммо мавҷуд нест ва ё бошандагон ба мақомоти иҷроияи ҳокимияти давлатӣ муроҷиат намекунанд.

Шаҳбону ОЛИМОВА,

«Ҳақиқати Суғд»

Читать далее

Панҷакент: АФЗАЛИЯТ БА КАРТОШКАПАРВАРӢ

Картошкапарварӣ аз соҳаҳои сердаромади хоҷагии халқи кишвар маҳсуб ёфта, дар таъмини амнияти озуқаворӣ – яке аз ҳадафҳои стратегии давлат ва Ҳукумати Ҷумҳурии Тоҷикистон нақши муҳим дорад. Панҷакент яке аз минтақаҳои картошкапарварии вилоят ба ҳисоб рафта, иқлими муътадили он барои парвариши ин зироат хеле мувофиқ аст.

Бино ба гуфти сардори раёсати кишоварзии шаҳр Ғолиб Гадоев соли ҷорӣ кишоварзон тибқи дурнамо нақша доранд, дар масоҳати умумии 5 ҳазор гектар кишти картошкаро ба роҳ монанд. То 13 – уми майи соли равон кишоварзону хоҷагидорони шаҳр дар майдони 3430 гектар кишти картошка гузаронидаанд, ки 70 фоизи нақшаро ташкил медиҳад. Бо мақсади иҷрои барзиёди нақша дар саҳро бо истифодаи техникаи кишоварзӣ, кӯшиши деҳқонон ва истифодаи самараноки обу ҳавои мусоид кишти ин зироат вусъат дорад.

- Кӯшиш карда истодаем, ки аҳолиро низ бештар ба кишти картошка дар хоҷагиҳояшон ҷалб намоем. Аз ҳисоби истеҳсоли зиёди картошка ҳам оилаашонро таъмин мекунанд ва ҳам дар бозорҳои шаҳру навоҳии вилояту ҷумҳурӣ маҳсулоти худӣ таъмин намуда, онро бо нархи дастрас мефурӯшанд, ки ин ҳам ба манфиати деҳқонон ва ҳам харидорон мебошад, - гуфт номбурда.

Ба андешаи мутахассисони соҳаи кишоварзии шаҳри Панҷакент хоҷагидорон тухмии босифатро ба таври зарурӣ захира намуда, имрӯз аз он васеъ истифода мебаранд. Дар хоҷагиҳои деҳқонии Ҷамоати деҳоти Ёрӣ, ки беш аз 2 ҳазору 150 гектар замини кишт мавҷуд мебошад, мувофиқи нақша дар майдони наздик 600 гектар картошкаи навъҳои серҳосил кишт менамоянд.

Бино ба гуфти Муҳаммадҷон Шехов – муовини раиси ҷамоат, ин мавзеъ офтобрӯя буда, дар моҳҳои май ҳарорати ҳаво баланд мешавад, аз ин рӯ, бештар барои кишти картошка имконият ҳаст ва он сол то сол афзуда истодааст. Таҳлилҳои солҳои охир нишон дод, ки дар ин заминҳо кишти картошка низ ба мақсад мувофиқ аст.

Кишоварзони Ҷамоати деҳоти Сӯҷина нақша доранд, дар майдони 550 гектар, бо истифода аз тухмиҳои хушсифати мутобиқ ба иқлими маҳал, кишти картошка гузаронанд. То имрӯз дар 420 гектар замин кишт ба роҳ монда шудааст.

Тавре роҳбари хоҷагӣ иттилоъ дод, дар ҷамоат 1 ҳазору 283 гектар замини обӣ мавҷуд буда, аз ин дар 550 гектар картошка кишт карда мешавад.

Шаҳриёр Абдушаҳидов - раиси Кооперативи тиҷоратии «Хуросон» - и Ҷамоати деҳоти Ёрӣ гуфт, ки мувофиқи нақша бояд дар 130 гектар замин кишти картошка гузаронида шавад, вале то имрӯз фақат дар 78 гектар кишт гардидааст.

- Ба он заминҳое, ки чанд сол пеш ғалла корида мешуду аз оби полезӣ танқисӣ дошт, имсол картошка кишт намудем. Тухмии картошка маҳаллӣ буда, сифати он беҳтар ва ҳосилдеҳ мебошад. Бо дастгирии Ҳукумати ҷумҳурӣ, Мақомоти иҷроияи ҳокимияти давлатии вилоят ва роҳбарияти шаҳр пойгоҳҳои обкашӣ таъмир шуда, мушкилоти оби полезӣ ҳалли худро ёфт.

Аз сабаби он, ки моҳҳои марту апрел сербориш омад, натавонистем саривақт кишти картошкаро ба анҷом расонем. Ният дорем, дар муҳлати муайянгардида нақшаро ба иҷро расонем, - мегӯяд Шаҳриёр Абдушаҳидов.

Маҳз ташкили хоҷагиҳои деҳқонӣ ва муҳайё будани техникаи кишоварзӣ ба деҳқонон имкон медиҳад, ки дар оянда бозори дохилиро бо маҳсулоти худӣ таъмин намоянд.

Аз рӯи маълумоти масъулини раёсати кишоварзии шаҳри Панҷакент то имрӯз дар 3430 гектар замин кишти картошка гузаронида шудааст, ки ин нишондиҳанда нисбат ба ҳамин даври соли гузашта қариб 2 ҳазор гектар зиёд мебошад.

Дар шаҳру деҳоти Панҷакент кишти картошка дар ҳамаи шаклҳои хоҷагидорӣ вусъат меёбад, зеро мардум хуб дарк намудаанд, ки ба ин навъи маҳсулоти кишоварзӣ солҳои охир талабот бештар буда, бо истифода аз шароити мусоиди роҳ дар минтақа метавонанд онро ба бозорҳои шаҳру навоҳии мамлакат интиқол дода ва ба ин васила дар таъмини амнияти озуқавории мамлакат саҳми муносиб гузошта шавад.

Нодир ТУРСУНЗОДА,
«Ҳақиқати Суғд»

Читать далее

БОҒИ «ҒАЛАБА»: ЧАРОҒОНКУНӢ КАЙ ОҒОЗ МЕШАВАД?!

Боғи «Ғалаба» - и шаҳри Хуҷандро чанд сол қабл ба боғи истироҳатии сокинон табдил доданду дар он мавзеъ барои бачагон аттраксионҳо ташкил карда, лавҳаҳои фахрии иштирокчиёни Ҷанги Бузурги Ватанӣ ва бартарафкунандагони садамаи неругоҳи барқӣ – атомии Чернобил, ҳамчунин муҷассамаи В.И.Ленинро гузоштанд. Аксар дар ин фасли зебои сол шомгоҳон ба ин ҷо меоянд, то кӯдаконашон бо бозӣ машғул шаванду худ низ истироҳат намоянд.

Вақте бегоҳӣ вориди боғ шудем, бароямон чароғаки телефони мобилӣ лозим шуд, зеро даромадгоҳи боғ чароғон нашудааст. Зинаҳои даромадгоҳ ба таври ноқулай сохта шудааст, ки кас барои фаромадан мушкилӣ мекашад. Вақте ба атроф назар афкандем, маълум шуд, ки дар ин ҷо чароғонкунӣ аз лампаҳои пастсифат истифода бурдаанд. Дар чунин равшании паст нафарони солхӯрда ва ё кӯдакони хурдсол барои сайр кардан душворӣ мекашанд.

Дар даромади боғ банери фарсудашударо овехтаанд, ки намуди ин мавзеъро коҳиш додааст. Набояд фаромӯш кард, ки нақши тахтаҳои таблиғӣ баҳри ҷалби мардум калон аст.

Баъзе аз аттраксионҳо корношоям буд. Барои кӯдакони хурдсол ҷойи махсуси бозӣ ҷудо карда шудааст, ки нархи он 4 сомонӣ аст. Вале дар дохил ягон намуди бозӣ нест, ки кӯдакон бозӣ кунанд. Пас, барои кадом намуди бозӣ 4 сомонӣ маблағ бояд супурд?

Вақте аз назди лавҳаи Қаҳрамонони Ҷанги Бузурги Ватанӣ гузар мекунем, онро ба душворӣ тамошо мекунем, зеро чеҳраҳои қаҳрамононро шохаҳои дарахтони калон панаҳ кардаанд. Дар пояи лавҳа гулҳои зебои ороишӣ шинонида нашудаанд. Чунин ҳолат дар назди лавҳаи бартарафкунандагони садамаи неругоҳи барқӣ - атомии Чернобил низ ба чашм мерасад.

Манзараи муҷассамаи В.И.Ленин худ шаҳодати он аст, ки он тӯли солҳо боре ҳам рӯи таъмирро надидааст. Бобати ободонии гирду атрофи муҷассама ҳарф задан ҳам нашояд, зеро сафолакҳо кафидаву деворҳо афтидаанд.

Бояд масъулин назди муҷассамаву лавҳаҳоро ободу зебо нигоҳ доранд, зеро барои шиносоӣ ва огоҳӣ ёфтан аз қаҳрамонии ҷанговарон сайёҳони зиёде ба ин ҷо меоянд.

Ҳарчанд роҳравҳои ин мавзеъ рӯбучин шуда бошанд ҳам, аммо қуттиҳои партовпартоӣ аз партов пур, роҳравҳо каҷу килеб, назди варзишгоҳ нообод ва дар он алафи зиёде рӯидааст.

Ба ҳар бобат хурсандиовараш он аст, ки ҳоло боғи «Ғалаба» фаъолият карда истодаасту сокинон барои хуш гузаронидани шоми худ меоянд.

Пурмоҳи ОЛИМӢ

Читать далее

Раҷаббой Аҳмадзода сокини ноҳияи Айнӣ Достонбой Шодмонови 29 соларо аёдат намуд

Субҳи имрӯз Раиси вилояти Суғд Раҷаббой Аҳмадзода ҷиҳати шиносоӣ бо раванди корҳои ободониву созандагӣ ба водии Зарафшон сафар кард.

Дар оғози сафар Раиси вилоят дар ноҳияи Айнӣ сокини 29 солаи ноҳия Достонбой Шодмоновро аёдат намуд ва ӯро бахшида ба Рӯзи ҷавонони Тоҷикистон табрик гуфт. Раҷаббой Аҳмадзода дар аснои суҳбат иброз дошт, ки Ҳукумати Ҷумҳурии Тоҷикистон ба зиндагиву фаъолияти шахсони ниёзманди ҷомеа таваҷҷуҳи хоса дошта, барои дастгирии маъюбону ятимон тадбирҳои заруриро роҳандозӣ менамояд.

Читать далее

Маросими ифтитоҳи мусобиқаҳои варзишӣ барои дарёфти Ҷоми Раиси вилояти Суғд

14 майи соли равон дар Қасри варзиши шаҳри Хуҷанд бо мақсади иҷрои дастуру супоришҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар самти тарғиби тарзи ҳаёти солим ва ҷалби наврасону ҷавонон ба варзиш дар вилояти Суғд маросими ифтитоҳи мусобиқаҳои варзишӣ барои дарёфти Ҷоми Раиси вилояти Суғд баргузор гардид.

Дар маросими мутантани ифтитоҳи мусобиқаҳои варзишӣ Раиси вилоят Раҷаббой Аҳмадзода, роҳбарони сохторҳои давлатӣ, намояндагони корпусҳои дипломатии кишварҳои хориҷӣ, ҷавонони фаъол, варзишгарон ва собиқадорони соҳаи варзиш ширкат варзиданд.

Читать далее

ҶАВОНОН – НАСЛИ ОЯНДАСОЗИ ТОҶИКИСТОН!

Татбиқи босамари сиёсати давлатии ҷавонон аз рӯзҳои нахустини соҳибистиқлолӣ дар меҳвари фаъолияти Ҳукумати кишвар қарор дорад. Табиист, ки бе иштироки фаъолонаи ин нерӯи бузург дар ҳаёти ҷамъиятӣ рушди иқтисодиву иҷтимоӣ ва сиёсиву фарҳангии давлатро тасаввур кардан ғайриимкон аст.

Таваҷҷуҳи пайваста, ғамхориҳои хирадмандонаву дурандешона ва дастгириҳои ҳамешагии Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон нисбат ба ҷавонон нерӯи онҳоро дар бунёди давлати ҷомеаи шаҳрвандӣ фаъол ва ба корҳои созандагию бунёдкорӣ раҳнамун месозад. Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар яке аз суханрониҳояшон мавқеи давлатро дар муносибат ба масъалаҳои ҳалталаби ҳаёти ҷавонон муайян намуда, гуфтанд: “Роҳбарияти давлате, ки бештар аз ҳафтод дарсади аҳолиашро ҷавонон ташкил медиҳад, танҳо дар сурате соҳибнуфуз мешавад ва кораш пеш хоҳад рафт, ки ин нерӯи бузургу солим аз сиёсати он пуштибонӣ кунад”.

Ҳукумати Тоҷикистон ташаббусу пешниҳодҳои созандаи ҷавононро ҳамеша дастгирӣ намуда, барои амалӣ гардидани онҳо имконият фароҳам меорад. Боиси ифтихор аст, ки дар Паёми навбатии худ Асосгузори сулҳу ваҳдати миллӣ - навбатии миллат, Президенти Ҷумҳурии Тоҷикистон муҳтарам Эмомалӣ Раҳмон ҷавононро мояи ифтихор ва сарбаландии Тоҷикистони азиз шуморида, аз ҷумла таъкид намуданд: «Мо ба ҷавонон эътимоди комил дорем, дастгирии самимонаи онҳоро аз сиёсати пешгирифтаи давлату Ҳукумат қадрдонӣ мекунем ва нақши арзишмандашонро дар ҳамаи ҷанбаҳои ҳаёти кишвар эҳсос менамоем».

Пешвои муаззами миллат парвариши меҳри ватандориро дар замири ҷавонон нуктаи муҳим арзёбӣ намуда, дар суханронии худ изҳор доштанд: “Ватан дар баробари Модар муқаддасоти воло буда, дар сарнавишти инсон нақши ҳалкунанда дорад. Бе Ватан инсон бе сарнавишт ва бе қадру манзалат аст. Бесабаб нест, ки арзишҳои волои ватандорӣ ҳанӯз аз давраи ориёиҳо зуҳур кардааст. Ватан танҳо марзу бум ва ҳудуди муайяни ҷуғрофӣ нест. Ватан пайванди ногусастании имрӯзу фардо мебошад”. Ҷиҳати дастгирию ҳавасмандгардонии ҷавонон дар тӯли солҳои соҳибистиқлолӣ як қатор имтиёзҳо, аз қабили стипендия ва квотаҳои Президентӣ, стипендияи байналмилалии Президентии “Дурахшандагон” таъсис дода шуд. Ҳамчунин, зиёда аз 300 нафар ҷавони кишвар тибқи стипендияи байналмилалии Президенти Тоҷикистон “Дурахшандагон” дар хориҷи кишвар таҳсил менамоянд. Грантҳои Ҳукумати Тоҷикистон барои ташкилотҳои ҷамъиятӣ дар соҳаи тарбияи ватанпарастии ҷавонон, Ҷоизаи ба номи Исмоили Сомонӣ барои олимони ҷавон, дастгириҳои давлатӣ оид ба ҷудо кардани қитъаи замин барои омӯзгорони ҷавон ва ҷалби ҷавонони лаёқатманд ба идоракунии давлатӣ ва пешбарии онҳо ба мансабҳои роҳбарикунанда аз зуҳуроти ғамхории доимии Ҳукумати мамлакат ва роҳбарияти Мақомоти иҷроияи ҳокимияти давлатии вилоят мебошад.

Дар бунёди давлати демократию дунявӣ мақоми ҷавонон ба сифати як нерӯи ниҳоят пуриқтидори бунёдкор ва пешбарандаи ҳаёти ҷомеа шинохта ва эътироф шудаанд. Тибқи арзёбии олимони сиёсатшинос татбиқи сиёсати давлатии ҷавононро дар замони соҳибистиқлолӣ ба чор марҳала ҷудо кардан мумкин аст. Марҳалаи якум аз моҳи марти соли 1992 бо қабули Қонун “Дар бораи сиёсати давлатии ҷавонон” оғоз гардида, то ба имзорасии Созишномаи истиқрори сулҳ ва ризоияти миллӣ идома меёбад. Қабули қонуни мазкур саҳифаи навро дар инкишофи ҳаракати ҷавонон боз намуд. Ташаккул ва муайянсозии роҳу равиши минбаъдаи сиёсати давлатии ҷавонон баъди Иҷлосияи ХVI Шӯрои Олӣ сурат гирифт. Сарвари давлат муҳтарам Эмомалӣ Раҳмон 2 - юми феврали соли 1993 бо ҷавонон мулоқот намуданд ва 4 - уми сентябри соли 1993 дар ҷамъомади Шӯрои марказии Иттифоқи ҷавонон, 17 - уми марти соли 1994 дар анҷумани якуми Иттифоқи ҷавонони Тоҷикистон ширкат варзида, аз ҷавонон даъват ба амал оварданд, ки чун як тан барои ягонагии Тоҷикистон, осоиш ва некӯаҳволии халқ саъйу талош намоянд. Мулоқоти Президенти кишвар муҳтарам Эмомалӣ Раҳмон бо намояндагони ҷавонони ҷумҳурӣ 23 - юми майи соли 1997 воқеаи таърихӣ буд. Ин мулоқот ба давре рост омад, ки ҷараёни нобоварию мухолифат ба фарҷоми мантиқии худ расида, ба марҳалаи ҳамкорӣ дар роҳи бунёди давлати демократии Тоҷикистон табдил ёфт.

Бо мақсади амалӣ гардонидани Қонуни Ҷумҳурии Тоҷикистон “Дар бораи сиёсати давлатии ҷавонон” Президенти кишвар 23 - юми майи соли 1997 Фармон “Дар бораи баъзе чораҳои беҳтар намудани кор бо ҷавонон” - ро ба имзо расониданд ва 27 - уми майи соли 1997 дар назди Ҳукумати Ҷумҳурии Тоҷикистон Кумитаи кор бо ҷавонон таъсис ёфт. Ҳамчунин, дар сохтори Дастгоҳи иҷроияи Президенти мамлакат шуъбаи сиёсати ҷавонон ба фаъолият шурӯъ кард. Марҳалаи дуюми татбиқи сиёсати давлатии ҷавононро пас аз ба имзорасии Созишномаи умумии истиқрори сулҳ ва ризоияти миллӣ то қабули Қонуни Ҷумҳурии Тоҷикистон “Дар бораи ҷавонон ва сиёсати давлатии ҷавонон” - ро дар таҳрири нав (2004) номид. Зеро бо имзошавии Созишномаи умумии истиқрори сулҳ ва ризоияти миллӣ марҳалаи муҳими тақдирсоз шурӯъ шуд ва табақаҳои гуногуни аҳолӣ, иттиҳодияҳои ҷамъиятӣ дар якҷоягӣ бо мақомоти сохторҳои давлатӣ баҳри татбиқи сулҳ, ваҳдати миллӣ, баланд бардоштани обрӯи байналхалқии кишварамон кӯшишҳои арзандаю назаррас ба харҷ доданд.

Самти дигари сиёсати давлатии ҷавонон дастгирии соҳибистеъдодҳои ҷавон мебошад, ки 26 - уми феврали соли 1998 дар ин бобат Фармони Президенти мамлакат “Дар бораи таъсиси стипендияи Президенти Ҷумҳурии Тоҷикистон барои хонандагони мактабҳои таҳсилоти ҳамагонӣ, летсейҳо, омӯзишгоҳҳои касбӣ - техникӣ, техникумҳо ва коллеҷҳо”, 20 - уми марти соли 1998 “Дар бораи таъсис додани ҷоизаи ба номи Исмоили Сомонӣ барои олимони ҷавоне, ки дар соҳаи илм ва техника корҳои намоён анҷом додаанд, ба тасвиб расид. Мулоқоти Сарвари давлат бо ҷавонони лаёқатманди кишвар, ки 16 - уми майи соли 1998 баргузор гардид, ба эҳёи рӯзномаи “Ҷавонони Тоҷикистон” ва ба корҳои роҳбарикунанда пешбарӣ кардани ҷавонон ҷараёни тоза бахшид ва 23 - юми май “Рӯзи ҷавонони Тоҷикистон” эълон шуд. Марҳалаи сеюм аз қабули Қонуни Ҷумҳурии Тоҷикистон “Дар бораи ҷавонон ва сиёсати давлатии ҷавонон” дар таҳрири нав (июли соли 2004) ибтидо гирифта, то таъсиси Шӯрои миллии кор бо ҷавонони назди Президенти мамлакат идома ёфтааст.

 Бо мақсади ба танзим даровардани муносибатҳои нави ҷамъиятӣ, такмили қонунгузории кишвар ва дар ин замина қувватгирии сиёсати давлатии ҷавонон, фароҳам овардани фазои мусоидаткунандаи меъёрии ҳуқуқии сиёсати давлатии ҷавонон зарурати ворид кардани тағйирот ба қонуни асосии ҷавонон ба миён омад. Бинобар ин 9 - уми июни соли 2004 Қонуни Ҷумҳурии Тоҷикистон “Дар бораи ҷавонон ва сиёсати давлатии ҷавонон” дар таҳрири нав қабул гардид. “Вобаста ба тақозои замон, - қайд намуданд Президенти кишвар муҳтарам Эмомалӣ Раҳмон, - Қонуни Ҷумҳурии Тоҷикистон “Дар бораи ҷавонон ва сиёсати давлатии ҷавонон” дар таҳрири нав қабул гардид, ки барои ҳалли масъалаҳои марбут ба ҷавонон заминаи боэътимод фароҳам овардааст...” Оғози марҳалаи чоруми дастгирии сиёсати давлатии ҷавононро аз таъсиси Шӯрои миллии кор бо ҷавонони назди Президенти Ҷумҳурии Тоҷикистон (18 - уми июли соли 2015) бояд ҳисобид. Зеро, таъсиси Шӯро ҳамчун иқдоми навбатии мақоми олии сиёсии мамлакат дар ҳаёти сиёсиву иҷтимоии Тоҷикистон ба ҳисоб рафта, робитаи бевосита ва самарабахши ҷавононро бо роҳбарияти кишвар таъмин намуд.

Иштирок ва суханронии Пешвои миллат муҳтарам Эмомалӣ Раҳмон дар ҷаласаи якуми Шӯрои миллии кор бо ҷавонони назди Ҳукумати мамлакат (27 - уми майи соли 2016) саҳифаи наверо дар таърихномаи ҳаракати ҷавонони соҳибистиқлоли кишвар оғоз намуд. Боиси таъкид аст, ки дар заминаи дастуру супоришҳои Пешвои муаззами миллат санаи 6 - уми майи соли 2019 бо ибтикори Раиси вилоят Раҷаббой Аҳмадзода ҷаласаи нахустини Шӯрои миллии кор бо ҷавонони назди Раиси вилоят баргузор гардида, дар назди ҷавонон вазифаҳои мушаххас гузошта шуд.

Тағйиру иловаҳои ба Конститутсияи мамлакат воридшуда (22 - юми майи соли 2016) барои фаъолияти ҷавонон майдони боз ҳам фарох кушода, ҷиҳати иштирок дар идоракунии давлат ва интихоб ба мақоми роҳбарии шохаҳои ҳокимият заминаи мусоид фароҳам овард. Пешвои миллат соли 2017 - ро “Соли ҷавонон” эълон намуданд, ки онро метавон давоми мантиқии он ташаббусҳо номид, ки ҳанӯз аз рӯзҳои аввали соҳибистиқлолӣ таваҷҷуҳи зиёд нисбат ба ҷавонон доштанд. Ҳукумат дар сиёсати худ ба ҷавонон такя карда, тарбия намудан ва ба камол расонидани насли ҷавону созанда, посдорандаи фарҳангу ҳувияти миллиро яке аз вазифаҳои аввалиндараҷаи худ медонад. Дар мамлакат солҳои 2019 - 2021 “Солҳои рушди деҳот, сайёҳӣ ва ҳунарҳои мардумӣ” эълон гардидааст, ки дар ин ҷода саҳми ҷавонон беназир аст. Ин нерӯи азими кишвар бояд бо истифода аз тамоми имкониятҳо донишу таҷриба, истеъдод, қобилияти фитрӣ ва тафаккури эҷодии худро баҳри рушду нумӯи диёри азизи худ масраф намоянд.

Саноатикунонии кишвар ва ба ин васила расидан ба ҳадафҳои стратегии мамлакат бо қувваи ҷавонон амалӣ мегардад, зеро ояндаи кишвар аз онҳо вобаста аст. Дар Ҷумҳурии Тоҷикистон аксарияти аҳолиро ҷавонон ташкил медиҳанд. Онҳо идомадиҳандаи кору пайкори насли калонсол, нерӯи созанда ва иқтидори воқеии пешрафти ҷомеа мебошанд. Дар Паёми навбатии Президенти мамлакат ба Маҷлиси Олӣ чунин омадааст: “Ҳукумати Тоҷикистон ташаббусу пешниҳодҳои созандаи ҷавононро ҳамеша дастгирӣ намуда, барои амалӣ гардидани онҳо имконият фароҳам меорад”. Пешвои миллат бо ифтихормандӣ аз ҷавонони замони истиқлол ба савияи илму дониш, маърифату ҷаҳонбинӣ, сатҳи тафаккур ва одобу ахлоқи онҳо баҳои сазовор додаанд, ки ин ташаббус аз ҷавонон масъулияти дучандро тақозо менамояд.

Давлату Ҳукумат ҷавононро дастгирӣ намуда, бо мақсади баланд бардоштани самаранокии сиёсати давлатии ҷавонон ва фаъолгардонии иштироки онҳо дар ҳаёти иҷтимоию иқтисодӣ тадбирҳои судмандро роҳандозӣ намуда истодааст. Ҳамчунин, қайд бояд намуд, ки дар шароити ташаннуҷи рӯзафзуни авзои сиёсии ҷаҳон ва тағйиру таҳаввулоти босуръати он, инчунин торафт вусъат гирифтани низоъҳои байнимазҳабӣ ва авҷи ҷиноятҳои муташаккили фаромарзӣ зиракии сиёсии ҷавонон аҳамияти бағоят бузург касб менамояд. Бо таъсири интернет, шабакаҳои мухталифи иҷтимоӣ ва дигар воситаҳои иттилоотӣ иддае аз ҷавонони сустиродаву ноогоҳ ба доми тазвири гурӯҳҳои манфиатҷӯ афтода, ба миллату Ватани худ хиёнат намуданӣ мешаванд, ки ин кори бархе аз онон обрӯ ва мақоми мамлакатро дар арсаи байналмилалӣ паст мегардонанд.

Ҷавонон ҳамеша дар хотир дошта бошанд, ки давлату Ҳукумат аз тамоми шароиту имкониятҳо истифода бурда, баҳри беҳтар ва шоиста гардидани зиндагии ҷавонон кӯшиш менамояд, онҳо бояд ба қадри кишвари ободу осоишта, истиқлолияту ваҳдат бирасанд. Шоистаи зикр аст, ки санаҳои 30 - юми март - 2 - юми апрели соли 2019 Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон зимни ташрифашон ба вилояти Суғд бо ҷараёни корҳои бунёдкорию созандагӣ шинос гардида, қатори дигар иншооти нав - бинои Қасри ҷавонон ба номи Лоиқ Шералиро дар маркази вилоят ифтитоҳ бахшиданд.

 Баъд аз шиносоӣ бо шароити корӣ дар толору синфхонаҳои Қасри ҷавонон Сарвари давлат муҳтарам Эмомалӣ Раҳмон зимни суханронӣ иброз намуданд, ки “дар шароити бисёр мураккаби ҷаҳони муосир нақши ҷавонон дар мубориза бар зидди ҳар гуна андешаю афкори зарарноку хатарбори гурӯҳҳои ба суботи ҷомеа таъсиргузор ба манфиати давлату миллати Тоҷикистони соҳибистиқлол муҳим мебошад”. Пешвои миллат дар ин мулоқот аз ҷавонон даъват ба амал оварданд, ки бо истифода аз шароити муосири хубу арзанда барои омӯзиш ва фаъолият, дар руҳияи худшиносиву худогоҳӣ ва ватандӯстиву ватанпарастӣ фаъолият намуда, барои пешрафт ва ободии сарзамини аҷдодӣ - Тоҷикистони азиз саҳми босазои худро гузоранд.

 Боиси таъкид аст, ки бо мақсади дар сатҳи баланди сиёсию фарҳангӣ, оммавию варзишӣ, тарбиявию ахлоқӣ таҷлил намудани Рӯзи ҷавонони Тоҷикистон қарори Раиси вилоят аз 25 - уми апрели соли 2019, №185 “Дар бораи таҷлили Рӯзи ҷавонони Тоҷикистон дар вилояти Суғд таҳти унвони “Ҷавонон - пайрави Пешвои миллат!” ба тасвиб расидааст. Тибқи қарори мазкур дар тамоми шаҳру ноҳияҳои вилоят силсилаи чорабиниҳои мухталифи фарҳангию маърифатӣ ва варзишӣ ба нақша гирифта шудаанд. Ҳамчунин, ба ин муносибат нақшаи чорабиниҳои алоҳида оид ба ташкил ва баргузор намудани мусобиқаи кушоди вилоятӣ барои дарёфти Ҷоми Раиси вилояти Суғд аз рӯи 15 намуди варзиш таҳия гардидааст, ки барои дар сатҳи баланду хотирмон гузаронидани Рӯзи ҷавонон мусоидат хоҳад намуд.

Чунин иқдом дар вилоят бори аввал сурат гирифта, ба он варзишгарони Ҷумҳуриҳои Қазоқистон, Ӯзбекистон ва Қирғизистон даъват шудаанд. Ин чорабинӣ бо мақсади тарғиби тарзи ҳаёти солим дар байни ҷавонону наврасон, тақвият бахшидани дӯстии байни ҷавонони минтақаҳои гуногун, муайян намудани беҳтарин варзишгарон ва ҷалби бештари ҷавонону наврасон ба варзиш ва тарбияи ҷисмонӣ амалӣ мегардад.

Итминони комил дорем, ки насли ҷавони имрӯза бо шукргузорӣ аз соҳибистиқлолии кишвар таҳти сарварии Пешвои муаззами миллат муҳтарам Эмомалӣ Раҳмон бо эҳсоси баланди ватандорӣ таҳсилу фаъолият намуда, соҳибони минбаъдаи ин сарзамини ободу мустақил хоҳанд гардид.

Мирзоғуфрон ҒАФУРОВ,
 сармутахассиси шуъбаи рушди иҷтимоӣ ва
робита бо ҷомеаи дастгоҳи Раиси вилояти Суғд

Озод РАҲИМОВ,
раиси Шӯрои донишҷӯёни Донишгоҳи давлатии Хуҷанд
ба номи академик Бобоҷон Ғафуров

Читать далее