07 February 2018

Раҷаббой Аҳмадзода раиси Федератсияи футболи вилоят интихоб шуд

Рӯзи 7 феврал дар Кохи Рӯдакии шаҳри Хуҷанд бо иштироки иҷрокунандаи вазифаи Раиси вилоят Раҷаббой Аҳмадзода ва ноиби президенти Федератсияи футболи Тоҷикистон Алишер Урунов  конференсияи ҳисоботию интихоботии Федератсияи футболи вилоят баргузор шуд.

Аз руи масъалаи якуми рӯзномаи конференсия иштирокчиён номзадии иҷрокунандаи вазифаи Раиси вилоят Раҷаббой Аҳмадзодаро, ки аз ҷониби президенти Федератсияи футболи Тоҷикистон муҳтарам Рустами Эмомалӣ пешниҳод гардидааст, ба вазифаи раиси Федератсияи футболи вилоят якдилона дастирӣ намуданд. Алишер Урунов ба Раҷаббой Аҳмадзода шаҳодатномаи Раиси Федератсияи футболи вилояти Суғдро супорида, изҳори боварӣ намуд, ки футбол дар вилоят минбаъд рушди бештар хоҳад ёфт.

Читать далее

Ҷаласаи ҷамъбастии Шӯрои вилоятии Ҳаракати ҷамъиятии Ваҳдати миллӣ ва эҳёи Тоҷикистон

Рӯзи 7 феврал дар Кохи Рӯдакии маркази вилоят ҷаласаи ҷамъбастии Шӯрои вилоятии Ҳаракати ҷамъиятии Ваҳдати миллӣ ва эҳёи Тоҷикистон баргузор шуд.

Дар рафти ҷаласа фаъолияти Шӯрои вилоятии Ҳаракати ҷамъиятии Ваҳдати миллӣ ва эҳёи Тоҷикистон дар соли 2017 мавриди баррасӣ қарор дода шуда, вазифаҳо барои соли равон муайян гардиданд.

Читать далее

Боздиди Раҷаббой Аҳмадзода аз Муассисаи давлатии “Боғи миллии Ваҳдат”

Нимаи дуюми рӯзи 6 феврал иҷрокунандаи вазифаи Раиси вилояти Суғд Раҷаббой Аҳмадзода аз Муассисаи давлатии “Боғи миллии Ваҳдат”, воқеъ дар ноҳияи Бобоҷон Ғафуров боздид намуд.

Тавре зимни боздид иттилоъ дода шуд, хоҷагидорони Муассисаи давлатии “Боғи миллии Ваҳдат” азм доранд, ки соли равон боз 3,5 ҳазор бех ниҳолҳои мевадиҳанда шинонида, дар афзун шудани ҳаҷми истеҳсоли маҳсулоти кишоварзӣ саҳми бештар гузоранд. Иҷрокунандаи вазифаи Раиси вилоят Раҷаббой Аҳмадзода аз иқдоми роҳбарият ва хоҷагидорони “Боғи миллии Ваҳдат” истиқбол кард ва бо шинонидани ниҳолҳои мевадиҳанда ба маъракаи ниҳолшинонӣ оғоз бахшид. Роҳбари вилоят ба масъулин дастур дод, ки бо истифода аз боду ҳавои мусоид маъракаи ниҳолшинонӣ дар муҳлатҳои кутоҳтарин ба анҷом расонида шавад.

Читать далее

Фурўши моҳии пок дар ҷои нопок

Бегоҳирўзӣ дар наздикии майдони Регистони мавзеи Панҷшанбеи шаҳри Хуҷанд нафарони зиёд ҷамъ омада буданд. Наздиктар рафтем, то бубинем, ки дар он ҷо чӣ ҳодисае рух додааст.

- Моҳӣ арзон шуд, гиред! Бо овози баланд марде ҳамаро ба сўи худ даъват мекард. Чанд нафар моҳифурўшон дар қадди роҳ дар замини чангу хок селофан кушода, болои он аз даруни халтаи чиркини хоку лойолуда моҳиҳои ношустаро бароварда мегузоштанд. Моҳиҳо дар ҳолати ғайрисанитарӣ буданду баробари ин мардум бо ҳам китф ба китф мезаданд, то аввалин шуда онро бо нархи арзон дастрас кунанд. Чанд муддат ин манзараро назорат кардем ва бароямон аён гардид, ки роҳгузарон бештар на ба сифати моҳӣ, балки ба нархи он диққат медиҳанд.

Моҳифурўш Исроил ном ҷавонмард сабаби дар қадди роҳ савдо кардани моҳиҳоро чунин маънидод намуд:

- Аслан дар бозори «20- солагии Истиқлолият» ба моҳифурўшӣ машғул ҳастам, вале аз сабаби он, ки ҷойи савдо дур аст, харидорон кам меоянд ва ноилоҷ бегоҳ дар қадди роҳ ба моҳифурўшӣ мебароям. Агар сари вақт нафурўшам, моҳӣ сифати худро гум мекунад.

«Гармӣ»-и савдову нодидии саломатӣ

Имрўз дар назди бозори марказии Панҷшанбе чанд нуқтаи фурўши моҳиҳои хому пухта ва дуддода мавҷуд аст. Аввалан, ба бозори «20-солагии Истиқлолият» равон шудем. Растаҳои моҳифурўшӣ дар қафотар ҷой гирифта будаанд. Занону мардони моҳифурўш худ харидоронро ба худ ҷалб мекарданд. Дар назар чунин менамуд, ки моҳиҳоро тоза шуста бошанд, вале вақте наздиктар омадем, дидем, моҳиҳо ҳарчанд нав дошта шудаанд, ношуставу дилнокашанд. Болои миз низ тоза нест. Яке аз фурўшанда назаре ба мо карду назди худ даъват намуд.

- Моҳӣ диҳам, кадом намудаш лозим аст? - пурсид ў.

- Чанд намуд моҳӣ доред ва нархи он чӣ гуна аст? - пурсидем мо.

- Нархи моҳиҳо аз 27 сомонӣ оғоз мешавад. Намудҳояш ҳам гуногун ва вобаста ба хелҳояш нархгузорӣ шудаанд. Ана ин сафедмоҳӣ (белқй амур), мормоҳӣ, чашмсафед (белоглазка), суфмоҳӣ (судак), зағорамоҳӣ (сазан) …

Фурўшанда нарху сифати моҳиҳоро як ба як муаррифӣ кард, гўё аз ҳама хубаш мормоҳӣ бошад, зеро сўзани кам дораду гўшти зиёд. Ҳамин вақт марди миёнасоле барои харидани равғани моҳӣ ба фурўшанда муроҷиат кард. Тавре огоҳ гаштем, як кило равғани моҳӣ 6-8 сомонӣ нархгузорӣ шудааст. Зан, ки ба савдо машғул буд, саросема равғани дар даруни халтачаи селофанӣ бударо ба тарозу гузошт.

Халтачааш то дараҷае ифлос шуда буд, ки кас ба ҳайрат меафтод. Наход дар халтача барои истеъмол равған ҷой карда шуда бошад? Мард ҳам 6 сомонӣ доду бечунучаро халтачаро гирифта рафт. Фурўшанда пулро ба киссааш андохт. Либоси фурўшанда хеле бадбўю олуда буд.

Аксар фурўшандагон - ҳам зану ҳам мард аз қоидаҳои оддии санитарию гигиенӣ дур мондаанд. Яхдонҳо низ хеле ифлос буда, кӣ медонад, дохили онҳо боз чӣ миқдоре моҳиҳои аз фурўшмонда бошад, зеро барои дидани ҳолати онҳо ягон нафар иҷозат надод.

Ба растаи моҳиҳои дуддода равон шудем. Моҳиҳоро бо як дидан кас ҳавас мекунад, зеро ҳолати зоҳириашон дилкаш менамуд. Бо фурўшандаи ин намуд моҳӣ ҳамсуҳбат гаштем ва хостем аз нозукиҳои омода кардани он огоҳ шавем, вале ў бо таърифкунии маҳсулоташ банд шуд:

- Як моҳии дар дуд омодашударо дар халтаи селофанӣ метавонед дар муддати 5-6 рўз нигоҳ доред ва сифати он коҳиш намеёбад. Агар онро дар ҷойи кушод гузоред, моҳҳои зиёд хусусияти худро гум намекунанд ва тамъашон аз моҳии наву тоза фарқияте надорад, - гуфт моҳифурўши дигар.

Пас ба чунин хулоса омадан мумкин аст, ки баъзе аз моҳиҳои дар болои миз гузошташуда моҳҳои тўлонӣ истода, яъне кўҳнаанд? Нархи ин хели моҳӣ аз 10 то 80 сомонӣ аст. Шояд барои гум накардани тамъаш ва тез нобуд нагаштан болои моҳиҳо кушодаву чангу ғубори гирду атроф бо он оғушта шудаанд.

Ба ин монанд дар ду нуқтаи бозори “Панҷшанбе” моҳии дар равған пухта ба фурўш гузошта шудааст, ки 100 грамми он 9-10 сомонӣ мебошад. Маҳсулоти барои истеъмол омодашуда низ ҳолати ғайрисанитарӣ дошт, зеро болояш кушодаву байни дигар маҳсулот, аз ҷумла маҳсулоти рўзмарра гузошта шудааст ва дар назди он рўзе садҳо нафар гаштугузор доранд. Либоси фурўшандагони ин намуди маҳсулот низ ба талаботи савдо ҷавобгў нест. Бо дастони ношуста ба даруни халтачаи селофанӣ моҳиро мемонанду ба харидор медиҳанд. Суоле ба миён меояд, оё ин намуди моҳиро метавон дар ин ҳолат метавон истеъмол кард? Онро шустан ғайриимкон асту таъмашро гум мекунад. Ин ҳолат магар ба саломатии истеъмолкунанда хатар надорад?!

Дар ҳошияи андешаҳо

Абдуҷалил Қодиров - мудири шуъбаи озмоишгоҳи назди бозори Панҷшанбе:

- Барои фурўши маҳсулоти гўштӣ, аз ҷумла моҳӣ дар як ҳафта ду маротиба санҷиш гузаронида мешавад ва дар асоси он ба фурўшандагон иҷозатномаи савдо дода мешавад. Асосан моҳиҳои воридшударо аз рўи сифати маҳсулот ва ба талаботи байторӣ - беҳдоштӣ ҷавобгў буданаш барои фурўхтан иҷозат медиҳем. Пас аз гузаронидани ташхис ба фурўшандагон шартномаи байтории №4 дода мешавад. Моҳӣ агар наву тоза бошад, ҳамон рўз фурўхта тамом карданашон зарур аст ва маҳсулоти аз фурўш мондаро бояд ба яхдонҳо гузоранд. Моҳиҳоро дар ҳарорати аз 20 дараҷа боло нигоҳ доштан мумкин нест. Муҳлати нигоҳдории моҳиҳои дуддодашуда то 5 рўз аст.

Ин мутахассис ҳамчунин қайд кард, ки моҳии дар шароити хона бирёнгардида набояд истеъмол карда шавад, зеро он барои саломатии инсон зарари калон дорад, вале афсўс, ки имрўз ин ҳолатҳо ба назар мерасанд. Харидорон аз он бехабаранд, ки моҳии пухта дар кадом шароит омода карда шудааст.

Сабоҳат Турдиева – харидор:

- Солҳои пеш шумораи ҷойи фурўши моҳӣ зиёд буд, аммо имрўз он танҳо дар як ҷой аст. Бегоҳ вақти аз кор ба хона рафтан дар қадди роҳ фурўшандаҳо моҳиҳои зиёдеро ба савдо мегузоранд, ки нархи онҳо низ он қадар гарон нестанд. Барои фарзандонам онро харидорӣ мекунам ва пеш аз истеъмол бо оби гарм мешўям. Ростӣ, дар бораи оқибати он боре ҳам фикр накардаам, зеро аксари мардум харида истодаанд. Чанд маротиба аз бозори “Панҷшанбе” моҳии пухташуда харидам, вале тамъаш он қадар хуб набуд, шояд аз он сабаб, ки хокаи тамъдиҳандаро зиёд ҳамроҳ карда бошанд. Аз ин ҷиҳат худам моҳӣ мегираму мепазам.

Мирзодаврон Солиев – роҳгузар:

- Аз завқи харидорон дар ҳайрат мемонам, ки чаро онҳо маҳсулоти дар замин гузошташударо мехаранд. Чаро маъмурияти бозори “Панҷшанбе” нисбат ба амали фурўшандагон ҳарфе намезананд? Ин ҳолатро кӣ назорат мекунад? Охир аз Регистони “Панҷшанбе” мардум, аз ҷумла меҳмонони зиёде гузар доранд ва вақте маҳсулоти ба талаботи санитарӣ ҷавобгў набударо мебинанд, чӣ гуна ақида пайдо мекунанд? Магар ин паст будани сатҳи маърифати харидору фурўшандаро нишон намедиҳад?

Наталия Ушарова – истеъмолкунанда:

- Боре аз бозори «20 – солагии Истиқлолият» ба маблағи 50 сомонӣ моҳӣ харидам ва ба чунин хулоса омадам, ки назорат аз болои сифати маҳсулоти истеъмолӣ, аз ҷумла моҳӣ хеле суст аст. Вақте моҳиро шуста, дар равған пухтам аз он бўи бад омад. Гумон карда будам, ки вақти пухтан, шояд бўяш равад, аммо тамъаш чунон дилбеҳузуркунанда буд, ки барои хўрдан касе ҷуръат ҳам накард. Бар замми ин, ҳарчанд ки дар оби зиёд онро шуста бошам ҳам, сангчаҳо байни дандонҳо ғичир-ғичир мекарданд. Ҳамин тавр аз харидани моҳӣ даст кашидам.

Суоли матраҳ ин аст, ки чаро имрўз барои фурўши моҳиҳо растаҳои алоҳида вуҷуд надоранду назорат ба савдои ин намуди маҳсулот дар сатҳи паст қарор дорад?

Шаҳбонуи СИДДИҚ,
«Ҳақиқати Суғд»

Читать далее

Азми оҳанини роҳи оҳанчиён

Барои иҷро шудани ягон нақша дар тамоми коргоҳ иттиҳоду иттифоқи коллективи кормандон нақши муҳим мебозад. Гузашта аз ин, баҳри бартараф кардани монеаҳо, расидан ба ҳадафҳои дар пешгузошта ва барзиёд иҷро намудани нақшаҳо ҳар як масъул бояд азми оҳанӣ дошта бошад. Ин гуна иттиҳоду ҳамгироӣ ва азми оҳаниро дар коллективи кории минтақаи суғдии Корхонаи воҳиди давлатии «Роҳи оҳани Тоҷикистон» бо шумули 22 корхонаи тобеъ метавон дид, ки шоистаи таваҷҷуҳ аст.

Рақамҳо сухан мегўянд…

Аз гуфтаи масъулин бармеояд, ки коллективи меҳнатии минтақаи суғдии Корхонаи воҳиди давлатии «Роҳи оҳани Тоҷикистон» дар 12 моҳи соли 2017 ба ҳамаи душвориву камбудиҳои объективию субъективии ҷойдошта ва дигар мушкилиҳо нигоҳ накарда, аксари нақшаю уҳдадорӣ ва вазифаҳоро саривақту босифат иҷро намуда, барои дурнамои соли 2018 омодагии комил дорад.

Тавре ҷонишини сардори Хадамоти боркашонии Корхонаи воҳиди давлатии «Роҳи оҳани Тоҷикистон» дар минтақаи Суғд Убайдуллохон Обидов гуфт, дар соли 2017 боркунии вагонҳо дар минтақа 620,5 ҳазор тоннаро ташкил дод, ки нисбат ба ҳамин даври соли гузашта 98,3 ҳазор тонна зиёд мебошад.

-Аз ҷумла борфарорӣ дар даври соли 2017 ба минтақаи Суғд 3125,3 ҳазор тонна иҷро карда шуд, ки нисбат ба ҳамин даври соли гузашта 19,5 ҳазор тонна зиёд мебошад ва иҷроиш 100,6 фоизро ташкил медиҳад,-иброз дошт У.Обидов.

Ҳамзамон, хизматрасонии кашонидани маҳсулоти кишоварзӣ дар соли гузашта 84919 тоннаро ташкил дод, ки нисбат ба соли 2016-ум 53378 тонна кам мебошад, ки аз ин меваи хушк – 25393 тонна, пиёз – 52278, сабзавот – 2483 меваҳо – 2620 тонна содир гардидаанд.

Ҳолати камшавии содиротро У.Обидов аз тарафи шахсони хусусӣ ва ширкатҳо ба дигар давлатҳо бо воситаи нақлиёти автомобилӣ ва кам бор кардани маҳсулоти хоҷагии қишлоқ рабт дод, ки воқеан дуруст аст.

-Чунки соҳибкорон ва ширкатҳо вақте муроҷиат мекунанд, бидуни мамониат ва босифат хизмати онҳоро ба ҷой меорем. Чунончӣ, соли гузашта ҳаво дар оғози баҳор хушку сардттар омад, боиси кам шудани содироти маҳсулоти кишоварзӣ шудааст, ки нишондиҳандаи содиршуда аз ин сабаб камтар гардид, -мегўяд ҷонишини сардори Хадамот.

Аз ҷумла, гардиши бор 119,3 миллион тонна киллограмм, бекористии вагонҳо таҳти амали боркунӣ 31 соат, гардиши мусофир 3,1 млн. мусофир-километр ва ғайра аз ибтикорҳои назарраси анҷомдодашудаи ин коргоҳ буда, бо вуҷуди ҷой доштани мушкилиҳо роҳбарият ва коллективи корӣ саъй доранд, ки дар соли 2018 бо нишондиҳандаҳои назаррас муваффақ шаванд.

Бахшҳои таконбахши фаъолият

Ногуфта намонад, ки минтақаи суғдии КВД «Роҳи оҳани Тоҷикистон» аз бахшҳои зиёде иборат аст, ки баҳри ба амалбарории ҳадафҳои дар пешгузошта мусоидат намуда, дар якҷоягӣ бо ҳамоҳангсозии роҳбарияти коргоҳ дар хизмати халқу Ватан камари ҳиммат бастаанд.

Аз ҷумла, КДФ «Қитъаи Суғдии роҳ», ки мутасаддии истифодаи хатти роҳи оҳан аст, фаъолияти самарабахшро ба роҳ мондааст. Боиси зикр аст, ки дарозии истифодабарии хатти роҳи оҳан 288,51 км, ки аз ин роҳҳои асосӣ - 199,2 км роҳҳои истгоҳӣ - 70,51 км ва роҳҳои фаръӣ - 18,8 километрро ташкил медиҳад.

-Баҳри баланд бардоштани таъмини бехатарии ҳаракати қатораҳо дар соли гузашта вагони роҳсанҷи ПС-72004 мувофиқи ҷадвали кори тасдиқгардида ва дастурамали техникии қитъа санҷиши мунтазами роҳро мегузаронанд,-мегўяд У.Обидов.

КДФ «Фосилоти мухобирот ва алоқаи Суғд» бошад, фаъолияташ аз худкори блоконӣ (АБ) - 109,7 км. нимкори блоконӣ (ПАБ) - 4 км. хатти электроҷезлӣ - 49 км. хатти роҳ бо алоқаи радиовӣ - 159,9 км. ақрабакҳо – 176 адад, чароғакҳои гуногун – 432 адад, хатти алоқаи ҳавоӣ – 116 км. хатти алоқаи кабелӣ – 44 км. дизели генераторҳо – 5 адад иборат аст. Аз суҳбат бармеояд, ки дар соли сипаришуда фосилоти мухобирот ва алоқаи Суғд натиҷаи қаноатбахш нишон додааст. Дар даври корӣ ҳамаи кўшиши коллектив барои иҷро намудани фармонҳо ва амрҳои роҳбарияти Раёсати роҳ, барои таъмин намудани бехатарии ҳаракати қатораҳо равон карда шуда буд, ки имсол низ баҳри беҳбудии корҳои ба дўшаш вогузор шуда, камари ҳиммат бастаанд.

Тавре маълум гардид, дар Пойгоҳи локомотивӣ низ ҳаҷми умумии кашонидани бор 264,90 миллион тонна-километр ва хароҷоти маводи сўзишворӣ 1904,398 тоннаро ташкил додааст. Дар парки тепловозии пойгоҳ 10 тепловози магистралӣ ва 5 тепловози манёврӣ кор карда истодаанд, ки дар маҷмуъ 56 тепловоз мавриди хизматрасонии техникӣ фаро гирифта шуда, баъди ба таври комиссионӣ аз назар гузаронидани сифати иҷрои корҳо ба истифодабарӣ дода шуд.

Тибқи иттиллои роҳбарияти минтақаи суғдии КВД «Роҳи оҳани Тоҷикистон» дар КФҶ «Коргоҳи таъмири қатораҳо» ба маблағи 6313479 сомонӣ пешбинӣ шуда, ба маблағи 17901023 сомонӣ иҷро гардид, ки ин 283 фоизро ташкил медиҳад. Дар Пойгоҳи вагонҳои боркаши №1 бошад, дар ин давра 52 тафтиши кори нуқтаҳои таъмири техникӣ гузаронида шуда, аз он 16 тафтиши ногаҳонӣ, 23 – тафтиши нақшавӣ, 13 тафтиши вагонҳои мусофиркаш мебошад. Инчунин, 51 ҳолати осеббинии вагонҳо ба қайд гирифта шудааст, ки маблағи зарари расонидашуда, ҳамагӣ 24257 сомониро ташкил дод, маблағи зарари расонида ба хазинаи Пойгоҳи вагонҳои боркаши №1 супорида шудааст. Дар маҷмуъ, ба дигар сохторҳои минтақаи суғдии КВД «Роҳи оҳани Тоҷикистон», аз ҷумла Шабакаҳои барқии минтақаи Суғд, ПЧ, МВРЗ, ТЧ, ШЧ, ҳифзи меҳнат ва техникаи бехатарӣ як қатор дастовардҳои муҳими дигар ба чашм расид, ки баҳри баланд бардоштани сатҳи хизматрасонӣ ва саҳмгузорӣ дар рушди Ватани азизамон хидмати мондагор доранд.

Ба ҷои хулоса

Зимни суҳбат маълум гардид, ки аз тарафи роҳбарияти КВД «Роҳи оҳани Тоҷикистон» баҳри иҷрои супориши Ҳукумати ҷумҳурӣ барои зиёд кардани ҳаҷми боркашонию мусофирбарӣ ва ҷалб намудани шаҳрвандон барои содироти маҳсулоти хоҷагии қишлоқ тавассути роҳи оҳан бо тарзи мувофиқа бо роҳи оҳани дигар давлатҳо сабукиҳо дода шудаанд. Оид ба пешниҳоди он дар ҳамаи истгоҳҳои минтақа лавҳаи эълонҳо овехта, бо телевизиону рўзномаҳои маҳаллӣ рекламаҳо паҳн карда шудааст.

Такя ба гуфтаи болоии коллективи меҳнатии минтақаи суғдии КВД «Роҳи оҳани Тоҷикистон» баҳри ба иҷро расонидани дастуру супоришҳои роҳбарияти коргоҳ тамоми саъйи худро дареғ надошта, дар оянда кўшиш менамоянд, ки боз ҳам сатҳу сифати фаъолияташонро аз пештара беҳтару хубтар ба роҳ монанд. Бо дар назардошти баъзе аз нуқсону камбудиҳои ҷойдошта роҳбарият ва кулли коллективии меҳнатӣ ҳадафмандона бо азми оҳанин зина ба зина ва бо мададу ёрии ҳамдигар ба пеш мераванд. Дар ин ҷода ба онҳо барори кору роҳи сафед хоҳонем.

Шаҳноза ҲОМИДОВА,
Набиюллоҳ СУННАТӢ,
«Ҳақиқати Суғд»

Читать далее

Раҷаббой Аҳмадзода ба ғолибони озмуни вилоятии “Хомаи созанда-2017” 150 000 сомонӣ мукофотпулӣ супорид

Рӯзи 6 феврал пас аз нишасти матбуотии иҷрокунандаи вазифаи Раиси вилоят Раҷаббой Аҳмадзода дар маҷлисгоҳи Осоишгоҳи “Баҳористон” маросими супоридани ҷоизаҳо ба ғолибони озмуни вилоятии “Хомаи созанда-2017” баргузор шуд.

Тавре мудири шуъбаи иттилоотию таҳлилии дастгоҳи Раиси вилоят Музаффар Юнусов дар ҳузури хабарнигорон таъкид намуд,  Мақомоти  иҷроияи ҳокимияти давлатии вилоят бо воситаҳои ахбори омма ҳамкории хубу самаранок дошта, барои дастгирии моддию маънавии рӯзноманигорон тадбирҳои заруриро амалӣ менамояд.

Читать далее