10 July 2018

Машварати корӣ дар ҳузури Пешвои миллат Эмомалӣ Раҳмон

9 июл дар Қасри миллат Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо иштироки муовини Сарвазири мамлакат, Раиси шаҳри Душанбе, раисони ноҳияҳои пойтахт ва роҳбарони як қатор вазорату идораҳо оид ба омодагӣ ба ҷашни умумимиллӣ — 30-солагии Истиқлолияти давлатии Ҷумҳурии Тоҷикистон, вазъи корҳои ободонӣ, бунёдкорӣ ва омодагии соҳаҳои иҷтимоӣ ба мавсими зимистони солҳои 2018-2019 дар пойтахти мамлакат машварати корӣ доир карданд.

Дар машварат нахуст ҳисоботи муовини Сарвазири мамлакат, намояндаи Президенти Ҷумҳурии Тоҷикистон дар шаҳри Душанбе барои омода кардани пойтахт ба ҷашни 30-солагии Истиқлолияти давлатии Ҷумҳурии Тоҷикистон Азим Иброҳим вобаста ба ҷараёни иҷрои корҳо ва таҳияи нақшаи чорабиниҳо шунида шуд.

Читать далее

Бозори бузурги «Водии имкониятҳо»

Дар Ярмаркаи байналмилалии савдо “Суғд - 2018” байни ширкатҳо ва соҳибкорони дохилию хориҷӣ зиёда аз 30 шартнома ва меморандуми ҳамкорӣ баста шуданд

Қасри варзиши шаҳри Хуҷанд рӯзҳои 6-7-уми июл ба як бозори бузург шабоҳат дошт, ки харидорону фурӯшандагон, истеҳсолкунандагону истеъмолгаронро аз тамоми минтақаҳои ҷумҳурӣ ва кишварҳои наздику дур дар Ярмаркаи байналмилалии савдо «Суғд 2018» гирди ҳам оварда буд. Дар растаҳои барҳавои он маҳсули дасти ҳунармандони халқӣ, хӯрокворию консерв, хушкмева, маҳсулоти саноати бофандагӣ, сохтмон, нӯшокиҳо, гӯштию ширӣ, меваю сабзавоти тару тоза ва ғайраро гузошта буданд. Иштироккунандагон имкон доштанд, ки бо фаъолияти ширкатҳои хориҷию ватанӣ аз наздик шинос шаванд, молу маҳсулот харидорӣ кунанд, шартномаҳои ҳамкорӣ ба имзо расонанд.

Муҳимтарин масъалаҳо дар ҷаласаҳои алоҳида мавриди муҳокима ва мубоҳисаи иштирокчиёни Ярмаркаи байналхалқии савдо «Суғд-2018» қарор мегирифтанд. Масалан, дар муҳокимаи панелии «Иқтидори Осиёи Марказӣ – дурнамои дастрасии меваю сабзавот ба бозорҳои нав: тамоюл ва имкониятҳо» иштирокдорон хеле фаъол буданд, зеро талабот ба меваҳои шаҳдбор ва сабзавоти болаззати Тоҷикистон дар бозорҳои Қазоқистону Россия торафт зиёд мешавад ва содироткунандагонро зарур аст, ки ба сифати маҳсулот ва хусусан, бастабандии он таваҷҷуҳи ҷиддӣ зоҳир намоянд. Сардори Раёсати кишоварзии вилояти Суғд Хайрулло Бобозода зимни маърӯзааш дар мавзӯи «Иқтидори содиротии меваю сабзавот» гуфт:

– Вилояти Суғд яке аз минтақаҳои аз лиҳози кишоварзӣ ва саноатӣ рушдёфтаи Тоҷикистон аст. Соли 2016 барномаи давлатии мусоидат ба содирот ва истеҳсоли маҳсулоти ивазкунандаи воридот дар Ҷумҳурии Тоҷикистон барои солҳои 2016-2020 қабул гардид.

Ҳадафи асосии ин барнома мусоидат ба татбиқи сиёсати берунии иқтисодии давлат ва баланд бардоштани рақобатпазирии маҳсулоти ватанӣ дар бозорҳои дохилӣ ва берунӣ, зиёд кардани ҳаҷми содироти маҳсулоти ғайри ашёи хом ва кам кардани ҳиссаи молу хизматрасониҳои истеъмолӣ дар ҳаҷми умумии воридот мебошад. Дар натиҷаи ислоҳоти дар ҷумҳурӣ гузаронида миқдори хоҷагиҳои кишоварзӣ дар вилоят аз 68 ҳазор гузашт. Соли 2017 майдони умумии кишти сабзавот 16117 гектар, ҳаҷми истеҳсоли маҳсулот 437,7 ҳазор тонна буд, ки беш аз 53,7 ҳазор тоннаи он бо маблағи умумии 2,5 миллион доллари амрикоӣ ба хориҷи кишвар содирот карда шуд. Мо бовар дорем, ки татбиқи ин барномаи давлатӣ ва ташкили вохӯриҳо, ярмаркаҳо ва намоишгоҳҳо бо харидорон ба вусъати минбаъдаи имкониятҳои содиротии истеҳсолкунандагони маҳсулоти кишоварзии вилояти Суғд мусоидат мекунад.

Баҳсҳо дар ҷаласаи панелии «Туризми вилояти Суғд – иқтидор ва нуқтаи рушд» ҳам муфид ва ҷолиб буданд, зеро имсол дар Тоҷикистон «Соли рушди сайёҳӣ ва ҳунарҳои мардумӣ» эълон шудааст ва таваҷҷуҳ ба ин соҳаҳои муҳим рӯз то рӯз меафзояд.

Дар ҷаласа директори иӣроияи Ассотсиатсияи рушди туризми “Зарафшон” Ӣамшед Юсуфов чунин иброз дошт: Ярмарка соли панҷум аст, ки баргузор мегардад ва натанҳо ба рушди кишоварзӣ, инчунин ба муаррифии имкониятҳои соҳаҳои дигар, аз ҷумла, сайёҳӣ низ мусоидат мекунад. Дар Тоҷикистон имкониятҳои рушди сайёҳӣ хеле зиёд мебошанд, ки истифодаи оқилонаи онҳо даромади калон меоварад.

Боиси хушнудист, ки ҷавонони суғдӣ бо дили пур ва лоиҳаҳои ҷасурона ба соҳибкорӣ ворид мешаванд. Дар яке аз майдонҳои намоишии Ярмарка, ки «Start Up – Чойхона V» ном дошт, ҷавонон чандин лоиҳаҳои бизнеси худро муаррифӣ карданд, ки аз ҷониби коршиносони дохилию хориҷӣ баҳои баланд гирифтанд. Умед аст, ки дар ярмаркаҳои оянда шоҳиди комёбиҳои ҷавонони соҳибкор хоҳем шуд.

«Минтақаи озоди иқтисодии «Суғд»: масъалаҳои муҳимтарини рушд» – чунин ном дошт яке аз ҷаласаҳои панелӣ. Дар ҷаласа зикр шуд, ки МОИ «Суғд» дар ҷумҳурӣ яке аз беҳтаринҳо буда, барои ҷалби сармоягузорон ва соҳибкорони дохилию хориҷӣ имконият ва шароити мусоид дорад.

Мувофиқи анъана баъди шиносоӣ бо молу маҳсулоти ба намоиш гузошта озмуни «Маҳсулоти беҳтарини сол» ҷамъбаст шуд. Дар Ярмаркаи байналмилалии савдо «Суғд–2018» як қатор корхонаҳо ва ширкатҳои фаъоли ватаниву хориҷӣ аз қабили ҶДММ «Saxovat broller», UzKoreaTrade LTD, ҶДММ “Martash spes adejda», ҶДММ “Toremed farm», ҶДММ “Jasmin cosmetics”, ҶДММ “Xon-Qizi”, ҶДММ “Euro print Kokand”, “Ал-нур инвест” ва дигарон бо сертификат тақдиронида шуданд. Ҷойҳои намоёнро ширкатҳои «Артуч», «Қолинҳои Қайроққум», «Темуриён», «Суғд-аквапласт», «Арча-мебел», «Зарафшон», Маркази савдои «Баҳор», «Нур-панел» соҳиб ва сазовори диплом гардиданд.

Ҳамчунин дар натиҷа байни ширкатҳо ва соҳибкорони дохилию хориҷии иштирокдори Ярмарка зиёда аз 30 шартнома ва меморандуми ҳамкорӣ баста шуданд.

Муовини Раиси вилояти Суғд Анвар ЯъҐубқ зимни суханрониаш дар ҷамъбасти Ярмарка чунин изҳор дошт:

– Дар Шарқ аз қадимулайём ду нафар шарту байъи савдо карда, даст ба дасти ҳам медоданд, ки ин шартнома ба ҳисоб мерафт. Тадриҷан ин шартномаҳо бо қалам дар коғаз сабт мешуданд, ки санади ҳуқуқӣ мебошанд. Ман бисёр хурсандам, ки дар Ярмаркаи панҷуми байналмилалии Суғд беш аз 300 меҳмон аз кишварҳои дӯст ташриф оварданд. Имсол ҳайати Ӯзбекистон хеле бонуфуз буд, ки нуқтаи авҷи ҳамкориҳоямонро нишон медиҳад. Иқтисодҳои мо ба ҳам хеле наздиканд ва баъзе коршиносон мегуфтанд, ки дар сурати боз шудани марзҳо молу маҳсулоти кишвари ҳамсоя бозорҳои моро пур мекунанду маҳсулоти ватанӣ аз фурӯш мемонад. Ин тавр нашуд, сиёсати дарҳои кушод рақобати солимро ба вуҷуд овард ва соҳибкорони мо ҳам молҳои рақобатпазире истеҳсол мекунанд, ки дар хориҷ ҳам талабот ба онҳо зиёд аст.

 Бисёр фараҳбахш аст, ки шарикони рушди мо аз Кореяи Ҷанубӣ, Македония ҳам ба Ярмарка ташриф оварданд ва тавре худашон гуфтанд, Хуҷанд, вилояти Суғд ба онҳо хеле писанд омадааст. Муҳимтар аз ҳама, гуфтанӣ ҳастам, ки инкишоф бе дарҳои кушод мумкин нест, чӣ тавре ки пешрафту дӯстӣ бе дилҳои кушоду бе боварӣ ба ҳамдигар имконпазир нестанд. Боварӣ барои бизнес ва пешрафт хеле муҳим аст. Агар боварӣ набошад, сармоягузорӣ ҳам намешавад. ҳамин боварии мо ба ҳамдигар буд, ки мо дар ин Ярмарка ба натиҷаҳои дилхоҳ ноил шудем.

Мо ба дӯстони анъанавиамон аз Федератсияи Россия, ки аз соли 2014 ҳамроҳи мо ҳастанд, ба намояндагони доираҳои соҳибкории ин кишвар, ки бо мо чанд созишнома ба имзо расониданд, арзи сипос мекунем. Албатта, сармоягузории онҳо ба рушди шаҳри Хуҷанд ва вилоят мусоидат хоҳад кард.

Бешубҳа, ин Ярмарка майдони хуби савдо аст. Ширкатҳои истеҳсолии маҳсулоти бофандагӣ, қисмҳои эҳтиётии автомобил, саноати кимиё ва дигар соҳаҳои иқтисоди мо маҳсулоти худро пешкаш карданд.

Мо бовар дорем, ки шарикони боэътимод пайдо мекунем. Инчунин, мо ширкатҳое дорем, ки дар Ҷумҳурии Тоҷикистон истеҳсолоти муштарак ташкил карданӣ ҳастанд, ки ба рушди ҳамкориҳои иқтисодию тиҷоратӣ, сайёҳию фарҳангии кишварҳоямон мусоидат хоҳанд кард.

Гулҷаҳон Турсунзода,
Улуғбек Худойбердиев,
Шаҳноза Ҳомидова,
«Ҳақиқати Суғд»

Читать далее

Таваҷҷуҳи сайёҳон ба вилоят афзудааст!

Дар бештари кишварҳои ҷаҳон соҳаи туризм дар ташаккули маҷмӯи маҳсулоти дохилӣ, фаъолнокии тавозуни савдои беруна, таъмини шуғли аҳолӣ ва таъсиси ҷойҳои кории иловагӣ нақши муҳим бозида, ба инкишофи соҳаҳои мухталиф, аз қабили нақлиёту коммуникатсия, сохтмон, фарҳанг, санъат, истеҳсоли маҳсулоти ниёзи мардум ва дигар бахшҳои иқтисодиёт таъсири мусбат мерасонад.

Ҷумҳурии Тоҷикистон низ дорои мероси ғании таърихиву фарҳангӣ ва захираҳои табиӣ буда, барои ҷалби теъдоди зиёди сайёҳони хориҷӣ ба кишвар иқтидори воқеӣ дорад. Бо дарназардошти омилҳои зикршуда Ҳукумати Ҷумҳурии Тоҷикистон соҳаи туризмро самти афзалиятноки сиёсати иқтисодии кишвар эълон намудааст.

Дар вилояти Суғд низ ҷойҳои таърихиву фарҳангӣ, осорхонаву тарабхонаҳо макони сайругашти сайёҳон шудааст. Имрӯз шуъбаи рушди сайёҳӣ дар вилоят ҷаҳд бар он дорад, ки сайёҳонро ба таври зарурӣ пешвоз ва шароити хуби истироҳатро фароҳам орад. Абдумаҷид Раҳимов - мудири шуъбаи рушди сайёҳии Мақомоти иҷроияи ҳокимияти давлатии вилоят гуфт, ки алҳол дар вилоят 13 осоишгоҳ, 54 меҳмонхона ва 20 ширкати сайёҳӣ фаъолият доранд. Давоми шаш моҳи соли равон тақрибан 372 ҳазор сайёҳ вориди вилоят шудаанд, ки асосан аз мамлакатҳои Иёлоти Муттаҳидаи Амрико, Олмон, Русия, Ӯзбекистон, Қазоқистон, Қирғизистон ташриф меоранд. Алҳол диққати сайёҳон бештар ба табиати нотакрори кишвар, ҷойҳои истироҳативу фароғатӣ равона карда шудааст, ки асосан шаҳру навоҳии Панҷакент, Шаҳристон, Истаравшан, Айнӣ ва Исфара аз қабили онҳоянд.

Оливиа Ҷонс – сайёҳ аз Иёлоти Муттаҳидаи Амрико:

- Бори аввал ба Ҷумҳурии Тоҷикистон барои саёҳат омадам ва худро дар олами дигар дидам. Мардумаш хеле меҳмоннавозу хоксор ҳастанд. Дар бозори марказии «Панҷшанбе» меваҳои тару тоза зиёд буда, бо нархи арзон фурӯхта мешаванд. Бояд гуфт, ки зардолуи Хуҷанд бароям писанд омад ва онро бори аввал чашидам. Масҷиди Шайх Маслиҳатдинро ҳамроҳи дӯстонам зиёрат кардем. Деворҳояш чунон моҳирона нақшбандӣ шудааст, ки кас ба ҳайрат меояд. Огоҳ гаштем, ки ба ин макони муқаддас нафарони зиёде омада, барои худу аҳли оила тансиҳатиро металабанд. Акнун барои сайру саёҳат ба шаҳри Панҷакент хоҳем рафт.

Лампрехт Ройсс – сайёҳ аз Олмон:

- Боғи фарҳангиву фароғатии ба номи Камоли Хуҷандӣ бароям писанд омад. Шомгоҳ дар ин макон мардуми зиёдеро дидан мумкин аст. Ҳама бо табассум сӯямон менигаранд. Барои мо самбӯсаи бо алаф омодашуда, ки онро дар танӯри тасфон мепазанд, маъқул шуд. Ман бори аввал ин гуна таомро чашидам. Ҳамчунин, Хона - музейи Камоли Хуҷандӣ диққати бинандаро ба худ ҷалб мекунад, ки бо маҳорати баланд сохтаанд. Болои кати гузошташуда чойи кабудро нӯшида, аз табиати нотакрори Хуҷандшаҳр лаззат бурдем. Ният дорем ба дигар ҷойҳои зебоманзари шаҳру навоҳии вилоят низ сафар кунем.

Оксана Полякова – сайёҳ аз Федератсияи Русия:

- Пас аз сайругашти дуру дароз хостем истироҳати худро дар назди баҳр гузаронем. Ба осоишгоҳи «Баҳористон», воқеъ дар шаҳри Гулистон омадем. Дар осоишгоҳ тамоми шароит муҳайё буд, табобати замонавиву муоширати табибони баландихтисос бароямон мақбул гашт. Ростӣ, мо гумон надоштем, ки сарзамини тоҷикон то дараҷае зебову дилписанд ва мардумаш меҳмоннавозу меваҳояш болаззат аст. Тӯли як ҳафта дар Хуҷанд саёҳат доштем ва ҷойҳои таърихии ин шаҳрро тамошо кардем. Вақти шом намуди шаҳр тамоман дигаргун гашта, диққати ҳар нафарро ба худ мекашад. Ният дорем, пас аз ду рӯз ба ноҳияи Айнӣ барои тамошои Искандаркӯл раҳсипор гардем, зеро шӯҳрати ин макон ба дуриҳо расидааст.

Сайдғозимхон Худойқулов – сайёҳ аз Ҷумҳурии Ӯзбекистон:

- Писарбачаи 12 - сола будам ва ҳамроҳи модарам ба Тоҷикистон сафар доштем. Пас аз кушода шудани сарҳад боз ба ин ҷо омадам. Ҷумҳурии Тоҷикистон алалхусус, шаҳри Хуҷанд хеле зебову назаррабо шудааст. Дар шаҳр биноҳои баландошёна, тарабхонаву меҳмонхонаҳои зиёде қомат афрохтаанд. Мақсад аз омадани ману ҷӯраҳоям зиёрати шаҳраки қадимаи Саразм, воқеъ дар шаҳри Панҷакент аст, зеро ёдгории қадимаи таърихии 5500 - солаи шаҳраки Саразм дар шаҳри Панҷакент ҳамчун маркази ташаккули фарҳанги заминдорӣ, ҳунармандӣ ва шаҳрсозии тоҷикон мамнӯъгоҳи таърихиву бостоншиносӣ аст. Аз ин лиҳоз, мехоҳам дар бораи он маълумоти бештаре пайдо намоям.

Бино ба маълумоти расонаҳои хабарӣ Ҷумҳурии Тоҷикистон аз 7 холи имконпазир 3,2 хол гирифта, дар давоми ду сол аз 119 ба 107-ум ҷой боло рафт. Беҳтарин нишондодро (5,7 хол) Тоҷикистон дар категорияҳои «амният», «тандурустӣ ва беҳдошт» ба даст овард. Ҷолиби диққат аст, ки Тоҷикистон дар рӯйхати кишварҳое, ки дар давоми як сол болоравии беҳтарини сайёҳӣ нишон доданд, алоҳида қайд шудааст. Дар ин рӯйхат Тоҷикистон дар зинаи сеюм қарор гирифта, дар ҷойи аввал Ҷопон ва дар ҷойи дуюм Озарбойҷон мебошанд.

Шаҳбонуи СИДДИҚ,
«Ҳақиқати Суғд»

Читать далее

Ту танҳо нестӣ, дигар!

Бо сиёсати хирадмандонаи Пешвои миллат муҳтарам Эмомалӣ Раҳмон дар ҷомеаи мадании Тоҷикистон ҳамаи табақаи кишвар баробар зисту иқомат доранд. Аз ҷумла, маъюбон як ҷузъи ҷудонопазири ҷамъияти мо ба ҳисоб рафта, пайваста таҳти ғамхории давлату Ҳукумат қарор ва дар пешрафти кишвари маҳбуб саҳми назаррас доранд. Таваҷҷуҳи Пешвои муаззами миллат ба чунин қишри ҷомеа лоиқи таҳсин ва итминон аст, ки дар гӯшаи дили ҳар як маъюб чунин нидо садо медиҳад: Ту танҳо нестӣ, дигар!

Аз рӯҳафтодагӣ то ба зинаҳои баланд

Акмал Қодиров яке аз ҷавонони маъюбест, ки қаблан ба намуди гӯштини юнонӣ ва баскетбол машқу тамрин мекард. Дар дил умедҳои зиёд мепарварид. Орзу дошт, ки рӯзе қаҳрамон мешавад. Ба дастаи мунтахаби баскетболбозони шаҳри Истаравшан шомил буд. Мутаассифона, соли 2000 ба садамаи автомобилӣ дучор ва аз пои чап маҳрум гардид. Баъди он рӯзҳои сахт худро маъюсу аз ҳаёт дилмонда медид.

- Ба қисмат тан дода, гумон кардам, ки дигар аз уҳдаи шуғле намебароям. Рӯзе аз зиндагӣ ғамгин гашта, ба варзишгоҳи марказии шаҳри Истаравшан ба тамошо рафтам. Тамрини дастаи футбол мегузашт. Ногаҳон марде наздам омада бо ман суҳбат орост ва аз ҳамон рӯз дар ҳаётам гардиши куллӣ рух дод, - мегӯяд Акмал.

Номи ин марди накӯкор Искандар Тӯраев буда, ӯро ба намуди варзиши қадимаи дастхобонӣ даъват кардааст. Ӯ нахустин устодаш дар ин ҷода буда, худи Акмал ҳамон сол байни маъюбон чемпиони Ҷумҳурии Тоҷикистон гардид. Соли 2005 бо раиси варзишгарони имконияташон маҳдуд дар вилояти Суғд Зокирҷон Комилов шиносоӣ пайдо намуда, ӯро низ устод хонд. Шабу рӯз машқ кард ва ҳамон сол чемпиони Осиё гардид. Акмал ба шахсоне, ки бо ӯ ҳамтақдиранд, иброз медорад, ки набояд аз зиндагӣ дилгир бошанд.

- Солҳои охир толорҳои варзишӣ бисёранду мисли устод Зокирҷон Комилов кам нестанд, ки бо мо-маъюбон сару кор доранд. Моро рӯҳбаланд намуда, доимо таъкид медоранд, ки набояд худро нотавон ҳис намоем.

Дар ёд дорам, бо дастгирии Президенти «Ассотсиатсияи армстронги Тоҷикистон» Фарҳод Султонов соли 2010 дар чемпионатҳои ҷаҳонии давлатҳои Амрико, Булғория иштирок намуда, ҷоизадори ҷои сеюм гаштам. Шахси маъюб гумон мекунад, ки ӯ нотавон аст, ин гуфтаҳо маъно надорад, - илова мекунад ӯ.

Акмал борҳо дар мусобиқаҳо иштирок намуда, Парчами Тоҷикистонро байни чандин давлатҳо боло бардоштааст.

Ғамхории ҳамешагии давлату Ҳукумат

Акмал Қодиров соли 2007 ҳамчун варзишгари беҳтарини сол аз тарафи Сарвари муҳтарам Эмомалӣ Раҳмон қадршиносӣ гардида буд. Ба гуфти ӯ Сарвари давлат дар вохӯрӣ аз ҳолаш пурсон шуданд ва баъди фаҳмидани вазъи оилавиаш тӯйи арӯсии ӯ бо сарпарастии бевоситаи Пешвои миллат баргузор шуд ва айни ҳол варзишгар соҳиби 3 фарзанди солеҳ мебошад.

Раиси варзишгарони имконияташон маҳдуд дар вилоят Зокирҷон Комилов иброз намуд, ки моҳи апрели соли равон чемпионати олимпии байни варзишгарони маъюб дар давлати Қазоқистон доир гардид. Дар он 29 нафар ширкат варзида, 8 медали тилло, 4 медали нуқра ва 8 медали биринҷӣ насиби тоҷикистониён гардид, ки чунин дастовардро мавсуф аз ғамхориву дастгирии пайвастаи Ҳукумати Тоҷикистон медонад.

Ба гуфти Зокирҷон Комилов варзишгарон хеле хуб баромад намуда, ҷавобан ба ғамхориҳои Раиси вилоят Раҷаббой Аҳмадзода ҷойҳои сазоворро ишғол намуданд. Дар он намояндагони 12 давлат ширкат варзиданд, ки Тоҷикистон сазовори ҷои сеюм гашт.

Алъон Акмал Қодиров новобаста аз маъюбиаш ба якчанд намуди варзиш, аз қабили вазнбардорӣ, дзюдои портерӣ, варзиши сабук, дастхобонӣ, баскетбол бо аробача машғул буда, худро варзишгари серсоҳа меҳисобад.

Бо пои дил - бо амри Ватан

Варзишгари дигар Қаҳрамон Мӯсобоев мебошад, ки соли 2004 бо амри тақдир дар муҳоҷирати меҳнатӣ ҳарду пояшро сармои шадид задааст. Дар натиҷа пизишкон ба хулоса омадаанд, ки пойҳоро бояд бурранд, то ба қисмати болои устухони пой таъсир нарасонад. Имрӯз Қаҳрамон аз ду пояш маҳрум аст. Тавре худи ӯ ба ёд меорад, дар айёми солим буданаш низ ба машқҳои дастхобонӣ, гурзбардорӣ ва шиноварӣ машғул будааст.

- Чанд муддат рӯҳафтода ва худро бекасу танҳо ҳис мекардам. Рӯзе ба варзишгоҳ рафта, маъюбонро дидам, ки ба варзиш машғул буданд. Дилам дубора ба ҳаёт гарм шуд. Хусусан, ошноӣ бо устодони варзиш Зокирҷон Комилов ва Акмал Қодиров ба зиндагиам маҷрои нави умедбахш ато кард, - мегӯяд Қаҳрамон.

Тавре аён гардид, Қаҳрамон Мӯсобоев дар мусобиқаҳои ҷумҳурӣ иштирок намуда, соҳиби медали тилло гардидааст. Пас аз маъюбиаш тӯли се соли аввал бо азобу машаққати зиёд машқу тамрин кард. Ӯ ягона варзишгарест, ки дар Тоҷикистон ба намуди варзиши шиноварӣ машғул аст. Бо дастгирии Мақомоти иҷроияи ҳокимияти давлатии вилоят ба шаҳри Сочии Федератсияи Русия, Ҷумҳуриҳои Қазоқистон, Ӯзбекистон сафар ва дар чемпионатҳо иштирок намуда, соҳиби ҷойҳои намоён гардидааст.

- Мақсад дорам, ки соли равон ба Индонезия рафта, дар намуди варзиши шиноварӣ байни маъюбон иштирок намоям, - бо хушҳолӣ мегӯяд ӯ.

Қаҳрамон иброз дошт, ки мисли ӯ ва Акмал Қодиров барин варзишгарон, аз пой маҳрум бошанд ҳам, доимо омодаанд, бо пои дил бо амри Ватан иқдом карда, эътибори давлату миллатро дар сатҳи ҷаҳон муаррифӣ намоянд.

Кам нестанд шахсоне, ки мисли Акмалу Қаҳрамон бо амри қисмат маъюб гаштаанд. Ба гуфти ин ду қаҳрамони олами варзиш набояд рӯҳан шикаста шуд. Ба тамоми маъюбон мегӯем: Шумо танҳо нестед дигар! Мо бо шумоем!

Шаҳноза Ҳомидова,
«Ҳақиқати Суғд»

Читать далее

Аёдати сарбозону афсарон

Дар қисмҳои ҳарбии ҳудуди ноҳияи Деваштич аёдати сарбозону афсарон баргузор гардид.

Дар аёдат муовинони раиси ноҳия А.Ҳодиев ва Б.Ғиёсиддинзода ва як гуруҳ хонандагони муассисаҳои таълимии ноҳия, аъзоёни фаъоли ТҶҶ «Созандагони Ватан» иштирок доштанд.

Мавриди зикр аст, ки ҷавонписарон ба ҳаёту фаъолияти афсарону сарбозон ошно шуда, муқаддастарин арзиши ҳаёт - дӯст доштан ва содиқона муҳофизат кардани Ватанро дар қалби хеш ҷой менамоянд.

Лоиқ ТӮЙЧИЕВ,
ноҳияи Деваштич

Читать далее