13 May 2019

Шиносоии Раиси вилоят бо ҷараёни сохтмони иншооти гуногун дар ноҳияи Ҷаббор Расулов

Дар қатори дигар шаҳру ноҳияҳои вилояти Суғд дар ноҳияи Ҷаббор Расулов низ ба пешвози ҷашни таърихии 30-солагии Истиқлолияти давлатии Ҷумҳурии Тоҷикистон сохтмони даҳҳо иншооти гуногун идома дорад.

Дар доираи сафари кории худ ба ноҳияи Ҷаббор Расулов Раиси вилоят Раҷаббой Аҳмадзода ҷараёни сохтмони як қатор иншоотро мавриди таваҷҷуҳ қарор дод. Раиси вилоят аз ҷумла бо рафти бунёди кӯдакистони хусусӣ шинос гардид. Чуноне иттилоъ дода шуд, кӯдакистони нав аз ҷониби соҳибкорзан Олтуной Бутаева сохта мешавад ва харҷномаи лоиҳавии он 1 миллиону 100 000 сомониро ташкил медиҳад. Бинои сохташаванда аз ду ошёна иборат буда, бо ифтитоҳи он 200 кӯдак ба таълиму тарбия фаро гирифта хоҳад шуд. Ин шашумин кӯдакистони хусусӣ дар ноҳия маҳсуб ёфта, шумораи умумии кӯдакистонҳои ноҳия 19 ададро ташкил мекунад.

Читать далее

Сафари кории Раиси вилоят ба ноҳияи Ҷаббор Расулов

10 майи соли 2019 Раиси вилояти Суғд Раҷаббой Аҳмадзода ҷиҳати шиносоӣ бо раванди корҳои саҳроӣ ба ноҳияи Ҷаббор Расулов сафар кард.

Зимни сафар Раиси вилоят нахуст аз пойгоҳи обкашии “Деҳмой-1” боздид намуд ва тавре иттилоъ дода шуд, айни замон ҳафт дастгоҳи обкашии пойгоҳ фаъол аст. Бо дастгирии роҳбарияти вилоят агрегати ҳаштуми пойгоҳ низ аз таъмир бароварда шуд, ки ин иқдом бешак барои беҳтар шудани кори пойгоҳ мусоидат мекунад. Дар ҳузури Раиси вилоят агрегати ҳаштум низ паз аз бозистии дусола ба кор андохта шуд.

Читать далее

Шиносоии Раиси вилоят бо ҷараёни сохтмони корхонаҳои нави саноатӣ дар шаҳри Бӯстон

9 майи соли равон Раиси вилояти Суғд Раҷаббой Аҳмадзода ба шаҳри Бӯстон сафари корӣ анҷом дода, бо ҷараёни бунёди корхонаҳои саноатӣ шинос гардид.

Дар доираи омодагиҳо ба ҷашни 30-солагии Истиқлолияти давлатии Ҷумҳурии Тоҷикистон ва ҷиҳати иҷрои супоришҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар самти ба роҳ мондани истеҳсоли маҳсулоти воридотивазкунанда дар шаҳри Бӯстон сохтмони ду корхонаи нав ҷараён дорад.

Читать далее

Бахшида ба Рӯзи ҷавонони Тоҷикистон барои дарёфти Ҷоми Раиси вилояти Суғд мусобиқаҳои гуногун доир мешавад

Бо мақсади иҷрои дастуру супоришҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар самти тарғиби тарзи ҳаёти солим ва ҷалби наврасону ҷавонон ба варзиш дар вилояти Суғд тадбирҳои зарурӣ андешида мешавад.

Аз ҷумла, бо ташаббуси роҳбарияти вилоят дар доираи чорабиниҳои марбут ба Рӯзи ҷавонони Тоҷикистон ва як моҳи ҷавонӣ дар шаҳру ноҳияҳои вилоят барои дарёфти Ҷоми Раиси вилояти Суғд мусобиқаҳои гуногуни варзишӣ гузаронида мешавад.

Мусобиқаҳо аз рӯи намудҳои тенниси рӯи миз, футбол, шоҳмот, бокс, гӯштини камарбандӣ, гӯштини миллӣ, гӯштини тарзи озод, волейбол, камонварӣ, дастхобонӣ, велосипедронӣ, баскетбол, шиноварӣ, тирпаронӣ ва картинг доир хоҳад шуд.

Барои ҳавасмандгардонии варзишгарон, гирандагони ҷойҳои ифтихорӣ ва Ҷоми Раиси вилояти Суғд аз рӯи 15 навъи мусобиқаҳо 500 ҳазор сомонӣ равона карда мешавад.

Хадамоти матбуоти
Раиси вилояти Суғд

Читать далее

МОРАТОРИЙ. ПАС САНҶИШ ЧАРО?

Бо мақсади таъмин намудани риояи дақиқи муқаррароти қонунгузорӣ дар самти мораторий ба Прокуратураи генералӣ супориш дода мешавад, ки дар ҳамкорӣ бо Кумитаи давлатии сармоягузорӣ ва идораи амволи давлатӣ нисбат ба масъулони мақомоти давлатие, ки ба фаъолияти соҳибкорон беасос дахолат карда, садди роҳи рушди соҳибкорӣ мешаванд, чораҳои зарурӣ андешад.

Аз Паёми Президенти мамлакат ба Маҷлиси Олии Ҷумҳурии Тоҷикистон
аз 26 декабри соли 2018

Солҳост, ки баҳри беҳтар намудани фазои мусоиди соҳибкорӣ, муҳайё сохтани ҷойи корӣ, хубтар ба роҳ мондани вазъи иқтисодии ҷомеа Асосгузори сулҳу ваҳдати миллӣ – Пешвои миллат, Президенти мамлакат муҳтарам Эмомалӣ Раҳмон мораторий эълон намуда истодаанд. Ва соли пеш дар Паёми Президенти мамлакат ба Маҷлиси Олии Ҷумҳурии Тоҷикистон (аз 26 декабри соли 2018) ба ҳамаи намудҳои соҳибкории истеҳсолкунанда мораторий эълон гардид. Аслан мораторий чист? Мораторий муваққатан боздоштани қисми муайяни ваколатҳои дар асоси қонун ва ё дигар санадҳои меъёрии ҳуқуқӣ муайяншудаи мақомоти ваколатдори давлатии санҷиш вобаста ба санҷишҳои фаъолияти субъектҳои соҳибкорӣ, бахусус дар соҳаҳои истеҳсолӣ, таъсиси корхонаҳои нави истеҳсоли молу маҳсулот ва ё техникаю технологияи навро барои васеъ намудани воситаҳои истеҳсолӣ ҷалб менамоянд, дониста мешавад. Ва мақсади асосии мораторий тақвият бахшидан ба рушди соҳибкорӣ буда, муҳайё сохтани ҷойи корӣ, беҳтар кардани вазъи иқтисодию иҷтимоӣ мебошад.

Новобаста аз он то ҳол дар баъзе корхонаҳо мақомотҳои санҷишӣ ташриф меоранд. Ҳол он ки пас аз ироаи Паёми Президенти мамлакат ба Маҷлиси Олии Ҷумҳурии Тоҷикистон Фармони Президенти Ҷумҳурии Тоҷикистон «Дар бораи ворид намудани тағйир ба Фармони Президенти Ҷумҳурии Тоҷикистон аз 16 январи соли 2018, № 990» 15 январи соли 2018 ба имзо расида буд. Чаро чунин ҳолат то ҳол рух дода истодааст?

Тавре аз иттилои Раёсати андози вилоят бармеояд, масъулини корхонаҳои саноатӣ фаъолияти хешро дар самти афзун гардонидани ҳаҷми истеҳсоли маҳсулот, беҳтар намудани сифати он, таъсиси ҷойҳои нави корӣ ба роҳ монда, ҳисоботи андоз, эъломияҳои он ва маълумотҳои вобаста ба андозбандиро сари вақт пешниҳод менамоянд. Пас ташрифи баъзе аз мақомоти санҷишӣ ба корхонаҳои саноатӣ дар чист?

Дар ин бора Зафар Назарзода, ёрдамчии калони Прокурори вилояти Суғд оид ба иҷрои қонунгузории андоз, мушовири адлияи дараҷаи 1 чунин ибрози назар намуд:

- Мақсади асосии ба тасвиб расидани Фармони Президенти мамлакат роҷеъ ба мораторий дастгирии давлатии фаъолияти соҳибкорон дар соҳаи истеҳсол, ташкили ҷойҳои корӣ, таҳкими иқтидори саноатию содиротии ҷумҳурӣ, кам намудани санҷишҳо ва фароҳам овардани фазои мусоид барои соҳибкорӣ аст. Дар ин замина 21 феврали соли 2018 Қонуни Ҷумҳурии Тоҷикистон «Дар бораи мораторий ба санҷиши фаъолияти субъектҳои соҳибкорӣ дар соҳаҳои истеҳсолӣ» қабул гардид ва тибқи муқаррароти он қисми муайяни ваколатҳои мақомоти ваколатдори давлатӣ вобаста ба санҷишҳои фаъолияти субъектҳои соҳибкорӣ дар соҳаҳои истеҳсолӣ муваққатан боздошта шудааст, - қайд кард З. Назарзода.

Дар ҳудуди вилоят дар асоси қарори Комиссияи давлатӣ оид ба татбиқи мораторияи санҷиш ба Феҳрасти субъектҳои соҳибкорӣ 633 субъекти фаъолияти соҳибкории истеҳсолкунанда дохил карда шудааст. Дар бобати иҷрои дастуру супоришҳои Президенти мамлакат, ки аз вохӯрӣ бо кормандони мақомоти прокуратура аз 13 марти соли 2018 бармеояд, назорати иҷрои талаботҳои қонуни мазкур мунтазам ба роҳ монда, фаъолияти мақомотҳои ваколатдори назоратӣ мавриди санҷиш қарор дода шуд.

Зимни санҷишҳои аз ҷониби намояндагони мақомоти Прокуратураи вилоят гузаронидашуда аз тарафи мақомотҳои ваколатдори назоратӣ ҳолатҳои бархилофи талаботҳои қонун гузаронидани санҷишҳо дар фаъолияти корхонаҳои истеҳсолӣ ошкор карда шуда, ҷиҳати бартараф намудани сабаби қонунвайронкуниҳои ҷойдошта чораҳои зарурӣ андешида шуданд.

Тибқи талаботи моддаи 7 - и қонуни мазкур дар давраи татбиқи мораторий як қатор қонунҳо, аз ҷумла Қонуни Ҷумҳурии Тоҷикистон “Дар бораи ҳифзи муҳити зист” вобаста ба санҷиши фаъолияти субъектҳои соҳибкорӣ дар соҳаҳои истеҳсолӣ боздошта шуда бошад ҳам, аммо бархе аз намояндагони Раёсати ҳифзи муҳити зисти вилоят ғайриқонунӣ амал карданд. Чунончӣ, дар асоси қарори сардори Раёсати ҳифзи муҳити зисти вилоят аз тарафи мутахассисони раёсат Р. Раҷабов ва бахши ҳифзи муҳити зисти шаҳри Гулистон Т. Ҳазратқулов фаъолияти ҶДММ “Чарми Хуҷанд” - и шаҳри Гулистонро бо мақсади риояи талаботи қонунгузорӣ дар соҳаи ҳифзи муҳити зист санҷиш гузаронида, санад тартиб додаанд. Тавре З. Назарзода иттилоъ дод, ҶДММ “Чарми Хуҷанд” корхонаи истеҳсолӣ буда, ба феҳрасти субъектҳои соҳибкорӣ дар соҳаҳои истеҳсолӣ шомил карда шуда, он ба коркарди пӯст ва пашм машғул ва дар давраи татбиқи мораторий санҷиши фаъолияти ҷамъияти номбурда манъ аст.

Ё худ, КДФ “Обтаъминкунӣ ва канализатсия” - и шаҳри Панҷакент низ ба феҳрасти субъектҳои соҳибкорӣ дар соҳаҳои истеҳсолӣ шомил буда, гузаронидани санҷиши қонунгузорӣ дар соҳаи ҳифзи муҳити зист қатъиян манъ аст. Аммо бархилофи Фармони мазкур аз 9 - уми апрел то 12 апрели соли 2018 аз тарафи мутахассисони Раёсат Ҷ. Маматов ва М. Пӯлотов фаъолияти ин корхона ғайриқонунӣ санҷида, санад тартиб дода шудааст.

Шахсони масъули мақомоти иҷроияи ҳокимияти давлатии шаҳри Конибодом бархилофи моддаи 22 - и Қонуни Ҷумҳурии Тоҷикистон “Дар бораи ҳимоя ва дастгирии давлатии соҳибкорӣ” ва Қонуни Конститутсионии Ҷумҳурии Тоҷикистон “Дар бораи мақомоти маҳаллии ҳокимияти давлатӣ” амал кардаанд. Яъне бо амри собиқ раиси шаҳри Конибодом аз 7 сентябри соли 2018 бинобар пайдо гардидани зарурият дар самти саривақт омода намудани маълумотҳои оморӣ оид ба воридоти ашёи хом, интиқоли маҳсулоти тайёр ва бо мақсади иҷрои нақшаи қисми даромади буҷети маҳаллӣ ва инчунин ҷиҳати назорат аз болои риояи техникаи бехатарӣ ва зидди сӯхтор дар назди ҶДММ “Нафтрасон” - и шаҳр дидбонгоҳи шабонарӯзии ғайрирасмӣ ташкил кардаанд. Баъди он як муддати муайян аз ҷониби кормандони вобасташуда автомошинаҳои ба ҳудуди ҷамъият воридшаванда ва содиршаванда дошта, ҳуҷҷатҳои онҳо санҷида, соатҳои зиёд беасос манъ карда, ба ин васила ба фаъолияти муътадили ҷамъият халал расонидаанд. Пас аз тафтишоти мақомоти прокуратураи вилоят 12 октябри соли сипарӣ ба амри собиқ раиси шаҳр эътироз оварда, он бекор карда шуда, қонунвайронкунӣ бартараф гардид.

Мақсаду мароми мораторий дар чист? Он тартиби гузаронидани санҷишҳои мақомотҳои давлатиро нисбати фаъолияти истеҳсолӣ ба танзим дароварда, барои пешбурди фаъолияти соҳибкорӣ шароити мусоид барои сармоягузорӣ фароҳам меоварад. Дар ин замина, фаъолияти соҳибкории ба истеҳсоли молу маҳсулот нигаронидашуда бояд нисбатан рушд ёфта, ҳаҷми истеҳсоли маҳсулоти дохила тадриҷан афзоиш ёбад. Бо ин мақсад, соҳибкорони ватанӣ ва намояндагони мақомотҳои санҷишӣ дастгирӣ ва ғамхориҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро дарк намуда, баҳри рушду нумӯи Тоҷикистон саҳмгузор бошанд ва талаботи муқаррарнамудаи қонунгузориро риоя намоянд.

Дар Паёми Пешвои миллат омадааст: “Мо соли ҷорӣ бо мақсади бартараф намудани санҷишҳои беасосу такрорӣ ва фароҳам овардани фазои мусоид барои рушди соҳибкорӣ ба ҳама гуна санҷишҳои фаъолияти соҳибкорони истеҳсолӣ дар давоми ду сол мораторий эълон намудем, ки аз он қариб 2000 субъекти соҳибкорӣ дар соҳаҳои истеҳсолӣ бархурдор гардиданд”. Яъне ба муҳлати ду сол эълон гардидани мораторий аз ҷониби Пешвои муаззами миллат муҳтарам Эмомалӣ Раҳмон имкон медиҳад, ки фаъолияти соҳибкорӣ дар вилоят рушд ёфта, ба вазъи иқтисодиву иҷтимоии кишвар таҳким бахшида, санҷишҳои беасосу такрорӣ барҳам хӯрад.

Тавҳида ҶӮРАЕВА,
“Ҳақиқати Суғд”

Читать далее

ОМОДАГӢ БА ИМТИҲОНҲОИ МАРКАЗОНИДАИ ДОХИЛШАВӢ

Маркази миллии тестии назди Президенти Ҷумҳурии Тоҷикистон ҳамаи шароитҳоро барои супоридани имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбӣ муҳайё кардааст. Дар ҳолати комёб гаштан дар имтиҳонҳо довталаб метавонад ба муассисаи таълимии дилхоҳ - донишгоҳу донишкада ва ё коллеҷ дохил шавад. Агарчанде омили комёбӣ дар роҳи донишҷӯйӣ донишу маҳорати арзанда доштан аст, аммо донистани шарту талаби имтиҳонсупорӣ, қоидаҳои он ва риояи ин шарту қоидаҳо низ дар ин маврид зарурат дорад.

Барои имтиҳонҳои марказонидаи дохилшавӣ омода шудани довталабон, истифода кардани онҳо аз хизматрасониҳои «Худро бисанҷ», ки Маркази миллии тестӣ тариқи онлайн дар сомонааш роҳандозӣ кардааст, ба манфиати кор хоҳад буд. Бо истифода аз хизматрасониҳо довталаб дараҷаи дониши худро санҷида, бо намунаи саволу масаъалаҳои барои имтиҳонҳои марказонидаи дохилшавӣ пешбинишуда ва тарзи иҷрои тестҳои имтиҳон шинос мешавад ва барои ҳалли он кӯшиш менамояд.

Хушбахтона, имсол дар имтиҳонҳои марказонидаи дохилшавӣ навгоние ҷорӣ шуда, як қатор довталабонро хушнуд гардонд. Имсол ва солҳои баъдӣ низ қабули довталабоне, ки хатмкардагони синфи 9-уманд, ба муассисаҳои таълимии таҳсилот миёнаи касбӣ ба воситаи Марказ ба роҳ монда мешавад. Ин навгонӣ имконият медиҳад, ки довталабон ихтисосҳои муайянро аз муассисаҳои таълимии таҳсилоти миёнаи касбӣ интихоб намоянд. Дар интихоби ихтисос дурбинонаю нуктасанҷона амал кардани довталабон шарти асосии қабулшавӣ аст, зеро саҳви онҳо дар интихоби ихтисос боиси пайомадҳои ногувор дар таҳсили минбаъдаашон хоҳад гашт.

Барои ин мо, аъзои Маркази миллии тестиро мебояд, ки ба довталабон моҳияти имтиҳонҳои марказонидаи дохилшавиро ба пуррагӣ фаҳмонем, мафҳумҳои асосиро шарҳ диҳем ва ба онҳо раҳнамо бошем. Шурӯъ аз қайди расмии довталаб, кабинети инфиродӣ, комбинатсияи ихтисос, қисмҳои А, АБ - 9, Б, В, Г, қисми имтиҳон, озмуни тақсимот, пешноманависӣ, тест, хол, холи гузариши фаннӣ, шакли таҳсил ва интихоби дурусти ихтисос аз омилҳое ба ҳисоб мераванд, ки аз ҷониби омӯзгорон ба ҳар як довталаб ба пуррагӣ омӯзонида шавад.

Намунаи интихоби комбинатсияи ихтисосҳо дар гурӯҳҳо дар дастури иттилоотию методӣ, ки соли 2019 бо унвони «Роҳнамои довталаб» ба дасти довталабон расидааст, оварда шудааст. Онҳо бо дарназардошти муассисаҳои таълимӣ, шакл ва намуди таҳсил то 12 комбинатсияи ихтисосро интихоб карда метавонанд.

Хатмкунандагони муассисаҳои таҳсилоти миёнаро, ки довталаб ба шумор мераванд, мебояд аз омӯзгорони фаннӣ ва мутахассисон маслиҳат гирифта, ба имтиҳони дохилшавӣ омодагии ҷиддӣ бинанд, то касбу кори муайянеро соҳиб шуда, ба халқу Ватан хизмати арзанда намоянд.

Сарвар FОЗИЕВА,
муовини директор оид ба
таълими Гимназияи № 4, шаҳри Хуҷанд

Читать далее