09 October 2018

Волоияти қонун масъулиятро пазиро бувад!

Дар ҷаласаи ҳайати мушовараи Прокуратураи вилояти Суғд ҷамъбасти фаъолияти ин ниҳод дар нӯҳ моҳи соли равон таҳти раёсати Прокурори вилоят Ҳабибулло Воҳидов мавриди таҳлилу баррасӣ қарор гирифт.

Прокурори вилоят зимни баромади худ қайд кард, ки кормандони мақомот баҳри таъмини волоияти қонун, ҳимояи ҳуқуқу озодиҳои инсон ва шаҳрванд, мубориза алайҳи ҷинояткорӣ дар асоси дастуру супоришҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, бахусус дар вохӯрӣ бо кормандони мақомоти прокуратура аз 13-уми марти соли 2018 баёнгардида фаъолиятро ба роҳ монда, корҳои муайянро дар доираи қонунҳои амалкунанда ба иҷро расонид.

Аз 8809 муроҷиати ба прокуратура воридгардида 2770 адад бевосита аз ҷониби кормандон баррасӣ гардида, 440 адади он қонеъ карда шуданд. Бо онҳо 485 санади эътиноии прокурорӣ қабул гардида, 205 қарори мақомоти тафтишотӣ ва таҳқиқ бекор ва 10 парвандаи ҷиноятӣ оғоз шудааст.

Дар самти назорати умумии қонунгузориҳо дар бораи муроҷиатҳо, меҳнат, манзил, нафақа, замин, шаҳрсозию меъморӣ, ҳифзи меҳнат ва техникаи бехатарӣ, мақомоти маҳаллии ҳокимияти давлатӣ, буҷет, ҳимояи ҳуқуқи истеъмолкунандагон, ҳифзи муҳити зист, танзими асъор, анъана ва ҷашну маросим, пардохти маблағҳои қувваи барқу об ва дигар қонунгузориҳо санҷида, 4133 ҳолати қонунвайронкунӣ ошкор, бо санадҳои эътиноӣ 7936 ҳазор нафар ба ҷавобгариҳои гуногун кашида, 59,2 миллион сомонӣ зарари моддӣ барқарор гардида, 593 парвандаи ҷиноятӣ оғоз карда шуданд.

Ҳамзамон, бо ҳама самтҳои назорати прокурорӣ зарарҳои моддӣ ба маблағи 127,9 миллион сомонӣ, аз ин 67,8 миллион сомонӣ ба манфиати буҷети давлатӣ ва 60,1 миллион сомонӣ ба фоидаи корхонаҳо рӯёнида шуд. Зиёда аз ин, дар самти назорати иҷрои қонунгузории замин 262 (199) парвандаи ҷиноятӣ оғоз гардида, 3909 (2086) гектар қитъаи замини худсарона ишғолгардида ба ҳолати аввала баргардонида, ба 192 қарори ғайриқонунии раисони шаҳру ноҳияҳо эътирозҳо оварда шуд, ки аз ин 163 қарор вобаста ба қонунгузории замин мебошанд.

Ҳамзамон, қайд гардид, ки дар рафти санҷиши иҷрои қонунгузорӣ дар бораи муроҷиатҳои шахсони воқеӣ ва ҳуқуқӣ ҳолатҳои вайрон кардани муҳлат бе баррасӣ мондан, аз натиҷаи баррасӣ хабар надодан дар фаъолияти мақомоти давлатии шаҳру ноҳияҳо ошкор гардида, ба ҷавобгарии мухталиф кашида шудаанд. Нисбат ба 8 нафар парвандаҳои ҷиноятӣ оғоз гардидааст.

 Дар ҷаласа ҳамчунин оид ба санҷиши қонунгузорӣ дар раванди бехатарӣ ва ҳифзи меҳнат дар корхонаю муассиса ва ташкилот, назорати иҷрои қонунҳо вобаста ба ноболиғон ва ҷавонон, вазъи иҷрои қонунгузорӣ дар бораи масъулияти падару модар дар таълиму тарбияи фарзанд, дар самти назорати қонунӣ будани санадҳои судҳо роҷеъ ба парвандаҳои граҷданӣ, иқтисодӣ ва оилавӣ фикру андешаҳо баён гардиданд.

 Дар охир Прокурори вилоят мушовири давлатии адлияи дараҷаи сеюм Ҳабибулло Воҳидов изҳор намуд, ки минбаъд низ баҳри таъмини волоияти қонун, ҳимояи ҳуқуқу озодиҳои шаҳрвандон ва мубориза бар зидди ҷинояткорӣ тамоми чораҳои зарурӣ андешида хоҳад шуд.

Гулҷаҳон МАҲКАМОВА,
“Ҳақиқати Суғд”

Читать далее

Деваштич: Ҳадаф, истеҳсоли беш аз 110 ҳазор тонна картошка

- Кишоварзӣ яке аз соҳаҳои асосии рушди иқтисодиёт маҳсуб ёфта, дар пешрафти ноҳия нақши муҳим мебозад. Дар асоси супоришҳои Ҳукумати ҷумҳурӣ дар Ҷамоату деҳоти ноҳия майдони кишти картошка сол аз сол зиёд гардида истодааст, - гуфт муовини аввали раиси ноҳия .

- Соли равон майдони кишти картошка дар ҳамаи шаклҳои хоҷагидорӣ 4422 гектарро ташкил медиҳад, ки аз он замини картошкаи хоҷагиҳои кишоварзӣ 3257,7 гектар, аҳолӣ 1164,3 гектар мебошад, ки ин нисбат ба солҳои қаблӣ 647 гектар зиёд буда, аз он 619 гектар аз ҳисоби хоҷагиҳои кишоварзӣ ва боқимонда 28 гектар аз аҳолӣ аст.

 Хоҷагиҳои кишоварзӣ имсол тасмим гирифтанд, ки 110550 тонна картошка истеҳсол намоянд, ки нисбат ба соли гузашта 10000 тонна зиёд мебошад.

Имсол дар ҳудуди ҳоҷагиҳои кишоварзии Ҷамоатҳои деҳоти Исмоили Сомонӣ зиёда аз 1059,59, Ваҳдат – 835,57 гектар, Муҷун - 374,42, Росровут - 87,53, Далён - 789,75, Ғазантарак - 59,98, Яхтан - 42,94, шаҳраки Ғончӣ - 7,46 гектар ва дигар ташкилот - 0,46 гектар картошка кишт карда шуд, -зикр намуд номбурда.

Аз минтақаҳои поёнӣ 180-200 сентнерӣ, миёна 230-250 сентнерӣ ва наздикӯҳии майдони картошка 260 - 280 сентнерӣ ҳосили картошка гирифта истодаанд. Ба ҳисоби миёна ҳосилнокӣ аз ҳар як гектар 250 - 260 сентнерӣ, дар баъзе хоҷагиҳои дигар бошад, 300 - 350 сентнериро дар бар мегирад.

То имрӯз бештар аз 2000 гектар майдони картошкаи ҳоҷагиҳои кишоварзии ноҳия наздик 52000 тонна ҳосил ҷамъоварӣ гардида, дар ин самт корҳо идома доранд. Барои ҷамъоварии 3257 гектар майдони картошка зиёда аз 16285 нафар коргар ва аъзои хоҷагиҳои кишоварзӣ ҷалб шудаанд. Дар кооперативи тиҷоратии «Овчии Ғончӣ» соли равон 253 гектар картошка кишт шуд, ки нисбат ба соли қаблӣ 28 гектар зиёд мебошад. То имрӯз аз он 150 гектараш ҷамъоварӣ гардида, аз ҳар як гектар ба ҳисоби миёна 270-280 сентнерӣ ҳосил ҷамъ оварда шуд.

Хоҷагиҳои кишоварзии ноҳия барои васеъ намудани майдони картошка, баланд бардоштани ҳосилнокии он ва ба ин васила таъмини бозори дохилӣ бо картошкаи хушсифат ба танзим даровардану роҳ надодан ба болоравии нарх аз имкониятҳои мавҷуда пурсамар истифода бурда, кӯшиш менамоянд, ки мардумро бо картошкаи босифати худӣ таъмин созанд.

- Бояд зикр кард, ки соли гузашта кишоварзони ноҳия дар ҳамаи шаклҳои хоҷагидорӣ 99622 тонна картошка истеҳсол карда буданд, ки аз он 72000 тонна аз ҳисоби хоҷагиҳои кишоварзӣ мебошад, - гуфт муовини аввали раиси ноҳия.

 Ҳамзамон, номбурда зикр намуд, ки камбориш омадани давраи зимистону баҳори соли ҷорӣ барои таъмини хӯроки чорво мушкилиҳои зиёд пеш овард. Чорводорони ноҳия ба ин нигоҳ накарда, баҳри дар амал татбиқ намудани дастуру супоришҳои Пешвои миллат муҳтарам Эмомалӣ Раҳмон оид ба беталаф нигоҳ доштани чорво дар давраи тирамоҳу зимистон саъйу талош доранд. Дар ноҳия ҷамъоварии хӯроки чорво барои ҳар як сар моли шартӣ 14,6 сентнерӣ рост меояд, ки ин нисбат ба ҳамин давраи соли гузашта зиёд аст.

Хоҷагиҳои кишоварзии ноҳия бояд мувофиқи дурнамо 22500 тонна хошоки дурушт ҷамъоварӣ намоянд. То имрӯз 35000 тонна хошок ҷамъоварӣ гардидааст, ки аз нақша 12500 тонна зиёд мебошад.

Маъмурахон САМАДОВА,
Нодир ТУРСУНЗОДА,
«Ҳақиқати Суғд»

Читать далее

Терроризм хатари ҷиддӣ ба амнияти давлат

Сарнавишти миллат дар ҳама давру замон ба вазъи ҷуғрофӣ, иҷтимоӣ, сиёсӣ, ахлоқӣ, иқтисодӣ, фикрӣ ва фарҳангӣ вобастагӣ дошт.

Кӯшишҳои тақсимоти нави ҷаҳон дар байни давлатҳои қудратманд аз солҳои 90-уми сада ХХ оғоз гардида буд ва то имрӯз идома дорад. Он ҷаҳони муосирро ба як бӯҳрони шадиди сиёсию иқтисодӣ кашида, боиси торафт дар ин замина вусъат ёфтани амалҳои террористӣ  гашта истодааст.

Ин падида, яъне терроризму экстремизм дар ҷаҳони ислом дар шакли тезу тунд сурат гирифта, боиси вайрон шудани амну субот дар ин ё он кишвар шуда истодааст. Барои расидан ба ин ҳадаф давлатҳои абарқудрат мекӯшанд, бо ҷалби ҷавонони ноогоҳ вазъиятро ноором созанд.

Баъзе нохалафони аз илму фарҳангу хираду фаросати инсонӣ бехабар миллати тамаддунофари бостонии моро бадном карданӣ шуда, ба роҳи ифротгароиву зиштиву фасод мераванд ва ҷони худро зери хатар мегузоранд. Чунин ашхос набояд фаромӯш кунанд, ки хиёнат ба Ватану миллат хиёнат ба падару модар ва фарзанду бародару хоҳар аст. Афсӯс, аз кӯтоҳандешӣ ин афрод ба қадри гузаштагони бофаросату нектинат ва тамаддунофару нексиришти хеш намерасанд.

Барои пешгирӣ аз паҳншавии ин падидаи даҳшатбор ифротгароӣ хусусан мо - омӯзгорон, падару модарон, зиёиёни кишварро зарур аст, ки наврасону ҷавононро дар рӯҳияи худшиносӣ, ҳувияти миллӣ, ватандӯстӣ тарбия намоянд.

 Нарзӣ Салоҳиддин,
мудири кафедраи забон ва адабиёти тоҷики
Донишгоҳи давлатии Хуҷанд

Читать далее

Филме, ки эҳсосу хирадро такон медиҳад!

Синамогарони ҷавону пуртакопӯи муассисаи давлатии «Суғдсинамо»-и ба номи Комил Ёрматов дар давоми се соли фаъолият фазои синамои тоҷикро бо 7 филми хубу диданӣ пуртар карданд ва ҳоло низ бо ҳамон шавқу шӯру зарфияти ҳунарӣ кори сангину пурмасъулияти хешро идома медиҳанд.

Баъзе аз филмҳои банаворгирифтаи онҳо, аз қабили «Коса», «Духтари Сайҳун» синамои тоҷикро берун аз кишварамон низ муаррифӣ намуда, ҷоизаҳо ба даст оварданд. Чанде пеш боз як филми наву хуби дигар бо номи «Сайёра ранг иваз мекунад» ба феҳристи филмҳои «Суғдсинамо» зам шуд ва 22-юми сентябр дар толори Театри ба номи Камоли Хуҷандии шаҳри Хуҷанд нахустнамоиши он баргузор гардид.

Пеш аз намоиш дар даромадгоҳи театр дар фазои мутантану идона дастандаркорону нақшофарони асосии филм ба мухлисони сершумори кинои тоҷик муаррифӣ шуданду дар бораи ҷараёни таҳияи филм суҳбати мухтасар оростанд. Директори ҷавону пурғайрати «Суғдсинамо», коргардони филми мазкур Муҳиддини Музаффар ба ҳамагон арзи сипос намуда, изҳор дошт, ки агар филми навбатии ӯ тавонад дилеро такон диҳад, шоду сарфароз хоҳад буд.

Толори театр пур аз мухлисон буд, ҳатто баъзеҳо ҷойи нишаст наёфтанд ва ин аз маҳбубияти коргардони ҷавону шинохта Муҳиддини Музаффар дарак медиҳад, ки қаблан бо филмҳои хуби дигараш ба дили бинандагон роҳ ёфта буд.

«Сайёра ранг иваз мекунад» филмест дар бораи арзишҳои волои инсонӣ чун муҳаббати хонаводагӣ, номусу шараф, ки онҳоро наметавон ба ивази молу сарвати ҳангуфт ба даст овард. Нақшҳои марказии онро ҳунарпешагони варзидаву шинохтаи кишвар Қурбони Собир, Хуршед Мустафоев, Таҳминаи Раҷаб, Тағоймурод Розиқов ва як гурӯҳ ҷавонони лаёқатманд иҷро кардаанд. Муаллифи филм Бахтиёр Каримов, продюссер Дилошӯб Орифзода, наворбардор Даврон Восидӣ, тадвингар Комил Суғдиён, оҳангсоз Зайниддин Каримов ва директори филм Осим Орифпур мебошанд.

Ҷанри филм мелодрама - детектив буда, суҷаи он пур аз моҷарову гирудорҳои зиёдест, ки ҳушу диққати тамошобинро то охир ба сӯи худ мекашад. Фарид (Қурбони Собир) шахси сарватманду дастдароз, соҳиби ширкат гумон мекунад, ки худ соҳиби тақдири хеш асту чархи гардун ба муроди ӯ мегардад. Писари ягонаи ӯ Ҷовид бо сӯиистифода аз мансабу моли падар бо дӯстонаш доим кӯчагардию авбошӣ мекунаду даст ба домани духтарон мезанад. Донишҷӯи донишкадаи санъат, ғиҷҷакнавози бомаҳорат Сайёра (Таҳминаи Раҷаб) номзади ҷавони дӯстдоштаи хеш аст. Боре чашми гуруснаи Ҷовид ба чеҳраи зебои Сайёра меафтаду мехоҳад ӯро ба доми хеш орад, вале муваффақ намешавад.

Аз ин рӯ, бо зӯрӣ ӯро мерабояду аз номус маҳрум мекунад. Вақти кашокаши Ҷовиду Сайёра тасодуфан теғ ба шиками Ҷовид мезанаду ӯ ҷон медиҳад. Хабари марги Ҷовид дили падарро реш мекунад ва ӯ ба авлодаш қасам мехӯрад, ки қотилро ҳатман меёбаду ҷазо медиҳад. Аммо баъдтар маълум мешавад, ки дар батни Сайёра кӯдак пайдо шудааст. Ин хабар Фаридро аз куштани Сайёра бозмедорад ва интизор мешавад, ки тифл-набера ва ягона меросхӯри ӯ ба дунё ояду баъдан ҷазои Сайёраро диҳад. Ҳамин тавр, бо ҳамин мақсад ӯ Сайёраро ноаён дуздида, ба кӯҳистони дурдаст мебарад ва он ҷо ӯро дар кулбаи сангие нигоҳ медорад.

Сайёра бо вуҷуди ҳама шиканҷаву уқубатҳое, ки Фарид ба сараш меорад, нисбати ӯ кинаву хусумат намеварзад, балки кӯшиш мекунад ба ӯ фаҳмонад, ки қотили фарзандаш худи ӯст, зеро аз хурдӣ ӯро дурусту накӯ тарбият накарда ва ба рафтору кирдораш бетафовут будааст. Саранҷом ин ҳақиқатро Фарид дарк мекунад ва зиндагии ваҳшиёнаи хешро, ки танҳо аз ғаразу манфиатҳои шахсӣ иборат буд ва аз муҳаббат нишоне надошт, пеши назар меораду аз кардаҳояш пушаймон мешавад. Сайёра муваффақ мегардад, ки ин намоди бадию зиштиро ба муҷассамаи некӣ табдил диҳад. Дар охир Фарид барои наҷоти Сайёра ва кӯдаки батни ӯ хешро қурбон мекунад.

Нақши дигаре, ки дар ин филм фарқкунандаву хотирмон аст, нақши хидматгори Фарид Гадо (Хуршед Мустафоев) мебошад, ки ҳунарпешаи варзида онро хеле муассиру ҷолиб иҷро кардааст. Гадо дар охир ба роҳбари хеш хиёнат мекунаду бо душманонаш мепайвандад ва ба курсии ӯ менишинад. Бо ҳамаи ин қонеъ нашуда, мехоҳад, ки тамоми мероси Фаридро аз худ кунад, вале мерос аллакай ба номи набераи Фарид, кӯдаки ҳанӯз ба дунёнаомада гузаштааст. Аз ин рӯ, Гадо мекӯшад, ки модари ҳомиларо аз байн барад ва соҳиби мерос шавад, вале тираш хок мехӯрад. Саранҷом ҳақ ба ҳақдор мерасаду некӣ бар бадӣ пирӯз мешавад.

Як ҷиҳати хуби филми «Сайёра ранг иваз мекунад» ин аст, ки он аз саҳнаҳову гирудорҳои хушку беҳадаф ва саргармкунанда иборат нест, балки ҳар порчаву ҳар саҳнаи он талқингари муҳаббату некӯӣ мебошад, ки дар маҷмӯъ ғояи асосии филмро ташкил додааст.

Номи филм баргирифта аз як саҳнаи зебову ошиқонаи он мебошад, ҳангоме ки ду дилдода дар лаби дарё ғарқи хаёлоти ширин менишинанд, ҷавон мегӯяд: «Вақте ки бо манӣ, сайёра ранг иваз мекунад».

Забони филм низ дурусту содаву ҳамафаҳм буда, аз такаллуфот орист. Гуфтугӯҳо табиӣ сурат гирифтаанд. Қаҳрамонон бо забони фасеҳу фаҳмо гап мезананд. Истиқболи гарму кафкӯбии самимонаи тамошобинон гувоҳи он буд, ки филм воқеан дили онҳоро такон ва нигоҳашонро ба зиндагӣ тағйир додааст.

Баъди анҷоми намоиш Ҳунарпешаи халқии Иттиҳоди Шӯравӣ Ҷӯрабек Муродов ва дигарон «Суғдсинамо»-ро бо ин дастоварди нав табрик карданд.

Назари чанде аз тамошобинон, ки пас аз намоиши филм бо онҳо ҳамсуҳбат шудем, собит намуд, ки филми навбатии «Суғдсинамо» дархури ниёзу хостаҳои онҳост. Алишер Ҷасуров, сокини шаҳри Хуҷанд бештар дар бораи ҷанбаи тарбиявию ахлоқии филм андеша ронда, чунин гуфт: «Мутаассифона, имрӯз баъзе филмҳоеро тамошо мекунем, ки хусусияти тарбиявӣ надоранд, бинанда аз онҳо чизе намегирад, вақт ба тамошои чунин филмҳо беҳуда сарф мешавад. Аммо ман имрӯз хурсанд шудам, ки филми хубу тарбиявӣ тамошо кардам. Бинанда бо дидани ин филм дарк мекунад, ки хушбахтии оила дар ахлоқи неку тарбияи хуби фарзандон аст ва падару модаре, ки ба тарбияи фарзандонашон диққати зарурӣ намедиҳанд, боиси бадбахтии онҳо мегарданд. Меарзад, ки бинанда ин филмро чандин бор тамошо кунад».

Сокини дигари маркази вилояти Суғд Фаридаи Ҷалолро бозии ҷолиби қаҳрамонони асосии филм ба ваҷду ҳаяҷон овардааст. Ӯ мегӯяд: «Қаҳрамонон нақши худро олиҷаноб иҷро карданд, табиӣ, самимона, таъсирбахш.

Ҳар ҳунаре, ки барои ҳунарпешаи ҳирфаиву сатҳи баланди синамо зарур аст, дар бозии онҳо дида мешавад. Коргардон ҳунарпешагонро хеле огоҳонаву оқилона интихоб кардааст. Аз тамошои филм лаззат бурдам».

Ҳамсуҳбатони дигари мо низ ҳамин гуна бо шавқу ҳаяҷон дар бораи филм андешаҳояшонро баён доштанд. «Сайёра ранг иваз мекунад» воқеан филмест, ки дороии синамои тоҷикро меафзояд, онро ба таври шоиста муаррифӣ мекунад ва эҳсосу хиради моро такон медиҳад.

Толиби Луқмон,
рӯзноманигор

Читать далее