10 January 2018

“Хуҷанд” ба бозиҳои плей-оффи Ҷоми КФО-2018 омодагӣ мебинад

Алҳол дастаи “Хуҷанд”-и шаҳри Хуҷанд ба мавсими нав ва бозиҳои плей-оффи Ҷоми КФО – 2018 дар Маркази таълимии шуъбаи Бонкии миллии Тоҷикистон дар шаҳри Гулистон омодагӣ мебинад.

Қаблан бозингарони тим дар варзишгоҳи “Спартак”-и маркази вилояти Суғд машқу тамрин мекарданд. Чуноне масъулини тими футболи “Хуҷанд” иттилоъ доданд, даста бо якчанд бозингаре, ки муҳлати қарордодашон хотима ёфтааст, хайру хуш намуд. Дарвозабон Рустам Ризоев, нимҳимоятгар Шоҳрух Раҷаматов ва ҳамлагар Давронҷон Тухтасунов аз ҷумлаи онҳоянд.

Ба даста бозингарони нав, аз қабили ҳимоятгар Фирдавс Чақалов аз бошгоҳи КВМА «Помир»-и Душанбе, нимҳимоятгар Фирўз Қараев аз тими «Регар-ТадАЗ»-и шаҳри Турсунзода, нимҳимоятгар Кароматулло Саидов аз дастаи «Барқчӣ»-и Ҳисор ва ҳамлагар Амирҷон Раҳимов аз тими “Эсхата”-и Хуҷанд даъват шудаанд, ки дар ҳамин ҳол дар машқҳои таълимиву тамрин ширкат доранд.

Бозии аввали “Хуҷанд” дар плей-оффи Ҷоми КФО-2018 бо ғолиби ҷуфти «Дордой»-и Қирғизистон ва «Аҳал»-и Туркманистон 13-уми феврал ё дар Бишкек ва ё дар Балканобод барпо ва бозии ҷавобӣ 20-уми феврал дар Варзишгоҳи “20-солагии Истиқлолияти Тоҷикистон”-и шаҳри Хуҷанд баргузор мешавад.

Рустам Хоҷаев, сармураббии дастаи “Хуҷанд” изҳор доштааст, ки мақсад доранд дар бозиҳои плей-оффи Ҷоми Конфедератсияи футболи Осиё маҳорати хуб нишон дода, мухлисонашонро шод гардонанд.

– Тамоми кўшишу ғайратамонро барои роҳ ёфтан ба марҳалаи гурўҳии Ҷоми КФО-2018 сафарбар мекунем, - зикр доштааст сармураббӣ.

Дар мавриди ба марҳалаи гурўҳии Ҷоми КФО-2018 роҳ ёфтан, «Хуҷанд» дар гурўҳи «D» бо дастаҳои қаҳрамони кишварҳои худ - «Истиқлол»-и Тоҷикистон, «Алтин Асир»-и Туркманистон ва «Олой»-и Қирғизистон қувва меозмояд.

Боиси тазаккур аст, ки тими “Хуҷанд” соли гузашта бо гирифтани ҷойи дуввум миёни дастаҳои лигаи олии мамлакат бо медали нуқра сарфароз шудааст. Инчунин “Хуҷанд” дар бозии ниҳоии Ҷоми Тоҷикистон-2017 тими “Истиқлол”-и шаҳри Душанберо бо ҳисоби 2:0 шикаст дода, сазовори Ҷоми Тоҷикистон гардидааст.

Хабарнигори
“Ҳақиқати Суғд”

Читать далее

Мулоқоти Пешвои миллат Эмомалӣ Раҳмон бо Сарвазири Ҷумҳурии Ӯзбекистон Абдулло Орипов

Имрӯз дар Бӯстонсарои ҳукуматӣ Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Сарвазири Ҷумҳурии Ӯзбекистон Абдулло Ориповро, ки бо сафари корӣ ба Тоҷикистон ташриф овардааст, ба ҳузур пазируфтанд.

Ҷонибҳо дар ҷараёни мулоқоти судманду созанда изҳори умедворӣ намуданд, ки ҷаласаҳои комиссияҳои байниҳукуматии Ҷумҳурии Тоҷикистон ва Ҷумҳурии Ӯзбекистон оид ба ҳамкории иқтисодию тиҷоратӣ ва оид ба масъалаҳои марзи давлатӣ дар пойтахти Тоҷикистон- шаҳри Душанбе дар сатҳи баланд баргузор шуда, натиҷаҳои кори онҳо омили муҳими таҳкимбахшандаи муносибатҳои дӯстонаю самимии ду ҳамсоядавлат мегарданд.

Читать далее

ҲАҚИҚАТИ СУҒД №2 (2018)

 
Читать далее

ҲАҚИҚАТИ СУҒД №1 (2018)

 
Читать далее

Таъсири номатлуби тағйирёбии иқлим

Гармшавии бесобиқаи глобалӣ

Обу ҳаво аз омилҳои муҳим буда, ба ҳаёти ҳамарӯзаи инсон таъсири худро мерасонанд. Одам вобаста ба обу ҳаво либос мепӯшад, тӯю маърака ё дигар чорабинӣ доир мекунад, ба меҳмонӣ меравад. Кишоварзон бошанд, вобаста ба сардиву гармии ҳаво, боришот ва яхкунии замин корҳои деҳқониро пеш мебаранд ва ба анҷом мерасонанд.

Таҳлилҳои солҳои охир нишон медиҳанд, ки ҳарорати миёнаи ҳаво дар фасли зимистон ба гармшавӣ майл дошта, он ҳамасола аз 1 то 1,5 дараҷа гарм шуда истодааст.

Мутахассисони соҳаи табиатшиносӣ сабаби асосии гармшавии умумиҷаҳонии иқлимро дар афзудани шумораи аҳолӣ, зиёд шудани партови газҳои фабрикаву заводҳо ба атмосфера аз партовҳои истеҳсолӣ, ифлос гардидани муҳити зист ва вайрон шудани хусусияти табиии хок медонанд.

Миқдори зиёди партови маишӣ ва истеҳсолот-заводу фабрикаҳо ба монанди газҳои СО2, NО2, формалдегидҳо ва дигар газҳо ба атмосфера пардаи азонии фазоро тунук мегардонанд. Дар натиҷа нури офтоб бисёртар ба замин омада мерасад. Зиёд шудани партовҳо ба замин таркиби хокро вайрон мекунад. Аз ҳамин ҳисоб қабати хоки кураи Замин наметавонад миқдори кофии газҳои дар таркиби хок бударо ба атмосфера хориҷ намояд. Ин падидаи гулӯпарникӣ мебошад.

Партовҳои аз ҳама ҷиддии истеҳсоливу маишӣ дар кишварҳои абарқудрат, ба монанди давлатҳои Аврупо ё Чин содир мегарданд. Тибқи барномаи «Иқлими сабз», ки аз ҷониби Созмони Милали Муттаҳид ҷонибдорӣ шудааст, ин гуна давлатҳо ба мамлакатҳои осеббин бояд ҷуброн диҳанд. Айни ҳол барнома мавриди амал қарор дошта, маблағҳои ба мамлакатҳои осебпазир пардохтшаванда ба рушди обёрии деҳот, таъмири ҷӯю каналҳо, селравҳо равона мегарданд.

Тадқиқоти олимон оид ба иқлим идома дорад. Хулосаҳое низ бароварда шудаанд, ки тағйирёбии иқлим ҷараён дорад: дар як нимкураи Замин хунукӣ ва дар нимкураи дигар гармӣ ба мушоҳида мерасанд. Баланд шудани ҳарорати ҳаво ба дигаргунии самти ҳаракати бодҳои (фронтҳои) атмосферӣ, ба иқлими субтропикӣ кам ворид шудан ва мутаносибан камии боришот дар минтақаи субтропикӣ боис гардидааст.

Мамлакати мо-Тоҷикистон ва кишварҳои дигари Осиёи Марказӣ дар минтақаи иқлими субтропикӣ буда, шиддатҳои атмосферие, ки ба ин самт меоянд, аз баҳр сарчашма мегиранд.

Дар ҷое, ки об бисёр аст, сар задани фронтҳои атмосферӣ зиёд мешаванд. Мамлакатҳои Амрико ва Аврупо ё дигар давлатҳои назди соҳили баҳр ё уқёнус ба ин мисол шуда метавонанд. Аз расонаҳои васоити ахбори омма маълум мегардад, ки айни вақт дар ин давлатҳо баландии барф аз 40 то 50 сантиметр ва 1 метр ҳам шудааст ва ё ҳар гуна тӯфон ба вуҷуд омада истодааст. Сабаби асосии боришоти зиёд ва тӯфонҳои баланд ҳамон бодҳои атмосферие мебошанд, ки аз баҳр ё уқёнус меоянд. Таҳлилҳо бозгӯянд, ки чунин ҳодисоти табиат ба тарафи минтақаҳои субтропикӣ наомадаанд.

Даврӣ будани ҳодисаҳои табиат

Ба гуфти директори Маркази обуҳавосанҷии вилояти Суғд Абдувалӣ Ҳомидов айни ҳол дар Тоҷикистон 54 стансияи метереологӣ мавҷуд буда, 14 адади он дар ҳудуди вилоят ҷойгир аст. Стансия метереологии шаҳри Хуҷанд аз соли 1824-ум ва Исфара аз соли 1870 то инҷониб фаъолият доранд. Дар вилоят баландтарин стансияи метереологӣ дар 3250 метр аз сатҳи баҳр дар ағбаи Анзоб ҷой гирифтааст.

Инчунин, ӯ қайд намуд, ки ҳодисаҳои табиат ба таври даврӣ такрор меёбанд. Масалан, стансияи метереологии шаҳр суръати шамоли сахти шаби 26-27 декабри соли 2017-ум шударо то 32 метр дар як сония ба қайд гирифтааст. Ҳамин гуна шамол дар шаҳри Хуҷанд соли 1993 ҷараён гирифта будааст. Чунин вазидани шамол дар ҳар 10-15 сол як маротиба такрор меёбад.

Ба таъкиди мутахассисон ҳарорати фасли зимистони соли 2014-ум шабеҳи зимистони соли 2017 будааст. Зимистони аз ҳама сардтарин, ки стансияи обуҳавосанҷии шаҳри Хуҷанд тӯли даҳ соли охир ба қайд гирифтааст, соли 2007-2008 буда, баландии барф дар шаҳри Хуҷанд 12-13 сантиметрро ташкил додааст. Инчунин дар давраи Шӯравӣ боридани барфи бисёр ва қабати барф аз 15 то 20 сантиметр ба қайд гирифта шудааст.

- Обуҳавосанҷон вазъи обу ҳаворо барои панҷ ва даҳ рӯз муайян менамоянд. Стансияҳои синоптикӣ ё марказҳои иттилооти аз стансияи метереологӣ гирифташударо дар харита ҷойгир намуда, пас аз коркард пешгӯии вазъи обу ҳаворо баён медоранд. Мутахассисон меъёри бисёрсолаи метереологиро муқаррар намуда, тибқи он боришотро дар ҳар фасл ё моҳ бо ченаки миллиметр муайян мекунанд. Айни ҳол бо сабаби тағйир ёфтани иқлим меъёри бисёрсола бо мушоҳидаҳои воқеӣ рост наомада истодааст. Кормандон муайян мекунанд, ки дар як метри мураббаъ чанд миллиметр борон мезанад ва аз рӯи он миқдори боришотро дар моҳ ё фасли сол аниқ менамоянд. То ҳол ба таври дақиқ гуфта намешавад, ки агар зимистон камбориш бошад, баҳору тобистон сербориш мешавад. Ё ин ки тобистон гармӣ бошад, зимистон ҳатман хунук меояд. Ин гуна хулосабарорӣ ғайриимкон аст. Бо вуҷуди он метавон гуфт, ки миқдори боришоте, ки дар атмосфера барои меъёри моҳона боқӣ мемонад, боз борон омаданаш мумкин аст, аммо маълум нест, ки дар кадом фасл ё моҳҳо, - изҳор дошт А.Ҳомидов.

Масоили ҷиддӣ дар оинаи илм

Тоҷикистон аз ҷиҳати захираҳои обӣ аз он ҷумла, пиряхҳо яке аз давлатҳои бойтарин маҳсуб меёбад.

Масъалаи обшавии пиряхҳо масоили мубрам буда, диққати олимону мутахассисон бояд беш аз пеш ба ин масъала ҷалб ва роҳҳои ҳалли он дарёфт карда шаванд.

Дар Паёми навбатии Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қайд гардид, ки аз 28000 пирях 1000 пирях нест гаштааст. Сабабҳои асосии ба нестӣ расидани пиряхҳо аввалан гармшавии умумиҷаҳонӣ бошад, дуввум, ифлос кардани атмосфера, севум камии боришоти барф ва сабаби чаҳорум кам шудани захираи обҳои зеризаминӣ аст.

Баланд шудани ҳарорати ҳаво-гармшавии умумиҷаҳонӣ ҳудуди обшавии пиряхҳоро зиёд гардонидааст. Ифлос шудани атмосфера сабаби обшавии пиряхҳо мебошад, чунки чангу ғубор сатҳи пиряхҳоро тира гардонида, ин тирагӣ миқдори зиёди нури офтобро фурӯ мебарад. Дар натиҷа обшавии пиряхҳо меафзояд.

Яке аз омилҳои муҳими дигар обшавии пиряхҳо кам гардидани захираи оби зеризаминӣ аст. Қисмати растанипӯши кураи Замин, боғҳову дарахтон захираи оби зеризаминиро нигоҳ медоранд. Дар ҳолате, ки оби зеризаминӣ кам мегардад, он барои пурра гардонидани ҳаҷми худ аз пиряхҳо об талаб мекунад. Яъне байни поёноб-обҳои зеризаминӣ ва болооб-пиряхҳо кашиш ба вуҷуд меоянд. Дар натиҷаи ин обшавии пиряхҳо фаро мерасанд.

Барои ҳамин мо бояд кӯшиш намоем, ки дар талу теппаҳо, даштрӯяҳо ва дигар мавзеъҳои бекорхобидаи замин ҳарчӣ бештар ниҳолу буттаҳои дарахтон ва зироатҳои гуногуни кишоварзӣ шинонида, онҳоро парваришу нигоҳубин намоем. Вақте ки ҳаҷми оби зеризаминӣ зиёдтар мешавад, пиряхҳо дар ҷойҳои худ қарор мегиранд.

Айни ҳол дар Тоҷикистон 149 дидбонгоҳи обсанҷӣ ва 2 маркази мониторинги ҳолати пиряхҳо мавҷуданд. Дар ояндаи наздик бо иқдоми Президенти кишвар муҳтарам Эмомалӣ Раҳмон дар назди Академияи илмҳои Ҷумҳурии Тоҷикистон Маркази пиряхшиносӣ таъсис дода мешавад, ки масъалаҳои дар ҳолати муайян нигоҳ доштани пиряхҳо, мониторинги онҳо, муайян намудани таркиби химиявии пирях, фарқияти намудҳои пирях ва дигар масоили марбут ба соҳаро аз ҷиҳати назариявӣ мавриди баррасӣ қарор хоҳад дод.

Ёдовар мешавем, ки Дабири кулли Созмони Миллали Муттаҳид Антониу Гутерриш ҳангоми тамошои кӯли зебои Сарез аз обшавии босуръати пиряхҳо мутаассир гардида, иброз дошт, ки барои дастгирии пешниҳодҳои Сарвари Тоҷикистон дар бораи истифодаи оқилонаи оби мусаффо, андешидани тадбирҳои муассир барои пешгирии таъсири номатлуби тағйирёбии иқлим бояд иқдомҳои зарурӣ роҳандозӣ шаванд.

Улуғбек ХУДОЙБЕРДИЕВ,
«Ҳақиқати Суғд»

Читать далее

Имтиёз ва ҳадафҳои умедбахш

Асосгузори сулҳу ваҳдати миллӣ-Пешвои миллат Президенти мамлакат муҳтарам Эмомалӣ Раҳмон дар Паёми навбатӣ хусусиятҳо, афзалиятҳо ва ҳадафҳои стратегию давлатии Ҷумҳурии Тоҷикистонро барои ҳамаи соҳаҳо баён намуда, вазорату идораҳо, мақомотҳои қудратӣ, аъзоёни Маҷлиси Миллӣ ва вакилони Маҷлиси намояндагон, аъзоёни Ҳукумат, кулли хизматчиёни давлатӣ, раисони вилоятҳо ва шаҳру ноҳияҳои кишвар, ҷавонону бонувон, аҳли зиё ва умуман хурду бузурги мамлакатро даъват намуданд, ки минбаъд низ саъю кӯшиши худро ҷиҳати ноил шудан ба ҳадафҳои олӣ, ҳифзи сулҳу оромӣ, суботи сиёсӣ ва Ваҳдати миллӣ дар кишвари азизамон сафарбар намоянд. Барои боз ҳам ободу зебо гардидани Ватани азизамон содиқона хизмат намуда, корҳои бунёдкориву созандагӣ, дигаргуниҳои иқтисодиву иҷтимоиро ба роҳ монда, соҳибкориву сармоягузориро такон бахшанд ва ҳарчӣ бештар ҷойҳои корӣ фароҳам оварда, самаранокии идоракунии давлатӣ таъмин карда шавад.

Дар ҷамъбасти суханронии худ, таъкид намуданд, ки «мардуми шарифи Тоҷикистон ҳуқуқи маънавии зиндагии шоистаро доранд». Ин гуфтаҳо шодиву сурурро дар дилҳо афзуда, мардуми шарифи Тоҷикистонро ба сӯи ояндаи ободу осуда бо қадамҳои устувор ҳидоят менамояд.

Аз Паёми Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бармеояд, ки соли 2018 - соли рушди муносибатҳои байналмилалӣ ва амалишавии сиёсати хориҷии Ҷумҳурии Тоҷикистон хоҳад гардид.

Пешвои миллат доир ба дастоварду камбудиҳои ҷойдошта ва вазифаҳо дар соли 2018 ҷиҳати ҳифз ва рушди сатҳи иҷтимоии мардуми кишвар, дар сатҳи устувор нигоҳ доштани нишондиҳандаҳои макроиқтисодии Тоҷикистон изҳори назар намуда, қайд карданд, ки суръати рушди иқтисодиёт ба 7 фоиз ва ҳаҷми маҳсулоти дохилӣ ба 60 миллиард сомонӣ баробар гардидааст. Дар се соли минбаъда ҳаҷми маҳсулоти дохилӣ зиёда аз 30 фоиз афзоиш ёфта, то ба 82 миллиард сомонӣ расонида мешавад. Ҳаҷми буҷети соли 2018 ба маблағи 21,3 миллиард сомонӣ ва назар ба соли 2017-ум 7,3 фоиз зиёд муайян гардидааст. Маҳсулоти дохилӣ ба ҳар нафар аҳолӣ нисбат ба соли гузашта 12 ва дар муқоиса 8 фоиз зиёд гардида, даромади пулии аҳолӣ 10 фоиз афзудааст. Рушди соҳаҳои хоҷагии халқ, аз ҷумла саноат 21,5 фоиз, кишоварзӣ 7,2, маблағгузорӣ ба сармояи асосӣ беш аз 6 дарсад, савдои чакана 6,6 фисад ва хизматрасонии пулакӣ 1,8 фоиз таъмин гардида, таваррум дар сатҳи 6,3 фоиз нигоҳ дошта шудааст. Дар ин раванд ҳаҷми содирот дар соли 2017 35,4 фоиз афзуда, воридот 10 фоиз кам шудааст, ки ин нишондиҳанда моро қонеъ гардонида наметавонад, зеро, ҳоло ҳам қисми зиёди маҳсулот бе коркарди ниҳоӣ содирот мешаванд.

Инчунин, вазъи буҷет, муносибатҳои пулию молӣ ва қарзии кишвар, ҳисоботи оморӣ, механизми ҷамъоварии маълумот, ноустувории сармоя ва низоми бонкӣ, сатҳи нокифояи қарздиҳӣ ва боз бисёр масъалаҳои дигар, ки дар рушди иқтисодиёти кишвар мавқеи созгору нақши калидиро бояд мебозанд, аз ҷониби Пешвои миллат таҳлили мушахас гардида, баҳри ислоҳи онҳо дастуру супоришҳои зарурӣ дода шуд.

Паёми навбатӣ Паёми хоса буд, зеро он паёми инсонгароӣ, сиҳатии омма, паёми устувор гардонидани амнияти милливу давлатӣ, сулҳу субот ва Ваҳдати миллӣ буда, маҳаки асосии онро мақоми инсон ташкил менамояд. Инчунин, он паёми имтиёзҳо, мусоидат ба фаъолияти соҳибкорӣ, рушди инфрасохтори сайёҳӣ, воридоти таҷҳизот ва масолеҳи сохтмон барои иншооти сайёҳӣ, рушди ҳунарҳои мардумӣ, рушди соҳаи тандурустӣ ҷиҳати воридоти технологияи навтарин барои корхонаҳои дорусозӣ ва таҷҳизоти ташхису табобат, рушди соҳаи маориф, фарҳанг ва рушди соҳаи паррандапарварӣ ва ба ин васила муҳайё кардани ҷойҳои кории нав мебошад.

Паёми навбатӣ мардуми шарифи Тоҷикистонро ба сӯи ояндаи ободу осуда бо қадамҳои устувор пеш хоҳад бурд. Ҳадафҳои стратегии ҳукумати Тоҷикистон, ки таъмини истиқлолияти энергетикӣ ва истифодаи самарабахши неруи барқ, раҳоӣ аз бунбасти коммуникатсионӣ ва ба кишвари транзитӣ табдил ёфтани Тоҷикистон, таъмини амнияти озуқаворӣ ва дастрасии аҳолӣ ба ғизои хушсифат ва ниҳоят вусъатдиҳии шуғли пурмаҳсулро фаро мегиранд, дар соли 2018 боқӣ мемонанд. Бояд қайд намуд, ки ин чор ҳадафи стратегӣ барои фарогирии 15 соли оянда пешбинӣ гардидааст. Зикр намудан бамаврид аст, ки дар Паёми навбатӣ ба ҳадафи чорум-вусъатдиҳии шуғли пурмаҳсул таваҷҷуҳи махсус дода шуд, зеро барои иҷрои ин ҳадаф тамоми ислоҳоти давлатӣ ва иқтисодӣ равона мегардад, то дар навбати аввал мардум ба ҷои кор ва шуғли пурмаҳсулу шоиста таъмин шаванд.

Аз Паёми навбатӣ Пешвои миллат, Президенти Ҷумҳурии Тоҷикистон ба Маҷлиси Олӣ кулли мардуми кишвар, кормандони соҳаҳои мухталифи хоҷагии халқ, бахусус омӯзгорону кормандони соҳаи тиб, ҳунармандони халқӣ умедҳои зиёде доранд ва бо боварии том метавон гуфт, ки Паёми Пешвои миллат чун ситораи қутбнамо Тоҷикистони маҳбуби моро ба сӯи ободӣ роҳнамо гардида, онро ба кишвари пешрафтаву мутараққӣ табдил хоҳад дод.

Маҳмадризо Шарифов,
 мутахассиси бахши Хадамоти
давлатии назорати назди
шуъбаи маорифи ноҳияи Мастчоҳ

Читать далее

Меҳвари фаъолият – волоияти қонун

Ҷаласаи васеи ҳайати мушовараи Прокуратураи вилоят баргузор гардид. Дар машварат фаъолияти мақомоти Прокуратураи вилояти Суғд дар соли 2017 мавриди таҳлилу баррасӣ қарор гирифт.

Прокурори генералии Ҷумҳурии Тоҷикистон генерал-полковники адлия Раҳмон Юсуф Аҳмадзод дар ҷаласаи ҷамъбастӣ ширкат намуд.

Доир ба фаъолияти мақомоти Прокуратураи вилоят дар соли 2017 прокурори вилояти Суғд мушовири давлатии адлия дараҷаи 3 Воҳидов ҳабибулло Сайдуллоевич баромади муфассал намуд. Дар заминаи он оид ба камбудиҳои ҷойдошта аз кормандони алоҳида пурсиш ба амал оварда, баҳри бартараф намудани онҳо супоришҳои мушаххас дода шуданд.

Аз баромади прокурори вилоят аён гардид, ки дар соли 2017 аз тарафи мақомоти прокуратураи вилоят ҳамагӣ 3529 (3671) муроҷиати шаҳрвандон ва намояндагони шахсони ҳуқуқӣ баррасӣ гардида, 654 (657) ё 18,5 фоизи онҳо қонеъ карда шудааст.

Вобаста ба онҳо 317 санади эътиноӣ бароварда, 75 (59) нафар ба ҷавобгарии интизомӣ, 5 (17) нафар ба ҷавобгарии моддӣ кашида, 213,3 ҳазор сомонӣ маблағҳои зарар руёнида шудааст.

Ҳамзамон, 227 (191) қарори мақомоти таҳқиқу тафтиш бекор карда, дар  5 (114) ҳолат парвандаҳои ҷиноятӣ оғоз гардидаанд.

Вазъи иҷрои қонунгузориҳо дар бораи замин, шаҳрсозию меъморӣ, муроҷиати шахсони воқеию ҳуқуқӣ, ҳимояи ҳуқуқи истеъмолкунандагон, ҳифзи саломатии аҳолӣ, андозу гумрук, маориф, обу барқ ва ғайраҳо санҷида, зиёда аз 15210 ҳолати қонунвайронкунӣ ошкор карда, баҳри бартараф сохтани онҳо ва баррасии ҷавобгарии шахсони гунаҳгор 2980 амр дода, 1903 эътироз оварда, 1605 пешниҳод бароварда, 6975 парвандаи ҳуқуқвайронкунии маъмурӣ ва 828 парвандаи ҷиноятӣ оғоз ва инчунин 141,3 миллион сомонӣ зарарҳои моддии расонида ба манфиати давлат, корхонаҳо ва шаҳрвандон барқарор гардиданд.

Ғайр аз ин, ба 197 қарори раисони шаҳру ноҳияҳо оид ба ҷудо намудани қитъаҳои замин эътирозҳои назоратӣ оварда, 2 ҳазору 92 гектар қитъаи замини дар истифодаи ғайриқонунӣ қарордошта, ба ҳолати аввала баргардонида шудаанд.

Ба судҳои граҷданӣ 93 аризаи даъвогӣ ба маблағи 4,7 миллион сомонӣ, ба Суди иқтисодии вилоят бошад, 51 аризаи даъвогӣ ба маблағи 47,1 миллион сомонӣ оварда, ҳамаи онҳо қонеъ гардонида шудаанд.

Прокурори генералии Ҷумҳурии Тоҷикистон Раҳмон Юсуф Аҳмадзод ба фаъолияти мақомоти Прокуратураи вилоят баҳои мусбат дод ва баробари  ин таваҷҷуҳи роҳбарият ва дигар кормандони фаврӣ ба ислоҳи камбудиҳои ҷойдошта нигаронида шуданд.

Прокурори генералӣ таъкид намуд, ки кормандони тамоми сатҳҳои ин мақомоти ҳомии қонун бояд нуктаҳои Паёми Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба Маҷлиси Олии Ҷумҳурии Тоҷикистон сармашқи фаъолияти касбӣ қарор дода, баҳри пурзӯр намудани назорати прокурорӣ ба иҷрои қонунгузории алохида оид ба сифати молу махсулот, ҳифзи сиҳатии мардум, маориф, туризм ва дигар самтҳо саъю талош варзанд.

Гулҷаҳон МАХКАМОВА

Читать далее